Tar Bayzlav makavay hidiy cike
2
Tizin tik, kata luwehin avə gədan: Mə tar Bayzlav, mə pəlu atalan hidiy cike wayza ɓəw mə luwen soko makavay hidiy cike. 2 Mana hin maa tar Bayzlav, mə taren a bayigi avə talan mbalgamiy cike wayza, kə jan yikwan kə ɗew avə zoy ɓəw avə nja maa tehte asəna acin am hovok ngə Bayzlav ɓəw avə ɗew malaw. 3 Kə taren Bayzlav a hidiy mana təgo səna law godokwən, ɗaw kə fet nəv ngə Bayzlav mə mbəl yikwan. 4 Ɗaw kə feten nəv, kadaban Bayzlav a may hidiy cike wayza kə səniy mindiwin ngə zləgam ngə Yesu, za kə mbəligi. 5 Zləgam nhi a hidiy cike wayza, kadaban Bayzlav sin a gendik palpal, hid ɗaha təm takan am walan Bayzlav avə hidigi. Hidi səna acin Yesu Kristu. 6 Sin a yah kə vəl micin ngetik kə pəsl hidiy cike wayza am mə ngavngav mə njə kə dah məc. Asəna acin, sin tu ɗefeyikwan kpekpe mandal Bayzlav mə may kə mbəl hidiy cike wayza. 7 Bayzlav tu vərəkak kə mə zlən zlən ngetik, kə ceɗ ləbar ngetik. Zəni ɗiyak kə hid mə ɗiyen jəgwan a hidiy səban tan maa par a Yahudigi, zləgam ngetik maa mindiwin kə jan taniy kə vəliy nəv ngatan a Bayzlav. Kat tə ceɗ mindiwin, kat tə ɗiy polkoy kwən.Ɗew ngə mawəligi avə wertigi
8 Za acin may ngaɗ wər, mawəliy mə tariy Bayzlav ko a ki, mə ɗewiy nəv kweɗek kweɗek za taniy kə kafiy ngəra ngatan kə tariy Bayzlav. Mə gər kə basiy nəv asənkwən kə kaɓariy ma kwən. 9 Wa səna, may ngaɗa wertiy təm mə gər kə kwəliy ləkwət ngə fal kwən. Taniy kə təmiy ləkwət taa dup kəsəm tan kaɗ kə dup weli. Mə gər kə səkəmiy təkəniy suloy tik maa tuwnha kə ɓulum talan tan avə sin kwən. Mə gər kə zeniy melenge asənkwən yakwaɗ asənkwən kə təm ləkwət suloy tik ma tuwnha kwən. 10 Amma taniy kə ɗefiy muzuroh ngatan malaw avə kəzəɗ ngatan malaw. Yaw mindiwin, wertiy taa luwta aa daɓenta talan a Bayzlav kə ɗiyta atəgo . 11 Mandal wertiy a zlimiy jəgwan am jik Bayzlav wər, mə zlimta avə njə maa tehte ɓəw avə daɓ talan. 12 Kat tə geɗen mozlokotuf a wertiy kə ɗiy jəgwan asənkwən kə kafiy talan atalan mawəl bəgwən. Mə ɗewiy tehte. 13 Kat tə luw atəgo , kadaban Bayzlav a ndən hid tizin tik, zlim tik Adamu zagway, za a dəwən səna sin ndən Hawwa. 14 Zəni Musuruf a lebeɗ Adamu kə ɗiy mə ngavngav bəgwən a lebeɗ werti. Amma wer a zlim ma ngə Bayzlav bəgwən. 15 Ko asəna, wertiy av kə mbuwiy wərigi, za Bayzlav av kə mbəlta, mana taniy tu musufiy hoy hoy am yək zləgam ngə Bayzlav, za mana taniy tu mayiy hidigi, za tu ɗewiy kə hidiy njə nəv maa kweɗek a kibik Bayzlav, za mə puwiy talan tan.