Pol ɗə mbuluk am hayək Makedoniya ɓəw ngə Yunanin
20
Adəwən gbezlerma maa way aliɓde Efesus za, Pol ɓas hidiy mə səbiy Yesu təbəgo. Sin ɗiya zləgam kə vəlenta gədan kə jan taniy kə gariy lawlaw am səb mozlokotuf ngə Yesu. Am way tik, sin luwenta mə ɗew lawlaw, za sin geɗta, vətik am hayək Makedoniya. 2 Sin ɗiya tal am hayək səna, a zləgam kə vəlen gədan a hidiy mə səbiy Yesu kə gariy lawlaw am səb mozlokotuf ngə Yesu. Za adəwən səna, sin hos am hayək Yunanin.ª 3 Pol ɗew abəgo təra makaɗ. Adəwən səna, a gər kə pət am pay ngə zlan maza, kəv tik am hayək Siriya. Zəni sin zlim yahudiy a ɗiyiy wirwir ngə wəzlta kaɗ. Maa zlim atəgo za, sin buw ɓən kaɗ. Sin jəɓ aa dəwən, ton aa mə hayək Makedoniya za. 4 Pol səna a ɗə mbuluk avə Sopater kər ngə Pirus hid tə Bereya. Aristarkus avə Sekundus, hidiy tə liɓde Tesalonik ɓəw Gayus hid tə Derbe, Tikikus avə Torofimus hidiy təm hayək Asiya, ɓəw Timote. 5 Hidiy nhi acin mə viy mə pəlpəla am hayək Torowas kə yikwan, kə puwiy yikwan abəgo. 6 Adəwən məmbəlwa ngə bret mətak njem maa ton za, yikwan pət am pay ngə zlan maza kə gar kin aa liɓde Filipi za, kəv kin a Torowas. Wan joɓən adəwən səna, yikwan hos a Torowas. Yikwan va jan hidiy ngiykwan sənan səna abəgo. Yikwan ɗew kaɗ abəgo zəm luma takan.Pol jəɓ a Torowas
7 Vuɗu ngə toɗwan, yikwan ɓas kə zəm gəda ngə ɓən atalan məc ngə Yesu. Zəni Pol ɗiya zləgamen a hidiy mə ɓas ɓasiy təbəgo. Sin aa səb avə zləgam hos dabdab vuɗu. A ɗiy atəgo kadaban sin av kə va apat tik am lay məpərmay. 8 Yikwan mawan mə ɓas ɓas a jik tə wəzlav tə talan celen, pətərliy ɗahiy dolom mə mbəl mbəl. 9 Kərgawla məpərmay, zlim tik Ewtikus mə ɗewe kaɗ am duduz ngə jik yikwan mə ɓas kə zlim zləgam səna. Pol tu vah am zləgam, kərgawla təm wanay tik, filen. Lay sin aawan, sin ndəvay tik dəga aa mə jik taa wəzlav tə talan celen mə makaɗ tik nha a kayək, gbiɓ! Hidiy viy kə kafta, va janta sin mə məcah za. 10 Za Pol surohohoh a kayək angər kərgawla səna. Sin maa hosoh za, sin daɓ atalan tik, sin ɗiya ɓiy am ngəra ngetik, za luwen a hidigi: ‹‹Nəv mə gər kə mbirehin kwən! Sin a məc bəgwən.›› 11 Za acin, Pol avə hidiy məpərmay buwiy tan a jik tu wəzlav tə talan celen. Pol wəɗak bret za taniy ɗiya zəmta witikwitik avə hidigi. Za sin ɗiya zləgam bah nanha, nha lay dan. Adəwən səna, sin vətik. 12 Kərgawla tafnan wər lawlaw tik, hidiy ngazlta kəv ade ngetik. Lay taniy mə limiy kərgawla tafnan awana avə micin, tu bac nəv ngatan cike.
Pol sliɗ Torowas, va aliɓde Miletus
13 Pol a gər kə va a ngaz a Asos zagway, za kə diw kə va a Miletus. Kadaban səna acin, sin luw a yikwan kə pət am pay ngə zlan maza, yikwan kə va məpəlpəla kə sin. Zəni yikwan va acin. Yikwan ɗiya puw tik a Asos kə jan yikwan kə ɗə mbuluk witikwitik kə va a Miletus. 14 Sin maa jan yikwan a Asos za, sin pət angər yikwan am pay ngə zlan maza, za yikwan vəkin a Mitilene. 15 Yikwan sliɗ aabəgo za avə pay ngə zlan maza, yikwan hos atalan maza ma dəzdəz avə Kiyosª. Azlapat tik, yikwan hos a Samos. Adəwən wan mə səb tik, yikwan hos aliɓde Miletus. 16 Yikwan məv a Miletus, yikwan mə ton aa liɓde Efesus bəgwən, kadaban Pol a may kə wan ndas am hayək Asiya bəgwən. A vaz kə va a Ursalima, mana a jan za, məmbəlwa ngə Pantekosta kə jantik abəgo .
Pol zləgamen atalan mbalgamiy ngə mgbəw ngə mə səbiy Yesu tə Efesus
17 Yikwan maa hos a Miletus za, Pol zlən hid a Efesus kə ɗefenma atalan mbalgamiy ngə mgbəw ngə mə səbiy Yesu kə yigi. 18 Taniy maa hosiy angər Pol za, sin ɗiya luwenta: ‹‹Dəga am diw wan kat mə hosoy angər kin am hayək Asiya, hin mə sən ɗew ngaɗa adab kin za. 19 Kat tu ɗiyen kəzəɗ a Yesu Məmar hidi avə daɓ talan, avə teweɗ ɓəw am takwaniy dolom makavay yahudiy ta jariy kə wəzlakta kaɗ. 20 Hin mə sən za, təkəniy ngə mənehin kə sən Məmar hidi, kat tə ɓahehin kaɗ bəgwən. Kat tu ceɗehin zləgam ngə Bayzlav, za kat tu jəgwanehin təkəniy am lay ɓas ɓəw ade kin. 21 Kat luwen a yahudigi ɓəw hidiy maa səban tan par a yahudiy kə ciy ngəra, kə buwiy angər Bayzlav, kə vəliy nəv ngatan a Yesu Məmar yikwan.
22 Tanjinhi, kata va a Ursalima kadaban Mbiɗ ngə Bayzlav a luwakku kat kə va birtiɗ abəgo, zəni tə sən təkən məv kə hosohoh atalan ɗa abəgo bəgwən. 23 Təkən kat mə sən wər, ko a liɓde ceki kat mə ton, Mbiɗ ngə Bayzlav a luwakku av kə pekekta am jik jaw, av kə zlənakta takwan. 24 Amma, ko kat tə məc asənkwən kat tə ɗew avə micin, a kat wər prakprak. Təkən zay tik maa day a kat wər, kə way ɗiy kəzəɗiy cike Yesu Məmar Hidi mə vəlakku lawlaw. Kəzəɗ səna acin, kə ceɗ Ləbar Malaw atalan təkəniy malaw Bayzlav mə ɗiyu.
25 ‹‹Kat tu tal adab kin cike kə ceɗ ləbar atalan bay ngə Bayzlav. Zəni tanjinhi kat mə sən za, hin mə limek ɗahba. 26 Kadaban səna acin, apicah kata luwehin, mana hid takan tə dab kin tu lek, ma ngaɗa kwən. 27 Kat tə luw anhi, kadaban kat mə ceɗehin ləbar atalan təkəniy Bayzlav mə may cike wayza. Kat tə ɓahehin ko təkən takan bəgwən.
28 ‹‹Kata luwehin, mə kaw talan kin lawlaw. Mə puw hidiy Mbiɗ ngə Bayzlav mə vəlehin kə puw tik lawlaw wa mə gəlgəla ta njə kə puw təkəniy huviy tik. Mə ɗew kə mə gəlgəliy ngə hidiy təm mgbəw ngə hidiy ngə Bayzlav. Taniy nhi, Bayzlav a zlambaɗata a ɓiɓiz ngə kərti tik.
29 ‹‹Kat mə sən za, mandal kat tu vəɗa, hidiy av kə yiy adap kin kə ngaviy ɗew ngikin mana haz donu maa lem mə njə kə pət adab təmakiy kə kawta. 30 Ko hidiy sənan tə dab kin təm av kə diw kə ngawiy ma kə lebeɗ hidiy kə geɗiy səb mozlokotuf ngə Yesu kaɗ kə səbiy jəgwan ngatan. 31 Mə puw talan kin lawlaw acin! Mə slek talan, mə ɗiya di makaɗ kata awan adab kin. Vuɗu avə pic, kat tu ngəzehin takan takan avə teweɗ am həriya.
32 ‹‹Tanjinhi, kata geɗehin am nəv ngəra ngə Bayzlav. Za zləgam atalan malaw ngetik mə mənehin. Zləgam səna kwəl kə vəlehin gədan ngə vəl nəv ngəkin a Yesu day kə tamicek. Za sin kwəl kə vəlehin təkən malaw Bayzlav mə sləsləɓ kə vəlen a hidiy ngetik.
33 ‹‹Mandal ɗew ngaɗa adab kin, kat tə neh gədmazlən angər hidi kə vəlak suloy, melenge asənkwən ləkwətiy bəgwən. 34 Hin avə talan kin, hin mə sən za, kat tə ɗiy kəzəɗ avə ngəra ngaɗa kə jan təkəniy ngə kaw talan ɗa avə hidiy mə ngazlakta. 35 Am təkəniy cike, kat tu jəgwanehin, say hin kə ɗiy kəzəɗ anhi kə jan kə mən hidiy təm sanha. Nəmkwan kə ɓən atalan zləgam Yesu Məmar hidi sin atalan tik mə luwu: ‹Hid mə vəlen təkən a hidi, zəzay ngetik day kə ngə hid mə yək təkən səna.›››
36 Pol maa way zləgam ngetik za, sin avə hidiy cike gbəliy titimbiz. Zəni Pol ɗiya tarenta Bayzlav. 37 Adəwən səna, hidiy ɗiya hanigi. Ɗiya tərlakiy kəsəm avə Pol, ɗenta mbeli lawlaw kə jan kə luwenta sin kə va avə zoy. 38 Taniy ɗiya denigi, a deniy day ɗər lay Pol mə luwenta, taniy a limta ɗaba. Zəni ɗiya ngazlta hos am lay sin tu kə pət am pay ngə zlan maza.