22
‹‹Bahbayɗigi avə galmayɗiy yahudigi, mə zlim zləgam kat tu kə luwehin nhi, kə jan hin kə sən tik, kat tə ɗiy mə ngavngav bəgwən.›› 2 Taniy maa zlimiy Pol a zləgam a ma ngatan ibraninko za, njitan tehte baha kə tehiy zlimi. Zəni Pol ɗiya luwenta:3 ‹‹Kat wər, kat njə yahudiya. A mbuwakta a Tarsus təm hayək Silikiya. Zəni tə gəl a Ursalima awənhi. Hid mə jəgwanak təkən acin Gamaliyel. Sin tu jəgwanak lawlaw kə səb mə jawjaw ngə didiy ngiykwan. Kata tu səb Bayzlav avə gədan ngaɗ cike wayza mana hin tanjinhi. 4 Kat tu zlənen takwan a hidiy mə səbiy mozlokotuf ngə Yesu. Kata tu wəzlta mimci. Kata tu kaw mawəligi avə wertigi, za kata tu pekta kaɗ am jik jaw. 5 Mordoy ngə masayigi avə mgbəw ngə talan mbalgamiy kwəl kə luwta zləgam ngaɗa mindiwin. Taniy tu vəlakta ɗereweliy taniy mə ɗəɗefenta a galmayiy ngiykwan yahudiy tə liɓde Damas. Ɗereweliy səna, tu vəlakta mozlokotuf kə kaw hidiy mə səbiy Yesu tə liɓde səna, kə jawta kaɗ, za kə tepta a Ursalima kə jan talan mbalgamiy kə zlənenta takwan.››
Pol ceɗ mana sin mə vəl nəv tik a Yesu
6 ‹‹Mandal kata a va aliɓde Damas, ngə dabdab pic, kat mbeh kə hos aliɓde səna, zləzlaɗ maa bilin surohoh a dibizlav za məndumndum, ɗiya ɗiy kəkay kəkay mgbaw kata. 7 Kat, kup, ndəv a kahayək, zəni kat zlim wəla a luwakku: ‹‹Sol, Sol, hoh gbezlerekma kemi? 8 Kat ɗiya neh tik: ‹Aw mordoy, hoh hid ngayi? Sin zlawakku: ‹Kata acin Yesu njə Nasaratu, hid hoh ta gbezlerenma səna.›› 9 Hidiy mə lapiy avə kata limiy zləzlaɗ səna, zəni a zlimiy wəla mə luwak nhi bəgwən. 10 Kat ɗiya neh tik: ‹‹Aw kat kə ɗiy təkən ngemi, Məmar hidi? ‹‹Sin luwakku: ‹‹A sliɗ, a va a Damas, abəgo hidiy av kə ceɗiy təkəniy hoh tu kə ɗiy tik cike wayza.›› 11 Zləzlaɗ maa kəkay kəkay tafnan mə hulufok həriya kaɗ. Za acin hidiy mə lapiy avə kata kawakta ngəra kə ngazlakta a Damas.
12 ‹‹Hid ɗaha zlim tik Ananiyas, awan aliɓde Damas səna. Sin a njə kə səb mozlokotuf ngə Bayzlav lawlaw. Za a njə kə kaw mə jawjaw Bayzlav mə vəlen a Musa lawlaw. Yahudiy tə liɓde Damas cike wayza a njə kə həmənta. 13 Ananiyas yah angər ɗa, gar a jagwar ɗa, za ɗiya luwakku: ‹‹Sol, galmayɗa, həriy koh mə zlər! Wayba həriy ngaɗa zləray tik, kat ɗiya lim lawlaw acin. 14 Sin ɗiya luwakku baha: ‹Bayzlav ngə didiy ngiykwan weloh dəga amicek kə sən may ngetik, hoh kə lim Yesu, hid maa tiɗtiɗe. Za hoh kə zlim wəla ngetik. 15 Kə jan hoh kə ɗew kə məsəber tik akibik hidiy cike wayza. Hoh kə ceɗenta təkəniy hoh mə limu avə təkəniy hoh mə zlimu. 16 Tanjənhi hoh puw mi? A yah yək baptisma, a tar Məmar hidi, kə jan kə geɗeh mə ngavngav koh cike way kaɗ.›››
Məmar hidi zlən Pol angər hidiy səban tan maa par a yahudigi
17 Pol ɗiya luw baha: ‹‹Adəwən səna, kat jəɓɗa a Ursalima. Pic sənan, kata tar am jik Bayzlav, za Bayzlav ɗef talan tik akibik ɗa wa kata sisin.
18 Kat lim Məmar hidi, zəni sin luwakku: ‹Angaw a sliɗ, a pət koh aa Ursalima za, kadaban hidiy tə liɓde nhi a yəkiy ma ngə koh hoh tu kə zləgamenta atalan ɗa kwən.› 19 Kat zlawenni: ‹Aw Məmar hidi, taniy aa sənta wayza kat tu pət am jik jəgwan ngə yahudiy parpar, kat tu kaw hidiy mə yəkiy zləgam koh kə zarta, za kə pekta am jik jaw. 20 Mandal hidiy taa wəzliy hid mə ceɗ zləgam ngə koh Etiyen kaɗ maa, kata awan abəgo təm. Kat tu fet a məc ngetik, za kat ɗər acin mə puw ləkwətiy tan.› 21 Məmar hidi luwakku acin: ‹A va, təv kə zlənoh gaf angər hidiy maa səban tan par a yahudigi.›››
Pol avə mordoy ngə sojigi
22 Hidiy mə ɓas ɓas ɗiya tehiy zlimiy am zləgam ngə Pol, hos am sin mə luw: ‹‹Təv kə zlənoh gaf angər hidiy maa səban tan par a yahudigi››. Maa zlimta atəgo za, taniy diw kə ciywəla. Ɗiya luwta acin: ‹‹Mə wəzl gawal nhi kaɗ mimci! Ɗah law sin kə ɗew a micin kwən!›› 23 Ɗiya ciywəla dayday, cokiy ləkwətiy tan fəkta kaɗ, ɗiya kafiy kirbitil. 24 Mordoy ngə sojiy ngə roma ngə ngərbək maa lim atəgo za, luwen a sojiy anhi: ‹‹Mə ngazl Pol a jik, mə rəben lakwatay kə jan sin kə ceɗ ma tə liɓ tik! Kat tə gər kə sən makavay mi zəgudu taa ciywəla atalan tik nhi.›› 25 Mandal taa jawiy Pol kə zarta, sin luwen a mordoy ngə sojiy ngə bələk təbəgo : ‹‹Hin mə gər kə zar njə roma nhi, za ɗər dalgway ngetik mə zla gesin ɗahkwən! Mozlokotuf ɗaha a hoh ngə ɗiy tik atəgo vu?›› 26 Mordoy ngə sojiy bələk maa zlim atəgo za, va luwen a mordoy ngə sojiy ngərbək: ‹‹Tanjinhi wər hav kə ɗiy aceki ? Gawal təgo təm njə roma ta!›› 27 Za acin mordoy ngə sojiy ngərbək va angər Pol, ɗiya neh tik: ‹‹Hoh wər hoh njə roma vu, a ceɗek may?›› Pol zlawenni, ɗiya luw: ‹‹Yaw kat njə roma.›› 28 Mordoy ngə sojiy səna luwenni: ‹‹Ngaɗa, kat tu wərək suloy dolom kə diw kat kə mbaɗ kə njə roma.›› Pol zlawenni, ɗiya luw: ‹‹Ngaɗa, dəga mə mbuwakta kat njə roma!›› 29 Hidiy mə gər kə zariy Pol kə ceɗ ma tə liɓ tik tafnan, geɗta kaɗ angaw. Mordoy ngə sojiy səna maa sən sin mə jaw njə roma za a selelen, sin ɗiya hovok dayday.
Pol awan akibik mgbəw ngə mə zliy dalgway ngə yahudigi
30 Mordoy ngə sojiy ngərbək aa may kə sən madaba maa yahudiy mə centa wəla a Pol nhi lawlaw. Kadaban səna acin, apat tik, sin luwen a sojiy kə pəsliy Pol kaɗ, luwen a mogroy ngə masayigi ɓəw hidiy məpərmay təm mgbəw ngə mə zliy dalgway ngə yahudiy cike wayza kə ɓasigi. Sin luwen a sojiy kə ngazliy Pol, vərəkta akibik tan.