Hidiy mə ɗiyiy jəgwan avə ngawma
4
Mbiɗ ngə Bayzlav mə luw za mgban mgban: mandal talan mahayək mbeh kə way, hidiy məpərmay av kə geɗiy səb mozlokotuf ngə Yesu kaɗ. Av kə yəkiy ma ngə hidiy mə ngawiy ma. Av kə səbiy jəgwan ngə hidiy məmariy mbiɗ mə ngavngav. 2 Hidiy məplafas mə njə kə ngawiy ma acin mə njə kə ɗiyiy jəgwan ngə lekta. Hidiy səna bərngəzl talan ngatan mə ngava wayza wa maslaga mə kəɗaw kəɗaw. 3 A njə kə takiy hidiy kə dəm werti kwən. Za baha, a njə kə luwenta a hidigi bah zəm təkəniy məpərmay heziª. Zəɗər Bayzlav a ndən təkəniy səna a hidiy mə səbiy Kristu. A ndən a hidiy mə səniy mindiwin kə zəmta, za kə luwenta soko a Bayzlav makavay. 4 Anhi acin, təkəniy Bayzlav mə ndənta cike wayza law. Təkən yikwan tu kə fiy kaɗ ɗahkwən, say kə zəm dap, za kə luwen soko a Bayzlav makavay. 5 Mindiwin, təkəniy cike wayza law kə zəm, kadaban zləgam ngə Bayzlav ɓəw yikwan mə tar Bayzlav tə talan, təkəniy səna a ɗewiy kə hezi ɗaba.Hidi malaw mə ɗiy kəzəɗ ngə Kristu
6 Mana hoh tu ceɗ jəgwan ngaɗa nhi a golmocohigi wər, hav kə ɗew kə hidi malaw mə ɗiy kəzəɗ ngə Yesu Kristu. Mana hoh tu ceɗ jəgwan səna wər, hav kə gəl am səb kotuf ngə Bayzlav makavay zləgam ngetik yikwan mə yəku ɓəw jəgwan malaw hoh ta səb tik. 7 Mələmbra mə ngavngav ma a feten nəv a Bayzlav ɗahkwən wər, hoh gər kə zlim kwən. Am ɗew ngəkoh ɗər, hoh kə mbəlam hoyhoy kə va kibik kibik mana Bayzlav mə mayu. 8 Kə gwic kəsəm kə dah lay wəriɓ a njə kə mənen a hidi gwedek dap, amma ɗew mana Bayzlav mə mayu, zay tik ɗaha am təkəniy cike wayza, kadaban Bayzlav av kə vəl a yikwan micin am ɗew ngiykwan ma tanjinhi, za ɓəw a kibik av kə vəl a yikwan micin mətak way baha. 9 Zləgam kata mə luwe hin səna mindiwin. Law hidi kə yək tik a nəv takan. 10 Kadaban səna acin, yikwan ma ɗiy kəzəɗ ma jiriɓ, yikwan ma mbəlam tik, kadaban yikwan mawana bəbəc atalan Bayzlav məmar micin. Sin acin kwəl kə mbəl hidiy cike, zəni ma day wər a mbəl hidiy mə yəkiy Kristu. 11 A jəgwanen a hidigi mə səbiy Yesu təkəniy kata mə ɗəɗef səna cike wayza, za taniy kə səbta.
Timote kə ɗiy kəzəɗ za hidiy kə ɓiyiy ngar ngetik
12 Hidi mə gər kə jərəvoh kadaban hoh wəlen kərti gawla kwən! A ɗef ɗew ngəkoh malaw ɗər kə jan hidiy mə səbiy Kristu kə ɓiyiy ngar ngəkoh. Am zləgam ngəkoh, a ɗefenta avə zləgam malaw. A ɗefenta am va ngəkoh malaw, a ɗefenta avə may hoh ta may hidigi, am yək zləgam ngə Bayzlav ɓəw am ɗew ngəkoh mətak ɗiy mə ngav ngav. 13 Ma jangi Deftere ngə Bayzlav hoyhoy a kibik hidigi. Ma vəlenta gədan, ma ɗiyenta jəgwan zləgam ngə Bayzlav hos am mandal kata tu kə vay. 14 Hoh kə ɓən atalan təkəniy Mbiɗ ngə Bayzlav mə vəloh gədan ngə ɗiy tik. A vəloh am mandal mokotufiy ngə Bayzlav mə luwta atalan koh, ɓəw mandal talan mbalgamiy ngə Eklesiya mə ɗiyiy ngəra atalan koh. 15 Kəzəɗ səna acin hoh tu kə ɗiy tik, za ma ɗiy a nəv koh takan, kə jan hidiy kə limiy mana hoh ta va kibik kibik am kəzəɗiy səna. 16 Za, ma kaw talan koh am ɗew ngəkoh ɓəw am jəgwan hoh ta ɗiyu. Ma səb avə kə ɗiy tik hoyhoy. Mana hoh tu ɗiy atəgo , hav kə mbəl talan koh avə hidiy mə zlimiy ma koh təm.