Zləgam atalan ɗew ngə Timote avə hidiy mə səbiy Kristu
5
Mana mbusur hidi tu ɗiy təkən mə ngavngav wər, hoh gər kə zləgamen avə ndəl kwən. Law law hoh kə vəlen ngəz a zayya mana hoh ta luwen a babay koh. Ma zləgamen a wəriy gawliy təm mana hoh ta luwen a golmocohiy wəriy kərtawəl. 2 Hoh kə zləgamen a mbusur wertigi zayya wa a mamayiy koh, za hoh kə zləgamen zayya a saɓar wertigi wa a golmocohiy wərzigi. Hoh kə zləgamenta avə nəv ma kweɗek.3 A kaw matakwan wertiy mə cupcupigi ngər səsaray. 4 Zəni mana werti mə cupcup awana a wərigi asənkwən didigi wər, say taniy kə ɗefiy hovok ngə Bayzlav təm nəv ngatan avə kə kaw hidiy ngatan təm zagway. Taniy kə kawiy mamay tan avə dehen tan mana hidiy ngatan səna təm mə kawta amicek. Mana taniy tu ɗiyta atəgo , av kə feten nəv a Bayzlav. 5 Matakwan werti mə cupcup ma sin a gendik, hidi ngə mən tik ɗahkwən. Bəbəc ngetik atalan Bayzlav, sin ɗaw kə tar Bayzlav hoyhoy kə mənenni. 6 Amma a werti mə cupcup mə njə ɗiy gugoɓ wər, ko sin awana micin, mə mbaɗa mana hidi mə məc məc. 7 A jəgwanen a wertiy mə cupcupiy anhi, kə jan hidiy kə zləgamiy atalan kəzəɗiy ngatan mə ngavngav kwən. 8 Yaw, mana hidi a ɓəs kə kaw vənenhigi bəgwən wər, za kambay ɗər mana a kaw hidiy tə de ngetik bəgwən wər, nhi wər a vəlen nəv ngetik a Kristu. Sin mə ɗiy mə ngavngav za day kə hidi maa a yək zləgam ngə Yesu bugwən.
9 Hoh gər kə ɗəɗef zlim ngə matakwan werti mə cupcup am ɗerewel ngə zlim ngə matakwaniy wertiy mə cupcup kwən, say mana di ngetik tu hos di ngər kwəh. Zəni mana a dəm mawəl jəɓ takan dap. 10 Werti mə cupcupiy səna, say mana hidiy a həməniy kəzəɗ malaw matakwan werti mə cupcup səna mə ɗiyu, mana sin tu gəl wəriy tik law law, zəni mana sin tu yək mbulukigi a de ngetik. Say mana sin a goh ngaz ngə hidiy mə yəkiy zləgam ngə Bayzlav zaba, za sin tu mən hidiy təm takwan, ɓəw sin tu ɗiy kəzəɗiy malaw par par, za acin hoh kə ɗəɗef zlim ngetik.
11 A saɓar wertiy mə cupcupigi, hoh gər kə ɗəɗef zlim ngatan kwən, kadaban av kə mayiy mawəl baha, av kə geɗiy səb mozlokotuf ngə Kristu kaɗ. 12 Mana tu ɗiyta atəgo , dalgway av kə kaw ta, kadaban av kə ngaviy jawma ngatan mə luwta a kibik Kristu a dəmiy mawəl ɗaba. 13 Ko mana a dəmiy mawəl kwən, mana hoh tu ɗəɗef zlim ngatan, av kə ɗewiy kə məsəfay kə taliy hayya a de hidigi. Za ɗər ma, a ɗiyiy məsəfay a gendik kwən, av kə joviy ma godokwən. Av kə mbaɗiy kə mədəɓərsayigi. Av kə zlayiy talan am zləgam may may. 14 Kadaban səna acin, may ngaɗa wər saɓar wertiy mə cupcupigi mə dəmiy mawəl baha, mə mbuwiy wərigi, taniy kə kawiy hidiy tə de ngatan. Za acin, mosumiy ngiykwan a janiy mozlokotuf ngə zləgam mə ngavngav atalan yikwan ɗaba. 15 Kata tə luw atəgo , kadaban wertiy saɓariy mə cupcupiy məpərmay tu boniy mozlokotuf ngə Bayzlav, tu səbiy mozlokotuf ngə Sayɗanu bay musuruf. 16 Mana werti mə yək zləgam ngə Yesu awana avə matakwan werti mə cupcup a de tik, law sin kə mənenni. Sin mə gər kə geɗen kəzəɗ tik a Eklesiya kwən. Zəni Eklesiya təm kə mənen a matakwan wertiy mə cupcupiy ma cekcek a gendik.
Talan mbalgam ngə Eklesiya
17 Talan mbalgamiy ngə Eklesiya mə ɗiyiy kəzəɗ a mozlokotuf tik lawlaw kə janiy gəd mazlən ngatan jəɓ sarayª. Kambay hidiy ta ɗiyiy kəzəɗ ma tuwnha ngə ceɗ ləbar ngə Bayzlav ɓəw ngə jəgwanen zləgam ngə Bayzlav a hidigi, taniy kə janiy mazlən ngatan jəɓ saray. 18 Zləgam ngə Bayzlav a luw: ‹‹Mə gər kə təm məpla am ma ngə zla mə njə kə ɗiy kəzəɗ ngə kəzl ngirmiª kwən ››. Wa səna a luw bah: ‹‹Hidi mə ɗiy kəzəɗ tu hos gəga kə jan gəd mazlən ngetik ›› .
19 Mana hidi tu centa wəla atalan mbalgam am dalgway makavay təkən mə ngavngav, hoh gər kə cehen zlim kwən. Mana hav kə ceh zlim wər, say mana hidiy saray asənkwən hidiy makaɗ mə limta za, zəni hoh kə cehenta zlimi. 20 A talan mbalgamiy mə ɗiyiy mə ngavngav, say hoh kə ngəzta a kibik hidiy cike wayza, kə jan hidiy mə fəs tik kə hovokigi.
21 Kata puloh dayday Timote, a kibik Bayzlav ɓəw a kibik Yesu Kristu, za ɓəw a kibik mbaslayiy Bayzlav mə welta: A səb zləgam kata mə luwoh. Hoh gər kə wel hidi a wel kwən, za hoh gər kə saf hidi məpərmay day kə hidi sənan kwən. 22 Hoh gər kə vaz kə ɗiy ngəra atalan hidi kə ɗiy kəzəɗ ngə mən hidiy Eklesiya kwən, hoh kə hezl hidi səna zagway. Hoh gər kə təm talan koh am mə ngavngav ngə hidiy məpərmay kwən, a puw talan koh kə jan ɗew ngəkoh kə ɗiy kweɗek kweɗek.
23 Hoh gər kə sa yəm a gendik kwən, ma jeɓ movu gwedek kadaban liɓi ta hamoh am pic sənan, kə jan liɓi səna kə homoh ɗaba.
24 Mə ngav ngav ngə hidiy məpərmay awaniy mgban mgban, mə səna kaɗ, ko mana a zliy dalgway gesin bugwən, hidiy a limta. Amma ngə hidiy məpərmay mə ngavngav səna av kə ɗef a dəwən zla dalgway. 25 Wa səna ngə kəzəɗ malaw təm, av kə ɗef mgban mgban. Ko mana a pətiy angaw am lay ma mgban mgban bugwən, ɗa kə vahiy mə ɓahɓah kwən.