Pol awan a kibik Felikus bay mordoy
24
Adəwən wan joɓən, Ananiyas mordoy ngə masayiy va a Kaysariya. A viy avə talan mbalgamiy sənan ɓəw hid məpərmay zlim tik Tertulus, sin hid mə sən mə jawjaw ngə dalgway ngə Roma. Taniy hosiy akibik bay Felikus kə jan kə centa wəla a Pol am dalgway. 2 Ɗefenta ma a Pol, zəni sin yah. Tertulus nap vəl tik, ɗiya luwen a bay Felikus: ‹‹Aw bay, mbelmbel hoh ɓəw zlambaɗ hoh mə dah tik avə sən ngəkoh adab hidiy ngiykwan, yikwan maa ɗewey kin avə zoy am hayək koh. 3 Hoyhoy yikwan mə njə kə jan təkəniy malaw mgbaw lay, za yikwan maa ɗiyoh soko day day. 4 Amma kata may kə zlayoh talan day am zləgam kwən, kadaban səna acin, kata pəloh, avə ndelek koh a tehe yikwan zlimi gwedek may. 5 Yikwan mə saf gawal nhi hid maa lem. A njə kə dah gbezlerma adab yahudiy təm talan mahayək cike wayza, za sin acin talan mbalgam ngə mgbəw ngə hidiy ta njə kə luwta Nasaratuhigi. 6 Sin a gər kə ɗiy təkən ngə dəbəz jik Bayzlav ngiykwan, zəni yikwan kaw. [Yikwan maa gər kə zla dalgway ngetik mana mə jawjaw ngiykwan, 7 amma Lisiyas mordoy ngə sojiy ngə ngərbək yah moh kaɗ a gədan aa ngər yikwan za. 8 Za luwen a hidiy mə centa wəla kə yiy kə centa wəla akibik koh awənhi.] A nehu, hoh atalan koh hav kə sən tik təkən yikwan mə ceɗeh tə talan tik cike wayza mindiwin.›› 9 Yahudiy cike wayza luwta: ‹‹Mindiwin, Tertulus mə luw səna tiɗtiɗe.››Pol zləgam atalan tik akibik Felikus bay mordoy
10 Felikus bay mordoy səken ngəra a Pol kə zləgam, za Pol ɗiya luw: ‹‹Kat mə sən za, hoh acin hid mə njə kə zla dalgway ngə hidiy ngiykwan mə ɗiya di ndas. Za acin, kat tə hovok kə zləgam atalan ɗa akibik koh kwən. 11 Mə ɗiya wan gəɓ atalan saray dap kat mə njah tə Ursalima kə səban Bayzlav. A kwəsalu hoh avə talan koh hav kə sən tik mindiwin. 12 Hid mə janak kata gəɓəz a hid asənkwən kata lebeɗ hidiy kə gbezlerma ɗahkwən. Ko a jik Bayzlav, ko a jik jəgwan ngə yahudigi, ko aliɓde, hid mə janak ɗahkwən. 13 Təkəniy cike hidiy mə zləgamta atalan ɗa, a ɓəsiy kə luwta mindiwin kwən. 14 Amma kat təv kə ceɗ zləgam maa mindiwin akibik koh, kata ɗiyen kəzəɗ a Bayzlav ngə didiy ngiykwan avə kə səb mozlokotuf ngə Yesu Məmar hidi. Angər tan wər, mozlokotuf nhi malaw kwən. Amma kat wər, təkəniy mə ɗəɗef ɗəɗefiy təm deftere ngə mə jawjaw ɓəw təm deftere ngə mokotufigi, kata mə yəkta za am nəv ngaɗa. 15 Təkən kat taa bəbəc atalan ɗaha. Za hidiy mə cakta wəla am dalgway nhi təm, aa bəbəciy atalan təkən səna. Təkən səna acin: Hidiy malaw avə hidiy mə ngavngav, Bayzlav av kə mbəlahta a mə məc za. 16 Kadaban səna, kata təl kə ɗew ɗew malaw akibik Bayzlav ɓəw akibik hidigi.
17 Adəwən di ndas, kat tu jəɓah a Ursalima kə dah suloy a hidiy ngaɗa ɓəw kə dahen vəl a Bayzlav. 18 Kata awan am jik Bayzlav, za taniy janakta abəgo. Kata ɗiy vəl ngə goh ɗew ngaɗa kə mbaɗ kweɗek kweɗek. Hidiy ɗahiy abəgo kwən, za gbezlerma a ɗiy abəgo təm bəgwən. 19 Amma galmayɗiy yahudiy sənan təm hayək Aziya awaniy abəgo. Mana kat mə ngavma za, taniy acin ngə yiy kə cakta wəla am dalgway akibik koh.
20 Asənkwən, mandal hidiy mə tepekta akibik mgbəw ngə hidiy mə zliy dalgway, hidiy səna a janiy mə ngavngav kat mə ɗiy zaba vu? Mana ɗaha, taniy mə ceɗta. 21 Ezen lay kat mə luw avə gədan mandal kat mə gar a gar akibik mgbəw ngə hidiy mə zliy dalgway, kat tə luw: ‹Kata awana aa bəbəc, Bayzlav av kə mbəla hidiy mə məcməciy aa mə məc za. Av kə zlakta dalgway akibik kin makavay zləgam nhi dap vu?›››
22 Felikus bay mordoy awana sən lawlaw atalan səb mozlokotuf ngə Məmar hidi. Sin doɗ dalgway səna am wan tə kibik. Luwen a yahudigi: ‹‹Kat təv kə zla dalgway nhi mandal Lisiyas mordoy sojiy ngə ngərbək tu yah.›› 23 Bay luwen a mordoy sojiy ngə bələk: ‹‹A pek Pol am jik jaw, amma hoh gər kə jaw kaɗ kwən. Mana ngwalayiy tik aa gər kə mənta, hoh gər kə takta kaɗ kwən.››
Pol awan akibik Felikus avə werti tik Durusila
24 Adəwən wan gwedek, Felikus yiy avə werti tik Durusila njə yahudiya, za sin zlən hid ɗefenma a Pol. Sin ɗiya teh zlimi kə zlim zləgam atalan vəl nəv a Yesu Kiristu Pol taa ceɗenni. 25 Pol diw kə ceɗen mana aceki kə ɗew tiɗtiɗe akibik Bayzlav, mana aceki hid tu kə puw talan tik am təkəniy mə ngavngav. Pol ɗiya luwen baha, Bayzlav av kə zla dalgway ngə hidiy cike wayza am way ngə talan mahayək. Bay maa zlim atəgo za, ɗiya hovok, za luwen a Pol: ‹‹Tanjinhi, gəga ngə pic tapica, av koh! Mandal kat mə jan lay za, təv kə ɗefehma.›› 26 Felikus a ɓən wər av kə jan suloy angər Pol. Kadaban səna acin, hoyhoy a njə kə ɗefenma a Pol kə zləgamigi.
27 Adəwən di saray, vərəkiy Porkiyus Festus am lay ngə Felikus, amma Felikus geɗ Pol am jik jaw, kadaban sin a may kə fet nəv ngə yahudigi.