Pol aliɓde Malta
28
Yikwan maa hos kin lawlaw atalan maza za, hidiy ceɗiy yikwan zlim ngə lay maa mgbaw tavə yəm səna, a njə kə luwta Malta. 2 Hidiy təbəgo yəkiy yikwan ngər səsaray. Mbəliy kuhu, za luwiy yikwan kə sif tik. Kadaban van tu diw kə za, za cəcən a ɗiy dayday. 3 Pol gas cicilem zek am kuhu. Lay kuhu mə ɗiy kwak, aska kurslu awan am cicilem səna, pətah ngac Pol, za paɗen am ngəra . 4 Hidiy tə liɓde səna maa limiy wən am ngəra ngə Pol za, ɗiya zləgamiy am walan tan, luwta: ‹‹Ko aceki, gawal təgo a njə kə wəzl dəwah. Mə safu, sin a lere aa mə yəm za, zəni zugwa ngiykwan aa may kə geɗ sin kə ɗew a micin kwən.›› 5 Amma Pol kwecek wən aliɓ kuhu, za aa hamen ko gwedek ɗahkwən. 6 Hidiy səna a ɓənta wər ngəra ngə Pol av kə rəzl asənkwən av ndəv kə məc angaw. Taniy puw puwta nanha, zəni taniy safta təkən mə ɗiyen a Pol ɗahkwən. Taniy buwiy ɓən tan kaɗ acin, za ɗiya luwta: ‹‹Haya, nhi zugwa kwa!››7 Abər lay yikwan taa sif kuhu səna, tuz ngə talan mbalgam ngə liɓde Malta awan abəgo, zlim ngə gawal səna Pubiliyus. Mə ɗiya wan makaɗ, aa kaw yikwan lawlaw ade tik, wa yikwan ngwalayiy tik. 8 Bahbay ngə Pubiliyus səna mə wana kaɗ aa dal, a njə kə rə bəbah ɓiɓiz ɓiɓiz, za kəsəm tik kwak. Pol va kə saf tik, Pol bac ngəra atalan gawal səna taren Bayzlav. Za witen məc tə kəsəm tik kaɗ. 9 Za acin, hidiy mə daldaliy sənan tə liɓde səna yiy angər Pol, sin wit məc tə kəsəm tan way kaɗ. 10 Hidiy tu həməniy yikwan dayday. Mandal yikwan maa gar kəv kin, taniy tu vəliy yikwan təkəniy cike wayza yikwan mə may kə ɗəmbuluk.
Pol awan a Roma
11 Adəwən tra makaɗ yikwan mə ton tə Malta, yikwan va pət am pay ngə zlan maza mə yah taa Aleksandiriya za. Zlim ngə pay ngə zlan maza səna, mə njə kə luwta zugwa məwəli, a ton viya aliɓde Malta. 12 Yikwan hos aliɓde Sirakus, yikwan ɗiy wan makaɗ abəgo. 13 Aabəgo za, yikwan mə səb gozlum maza, za yikwan hos aliɓde Regiyon. Apat tik, mbiɗ mə njə kə yah a mə ngərzəm diw kə cah, za yikwan diw kəv kin, adəwən wan saray yikwan hos a Potiyoli. 14 Aliɓde səna, hidiy mə səbiy Yesu ɗahiy abəgo, luwiy yikwan kə ɗew a taniy zəm luma takan. Anhi acin mana yikwan mə hos a Roma. 15 Hidiy məpərmay mə səbiy Yesu tə liɓde Roma maa zlimta yikwan mə hosoh za, yiy gbamiy avə yikwan a luma Apiyus, za hidiy sənan a janiy yikwan am lay ta njə kə luwta Digi Makaɗ ngə Mbulukigi. Pol maa limta za, luwen soko a Bayzlav, za sin sok nəv tik kaɗ. 16 Adəwən yikwan maa hos a Roma za, a pekiy Pol a jik jaw bəgwən. Geɗenta mozlokotuf sin kə wan agendik avə soje takan ngə puw tik.
Pol ceɗ zləgam ngə Bayzlav a Roma
17 Adəwən wan makaɗ, Pol ɗefen a mogroy ngə yahudiy tə Roma kə yiy angər tik. Maa ɓasiy kaɗ za, sin ɗiya luwenta: ‹‹Galmayɗigi, kat tə ɗiy mə ngavngav a hidiy ngiykwan bəgwən, ko mə zugzugwa ngə didiy ngiykwan, tə ngav kaɗ bəgwən. Amma, hidiy kawakta a Ursalima, za vəlakta a hidiy Roma. 18 Romiy səna ɗiyakta neh atalan təkən kat mə ɗiyu. Za adəwən səna, taniy gər kə fəkakta kaɗ, kadaban taniy a janiy təkən kat mə ɗiy ma gəga ngə wəzlakta kaɗ ɓahbəgwən. 19 Amma mogroyiy yahudiy wər a ngəmta bəgwən, za mə mbaɗa kə takwəla a kata kə ɗefenma a bay Roma məmar hayək Roma cike. Za ɗər maa, tə may kə cenwəla a hidiy ngaɗa am dalgway ɓahbəgwən. 20 Kadaban səna acin, kat tə ɗefe hin ma yikwan kə mgbam həriya, za kə zləgam avə hin. Israyiliy a bəbəciy atalan təkən ngemi, hin ma sən wayza. Mindiwin, a jawakta avə selelen nhi makavay səna.››
21 Mogroy ngə yahudiy zlawenta, ɗiya luwta: ‹‹Yikwan mə jan ɗerewel mə yah taa Yahudiya za mə zləgam atalan koh bəgwən. Adab galmayiy ngiykwan təm, ko hid takan mə dah ləbar koh asənkwən mə zləgam mə ngavngav atalan koh ɗahkwən. 22 Amma may ngiykwan, hoh talan koh hoh kə ceɗe yikwan ɓən ngə koh. Kadaban yikwan mə sən za, kə lay kə lay hidiy ɗaw kə zləgamiy ma mə ngavngav atalan mgbəw ngə hidiy hoh ta ɗew tə dab tan.›› 23 Mogroy ngə yahudigi ɓəw Pol weliy pic ngə ɗiy ɓas. Wan səna maa hos za, taniy yiy kə safiy Pol ade tik. Pic səna acin, taniy ndas day kə tamicek. Dəga ngə gbum nha ngə sukoh, Pol a ceɗenta zləgam ngə Bayzlav, za a zləgamenta ma atalan bay ngə Bayzlav. Sin ɗiya jangi am Deftere ngə Musa ɓəw am Deftere ngə mokotufiy, kə jan taniy kə yəkiy zləgam atalan Yesu.
24 Hidiy sənan mə yəkiy zləgam səna za, amma hidiy məpərmay a yəkta ɓahbəgwən. 25 Mandal taniy taa vitan, a zleriy ma am walan tan bəgwən. Pol luwenta dap: ‹‹Zləgam Mbiɗ ngə Bayzlav mə zləgamen a didiy kin aa ma ngə mokotuf Bayzlav zlim tik Esaya mindiwin, 26 sin a luw:
‹Av angər zəgudu təgo, za ma luwenta:
Hin maa teh zlimi lawlaw,
amma hin maa zlim ɓahɗakwən.
Hin maa saf, amma hin maa lim lay ɗahkwən .
27 Mindiwin, nəv ngə hidiy nhi toytoy.
Taniy mə nekiy zlimiy ngatan kaɗ,
a mbaliy kə zlimiy avə sin kwən,
taniy mə pekiy həriya ngatan kaɗ.
A mbaliy kə safiy avə sin kwən,
a mbaliy kə səniy təkən avə nəv ngatan kwən.
A ngəmiy kə buwiy angər ɗa,
za kə jan kat kə lerta a mə ngavngav za kwən.›››
28 Pol ɗiya luw baha: ‹‹Mə sən təkən takan, Bayzlav a zlənah ləbar malaw ngə mbəl hid a hidiy maa səban tan par a yahudigi. Taniy wər, av kə zlimta!›› [ 29 Adəwən zləgam səna, yahudiy viy tan, a ngiwayiy dayday.]