Pol avə Silas viy aliɓde Tessaloniki
17
Pol avə Silas toniy aa liɓde Amfipolis ɓəw liɓde Apoloniya, za hosiy a Tessaloniki. Jik jəgwan ngə yahudiy awan abəgo. 2 Pol va pət a jik səna mana maa hoyhoy. Mə ɗiya pic nəp ngə yahudiy makaɗ, a njə kə ngiyway avə yahudigi atalan Deftere ngə Bayzlav. 3 Sin a njə pləslenta madaba ma səna, za a njə kə luwenta anhi: ‹‹Say Kristu kə zlən takwan, sin kə məc, za kə mbəlah aa mə məc za. Kristu səna acin Yesu kata taa ceɗehin nhi.›› 4 Hidiy sənan tə dab yahudigi yəkiy zləgam ngə Pol avə Silas səna, za lapiy avə tanigi. Yunaninkiy dolom mə mbəzliy Bayzlav lapiy avə tanigi, za wertiy mogroy yəkiy zləgam ngə Pol təm.5 Amma yahudiy məpərmay ɗiyenta ngərak a Pol avə Silas. Viy, tar tariy gberzlem hidiy taa taliy hayya a kəmay luma. Taniy ɓasɓasiy zəgudu, za ɗiya lebeɗta kə ɗiyiy gbezlerma aliɓde. Taniy viy ade ngə hid məpərmay zlim tik Yason kəv kə jariy Pol avə Silas. Anhi acin a gər kə tepta akibik hidigi. 6 Zəni a janta bəgwən. Kadaban səna, taniy kawiy Yason avə hidiy sənan mə səbiy Yesu, tepta akibik hidiy mə zliy dalgway tə liɓde səna. Za ɗiya ciywəla, luwta: ‹‹Pol avə Silas tu ɗiyiy gbezlerma am talan mahayək cike wayza avə jəgwan ngatan. Za tanjinhi, awaniy aliɓde ngiykwan awənhi. 7 Yason yəkta ade ngetik. Hidiy səna aa səbiy mə jawjaw ngə bay mordoy ngə Roma məmar hayək roma cike ɗahkwən, a njə kə luwta, bay məpərmay ɗaha, zlim tik Yesu.›› 8 Hidiy mə zliy dalgway avə zəgudu maa zlimiy zləgam nhi za, ɗiya denigi. 9 Za acin, luwenta a Yason avə hidiy mə səbiy Yesu kə wərəkiy suloy dolom kə jan mə zliy dalgway kə geɗta kaɗ.ª
Pol avə Silas viy aliɓde Bereya
10 Vuɗu maa ɗiy za, hidiy mə səbiy Yesu tə Tesaloniki luwenta a Pol avə Silas kə viy aliɓde Bereya. Maa hosiy aliɓde səna za, viy am jik jəgwan ngə yahudigi. 11 Yahudiy tə liɓde Bereya awaniy avə ngar malaw day tə Tesaloniki. Zlimiy zləgam ngə Bayzlav avə nəv takan. Hoyhoy a njə kə kwəsaliy deftere ngə Bayzlav kə jan kə səniy ləbar Pol taa ceɗenta wər mindiwin vu. 12 Maa sənta atəgo za, hidiy tə dab tan dolom vəliy nəv ngatan a Bayzlav. Adab yunaninkigi, wertiy mogroy ɓəw mawəliy ndas tu vəliy nəv ngatan a Bayzlav təm.
13 Amma yahudiy tə Tesaloniki maa zlimta Pol a ceɗ zləgam ngə Bayzlav aa bereya za, taniy viy aliɓde səna, ɗiya lebeɗiy hidiy kə mgbezlerima a Pol. 14 Njoɗ hidiy mə səbiy Yesu ngazliy Pol atalan maza. Zəni Silas avə Timote ɗewiy tan aliɓde Bereya. 15 Hidiy mə ngazliy Pol səna, tepta hos a Atena. Adəwən səna, taniy jəɓiy a Bereya. Za viy kə luwenta a Silas avə Timote anhi :‹‹Pol a luw hin kə va angaw angər tik.››
Pol ceɗ ləbar malaw aliɓde Atena
16 Pol aa puw Silas avə Timote aliɓde Atena. Mandal səna, sin lim mana hidiy tə liɓde səna ta mbəzliy zugwa. Sin ɗiya den kadaban lay sin mə limta. 17 Sin va am jik jəgwan ngə Yahudigi. Abəgo, Pol ɗiya ngiway a yahudiy ɓəw avə yunaninkiy mə mbəzliy Bayzlav. Zəni am lay hidiy mə njə kə mgbəwiy aliɓde, a njə kə ngiway hoyhoy avə taniy təm.
18 Abəgo səna, hidiy sənan mə səniy təkən ta njə kə ɗefentəma Epukirigiª ɓəw Sitoykigiª yiy təm kə zləgamigi avə Pol. Hidiy sənan luwta: ‹‹Nhi hid mə cokoɓ ma! A gər kə ceɗ ma ngemi?›› Hidiy sənan təm luwta: ‹‹A zləgam atalan zugwa ngə hidiy məpərmay zen siki.›› A luwta anhi, kadaban Pol aa ceɗ ləbar malaw atalan Yesu. A ceɗ təm hidiy av kə mbəliy aa mə məc za. 19 Taniy luwenta a Pol kə va avə tanigi. Tepta akibik hidiy mə zliy dalgway ta njə kə ɓasiy am Areyopagus, za ɗiya luwenta: ‹‹Hoh kwəl kə ceɗ yikwan jəgwan ndawyan hoh taa ɗiy nhi vu?›› 20 Hoh zləgam yikwan mətak bes atalan təkəniy ndawyan maa yikwan maa sən ɗahkwən. Za yikwan mə gər kə sən madaba ma tik.››
21 Asəna acin, hidiy tə Atena cike wayza avə mbulukiy tə bəgo, zlayiy talan tan kə ceɗiy ma ndawyan asənkwən kə zlimiy jəgwan ndawyan.
22 Za acin, Pol gar akibik hidiy mə zliy dalgway tə liɓde Atena, za ɗiya luwenta: ‹‹Hin hidiy tə Atena, kat saf hin nhi, hin hidiy mə njə kə mbəzliy zugwiy kin ma parpar lawlaw. 23 Am mandal kata taa tal am walan de ngəkin, kat lim təkəniy hin mə ndənta kə mbəzl. Kat lim ɗər lay hin mə zaɓu kə feten təkən a Bayzlav, za hin ɗəɗef akimin anhi :‹‹A Bayzlav mətak sən.ª›› Asəna wər, kat tə yah kə ceɗehin Bayzlav hin taa mbəzl tik mətak sən səna. 24 Bayzlav mə ndən talan mahayək avə təkəniy tə kimin cike wayza, sin acin məmar dibizlav avə mahayək. Sin aa ɗew a jik hidiy mə ndənta ɗahkwən . 25 Sin aa may mən ngə hid za kə jan kə ɗew avə micin bəgwən, təkən mə fəsəken ɗahkwən. Aska ɗər sin acin mə njə kə vəl micin, nəp a hidigi ɓəw sin acin mə njə kə vəl təkəniy cike wayza. 26 Avə hid takan, sin ndən səbaniy parpar kə jan kə ɗewiy am talan mahayək. Sin acin mə ver halah ngə hayəkigi. Sin acin mə sla diy ngə təkəniy cike wayza. 27 Bayzlav a ɗiy atəgo kə jan hidiy kə jarta. Ko mana awaniy avə takwan ngə jar tik, av kə janta zen. Mindiwin, sin ɗaha gaf avə yikwan kwən. 28 Mana mə luwta:
‹‹Yikwan mə ɗew kadaban sin,
mbelmbel sin acin yikwan maa tal,
za yikwan mawana micin.››
Hidiy mə jəkiy drif tə dab kin sənan təm mə luwta za anhi:
‹‹Mindiwin, yikwan wəriy ngetik.››
29 Anhi acin, yikwan wəriy ngə Bayzlav. Yikwan mə gər kə ɓən Bayzlav cece təkən hidiy mə ndənta avə melenge, avə suloy asənkwən avə gugwən kwən. Təkəniy nhi, hidiy a ɗiyta avə ngəra ngatan ɓəw avə ɓən ngatan dap. 30 Za Bayzlav aa ɓən atalan mə ngavngav hidiy mə ɗiyta taməcek ɗahkwən, kadaban mandal səna, hidiy a sənta ɗahkwən. Zəni tanjinhi, sin a ɗefenma a hidiy təm hayək cike wayza kə zlambaɗiy ngar ngatan kaɗ. 31 Asəna acin, Bayzlav tu sla pic sin tu kə zla dalgway ngə talan mahayək avə mindiwin. Sin wel hid takan makavay səna, za sin mbəlah kaɗ aa mə məc za. Avə kə ɗiy anhi acin, Bayzlav tu ɗef a hidiy cike wayza gawal nhi acin sin mə wel ngə zla dalgway səna.
32 Yunaninkiy maa zlimta mana Pol mə luw Bayzlav kwəl kə mbəlah hid aa mə məc za, hidiy sənan ɗiya mbisenta. Zəni hidiy məpərmay ɗiya luwta: ‹‹Yikwan məv kə teh zlimi am pic məpərmay, mandal hoh tu kə zləgam atalan təkəniy nhi baha!›› 33 Za adəwən səna Pol geɗta, vətik. 34 Zəɗər hidiy sənan vəliy nəv ngatan a Bayzlav, za səbiy Pol. Adab tan, məv kə jan Diyonisiyus hid tə dab mə zliy dalgway tə Atena, wer ɗaha zlim tik Damaris, za ɓəw hidiy məpərmay təm.