Pol awan aliɓde Korintu
18
Adəwən səna, Pol gar aa Atena za, va a Korintu. 2 Abəgo, sin jan njə yahudiya məpərmay zlim tik Akilas a mbuwta am hayək Pontus. A yiy mbeh nhi aa mə hayək Italiya za avə werti tik Priskila. A yiy abəgo za nhi, kadaban Kalawdiyus bay mordoy ngə roma a luw yahudiy cike kə jeliy tan aa Roma za. Zəni Pol va kə safahta.3 Mazla ngatan avə Pol takan, ɗaw kə ɗiyiy mazlaɓ kə ber. Pol a ɗew avə tanigi kə jan kə ɗiyiy kəzəɗ witikwitik. 4 Hoyhoy am pic nəp ngə yahudigi, Pol a njə kə pət am jik jəgwan ngə yahudigi, ɗaw kə ngiway avə yahudigi ɓəw yunanikigi. Pol a mbəlam avə zləgam parpar kə jan taniy kə yəkiy zləgam ngə Yesu.
5 Silas avə Timote maa yiy aa Makedoniya za, Pol vəl talan tik cike kə ceɗ zləgam ngə Bayzlav. Ɗaw kə pəslen a yahudigi Yesu acin Kristu. 6 Amma yahudiy a yəkiy ma ngetik bəgwən, ɗiya rəta. Zəni Pol ɗiya mbic kirbitil təm ləkwətiyª tik kaɗ, za ɗiya luwenta: ‹‹Mana hin tu lek, mə ngavngav ngəkin acin mə lekehin. Kata wər, ma ngaɗa ɗah akimin kwən! Dəga tanjinhi, təv ɗa kə ceɗ ləbar ngə Bayzlav a hidiy maa səban tan par a yahudigi.›› 7 Pol pətah tik aa mə jik jəgwan ngə yahudiy za. Sin va tik ade gawal məpərmay zlim tik Titus Yustus, hid mə njə kə mbəzl Bayzlav. De ngetik mbeh a jik jəgwan ngə yahudigi. 8 Amma Kirispus talan mbalgam ngə jik jəgwan səna, yək zləgam ngə Bayzlav sin avə de ngetik cike wayza. Hidiy tə Korintu dolom mbaɗiy kə hidiy mə yəkiy Yesu, lay taniy mə zlimiy zləgam ngə Pol. Za acin, taniy yəkiy baptisma.
9 Ngə vuɗu məpərmay, Məmar Hidi ɗef talan tik a Pol wa aa sisin, za luwenni: ‹‹Hoh hovok kwən, a səb avə zləgam, hoh gər kə njə tehte kwən, 10 kadaban kata, kata awana avə hoh, za hid ngə ɓəs kə kawoh za kə ɗiyoh mə ngavngav ɗahkwən. Aliɓde nhi, hidiy ngaɗa ɗahiy dolom.›› 11 Pol ɗew a Korintu di takan avə təra kwəh. Aa jəgwanen zləgam ngə Bayzlav a hidigi.
Pol awan akibik bay Galiyon
12 Am mandal Galiyon acin bay ngə Akayaª, Yahudiy cike wayza zleriy ma kə jupiy Pol, kawta, zəni tepta am lay zla dalgway. 13 Za ɗiya luwta: ‹‹Gawal nhi a lebeɗ hidiy kə mbəzliy Bayzlav par a mana mə jawjaw mə mayu!›› 14 Pol a may kə zlawenta, amma bay Galiyon luwen a yahudigi: ‹‹Mana gawal nhi mə ngav mə zugzugwa ngə hayək ngiykwan za, asənkwən a ɗiy mə ngavngav məpərmay, mindiwin, təv kə zlim ma ngəkin lawlaw. 15 Amma ngəkin, hin mə gəɓəz atalan ma, atalan zlimigi, za ɓəw atalan mə jawjaw ngəkin gingin. Asəna acin, ma ngəkin gingin! Kata may kə zla dalgway ngə təkəniy mana nhi kwən!›› 16 Zəni bay Galiyon gamta kaɗ aa mə lay zla dalgway za. 17 Za acin hidiy cike wayza kawiy Sostenes talan mbalgam ngə jik jəgwan ngə yahudigi. Ɗiya zarta am lay zla dalgway. Amma bay Galiyon ma ngetik ɓahɗakwən.
Pol jəɓ kəv aliɓde Antakiya təm hayək Siriya
18 Adəwən səna, Pol ɗew wan ndas a Korintu, za sin sliɗ tik aa dab hidiy mə səbiy Yesu za. Sin va avə Priskila ɓəw Akilas a Kenkereya. Abəgo, Pol zlar talan kaɗ kə jan kə ɗefen a hidiy təkən sin mə luw av kə ɗiyen a Bayzlav, sin mə ɗiy za. Za taniy pətiy am pay ngə zlan maza, viy a Antakiya təm hayək Siriya. 19 Hosiy a liɓde Efesus. Pol geɗ Priskila avə Akilas abəgo. Mandal sin awan abəgo, sin va pət a jik jəgwan ngə yahudigi, ɗiya ngiyway avə tanigi. 20 Taniy tariy Pol kə ɗew wan ndas avə tanigi abəgo, zəni Pol a ngəm ɓahbəgwən. 21 Sin sliɗ adab tan za, ɗiya luw: ‹‹Mana Bayzlav mə ngəma za, təv kə jəɓahah am pic məpərmay angər kin. ‹‹Za sin sliɗ tik aa Efesus za, pət am pay ngə zlan maza, vətik.
22 Pol maa hos aliɓde taa njə kə luwta Kaysariya za, sin sərohoh aa mə pay ngə zlan maza za, va a liɓde Ursalima kə ɗen mbeli a hidiy təm mgbəw ngə mə səbiy Yesu zagway, za acin sin sliɗ tik aabəgo za, vətik a Antakiya təm hayək Siriya. 23 Sin ɗew aliɓde səna ngə wan gwedek, za sin vətik. Sin ɗiya ton a mə hayək Galatiya ɓəw a mə hayək Firigiya, za ɗaw kə vəlen gədan a hidiy mə səbiy Yesu.
Apolos a ɗiy jəgwan a Efesus ɓəw a Korintu
24 Njə yahudiya zlim tik Apolos a mbuwta a Aleksandiriya, yah aliɓde Efesus. Sin aa sən kə ɗiy jəgwan lawlaw, za aa sən deftere ngə Bayzlav lawlaw. 25 Mə jəgwanenta zləgam ngə Yesu Məmar hidi za lawlaw, sin hid maa ɓenɓen, aa ceɗ ma ngə Yesu, za aa jəgwanenta ma səna kpekpe a hidigi. Zəni atalan baptisma wər, sin a sən baptisma ngə Yuhana dap. 26 Zəni Apolos nap ceɗ zləgam ngə Bayzlav mətak hovok a hidiy am jik jəgwan ngə yahudigi. Priskila avə Akilas maa zlimiy jəgwan ngetik za, taniy ɗefentəma ade tan, za taniy jəgwanenta səb Mozlokotuf ngə Bayzlav baha day kə tamicek. 27 Za Apolos ɗiya sləsləɓ kəv am hayək Akaya. Hidiy mə səbiy Yesu vəlenta gədan. Ɗəɗefenta ɗerewel a galmayiy tan təbəgo, kə luwenta kə yəkiy Apolos lawlaw. Sin ɗiya va, maa hos abəgo za, sin tu mən hidiy mə səbiy Yesu təbəgo godokwən, kadaban Bayzlav aa ɗiy kəzəɗ avə sin. 28 Za akibik hidiy cike wayza, sin tu zləgamen a yahudigi avə gədan kə jan kə ceɗenta ɓən ngatan nhi, ɓən malaw kwən. Sin ceɗenta avə deftere ngə Bayzlav, mindiwin Yesu acin Kristu.