Pol awan akibik Festus bay mordoy
25
Maa vərəkiy Festus am bay za, wan makaɗ adəwən səna, sin gar aa Kaysariya za kəv a Ursalima. 2 Abəgo, mogroy ngə masayigi ɓəw talan mbalgamiy ngə yahudigi, yiy angər tik kə centa wəla a Pol. Taniy ɗiya pəlta, 3 luwenta: ‹‹Aw bay, yikwan maa pəloh, a saf marɓen ngiykwan, a zlənah Pol a Ursalima.›› A luwta atəgo nhi, kadaban yahudiy sənan a gər kə ɗəfiy Pol kə wəzlta kaɗ a mozlokotuf. 4 Amma Festus zlawenta, ɗiya luw: ‹‹Pol awan am jik jaw a Kaysariya, kata atalan ɗa, təv kə buw ɗa akibik nhi. 5 Bayiy kin mə səbakta a Kaysariya. Mana gawal səna mə ɗiy mə ngavngav za, taniy kwəl kə centa wəla abəgo.››6 Av kə ɗiy wan cəfaɗcəfaɗ asənkwən wan gəɓ bay Festus mə wan a Ursalima, za sin jəɓ tik a Kaysariya. Apat tik, sin va ɗew am lay ngə zla dalgway, za zlən hid kəv kə ɗefenma a Pol. 7 Pol maa hosoh za, yahudiy mə yiy taa Ursalima za ɓas ɓasiy mgbaw sin. Za ɗiya ngawentəma mə ngavngav day godokwən. Amma taniy a ɓəsiy kə ɗef təkəniy taniy mə zləgamiy atalan Pol nhi, mindiwin bəgwən. 8 Pol nap zləgam atalan tik, ɗiya luw: ‹‹Tə ɗiy mə ngavngav atalan mə jawjaw ngiykwan Yahudiy bəgwən, ko atalan jik Bayzlav, ko atalan bay məmar hayək roma cike, kat tə ɗiy mə ngavngav ɓahbəgwən.›› 9 Festus a may kə fet nəv ngə yahudiy təbəgo, za sin ɗiya neh Pol, ɗiya luwenni: ‹‹Hoh may kəv a Ursalima hidiy kə zliy dalgway ngəkoh nhi akibik ɗa vu?›› 10 Pol zlawenni, ɗiya luw: ‹‹Kata awan am lay ngə zla dalgway ngə bay məmar hayək roma cike wayza, za dalgway ngaɗa kə zla awənhi. Hoh avə talan koh, hoh mə sənza lawlaw. Kat tə ɗeyen mə ngavngav a yahudiy ɓahbəgwən. 11 Mana kat mə ɗiy mə ngavngav za, asənkwən mana kat mə ɗiy təkən za gəga ngə wəzlakta kaɗ, kat tə ɓon kə məc kwən. Amma mana zləgam taniy mə zləgamta atalan ɗa mindiwin akimin ɗahkwən, nhi wər hid ngə jan gədan kə vəlak am nəv ngəra ngatan ɗahkwən. May ngaɗa wər, bay mordoy məmar hayək roma cike kə zla dalgway ngaɗa.›› 12 Za acin Festus ɗiya ɗəwaliy ma avə mbaslayiy tik. Za ɗiya luwen a Pol: ‹‹Hoh luw hoh gər bay mordoy məmar hayək roma cike kə zla dalgway ngəkoh, av kə tepiy akibik tik səna.››
Pol awan akibik bay Agaripa avə Bernike
13 Adəwən wan gwedek, bay Agaripa yiy a Kaysariya avə galmən kərtaza zlim tik Bernike kə ɗenta mbeli a Festus. 14 Ɗewiy abəgo wan ndas. Festus nap ceɗen zləgam tə talan Pol a bay Agaripa. Sin ɗiya luw: ‹‹Gawal awan a jik jaw awənhi, Felikus bay kat mə ɗew təm lay ngetik acin mə geɗ tik. 15 Mandal kat mə njah tə Ursalima, mogroy ngə masayigi ɓəw talan mbalgamiy ngə yahudiy yiy dahiy zləgam atalan tik kə centa wəla am dalgway. Za luwakta kat kə zlen dalgway ngə wəzl kaɗ. 16 Kat zlawenta, kat ɗiya luw: ‹‹Ngiykwan romigi wər, yikwan maa zla dalgway zagway ɗahkwən, say hidiy mə centa wəla a hid am dalgway kə ceɗiy mə ngavngav ngə hid səna, zəni hid mə centa wəla kə jan sin kə zlaw zləgam tə talan tik. 17 Za acin, mogroy ngə jik Bayzlav ngatan yiy avə kata awənhi, yikwan maa hosoh za, a vah ɓahbəgwən, apat tik, kat va ɗew am lay zla dalgway, za kat luw kə dahiy gawal səna. 18 Hidiy mə centa wəla am dalgway hosigi. Ɓən ngaɗ wər taniy av kə luwta sin mə ɗiy mə ngavngaviy dolom kat mə sənu, amma ɓahɗakwən! 19 Amma taniy a gəɓəziy tan avə Pol atalan mə jawjaw ngatan ɓəw atalan gawal məpərmay taa njə kə luwta Yesu. Sin mə məca za, zəni Pol a luw sin awana avə micin. 20 Dalgway nhi kat tə sən kə zla aceki bəgwən. Za acin kat neh Pol mana aa may kə va a Ursalima, kə jan kə zliy dalgway ngetik abəgo. 21 Amma Pol ɗiya ɓon. May ngetik wər, bay roma mordoy məmar hayək roma cike kə zla dalgway ngetik. Kat luwen a hidiy acin kə pekta gesin am jik jaw awənhi gesin. Adəwən səna, kat kə zlən tik akibik bay səna.›› 22 Agaripa luwen a Festus acin anhi: ‹‹Kat təm, kata aa may kə zlim zləgam ngə gawal səna.›› Festus zlawenni, ɗiya luw: ‹‹Apat, hov kə zlim zləgam ngetik.››
23 Apat tik, Agaripa avə Bernike hosiy avə hidiy mə ngazlata dolom taa vəlenta mordoy. Taniy pətiy a jik ngə zla dalgway avə mordoy ngə sojigi ɓəw mogroy tə liɓde səna. Festus luwen a hidiy kə dahiy Pol, zəni dahta. 24 Maa dahta za, Festus ɗiya luw: ‹‹Agaripa bay mordoy ɓəw hin hidiy cike wayza mə ɓasiy angər yikwan awənhi, hin maa lim gawal nhi. Zəgudu ngə Yahudiy yiy angər ɗa kə centa wəla. Taniy viy a Ursalima kə janakta ɓəw awənhi. A yiy avə cəwəla, a luwta: ‹Ɗah law Pol kə ɗew a micin ɗahba!››› 25 Kat wər, tə limek təkən sin mə ɗiy maa gəga ngə wəzl kaɗ nhi ɓahbəgwən. Amma makavay sin a gər bay mordoy məmar hayək roma cike kə zla dalgway ngetik, kat ɗiya ɓən kə zlən tik akibik bay səna acin. 26 Kat wər tə janak zləgam atalan tik ngə ɗəɗefen a bay mordoy məmar hayək roma cike nhi bəgwən. Kadaban səna acin, kat dah sin adab kin, maa day ɗər, kat tə dahen a hoh, Agaripa bay mordoy. Mə nehu kə jan təkən kat tu kə ɗəɗef kaɗ. 27 Angər ɗa wər, kə zlən hid təm jik jaw a bay mordoy məmar hayək roma cike, mətak ceɗen madaba ma mə centa wəla am dalgway səna, ɗah law kwən.››