Timote lapiy avə Pol ɓəw Silas
16
Adəwən səna, Pol avə Silas viy a liɓde Derbe, za sliɗiy aabəgo za, viy a Listra. Hid ɗaha abəgo, mə njə kə səb Yesu, zlim tik Timote. Mamay tik njə yahudiya mə njə kə səb Yesu, bahbay tik wər njə yunanin. 2 Hidiy mə səbiy Yesu tə Listra ɓəw tə Ikoniya a njə kə zləgamiy ma malaw atalan Timote. 3 May ngə Pol wər, kə lap kə viy avə sin. Yahudiy təm hayək səna aa sənta wayza bahbay ngə Timote wər njə yunanin, kadaban səna acin, Pol zla mandawal ngə Timote kaɗ, za lapiy avə sin, viy tan.4 A liɓde taniy mə toniy cike, a njə kə ceɗiy ləbar ngə məzlənzləniy ngə Yesu ɓəw talan mbalgamiy ngə mgbəw ngə mə səbiy Yesu mə jawta tə Ursalima a hidiy mə səbiy Yesu. A njə kə luwenta a hidiy kə ɗiyiy təkəniy mana mə jawta səna. 5 Za acin, hidiy mə səbiy Yesu tu janiy gədan ngə vəl nəv a Yesu day kə taməcek. Hoyhoy hidiy mə səbiy Yesu a fufuligi.
Pol lim hid tə Makedoniya waa a sisin
6 Adəwən səna, Pol avə Silas a gər kə viy kə ceɗiy zləgam ngə Bayzlav am hayək Aziya, amma Mbiɗ ngə Bayzlav takta kaɗ. Za acin taniy toniy aa mə hayək Firigiya ɓəw Galatiya. 7 Mandal taniy mbeh kə hosiy am hal ngə hayək Misiya, gəriy kə viy am hayək Bitiniya, amma Mbiɗ ngə Yesu a geɗenta mozlokotuf ɓahbəgwən. 8 Za acin taniy toniy aa mə hayək Misiya za, surohiy am lay ngə payiy ngə zlan maza ta gariy tə liɓde Torowas. 9 Avə vuɗu, Pol lim hid tə Mekadoniya waa a sisin, mə gara kaɗ, aa pəl Pol dayday, a luwenni: ‹‹A yah a Mekadoniya kə mən yikwan!›› 10 Adəwən Pol mə lim hidi waa am sisin səna za, yikwan sləsləɓ kə va a Mekadoniya, kadaban yikwan mə sən za Bayzlav acin mə ɗef yikwanª ma kəv kə ceɗ ləbar ngetik abəgo.
Lidiya tə Filipi vəl nəv ngetik a Məmar hidi
11 Yikwan pət am pay ngə zlan maza a Torowa, yikwan va kin a Samotaras, hayək maa mgbaw tav yəm. Apat tik, yikwan va kin a liɓde Neyapolis. 12 Aabəgo za, yikwan va a liɓde Filipi, liɓde tizin təm hayək Mekadoniya, liɓde səna Roma acin məmar tik. Yikwan mə ɗiy wan gwedek abəgo.
13 Am pic nəp ngə yahudigi, yikwan pətaha aa liɓde za, yikwan va kin atalan maza, ɓən ngiykwan yikwan məv kə jan lay yahudiy ta tariy Bayzlav abəgo. Yikwan maa jan lay ngə tar Bayzlav za, wertiy mə ɓasiy kaɗ abəgo, yikwan ɗew kaɗ kə zləgam avə tanigi. 14 Wer takan tə dab tan zlim tik Lidiya a mbuwta a liɓde Tiyatir. A njə kə ber ləkwət ma wəzek səkəm tik tuwah, a njə mbəzl Bayzlav. Wer səna teheh yikwan zlimi, Bayzlav zlər nəv tik kə jan sin kə yək zləgam Pol mə luwu. 15 Sin avə hidiy tə de tik cike wayza yəkiy baptisma, za ɗiya luw yikwan: ‹‹Mana hin mə safak za kə hid mə vəl nəv ngetik a mə Məmar hidi, mə yah ɗew ade ɗa.›› Tar ngetik mbaɗ kə tak wəla a yikwan kə va ade tik.
Pol avə Silas awaniy am jik jaw a liɓde Filipi
16 Am pic sənan, yikwan maa va am lay ngə tar Bayzlav, bahlam kərtaza yah gbam avə yikwan. Kərtaza səna awana avə mbiɗ mə ngavngav a kəsəm. Mbiɗ səna ɗaw kə vəlen sən ngə ceɗ təkəniy tu kə yah. Hidiy məmarta ɗaw kə janiy suloy dolom angər hidigi, kadaban sin taa njə kə ceɗenta təkəniy tu kə yah avə talan. 17 Sin ɗiya səbah yikwan aa ca wəla aa luw: ‹‹Hidiy nhi, hidiy mə ɗiyiy kəzəɗ ngə Bayzlav maa fal! A yiy kə ceɗehin mozlokotuf ngə jan mbəl micin kin.›› 18 Kərtaza səna tu ɗiy atəgo wan ndas, adəwən səna, Pol nəv hamenni, cəhəriya aa dəwən luwen a mbiɗ mə ngavngav tə kəsəm kərtaza səna: ‹‹Musuruf, kata luwoh avə zlim ngə Yesu Kristu a pətah aa kəsəm kərtaza nhi za!›› Wak musuruf tafnan pətah tik aa kəsəm kərtaza səna za.
19 Hidiy məmariy bahlam kərtaza səna, limiy təkən mə ton səna. Taniy mə sənta za a janiy suloy avə kəzəɗ ngə kərtaza səna ɗaba. Za acin, taniy kawiy Pol avə Silas tepta am lay ɓas tə liɓde, kə jan talan mbalgamiy kə zlenta dalgway. 20 Tepta angər mə zliy dalgway ngə Romigi. Taniy ɗiya luwenta: ‹‹Hidiy nhi yahudigi, a njə kə ɗiyiy ngay a liɓde ngiykwan. 21 A njə kə jəgwaniy məzugzugwiy maa par avə məzugzugwiy yikwan hidiy Roma maa kwəl kə səb tik kwən, asənkwən yikwan kwəl kə yək tik kwən.
22 Za acin, zəgudu nəv ngatan hamenta dayday atalan Pol avə Silas. Mə zliy dalgway ngə romigi maa limta atəgo za, taniy luwenta a sojiy kə kwahiy lukwətiy tə kəsəm Pol avə Silas, za kə zarta avə lakwatay. 23 Maa rəbenta lakwatay dayday za, pekta kaɗ am jik jaw. Za luwenta a hid mə puw jik jaw, sin kə puwta lawlaw. 24 Hid mə puw jik jaw maa zlim atəgo za, sin tepta am jik wayway tik, za təm ngaz ngatan am dən.
25 Ngə dabdab vuɗu, Pol avə Silas a tariy Bayzlav, za a səbanta avə drif. Hidiy məpərmay təm jik jaw aa zlimta. 26 Njoɗ hayək ɗiya kəz a gədan, gingiɗgingiɗ. Jik jaw ɗiya kəz a gədan hos am lay mbasl jik tik. Wak za, məjijikiy zləriy tan nguray. Seleleniy mə jawiy hidiy təm jik jaw yoɓiy tan, koyoyoy. 27 Hid mə puw jik jaw fəɗah, pəlan. Sin lim mə jijikiy mə zləriy tan za. Sin a ɓən wər, hidiy təm jik jaw mə leriy tan cike wayza. Sin ɓiy maslalam, a gər kə wəzl talan tik kaɗ. 28 Amma Pol ɗiya cəwəla dayday, ɗiya luwenni: ‹‹Hoh gər kə ɗiyen takwan atalan koh kwən! Yikwan cike wayza yikwan mawan awənhi!›› 29 Hid mə puw jik jaw ɗiya jar kuhu, vaz ngaz kə va kə pət am lay mə jawiy taa Pol səna, sin a hovok, aa nənəh gbilih titimbiz a kibik Pol avə Silas. 30 Adəwən səna, sin ngazlata kaɗ acaɗak, sin nehta, ɗiya luw: ‹‹Aw mordoyɗigi, kat kə ɗiy aceki kə jan kat kə mbəl?›› 31 Pol avə Silas zlawenta, ɗiya luwta: ‹‹A vəlen nəv koh a Məmar yikwan Yesu, za av kə mbəloh, hoh avə hidiy tə de koh cike wayza.›› 32 Za Pol avə Silas ɗiya ceɗenta zləgam ngə Məmar Hidi a sin ɓəw a hidiy tə de ngetik cike wayza.
33 Ngə vuɗu səna, hid mə puw jik jaw ngazl Pol avə Silas. Sin goh gohenta mbəlah tə kəsəm tan kaɗ. Njoɗ sin yək baptisma, sin avə hidiy tə liɓ de tik cike wayza. 34 Adəwən səna, sin ngazl Pol avə Silas ade tik, vəlenta təkən ngə zəm. Sin avə hidiy tə de ngetik cike wayza aa waniy avə zəzay, lay taniy mə vəliy nəv ngatan a Bayzlav.
35 Lay maa dan za, mə zliy dalgway ngə romigi zləniy sojiy kəv kə luwenta a hid mə puw jik jaw kə fək Pol avə Silas kaɗ. 36 Hid mə puw jik jaw səna ceɗen a Pol: ‹‹Mə zliy dalgway ngə romiy a luwakta kata kə fəkehin kaɗ. Tanjinhi mə pətahah, məv kin avə zoy!›› 37 Amma Pol ɗiya luwen a sojiy tafnan: ‹‹Taniy a zliy dalgway ngiykwan ɓahbəgwən, za taniy bazlbazliy yikwan dayday akibik hidiy cike wayza! Zəmaa yikwan romigi! Za baha, taniy pekiy yikwan am jik jaw. Tanjinhi a gər kə fikiy yikwan aa mə jik jaw za avə ɓah? Awwo, nhi wər a ɗiy kwən! Taniy avə talan tan mə yigi, za mə fikiy yikwan kaɗ!›› 38 Sojiy ngə mə zliy dalgway səna vigi, ceɗenta zləgam səna a mə zliy dalgway. Taniy maa zlimta Pol avə Silas nhi taniy Romigi za, hovok ɗiyenta. 39 Anhi acin, taniy yigi avə talan tan a kibik Pol avə Silas kə tarta, kə geɗ mə ngavngav ngatan kaɗ. Taniy fəkahta kaɗ aa mə jik jaw za, tarta kə viy tan aa liɓde tan za.
40 Pol avə Silas maa pətiy tan aa mə jik jaw za, viy tan ade ngə Lidiya. Taniy janiy hidiy mə yəkiy zləgam ngə Yesu abəgo, vəlenta gədan, za viy tan a liɓde məpərmay.