Pol mbəzl ma atalan tik akibik Agaripa
26
Bay Agaripa ɗiya luwen a pol anhi: ‹‹Hoh awana avə zləgam ngə mbəzl ma atalan koh.›› Pol kaf ngəra za nap zləgam kə mbəzl ma atalan tik, sin ɗiya luw: 2 ‹‹Aw bay Agaripa, apicah kata awana zəzay kə mbəzl ma atalan ɗa akibik koh. Təv kə mbəzl ma makavay təkəniy cike wayza hidiy ngaɗa yahudiy mə luwta atalan ɗa, kə cakta wəla am dalgway. 3 Hoh avə talan koh, hoh sən mə jawjaw ɓəw zləgam yahudiy taa zləgamta lawlaw, kadaban səna acin, kata pəloh, a musuf a tehek zlimi.4 ‹‹Yahudiy cike wayza aa səniy ɗew ngaɗa lawlaw dəga kata wəlen kərti. A səniy ɗew ngaɗa tə dab hidiy ngiykwan ɓəw a Ursalima lawlaw dəga am diw tik. 5 Kata awan adab farisiy mə njə kə kawiy mə jawjaw ngə yahudiy lawlaw day hidiy sənan. Taniy a sənakta wayza dəga amicek. Mana aa mayta, taniy kwəl kə luwta təkən kat mə luw nhi mindiwin. 6 Tanjinhi, hidiy a cakta wəla am dalgway nhi, lay kat taa bəbəc atalan təkən Bayzlav mə luw av kə ɗiyen aa didiy ngiykwan. 7 Səbaniy ngə hidiy ngiykwan maa gəɓ atalan saray aa bəbəciy təm atalan təkən Bayzlav mə luw av kə ɗiyenta, za taniy a njə kə ɗiyiy kəzəɗ ngə Bayzlav vuɗu avə pic a nəpiy ɗahkwən. Aw bay Agaripa, kat təm kata bəbəc atalan təkən səna. Makavay səna acin, galmayiyɗiy yahudiy cakta wəla. 8 Hin yahudigi, hin maa may kə yək Bayzlav av kə mbəlah hidiy aa mə məc za kwən wər kemi?
9 ‹‹Kat atalan ɗa, kat mə təl za a jəgəm kə ngav zlim ngə Yesu njə Nasaratu avə wirwir parpar. 10 Təkən səna acin kat mə ɗiyu a Ursalima. Kat tu pek hidiy dolom mə njə kə səbiy Yesu am jik jaw. Kəzəɗ səna, bayiy ngə masayiy acin mə geɗekta mozlokotuf kə ɗiy tik. Za mandal tu zlenta dalgway a hidiy kə wəzlta kaɗ, kat tə njə kə ngəm. 11 Kat tə njə kə pət a jik jəgwan ngə yahudiy cike wayza. Tə njə kə zlənenta takwan a hidiy mə səbiy Yesu, kə takenta wəla taniy kə geɗiy vəl nəv a Yesu kaɗ. Nəv ngaɗa tu nus day godokwən a tanigi. Kat tu gbezlerentəma kula aliɓde məpərmay təm hayək yahudiy kwən.››
Pol ceɗ mana Məmar hidi mə ɗefenma
12 Pol ɗiya luw baha: ‹‹Pic takan kata va a Damas. Bayiy ngə masayiy zlənakta abəgo avə ɗerewel am ngəra ngə vəlak mozlokotuf kə kaw hidiy mə səbiy Yesu. 13 Aw bay Agaripa, mandal kata awan a mozlokotuf, ngə dabdab pic, kata lim zləzlaɗ yah a dibizlav za, zləzlaɗ kəkay kəkay day ngə pic, za tu zləzlaɗ mgbaw lay kat mə ɗew təbəgo ɓəw mgbaw hidiy mə ngazlakta. 14 Yikwan, sənaf, ndəv cike wayza a kayək, za kat zlim wəla a luwakku avə ma ngə Ibranin: ‹Sol, Sol, hoh gbezlerekma kemi? Hoh ɓən wa hoh zlənen takwan a kata, aska ɗər hoh zlənen atalan koh.› 15 Kat ɗiya neh tik, kat luwenni: ‹Məmar hidi, hoh hid ngayi?› Məmar hid zlawakku, ɗiya luw: ‹Kata acin Yesu hid hoh ta gbezlerenma səna. 16 Tanjinhi, a sliɗ a gar a gar! Anhi təkən kat mə ɗefen talan ɗa a hoh makavay səna: Kat tə weloh kə mbaɗ kə hid mə ɗiy kəzəɗ ngaɗa. Hov kə ɗew kə məsəber ngaɗa kə ceɗen a hidiy mana hoh mə limek tapicah. Za hov kə ceɗenta təkən kat tu kə ɗefeh tə kibik nhi təm. 17 Kat təv kə zlənoh adab hidiy kat mə lereh taa ngər tan za, hidiy koh yahudigi ɓəw hidiy maa səban tan par a yahudigi. 18 Kat tə zlənoh kə zlərenta həriya kaɗ, za hov kə ngazlata aa mə lay maa zigwit za, kə dahta am zləzlaɗ. Hov kə ngazlata aa mə nəv ngəra ngə Bay Musuruf za, kə tepta angər Bayzlav. Mana taniy tu vəliy nəv ngatan a kata, av kə janiy geɗ mə ngavngav ngatan, za av kə ɗewiy adab hidiy Bayzlav məmarta.›››
Pol ceɗ kəzəɗ sin mə ɗiyu a Damas
19 Pol ɗiya luw baha: ‹‹Aw bay Agaripa, dəga am mandal səna, tə ɓon kə ɗiy təkən mə yah taa ngər Bayzlav za kat mə lim nhi bəgwən. 20 Zəni kat ceɗen a hidiy tə Damas zagway, za acin a hidiy tə Ursalima, ɓəw a hidiy cike wayza təm hayək yahudiya lap a hidiy maa səban tan par a Yahudigi. Kat tə luwenta anhi: ‹Mə buw ngar kin kaɗ, za mə jəɓah angər Bayzlav. Mə ɗiy kəzəɗ malaw kə jan hin kə ɗefen a hidigi, hin mə buw ngar kin kaɗ.›
21 Yahudiy kawakta a jik Bayzlav, za gər kə wəzlakta kaɗ makavay səna. 22 Amma kula apicah, Bayzlav tu puwakku, taa səb a ceɗ zləgam ngetik akibik hidiy mogroy ɓəw a hidiy mə gəcgəc. Mokotufiy ngə Bayzlav ɓəw Musa tu zləgamiy atalan təkən məv kə hosoh səna, kat tə zləgam ma par atalan ɓahbəgwən. 23 Ma kat mə luw tik wər, Kristu mə zlən takwan za, sin acin mə pətah məpəlpəla aa mə məc za. Za sin av kə ɗefen zləzlaɗ a yahudigi ɓəw a hidiy maa səban tan par a yahudigi.››
Pol luwen a Agaripa kə vəl nəv ngetik a Yesu
24 Mandal Pol aa mbəzl ma atalan tik səna, Festus cəwəla dayday ɗiya luwen a Pol: ‹‹Pol, hoh wək! Sən ngəkoh day, mbaɗ hoh kə hid mə wəkwək!›› 25 Pol zlawenni, ɗiya luw: ‹‹Aw bay Festus, kat tə wək kwən! Ma kat taa ceɗe nhi, ma maa mindiwin za aa zlim. 26 Bay aa talan tik mə zlim za, kadaban səna kat tə hovok kə zləgam akibik tik kwən. Mindiwin, kat mə sən za, bay aa sən təkəniy nhi kweɗek kweɗek, kadaban təkəniy səna a ɗiy avə ɓah kwən. 27 Aw bay Agaripa, hoh mə yək zləgam ngə mokotufiy ngə Bayzlav za am nəv koh vu? Kata sənu, hoh mə yək za.›› 28 Agaripa zlawen a Pol, ɗiya luw: ‹‹Cakaɗ gwedek, hoh gər kə lebeɗek kə mbaɗ kə hid ngə Kristu!›› 29 Pol luwenni: ‹‹Ya may ngaɗa wər, ko mbehmbeh nhi, ko akibik, Bayzlav kə mənehin, hoh avə hidiy taa zlimiy zləgam ngaɗa tapicah, hin kə mbaɗ kə mə səbiy Yesu mana kata, amma hidiy mə gər kə jawiy hin a selelen mana kat kwən!››
30 Adəwən səna, Agripa bay mordoy, bay Festus, Bernike ɓəw hidiy mə ɗewiy a taniy gariy tan. 31 Mandal taniy taa pətiy tan, ɗiya zləgamiy am walan tan, ɗiya luwta: ‹‹Gawal nhi, a ɗiy təkən maa gəga ngə wəzl kaɗ asənkwən ngə pek kaɗ am jik jaw bəgwən.›› 32 Agaripa bay mordoy luwen a Festus: ‹‹Lay gawal nhi mə may bay məmar hayək roma cike kə zla dalgway ngetik kwən, mbək yikwan məv kə fək kaɗ.››