Talan mbalgam ngə Mgbəw ngə mə səbiy Yesu
3
Kata luwehin zləgam maa mindiwin, mana hid aa may kə mbaɗ kə talan mbalgam ngə Mgbəw ngə mə səbiy Yesu wər, hid səna mə may kə ɗiy kəzəɗ malaw za. 2 Yaw, kə mbaɗ kə talan mbalgam ngə Mgbəw ngə mə səbiy Yesu wər, say sin kə ɗew kə hid maa a zləgamiy mə ngavngav atalan tik ɗahkwən, say məmar wer takan. Hidi səna wər, hid mə puw talan tik mətak jov ma hayya. Sin a njə kə hezl təkən, mə njə kə ɗiy təkən avə mozlokotuf tik, mə njə kə yək mbulukiy ade ngetik, ma ɓəs kə ɗiy jəgwan a hidigi . 3 Hid səna wər mə gər kə ɗew kə hid mə vəl talan tik am movu kwən, za aa jar ma ɗahkwən, amma hid njə ɗew maa tehte, mətak kaɓarma, maa aa vəl nəv tik day am suloy ɗahkwən . 4 Say sin kə sən ngazl hidiy təde ngetik law law, kə jəgwanen a wəriy ngetik kə zlimenta ma avə daɓ talan. 5 Kat tə luw atəgo , kadaban mana hidi a ɓəs kə ngazl hidiy tə de ngetik bəgwən wər, av kə puw Mgbəw ngə mə səbiy Bayzlav aceki ? 6 Mə gər kə vrək hid ndawyan am yək ləbar ngə Bayzlav kə talan mbalgam kwən. Mə gər kə vrək hid mana nhi kwən, kə jan ta sin kə kaf talan tik, zəni kə jan Bayzlav kə zlen dalgway mana mə zlen a Musuruf kwən. 7 Say hid səna kə ɗew kə hid malaw kə jan hidiy mətak yəkiy ma ngə Bayzlav kə vəlenta mordoy təm. Asənkwən hidiy av kə jərəvta, za av kə ndəv am ɗəf ngə bay Musuruf.Hidiy mə njə kə məniy hidiy təm Mgbəw ngə mə səbiy Yesu
8 Hidiy mə məniy hidiy təm Mgbəw ngə mə səbiy Yesu wər, taniy təm kə ɗewiy kə hidiy malaw. Mə gər kə ɗewiy kə hidiy məplafas kwən, asənkwən kə hidiy mə hayhay kwən. Mə gər kə jariy suloy avə wirwir mə ngavngav kwən. 9 Say taniy kə yəkiy zləgam maa mindiwin Bayzlav mə ceɗenta avə nəv ngatan tik. 10 Mana hin maa may kə vərək hidiy mə məniy hidiy təm Mgbəw ngə mə səbiy Yesu wər, hin kə saf ɗew ngatan zagway. Mana hin tu lim ɗew ngatan law law, hin kə vrəkta acin.
11 Law law wər, wertiy mə məniy hidiy təm Mgbəw ngə mə səbiy Yesu təm mə ɗewiy kə wertiy mə ɗiyiy kəzəɗ maa tiɗtiɗe. Mə gər kə zəmiy madaba ngə hidiy kwən, mə ɗewiy kə wertiy mə puwiy talan tan law law, za mə njə kə ɗiyiy təkən hoyhoy a mozlokotuf tik.
12 Hidiy mə məniy hidiy təm Mgbəw ngə mə səbiy Yesu səna, ko hid ngayi məmar wer takan dap, za mə puw wəriy ngetik ɓəw hidiy təde ngetik law law. 13 Mana tu ɗiyiy kəzəɗ law law wər, hidiy av kə həmən ta. Za hidiy mə ɗiyiy kəzəɗ səna av kə ceɗiy zləgam ngə Yesu mətak hovok a hidigi, kadaban taniy mə vəliy nəv ngatan a Kristu.
Ləbar ngə Bayzlav mə pətah təm lay maa mgban.
14 Hoh kərti ɗa Timote, taa ɓən kə vay kə safoh a kibik awənhi. Tə ɗəɗefoh ɗerewel nhi, 15 kə jan ko tə jan kə vay njoɗ bəgwən, hoh kə sən ɗew adab hidiy ngə Bayzlav. Hidiy səna acin, Mgbəw ngə mə səbiy Bayzlay məmar micin. Mgbəw ngə mə səbiy Yesu səna a njə kə jəgwanen zləgam ngə Bayzlav a hidigi, ɓəw a njə kə puwiy mindiwin. 16 Yaw, mindiwin, ləbar səna mordoy. A ɗefiyikwan mana aceki yikwan tu kə ɗew a kibik Bayzlav. Ləbar ngə Bayzlav maa mindiwin mə ɓahɓah, tanjinhi Bayzlav tu pətah kaɗ am lay ma mgban. A ceɗiyikwan:
Kristu tu yah am talan mahayək, mbaɗ kə hidmamblen,
Mbiɗ ngə Bayzlav tu ɗefiyikwan sin hid mə ɗiy təkən a mozlokotuf tik.
Mbaslayiy ngə Bayzlav mə limta za,
hidiy tu cakwayiy zlim ngetik mgbaw talan mahayək cike wayza,
hidiy təm lay maa parpar vəliy nəv ngatan a sin.
Bayzlav ɓiy kaɗ kəv a dibizlav, tanjinhi mə ɗewekaɗ am lay njə gədan mordoy.