Ɗew ngə baalamigi avə hidiy məmarta
6
Hidiy baalamigi cike, say taniy kə daɓenta talan a hidiy məmarta, kə jan hidiy kə ɗewiy mətak zləgamiy mə ngavngav atalan zlim ngə Bayzlav ɓəw atalan jəgwan ngiykwan. 2 Baalamiy məpərmay ɗahigi, hidiy məmarta mə yəkiy zləgam ngə Yesu za. Asəna acin, taniy galmayigi avə hidiy məmarta am yək zləgam ngə Yesu. Zəni mana baalamiy səna a daɓenta talan ɗahkwən kadaban a luwta yikwan galmayigi, ɗah law atəgo kwən. Law law wər, baalamiy kə ɗiyiy kəzəɗ tan law law. Kə ɗiyiy kəzəɗ law law kadaban a məniy hidiy mə yəkiy zləgam ngə Bayzlav ma Bayzlav ta mayta.Nja ma cekcek
3 Mana hidi tu ɗiy a hin jəgwan məpərmay, zəni aa yək zləgam ma mindiwin ngə Məmar yikwan Yesu Kristu ɗahkwən, za ɓəw aa yək jəgwan yikwan ta ɗiyu atalan ɗew am mozlokotuf ngə Bayzlav ɗahkwən, 4 mana hidi səna tu ɗiy atəgo , asəna wər sin hidi mə kaf talan tik, maa a sən təkən ɗahkwən. Sin ɗaw kə kaɓarma am zləgam. Ɗaw kə dah ngərak, ɗaw kə dah gəɓəz, ɗaw kə dah ɗiy məcəcew a dab hidigi. Ɓəw ɗaw kə dah ngar ngə ɓənen mə ngavngav a hidigi. 5 Ɗaw kə dah gadaray ma away ɗahkwən a dab hidiy bərngəzl talan tan ma toy toy ɓəw a dab hidiy ma a ceɗiy mindiwin ɗahkwən. Ɓən ngatan mana tu səbiy mozlokotuf ngə Bayzlav wər, taniy av kə janiy suloy.
6 Mindiwin, mana hidi tu yək zləgam ngə Bayzlav wər, mə mbaɗa kə nja mordoy mana hidi səna a fet avə təkən sin məmaru. 7 Kata tə luw anhi kadaban, yikwan mə yah am talan mahayək ngəra maymay, zəni yikwan məv kə buw kin ngəra may may təm. 8 Za acin, mana yikwan mawana zəm avə ləkwət, gəga. 9 A hidiy mə mayiy kə jan arayiy dolom, av kə ndəviy am lebeɗ wa təkən huvigi ta ndəviy am ɗəf. A waniy avə tamah mə ngavngav. Təkəniy səna ɗaw kə ngaviy hidigi, za kə lekiy tan ɗəɗək. 10 Tamah ngə suloy ɗaw kə dah təkəniy mə ngavngav cike. Hidiy sənan boniy mozlokotuf ngə yək zləgam ngə Bayzlav, kadaban taniy tu mayiy suloy godokwən. Za tu janiy takwan am nəv ngatan makavay səna.
Pol a səb a kə ngəz Timote
11 Kata tə luwen a hoh Timote, hidi ngə Bayzlav, a siy koh gaf a təkəniy mə ngavngaviy nhi. A mbəlamu kə ɗew kə hidi malaw a kibik Bayzlav. Hoh kə ɗiy mana sin mə mayu, za hoh kə vəlen nəv koh a sin hoyhoy. Hoh kə may coloh law law, hoh kə ɓəs takwan am ɗew ngəkoh, za ma ɗewey koh law law avə hidiy məpərmay. 12 Say hoh kə səsac kə ɗiy jəgəm malaw am səb mozlokotuf ngə Bayzlav kə jan micin mətak way. Bayzlav a ɗefema makavay micin mətak way səna, za hoh mə zləgamaza mgban mgban a kibik hidiy dolom mana hoh mə yək zləgam ngə Bayzlav. 13 Kata tə luwoh a kibik Bayzlav mə njə kə vəlen micin a təkəniy cike wayza, ɓəw a kibik Yesu Kristu mə zləgam ma malaw mgban mgban a kibik bay Pontiyus Pilatu. 14 Hoh kə səb zləgam kata mə luwoh nhi, hoh gər kə ngav kaɗ kwən. Hoh gər kə ngav ɗew ngəkoh zəni hidiy kə zləgamiy atalan koh kwən hos am pic Məmar yikwan Yesu Kristu tu kə jəɓaha. 15 Av kə jəɓaha am pic Bayzlav mə mayu. Sin acin Bayzlav, awana avə gədan. Bayzlav wər, sin a gendik pal pal acin ta zəm bay atalan təkəniy cike, sin awan am zəzay. Sin bay ngə bayigi. Sin acin Məmar hidi a kibik məmariy hidiy cike wayza. 16 Sin a gendik acin mə ɗew a micin hoyhoy. Mə ɗewe kaɗ am lay ma cəcay. Lay a zləzlaɗ day day, hidi kwəl kə saf Bayzlav kwən. Hidi mə lim tik ɗahkwən, za hidi ngə ɓəs kə lim tik ɗahkwən təm. Hidiy cike mə səbaniy Bayzlav ɓəw mə vəlenta mordoy hoyhoy. Sin mə zəm bay tik atalan təkəniy cike hoyhoy. Amina.
Hidiy mə njənjigi
17 A luwen a hidiy mə njənjigi təm talan mahayək nhi, a luwenta mə gər kə kafiy talan tan kwən. A luwenta təm, mə gər kə vəliy nəv ngatan am aray kwən, kadaban aray a ɗew hoyhoy ɗahkwən. Geleɓe mə vəliy nəv ngatan a Bayzlav ɗər, mə njə kə vəli yikwan təkəniy cike a nəv takan, kə jan yikwan kə zəzay. 18 Ma ceɗenta mə ɗiyiy kəzəɗ malaw. Taniy kə ɗiyiy kəzəɗ malaw day godokwən. Say taniy kə vəlenta təkən a celeniy tan avə nəv takan, mə ɗewiy ngəra fongo. 19 Mana tu ɗiyta atəgo , a ɓahiy təkəniy tan am lay malaw ngə ɗew ngatan tə kibik, kə jan taniy kə janiy micin ma mindiwin.
Mbeli ngə way way tik
20 Hoh Timote, a kaw talan koh am kəzəɗ Bayzlav mə vəloh hoh, kə ɗiy tik law law. Hoh gər kə vəl talan koh am ngəway mə may may kwən. Hoh gər kə təm ma koh am jəgwan mə njə kə ɗefta sən nhi kwən, kadaban təgo wər sən malaw kwən. 21 Kata tə luw atəgo nhi, hidiy məpərmay ɗaw kə luwta awaniy avə jəgwan ngə sən səna, zəni lekiy mozlokotuf ngə Bayzlav kaɗ.
May ngaɗa Bayzlav mə saf marɓən ngəkin.