Pol awan aliɓde Efesus
19
Mandal Apolos awan aliɓde Korintu, Pol ɗiya tal am hayəkiy tə talan wurum, za acin, sin hos aliɓde Efesus. Sin jan hidiy sənan mə səbiy Yesu abəgo. 2 Zəni sin ɗiya nehta, ɗiya luw: ‹‹Hin mə jan Mbiɗ ngə Bayzlav za mandal hin mə vəl nəv kin a Yesu za vu?›› Taniy ɗiya zlawta, luwta: ‹‹Yikwan mə zlim zləgam atalan Mbiɗ ngə Bayzlav ɓahbəgwən.›› 3 Za Pol ɗiya nehta, ɗiya luw: ‹‹Mana asəna, baptisma hin mə yəku, mə yək madaba mana aceki?›› Taniy zlawta, ɗiya luwta: ‹‹Yikwan mə yək baptisma Yuhana mə ɗiyen a hidigi.›› 4 Za acin Pol ɗiya luw: ‹‹Amicek, Yuhana a juroɓen baptisma a hidiy mə ciy ngəra am mə ngavngav ngatan. Yuhana səna a luwen a yahudigi, hid məpərmay av kə yah adəwən ɗa. Lawlaw hidiy kə vəliy nəv ngatan a hid səna. Hid səna acin Yesu.››5 Adəwən taniy maa zlimiy zləgam ngə Pol za, taniy yəkiy baptisma am zlim ngə Yesu Məmar Hidi. 6 Pol ɗiy ngəra atalan tan. Mbiɗ ngə Bayzlav surohohoh atalan tan, za taniy diw kə zləgamiy a ma maa parpar maa taniy aa sənta amicek ɗahkwən, za ɗiya ceɗiy zləgam ngə Bayzlav a hidigi. 7 Hidiy mə yəkiy baptisma səna, taniy gəɓ atalan saray.
8 Mandal Pol awan a Efesus, tər makaɗ sin a njə kə va hoyhoy am jik jəgwan ngə yahudigi. Abəgo, sin ɗaw kə zləgamen a hidigi mətak hovok. Sin ɗaw kə ceɗenta zləgam parpar təm Deftere ngə Bayzlav a hidiy atalan Bay ngə Bayzlav, kə jan taniy kə yəkiy zləgam səna. 9 Zəni hidiy sənan tə dab tan, nəv ngatan toytoy ɓoniy kə yəkiy zləgam ngə Bayzlav. Akibik hidiy cike wayza, a njə kə zləgamiy ma mə ngavngav atalan mozlokotuf ngə Məmar Hidi. Za acin Pol geɗta, za vətik witikwitik avə hidiy mə vəliy nəv ngatan a Yesu. Adəwən səna, hoyhoy Pol a njə kə ngiway avə hidiy təm jik jəgwan ngə hid məpərmay zlim tik Tiranus.
10 Pol a ɗiy atəgo aliɓde Efesus di saray. Lay sin ta ɗiy atəgo, Yahudiy avə hidiy ma səban tan par a yahudiy təm hayək Asiya cike wayza, tu zlimiy zləgam ngə Bayzlav atalan Yesu Məmar Hidi.
Zləgam atalan wəriy Sikewas
11 Bayzlav tu vəlen gədan a Pol ngə ɗiy təkəniy mogroy mə kpahiy talan. 12 Asəna acin, hidiy ɗaw kə ɓiyiy ləkwət mə mbəlem kəsəm ngə Pol ɓəw təkən ngə saɗ lay wiriɓ ngetik, kə dupenta a mə daldaliy a kəsəm. Mandal tu ɗiyta atəgo, a njə kə janiy zoy. Asəna təm, mandal tu ɗiyenta a hidiy njə mbiɗ mə ngavngav tə kəsəm, a njə kə gam mbiɗ mə ngavngav səna kaɗ.
13 Mandal səna, yahudiy sənan a njə kə viy am lay maa parpar kə gamiy mbiɗ mə ngavngav aa kəsəm hidiy za. A təliy kə gamiy mbiɗ mə ngavngav səna avə zlim ngə Yesu Məmar Hidi. A njə kə luwenta a mbiɗ mə ngavngav anhi: ‹‹Yikwan maa luwoh avə zlim ngə Yesu Məmar Hidi Pol taa njə kə ceɗ ləbar ngetik, a pətah aa kəsəm gawal nhi za angaw!›› 14 Hidiy mə njə kə ɗiyta atəgo səna, wəriy ngə mordoy ngə masayiy ngə yahudiy məpərmay zlim tik Sikewas. Wəriy ngetik səna taniy cisaray. 15 Taniy maa luwenta a mbiɗ mə ngavngav atəgo za, mbiɗ mə ngavngav zlawenta, ɗiya luwenta: ‹‹Yesu, kata sənu. Pol təm, kata səntik. Ya hin acin wər, hin yi?›› 16 Hid njə mbiɗ mə ngavngav tə kəsəm, griv mbir adab tan kə jəgəm. Sin day a dayta a gədan. Sin ɗiyenta takwan dayday. Sin duroɓ duroɓenta kəsəm, sin ngok ngok lukwətiy tə kəsəm tan. Zəni taniy siy tan aa de səna za kəsəm maymay. 17 Yahudigi ɓəw hidiy ma səban tan par a yahudigi tə liɓde səna ma zlimta atəgo za, ɗiya hovokiy dayday. Ɗiya luwta: ‹‹Zlim ngə Yesu Məmar Hidi awana avə gədan mordoy.››
18 Hidiy dolom mə yəkiy Yesu yiy ceɗiy mə ngavngav ngatan akibik hidiy cike wayza. 19 Hidiy dolom mə njə kə ɗiyiy mə wəzlwəzlək dahiy ɗereweliy ngatan. Kəɗawta kaɗ akibik hidiy cike wayza. Səkəm ngə ɗereweliy səna, nəf nəfta avə kə ɗiy suloy gabal ngər joɓən (50 000). 20 Avə gədan ngə Bayzlav, hidiy dolom zlimiy zləgam ngetik lay mə limiy təkəniy mə toniy səna. Zləgam ngə Bayzlav ɗiya fuful kibik kibik.
Hidiy tə liɓde Efesus a yəkiy Pol bəgwən
21 Adəwən səna, Pol ɓən lawlaw sin kəv a Ursalima. Sin a ton aa mə hayək Makedoniya, zəni a ton aa mə hayək Akaya, za kə hos a Ursalima. Sin ɗiya luw: ‹‹Adəwən kat tu hos abəgo, say kat kə hos təm a Roma››. 22 Zəni Pol zlən calmandaliy tik mə ɗiyiy kəzəɗ saray am hayək Makedoniya. Hidiy səna acin Timote avə Erastus. Amma sin wər ɗew wan gwedek am hayək Asiya.
23 Mandal səna, gbezlerma mordoy ɗiy a liɓde Efesus atalan səb mozlokotuf ngə Yesu. 24 Hid məpərmay ɗaha abəgo, zlim tik Demetiriyus. A njə kə ɓəsl jah zugwigi avə vezek ngə ta suloy. Zugwa səna werti, zlim tik Artemis. Demetiriyus avə wəriy gawliy ngetik a njə kə janiy suloy dolom avə kəzəɗ səna.
25 Za acin, Demetiriyus ɓas ɓas hidiy mə ɗiyiy kəzəɗ ngetik avə hidiy mə ɗiyiy mahzla mana sin. Sin ɗiya luwenta: ‹‹Gawligi, hin mə sən za, yikwan mə jan nja mbelmbel kəzəɗ nhi. 26 Amma hin avə talan kin hin mə lim za, za hin mə zlim təkən gawal ta luwta Pol nhi mə ɗiy za, sin a luwen a hidigi, zugwiy yikwan ta njə kə ɓəslta nhi bayzlaviy kwən. Hidiy dolom aa yəkiy ma ngetik. Awənhi agendik kwən, amma hidiy təm hayək Asiya cike wayza. 27 Mana anhi, hidiy a cəcefiy mazla ngiykwan kwən. Za maa day ɗər, hidiy av kə geɗiy jah zugwa ngiykwan kaɗ, za av kə geɗiy mbəzl zugwa ngiykwan werti Artemis nhi kaɗ təm. Mindiwin, zugwa ngiykwan Artemis nhi, zugwa mordoy hidiy parpar tə Asiya ɓəw təm talan mayək cike wayza a njə kə mbəzlta. Mana hidiy tu yəkiy zləgam ngə Pol, zay ngə zugwa ngiykwan nhi ɗahɗaba.››
28 Hidiy maa zlimiy zləgam ngə Demetiriyus za, nəv ɗiya hamenta dayday. Taniy ciywəla ɗiya luwta: ‹‹Artemis zugwa werti, yikwan hidiy Efesus taa mbəzl nhi, zugwa mordoy! 29 Adəwən səna gwedek, hidiy ɗiya cakwayiy gbezlerma səna mgbaw liɓde. Za kawiy hidiy saray Gayus avə Aristarkus hidiy mə yiy taa mə hayək Makedoniya za, mə ngazliy Pol am mbuluk tik. Taniy tepta am lay ɓas ngatan maa hoyhoy. 30 Pol aa may kə ɗef talan tik akibik zəgudu, amma hidiy mə yəkiy Yesu a geɗenta mozlokotuf ɓahbəgwən. 31 Hidiy mogroy sənan təm hayək Asiya ngwalayiy ngə Pol. Zləniy hidiy kə luwenta a Pol mə gər kəv am lay ɓas ngə hidiy kwən. 32 Mandal səna, adab zəgudu hidiy a gbezleriy ma. Hidiy a ciywəla hayya. Zəni hidiy dagay tik a sənta a ɓasiy makavay mi bəgwən. 33 Njə yahuda ɗaha abəgo zlimtik Aleksandər, yahudiy məpərmay goɗta akibik kə jan sin kə zləgamen a hidigi. Za hidiy sənan tə dab zəgudu ɗiya pəslenta madaba ma səna acin. Za acin Aleksandər zləgamenta avə ngəra taniy kə njiy tehte kə jan sin kə zləgamenta. 34 Amma maa zlimta sin njə yahudiya za, taniy cike wayza diw kə ciywəla witikwitik, ɗiya luwta: ‹‹Artemis zugwa werti, yikwan hidiy Efesus ta mbəzl nhi, zugwa mordoy!›› Mə ɗiya masa saray a ciywəla.
35 Anhi acin, hid mordoy mə njə kə ɗəɗef tə liɓde səna, pəcə pəcə mə jan kə luwen a hidiy kə besiy kaɗ, hidiy njiy tan tehte. Sin ɗiya luwenta: ‹‹Hin hidiy tə Efesus, hidiy a sənta wayza, gugwən ngə zugwa werti Artemis, a ndəva aa dibizlav za awənhi.›› Zəni hidiy a sənta wayza, hidiy tə liɓde Efesus acin ngə puwiy jah zugwa mordoy ɓəw gugwən mə sləniy zugwa səna. 36 Ko hid takan ngə luw atəgo kwən wər ɗahkwən. Asəna acin, mə bes kaɗ, mə ɓən lawlaw zagway kə diw hin kə ɗiy təkənigi. 37 Hin mə dah hidiy nhi awənhi kemi? Mə həliy təkəniy tə jah zugwa za vu? Taniy mə riy zugwa ngiykwan werti za vu? Awwo! 38 Pic ngə zla dalgway ɗaha. Hidiy ngə zliy dalgway ɗahigi. Mana Demetiriyus avə hidiy mə ɗiyiy kəzəɗ avə sin awaniy avə ma a hidi, lawlaw taniy mə centa wəla a gawal səna am pic ngə zla dalgway. 39 Mana hin ma may kə zaɓ ma məpərmay baha, hin kə tep ma səna akibik hidiy mə zliy dalgway taniy kə zliy ma tik. 40 Amma makavay təkən mə ɗiy tapicah nhi, mana yikwan mə gar lawlaw bəgwən, hidiy Roma av kə luwta yikwan mə ɗiy mə ngavngav za. Av kə luwta yikwan mə dah gbezlerma za aliɓde. Kadaban yikwan kwəl kə pəsl ma tik a hidiy Roma, yikwan mə ɗiy gbezlerma nhi kemi kwən. 41 Adəwən hid mordoy mə njə kə ɗəɗef maa luw atəgo za, sin luwen a hidiy kə viy tan ade.