Aa tepiy Pol a Roma
27
Bay Festus avə hidiy tik zləniy yikwan a pay mordoy ngə zlan maza am hayək Italiya. Taniy vəliy Pol ɓəw hidiy sənan təm jik jaw am ngəra ngə soje roma zlim tik Yuliyus. Sin mordoy ngə sojiy ngə bələk tə dab mgbəw ngə sojiy ta njə kə luwta: ‹‹Sojiy ngə bay məmar hayək roma cike wayza.›› 2 Yikwan pət am pay ngə zlan maza mə yah taa liɓde Adaramitenus za, pay ngə zlan maza səna av kə gar am lay gar təm hayək Asiya. Za yikwan vəkin acin. Aristarkus njə Makedoniya tə liɓde Tesalonik awana avə yikwan. 3 Apat tik, yikwan hos aliɓde Sidon. Yuliyus ɗaw kə ɗiyen malaw a Pol, geɗen mozlokotuf kəv kə ɗen mbeli a ngwalayiy tik, za sin kə jan mən angər tan. 4 Adəwən səna, yikwan diw kəv kin, amma mbiɗ a cah dəzdəz a yikwan, za acin yikwan hor kin aa gozlum liɓde kiprus maa mgbaw avə yəm. 5 Za acin yikwan zlan maza tə bər hayək Silikiya ɓəw maza Pamfiliya za yikwan hos aliɓde Mira təm hayək Lisiya. 6 Abəgo, mordoy ngə sojiy ngə bələk tafnan jan pay mordoy ngə zlan maza a yah aa liɓde Aleksandəriya za kəv a Italiya. Sin luw yikwan kə pət akimin, za yikwan pət.7 Wan ndas, yikwan maa va gwedek gwedek, yikwan mə hos pəcəpəcə aliɓde Kinidus, zəni mbiɗ aa tak yikwan kə yah dəwən. Za acin, yikwan ton kin aa mə lay maa mgbaw tavə yəm ta njə kə luwta Salmoni, yikwan hor kəv kin aa gozlum liɓde Kereta maa mgbaw tavə yəm. 8 Yikwan mə ton atalan maza avə takwan, yikwan hos, pəcəpəcə, am lay ta njə luwta Lay Malaw ngə gar pay ngə zlan maza, lay səna mbehmbeh avə liɓde Laseya.
9 Zəni yikwan tu vah abəgo, tuwah kə ɗəmbuluk kəv akibik, kadaban wan ngə ɗiy dalyam ngə yahudiy tu tonª. Pol aa may kə ceɗenta ɓən ngetik a hidigi, 10 za Pol ɗiya luwenta: ‹‹Haya gawliɗa, kat saf ɗəmbuluk ngiykwan nhi av kə zlənah yikwan takwan. Pay ngə zlan maza, lap a təkəniy ngə ber tə kimin av kə ngavigi, za mana hid a gar lawlaw bəgwən maa micin ngiykwan av kə lek.›› 11 Amma mordoy ngə sojiy ngə bələk a zlim ma ngə Pol ɓahbəgwən, sin a ɓəɓəl ɗər atalan zləgam ngə hid mə kwar pay ngə zlan maza ɓəw atalan hid məmar pay səna. 12 Za acin, ɗah law kə ɗew am lay ngə gar pay ngə zlan maza nhi a viya kwən. Makavay səna acin, hidiy dagaytik tə liɓ pay ngə zlan maza aa may kə viy tan aabəgo za. May ngatan, taniy kə hosiy am lay ngə gar pay zlan maza tə liɓde Fenikis, lay maa mgbaw avə yəm tə Kereta. Lay gar ngə pay ngə zlan maza səna a wan dəzdəz aa mə lay pic taa ndəv. Hidiy a gər kə toniy viya abəgo.
Mbiɗ aa cah a gədan a maza
13 Mbiɗ yah aa mə ngərzəm ngə lay səna za, aa cah gwedek gwedek, hidiy mə kwariy pay ngə zlan maza acagandan ɓən ngatan nhi wər av kə ɗiy. A masa maa ɓilik taa njə kə taniy pay ngə zlan maza pəɗta kaɗ, ɗiya viy tan akibik, a səbiy aa gozlum maza maa mgbaw Kereta. 14 Amma adəwən səna gwedek, mbiɗ taa njə kə luwta Erakilonª nap cah a gədan, mbiɗ səna a yah aa wurum Kereta za. 15 Mbiɗ səna aa takah pay ngə zlan maza kə yah adəwən. Yikwan saf yikwan kwəl kə va dəzdəz a mbiɗ səna kwən. Yikwan geɗ mbiɗ kə goɗiy yikwan dap. 16 Yikwan ton aa bər liɓde mendez maa mgbaw avə yəm, ta njə luwta Kawda. Anhi acin, yikwan ler pay mendezª ngə zlan maza kə təm am pay mordoy ngə zlan maza pəcəpəcə. 17 Hidiy mə ɗiyiy kəzəɗ am pay mordoy səna wətiy pay mendez ngə zlan maza, fəkta aliɓ pay mordoy, za acin ɓiyiy mbiseh tərlak tərlakta am pay mordoy ngə zlan maza kə jan kə vəlen gədan. A hovokiy taa pay ngə zlan maza kə ndəzl am midil vəgaɗ ta gozlum hayək Libiya. Za acin, taniy fəkiy təkən mə jawjaw təm pay ngə zlan maza aliɓ yəm kə jan pay səna kə va zayya, za geɗiy mbiɗ kə goɗ pay ngə zlan maza nguray tik. 18 Apat tik, mbiɗ a cay tik dap a gədan. Hidiy mə ɗiyiy kəzəɗ am pay mordoy səna diw kə cikiy təkəniy ngə ber təm pay ngə zlan maza aliɓ yəm. 19 Za azlapat tik, taniy atalan tan cik cikiy təkəniy sənan təm pay ngə zlan maza kaɗ am yəm. 20 Tu ɗiy wan ndas, yikwan mə lim pic asənkwən cuzlerekiy ɓahbəgwən. Mbiɗ a cay tik a gədan dap. Yikwan mə ɓən wər yikwan mə mbəl ɗaba.
21 Wan ndas, yikwan mə dezl təkən ngə zəm ɓahbəgwən. Pol gar akibik hidiy cike wayza, za ɗiya luw: ‹‹Gawla, mana hin mə zlimek ma zaba, yikwan mə garah aa Kereta za kwən. Yikwan məv kə ler am mbiɗ, za təkəniy ngiykwan ngə ber a lekiy kwən. 22 Amma tanjinhi, kata luwehin, mə sok nəv! Ko hid takan tə dab yikwan ngə məc ɗahkwən, səna pay ngə zlan maza acin məv kə ngav dap. 23 Ngə vuɗu nhi, Bayzlav məmar kata, zəni kat ta ɗiyen kəzəɗ zlənah mbaslay ngetik angər ɗa. 24 Sin luwakku: ‹Pol, hoh hovok kwən! Say hoh kə va akibik bay məmar hayək roma cike, za sin kə zla dalgway koh. Za Bayzlav ɗiy malaw ngetik atalan koh, makavay səna, geɗ micin ngə hidiy cike mə ɗiy mbuluk tavə hoh.› 25 Gawligi, mə sok nəv kaɗ acin! Kata awana bəbəc atalan Bayzlav. Mindiwin, təkən Bayzlav mə luwakku av kə hosohoh. 26 Amma mbiɗ av kə goɗiy yikwan hos aliɓde məpərmay maa mgbaw tavə yəm, yikwan məv kə ndəzl abəgo.››
27 Am wan mə gəɓ atalan foɗ tik, mbiɗ aa goɗ yikwan dap. A tep yikwan a maza mordoy ta njə kə luwta Adiriya. Ngə dabdaba vuɗu, hidiy mə kwariy pay ngə zlan maza a ɓənta yikwan mbeh kə jan talan maza. 28 Taniy a masa maa ɓilik mə jawjaw ta mbiseh ngə sla təkən təm pay ngə zlan maza fəkta aliɓ yəm kə sla kpəm tik, taniy safta kpəm tik mə ɗiya metir 37. Taniy viy gwedek akibik, fəkta baha, safta kpəm tik mə ɗiya metir 28. 29 Taniy nap hovokiy taa pay ngə zlan maza kə gbizl am gugwənigi. Kadaban səna acin, taniy fəkiy masiy foɗ maa ɓilik ngə gar pay ngə zlan maza aa dəwən kə jan pay səna kə gar. Za a puwta kwet lay kə dan. 30 Hidiy mə kwariy pay ngə zlan maza surohiy pay mendez ngə zlan maza kaɗ atalan yəm, za ɗiya luwta: ‹‹Yikwan məv kə va a pay mendez ngə zlan maza kə fəka masa maa ɓilik ngə gar pay ngə zlan maza aakibik. ‹‹Aska mindiwin kwən, taniy a gər kə siy tan. 31 Pol luwen a mordoy ngə sojigi ɓəw a sojigi: ‹‹Mana hidiy mə kwariy pay ngə zlan maza ɗahiy aliɓ pay ngə zlan maza kwən, hin mə mbəl kwən.›› 32 Za acin sojiy zliy mbiseh mə jawjaw təm pay mendez ngə zlan maza kaɗ, geɗta yəm kə tep tik.
33 Mandal taniy aa puwiy lay kə dan, Pol luwen a hidiy cike wayza kə zəmiy təkən. Sin ɗiya luwenta: ‹‹Mə ɗiya wan gəɓ atalan foɗ apicah hin maa puw təkən tu kə ton, za hin mə dezl təkən ngə zəm ɓahbəgwən. 34 Taa luwehin tanjinhi, mə zəm təkən, hin məv kə jan gədan kə mbəl micin kin. Mə zlimu, ko suson talan kin takan a lek kwən!›› 35 Adəwən zləgam səna, Pol wət bret, luwen soko a Bayzlav akibik hidiy cike, mban kaɗ, za sin ɗiya ham tik. 36 Hidiy cike sokiy nəv tan kaɗ acin, nap zəmiy təkən təm. 37 Yikwan cike wayza tə liɓ pay ngə zlan maza səna, mə ɗiya blək saray angər cisaray avə kwəh (276). 38 Adəwən hidiy maa zəmi pas za, hidiy a təkən ngə zəm maa ceh ngrim hiziɗ cikta kaɗ am yəm, kə jan kə ɗiyen keferkefer a pay ngə zlan maza.
Pay ngə zlan maza tu nder
39 Lay maa dan za, hidiy mə kwariy pay ngə zlan maza limiy lay mbaɗ gaf, a səniy lay səna ɗahkwən. Lay səna, taniy a safta kə lay malaw ngə gar pay ngə zlan maza. May ngatan mana a jan za, taniy kə kwariy pay ngə zlan maza kula abəgo . 40 Kadaban səna acin, taniy pəsliy masiy maa ɓilik mə jawjawiy təm pay ngə zlan maza kaɗ, za geɗta am yəm. Pəsliy mbəseh mə jawjaw təm təkən ngə kwar pay ngə zlan maza kaɗ, za a mbusur ləkwət jawta akibik ngə pay ngə zlan maza səna. Kə jan mbiɗ kə tepta kəv a gozlum maza. 41 Amma gwedek taniy hosiy am lay vəgaɗ, pay ngə zlan maza, sirif, pət tik aliɓ vəgaɗ. Məzuroh tik mə ndrife kaɗ am vəgaɗ, za a kəz ɗahɗaba, zəni madaba tik təm yəm mə kəz ta gədan tu nder kaɗ.
42 Sojiy gər kə wəzliy hidiy ngə jik jaw kaɗ, kə jan taa kə ɗiyiy bavbav kə leritan. 43 Amma mordoy ngə sojiy ngə bələk ngə Roma a gər kə ler micin ngə Pol, za sin tak sojiy kə wəzliy hidiy tə jik jaw kwən. Sin luwen a hidiy mə səniy bavbav kə mbiriy məpəlpəla am yəm, za kə viy aa gozlum maza. 44 Hidiy sənan wər kə kawiy mə fəs pay ngə zlan maza mə nganga maa parpar za kə səbiy hidiy mə ciy kibik səna. Anhi acin, hidiy cike wayza hosiy a gozlum maza lawlaw, hid mə məc ɗahkwən.