23
Pol cə həriya atalan hidiy təm mgbuw ngə hidiy mə zliy dalgway, za ɗiya luw: ‹‹Galmayɗigi, kat tu ɗew ɗew malaw akibik Bayzlav nha tanjinhi. Kat tə ɗiy mə ngavngav bəgwən.›› 2 Mordoy ngə masayiy zlim tik Ananiyas luwen a hidiy maa mbeh tə jagwar Pol kə mgbosta am ma. 3 Pol luwenni: ‹‹Bayzlav av kə wəzloh ɗər, məplafas hid cah! Hoh ɗew kaɗ kə zla dalgway ngaɗa mana mə jawjaw ngə Musa mə luwu. Za hoh mə luwen a hidiy kə wəzlakta nhi, hoh səb mana mə jawjaw səna mə luw bəgwən!›› 4 Hidiy maa mbeh tə jagwar Pol luwenta: ‹‹Wana! Hoh sən gawal hoh ta rə nhi, mordoy ngə masayiy təm jik Bayzlav bəgwən vu!›› 5 Pol ɗiya zlawenta, ɗiya luw: ‹‹Galmayɗigi, kat tə sən sin mordoy ngə masayiy bəgwən, kadaban mə ɗəɗefe kaɗ am deftere ngə Bayzlav: ‹Hoh gər kə zləgam ma mə ngavngav atalan bay məmar hidiy koh kwən.›››6 Pol mə sən za, adab hidiy təm mgbəw ngə hidiy mə zliy dalgway nhi, hidiy sənan sadukigi, za sənan farisigi, kadaban səna acin, sin ɗiya luw a gədan akibik tan: ‹‹Galmayɗigi, kata a ceɗehin, kat njə farisa, kər ngə farisigi. Kat mə yək za am nəv ngaɗa mana tanigi. Hidiy mə məc məc av kə mbəliy a mə məc za, hidiy a cakta wəla am dalgway acin makavay səna.›› 7 Sadukigi ɓəw farisiy maa zlimiy zləgam ngə Pol za, diw kə ngiway am walan tan, zəgudu wəzakiy kaɗ madaba saray. 8 Taniy a ngiway nhi, kadaban sadukiy a njə kə luwta: ‹‹Hidiy mə məcməciy a mbəliy aa mə məc za kwən, mbaslayiy ngə Bayzlav ɓəw mbiɗ ɗahiy kwən.›› Zəni farisiy wər mə yəkta za am nəv ngatan, təkəniy nhi cike wayza ɗahigi. 9 Hidiy cike wayza aa zləgamiy a gədan. Hidiy sənan tə dab farisiy mə njə kə jəgwanenta mə jawjaw ngə Bayzlav a hidigi, gariy a gar za ɗiya luwta a gədan: ‹‹Yikwan mə jan təkən mə ngavngav gawal nhi mə ɗiyu ɓahbəgwən. Ezen mbiɗ asənkwən mbaslay ngə Bayzlav acin mə luwenni.›› 10 A ngiywayiy dayday. Mordoy ngə sojiy ngə ngərbək ɗiya hovok. Sin a ɓən hidiy av kə pohiy Pol kaɗ. Sin ɗiya luwen a sojiy acin: ‹‹Mə səroh! Mə ngazl Pol aa mə lay dalgway nhi za, mə tepu a jik kin!››
11 Ngə vuɗu səna, Məmar hidi yah akibik Pol wa a sisin, ɗiya luwenni: ‹‹A musuf! A Ursalima awənhi, hoh tu zləgam mgban mgban atalan ɗa. Say hoh kə zləgam mgban mgban atalan ɗa am hayək Roma təm.››
Yahudiy a jariy wirwir ngə wəzl Pol
12 Apat tik, yahudiy sənan ɓasiy kaɗ avə ɓah kə jariy wirwir atalan Pol. Luwiy mbeɗi akibik Bayzlav, ɗiya luwta: ‹‹Yikwan mə zəm gəda kwən, za yikwan mə sa yəm kwən, say yikwan tu wəzl Pol!›› 13 Hidiy mə ɗiyiy wirwir za luwiy mbeɗi səna, taniy day ngər foɗ. 14 Viy angər mogroy ngə masayigi ɓəw talan mbalgamigi, ɗiya luwenta: ‹‹Yikwan mə luw mbeɗi za akibik Bayzlav, yikwan mə zəm kwən say yikwan tu wəzl Pol. 15 Tanjinhi acin, hin avə hidiy sənan tə dap mgbəw ngə hidiy mə zliy dalgway, məv angər mordoy ngə sojiy ngərbək ngə roma, za hin kə tar tik sin kə zlənah Pol kə yah angər kin wa hin mə gər kə kwəsal madaba ma tə talan tik. Yikwan wər, yikwan mə sləsləɓaha za kə wəzl kaɗ a mozlokotuf dəga sin wəlen kə hosoh awənhi.››
16 Amma kərtawəl məpərmay ɗaha, mamay tik galmən ngə Pol, zlim zləgam ngə hidiy mə ɗiyiy wirwir səna. Sliɗ va am jik ngə sojigi, ceɗen ləbar səna a Pol. 17 Za acin, Pol ɗefenma a mordoy sojiy takan tə dab mogroy ngə sojiy bələk, za ɗiya luwenni: ‹‹Aw a ngazl kərgawla nhi angər mordoy kin, sin awana ləbar ngə ceɗenni.›› 18 Mordoy sojiy səna ngazl kərgawla səna, lapigi, tep angər mordoy tan, za ɗiya luwenni: ‹‹Pol təm jik jaw ɗefekma, angar kat kə ngazla kərgawla nhi angər koh. Sin awana ləbar ngə ceɗeh.›› 19 Mordoy sojiy ngə ngərbək kaw kərgawla səna am ngəra, ngazl, viy a gozlum za, ɗiya neh tik, luwenni: ‹‹Hoh gər kə ceɗek ləbar ngemi?›› 20 Kərgawla səna zlawenni, ɗiya luw: ‹‹Yahudiy sənan mə zleriy ma za kə yiy kə nehiy kə jan hoh kə zlənenta Pol apat akibik mgbəw ngə hidiy mə zliy dalgway. Av kə luwta wa a gər kə kwəsaliy madaba ma tə talan tik kə sənta lawlaw. 21 Amma hoh gər kə ngəm kwən. Tanjinhi, hidiy day ngər foɗ aa puwta a mozlokotuf kə wəzlta kaɗ. Taniy mə luwiy mbeɗi za akibik Bayzlav, a zəmiy gəda kwən, za a siy yəm kwən. Say taniy tu wəzliy Pol kaɗ. Taniy mə sləsləɓiy wayza, a puwiy zlaw angər koh.›› 22 Mordoy ngə sojiy maa zlim atəgo za, ɗiya ngəz kərgawla səna, luwenni: ‹‹Ləbar hoh mə ceɗek nhi, hoh gər kə ceɗen a hid məpərmay kwən.›› Za sin geɗ kərgawla səna kəv tik.
Tepiy Pol akibik bay Felikus
23 Njoɗ mordoy ngə sojiy ngə ngərbək ɗefenma a mogroy saray ngə sojiy ngə bələk, ɗiya luwenta: ‹‹Mə wel sojiy bələk saray, hidiy mə kwariy plis ngər cisaray, ɓəw hidiy mə kawiy maslalamiy bələk saray. Mə jawiy kəsəm tan kaɗ lawlaw kə viy a Kaysariya avə masa ngərafkatakan ngə vuɗu. 24 Mə sləsləɓiy plisiy təm ngə tep Pol, sin kə hos lawlaw akibik bay Felikus.›› 25 Adəwən səna, mordoy ngə sojiy ngə ngərbək tafnan ɗəɗef ɗerewel anhi, sin ɗiya luw:
26 ‹‹Kata Kalawdiyus Lisiyas, ta ɗəɗefeh ɗerewel nhi a hoh Felikus bay mordoy, kata ɗoh mbeli.
27 ‹‹Gawal kata taa zlənay nhi, yahudiy acin mə kawta, a gər kə wəzlta kaɗ. Kat maa zlim sin njə roma za, kat va avə sojiy ngaɗa, yikwan lereh kaɗ. 28 Kat tə gər kə sən tik acin ko yahudiy a centa wəla makavay mi, kadaban səna, kat tep akibik mgbəw ngə hidiy mə zliy dalgway ngatan. 29 Kat saf taniy a gəɓəziy avə Pol atalan mə jawjaw ngatan. A centa wəla am dalgway acin makavay səna. Amma a ɗiy təkən maa gəga ngə wəzl kaɗ nhi bəgwən asənkwən kə pek kaɗ am jik jaw nhi bəgwən. 30 Zəni hidiy ceɗekta yahudiy a puwta a mozlokotuf kə wəzlta kaɗ. Kadaban səna acin, kat zlənay gawal səna angaw. Kat luwen a hidiy taa centa wəla, mə va centa wəla am dalgway akibik koh.››
31 Sojiy ɗiyiy mana mordoy ngatan mə luwenta. Taniy ngazliy Pol, ngazl ngazlta vuɗu vuɗu hos aliɓde Antipatiris. 32 Apat tik, sojiy mə viy avə ngaz buwiy tan am lay ɗiy kəzəɗ ngatan, za geɗiy hidiy mə kwariy plisiy kə ngazliy pol hos am lay taniy taa vigi. 33 Hidiy mə kwariy plisiy səna hosiy a Kaysariya, taniy vəlenta ɗerewel a Felikus bay mordoy, za dahiy Pol akibik tik. 34 Bay jangi ɗerewel za ɗiya neh Pol, sin luw: ‹‹Hoh hid təm hayək ceki?›› Pol zlawenni ɗiya luw: ‹‹Kat hid təm hayək Silikiya.›› 35 Bay səna luwen a Pol: ‹‹Mandal hidiy mə ciywəla am dalgway tu yigi, təv kə nehe.›› Za luwen a sojiy kə tepiy Pol ade Hirudus bay mordoy, za taniy kə puwta.