Pol a va aliɓde Ursalima
21
Adəwən yikwan maa sliɗ adab talan mbalgamiy ngə mgbəw ngə mə səbiy Yesu tə Efesus za, yikwan vəkin avə pay ngə zlan maza a Kos maa mgbaw avə yəm. Azlapat tik, yikwan hos a Rodos maa mgbaw avə yəm. Za yikwan gar kin aabəgo za, avə pay ngə zlan maza yikwan vəkin aliɓde Patara. 2 Yikwan maa hos a Patara za, abəgo yikwan jan pay ngə zlan maza ngə va am hayək Finikiya. Za yikwan pət aliɓ tik, yikwan vəkin. 3 Mandal yikwan maa wan aliɓ yəm, yikwan maa lim liɓde Kiprus aa mə ngəra zlaɓay, zəni yikwan ton kin, yikwan vəkin am hayək Siriya. Yikwan gar aliɓde Tir təm hayək Siriya kə jan kə səroh səndəkiy təm pay ngə zlan maza. 4 Za acin yikwan surohoh aa mə pay ngə zlan maza za, yikwan va jan hidiy mə səbiy Yesu tə liɓde səna. Za yikwan ɗew witikwitik a tanigi zəm luma takan. Mbiɗ ngə Bayzlav ɗefenta təkən məv kə hosohoh atalan Pol a Ursalima, makavay səna acin, taniy luwenta: ‹‹Hoh gər kəv a Ursalima kwən.›› 5 Zəni, adəwən wan cisaray maa ton za, yikwan sliɗ kəv kin a mbuluk baha. Hidiy təbəgo cike wayza avə wertiy tan ɓəw wəriy tan ngazliy yikwan zlan liɓde ngatan kaɗ. Yikwan hos a gozlum maza, za yikwan gbiliy titimbiz, yikwan cike wayza kə tar Bayzlav. 6 Adəwən yikwan maa way tar Bayzlav za, yikwan ɗiya luw am walan ngiykwan mə ɗew lawlaw. Za yikwan pət kin am pay ngə zlan maza. Taniy təm buwiy tan ade tan.7 Yikwan vəkin aa liɓde Tir za, yikwan mə way ɗəmbuluk ngiykwan avə pay ngə zlan maza. Yikwan vəkin aliɓde Potolemayis. Abəgo, yikwan surohoh kaɗ aa mə pay ngə zlan maza za. Yikwan va ɗen mbeli a galmayiy ngiykwan mə səbiy Yesu təbəgo. Yikwan ɗew avə tanigi witikwitik wan takan. 8 Apat tik gbum, yikwan gar kin aabəgo za, yikwan hos aliɓde Kaysariya. Yikwan va angər Filip, hid mə njə kə ceɗ zləgam ngə Yesu. Yikwan ɗew ade tik. Sin hid takan tə dab hidiy cisaray mə welta a Ursalima kə ɗiy kəzəɗ ngə wəɗak zəm a hidigi. 9 Filip səna awana midimiy foɗ. Midimiy səna a njə kə ceɗiy ləbarª ngə Bayzlav a hidigi. 10 Wan ndas yikwan mə ɗew təbəgo. Mokotuf ngə Bayzlav zlim tik Agabus hosohoh aliɓde səna. A yah aa mə hayək yahudiya za. 11 Za sin hosohoh adab yikwan. Sin ɓiy maslapa ngə Pol, jaw ngaz avə ngəra ngetik kaɗ, za sin ɗiya luw: ‹‹Mbiɗ ngə Bayzlav a luw: ‹A Ursalima, yahudiy av kə jawiy hid mə mar maslapa nhi› mana kata mə jaw ngaz avə ngəra ngaɗ nhi. Za acin, av kə vəlta am nəv ngəra ngə hidiy maa səban tan par a yahudigi.››
12 Yikwan maa zlim zləgam səna za, yikwan avə hidiy mə səbiy Yesu tə Kaysariya, yikwan ɗiya tar Pol kə ɗewey tik mətak va a Ursalima. 13 Zəni Pol zlaw yikwan, ɗiya luw: ‹‹Hin mə han kemi? Mə ɗiy kat kə den kemi? Ngaɗa wər, ko a jawakta, ko wəzlakta mimci a Ursalima makavay Yesu Məmar Hidi, a kata wər law. Təv kə va dap.›› 14 Za acin yikwan wər yikwan mə ɓəs kə zlambaɗ ɓən ngetik bəgwən, kadaban səna, yikwan geɗ sin kə va. Yikwan luwenni: ‹‹Bayzlav Məmar Hidi mə ɗiy may ngetik atalan koh.››
15 Adəwən wan ngiykwan gwedek aliɓde Kaysariya, yikwan sləsləɓ kə ɗəmbuluk, yikwan tapkin kəv a Ursalima. 16 Hidiy mə səbiy Yesu sənan tə Kaysariya ngazliy yikwan. Taniy tepiy yikwan ade ngə gawal məpərmay zlim tik Manason mə mbuwta a hayək Kiprus, maa mgbaw avə yəm. Sin mə yək zləgam ngə Yesu mə vaha za. Yikwan wan ade tik.
Pol va kə safah Yakuba
17 Yikwan maa hos a Ursalima za, hidiy mə səbiy Yesu təbəgo yəkiy yikwan ngəra səsaray. 18 Apat tik, Pol lap avə Yikwan kə va ade Yakuba. Talan mbalgamiy cike ngə mgbəw ngə mə səbiy Yesu tə Ursalima awaniy abəgo təm. 19 Pol ɗenta mbeli. Za sin ɗiya pəslenta madaba ma lawlaw ngə təkəniy Bayzlav mə ɗiy adab hidiy maa səban tan par a yahudigi avə kəzəɗ sin taa ɗiyu. 20 Adəwən talan mbalgamiy maa zlimiy zləgam ngetik za, ɗiya səbaniy Bayzlav. Za ɗiya luwenta a Pol: ‹‹Galmay ngiykwan, a zlimu, adab yikwan yahudigi, hidiy dolom tu yəkiy Yesu. Taniy a səbiy mə jawjaw Bayzlav mə vəlen a Musa avə nəv takan təm. 21 Hidiy səna a zlimta hoh njə kə jəgwanen təkən a yahudiy təm hayək maa parpar kə geɗiy səb mə jawjaw ngə Musa kaɗ ta. Za baha, hoh njə kə luw hidiy kə zliy mandawal ngə wəriy tan kaɗ kwən, mə gər kə səbiy mə zugzugwiy ngə yahudiy kwən. 22 Tanjinhi acin, hoh mə yah za awənhi, hidiy av kə zlimiy ləbar tik. Ya yikwan kə ɗiy acin aceki? 23 Geleɓ hoh kə ɗiy mana yikwan tu kə luwoh nhi. A zlimu, hidiy foɗ a luwta av kə ɗiyenta təkən a Bayzlav. 24 Pic taniy tu kə ɗiyiy mə zugzugwa kə jan kə mbaɗiy kə hidiy njə nəv maa kweɗek akibik Bayzlav ɓəw ngə zlar talan tan kaɗ mbeh kə hos. Law hoh kə lap a tanigi. Hoh acin ngə wərək suloy ngə məzugzugwa. A kə ɗiy atəgo acin, hidiy cike wayza av kə sənta zləgam taniy mə zlimta atalan koh hidiy a ngawiy ma. Za baha, taniy av kə sənta am ɗew ngəkoh, hoh təm hoh səb mə jawjaw ngə Musa. 25 A hidiy maa səban tan par a yahudiy mə vəliy nəv tan a Yesu wər, yikwan mə jawma kə ɗəɗefenta ɗerewel, am ɗerewel səna yikwan kə luwenta, mə gər kə zəmiy vərən hidiy mə fatta am zugwa kwən, mə gər kə zəmiy ɓiɓiz kwən. Taniy mə gər kə zəmiy vəren ngə təkən huvu məc məc kwən. Taniy mə gər kə ɗiyiy vərndew kwən.››
26 Za acin, Pol yək ma ngatan. Apat tik, sin va a hidiy foɗ tafnan. Taniy ɗiyiy məzugzugwa ngə mbaɗ talan tan kweɗek kweɗek akibik Bayzlav səna. Za taniy pətiy a jik ngə Bayzlav, luwenta a masayigi: ‹‹Adəwən wan cisaray, mə zugzugwa ngə mbaɗ talan ngiykwan kweɗek kweɗek akibik Bayzlav av kə way, yikwan məv kə jəɓahah kə jan ko hid ngayi kə faten təkən a Bayzlav.››
Hidiy kawiy Pol a jik Bayzlav
27 Wan cisaray ngə məzugzugwa səna maa ton za, yahudiy məpərmay mə yiy taa mə hayək Asiya za, limiy Pol am jik Bayzlav. Taniy luwenta a hidiy cike kə gbezlerentəma a Pol, za taniy kawta. 28 Taniy ɗiya ciywəla, luwta: ‹‹Hin hidiy Israyila cike wayza, mə mən yikwan kə kaw gawal nhi! Mə safu, gawal nhi acin hid mə njə kə jəgwanen a hidiy am lay parpar kə zeliy yikwan, yikwan yahudigi, ɗaw kə jəgwanen a hidiy kə zeliy mə jawjaw ngə Musa ɓəw ɗaw kə jəgwanen a hidiy kə zeliy jik Bayzlav nhi təm. Tanjinhi sin dah hidiy səban tan maa par a yahudiy kə pətiy am jik ngə Bayzlav, anhi sin tu dəbəz lay maa kweɗek kaɗ.›› 29 Taniy a luwta anhi kadaban a limiy Pol avə Torofimus hid tə Efesus awaniy witikwitik aliɓde Ursalima. A ɓənta wər Pol mə dah gawal nhi za am jik Bayzlav. 30 Gbezlerma səna tu cakway mgbaw liɓde Ursalima. Hidiy aa siy am lay parpar tə slalade za, kə yiy am jik Bayzlav. Za taniy kawiy Pol, ngazlata kaɗ aa mə jik Bayzlav za. Za njoɗ taniy pekiy məjijik ngə jik Bayzlav kaɗ. 31 Mandal taniy ta gər kə wəzliy Pol kaɗ, hid məpərmay va ceɗen a mordoy sojiy ngə ngərbək ngə roma, ɗiya luwenni: ‹‹Hidiy tə Ursalima cike wayza a gbezlerima.›› 32 Njoɗ sin ngazl sojiy dolom ɓəw avə bayiy ngə sojiy bələk bələk, taniy siy kəv angər hidiy mə ɓas ɓasiy səna. Hidiy mə ɓas ɓasiy maa limiy mordoy ngə sojigi ɓəw sojiy za, taniy geɗiy kə wəzliy Pol kaɗ. 33 Za acin mordoy ngə sojiy ngərbək səna kərəɓ abər Pol, sin kaw kaɗ, za ɗiya luwen a sojiy kə jawta avə seleleniy saray. Za sin ɗiya neh hidiy mə ɓas ɓas: ‹‹Nhi səna wər hid ngayi? A ɗiy təkən ngemi?›› 34 Hidiy ɗiya ciywəla dayday, ko yi a zləgam ma ngetik par. Mordoy ngə sojiy nhi a jan kə sən madaba ma səna bəgwən, kadaban hidiy a zləgamiy dayday. Maa saf atəgo za, sin luwen a sojiy kə tepiy Pol am jik ɗew ngə sojigi. 35 Taniy maa hosiy am lay taniy tu kə tapiy kə jan kə pətiy ade za, taniy wutiy Pol kadaban zəgudu a njəslta a gədan, 36 hidiy dolom aa səbta, aa ciywəla, aa luwta: ‹‹Mə wəzl kaɗ! Mə wəzl kaɗ!››
Pol pəsl madaba ma tə talan tik aa yahudigi
37 Mandal sojiy aa pətiy Pol kə va ade tan, Pol luwen a mordoy ngə sojiy ngə ngərbək səna a ma yunanin: ‹‹Təv kə jan mozlokotuf kə zləgamoh gwedek vu?›› Mordoy ngə sojiy zlawenni, ɗiya luw: ‹‹Hoh sən zləgam yunanin ɗah vu? 38 Aska hoh acin njə Misra mə lebeɗ hidiy kə gbezlerentəma a bay roma mordoy, za mə tep hidiy maa lem ngərbək foɗ adab donu amicek nhi kwən vu?›› 39 Pol zlawenni: ‹‹Awwo! Kat wər, kat njə yahudiya. A mbuwakta a Tarsus liɓde mordoy təm hayək Silikiya. Ambuw, a geɗek mozlokotuf kat kə zləgamen a hidiy nhi.›› 40 Za acin mordoy ngə sojiy geɗen mozlokotuf sin kə zləgam. Pol gar a gar am lay maa fal ngə pət kə va a jik, sin kaf ngəra a hidiy kə jan kə sənta sin aa may kə zləgamenta. Hidiy cike wayza njiytan tehte. Za Pol ɗiya zləgamenta a ma Ibraninko. Sin ɗiya luw: