Talan mbalgamiy ngə mə səbiy Yesu ɗiyiy ɓas a Ursalima
(Galatiya 2.1-9)
15
Hidiy məpərmay gariy aa mə hayək yahudiya za, viy a liɓde Antakiya təm hayək Siriya. Taniy jəgwanenta a hidiy mə səbiy Yesu təbəgo ɗiya luwta: ‹‹Mana hin mə zla mandawal mana mə jawjaw ngə Musa mə luw ɓahbəgwən, hin mə mbəl kwən.›› 2 Pol avə Barnabas a yəkiy jəgwan səna ɓahbəgwən. Ɗiya ngiway dayday avə hidiy səna makavay ma təgo. Adəwən səna, hidiy mə səbiy Yesu zleriy ma kə zləniy Pol avə Barnabas ɓəw hidiy məpərmay tə liɓde Antakiya kə viy a Ursalima kə zləgamiy avə məzlənzləniy ngə Yesu ɓəw talan mbalgamiy ngə mgbəw ngə mə səbiy Yesu atalan ma səna.3 Za hidiy təm mgbəw ngə mə səbiy Yesu tə Antakiya vəlenta təkəniy gəga ngə ɗəmbuluk a Pol avə Barnabas ɓəw hidiy məpərmay səna. Toniy aa mə hayəkiy Finikiya avə Samariya, ɗiya ceɗenta a hidiy mana aceki hidiy maa səban tan par a yahudigi mə yəkiy zləgam ngə Bayzlav. Am lay taniy mə toniy cike, hidiy mə səbiy Yesu mə zlimiy ləbar səna, tu zəzayiy dayday.
4 Pol avə Barnabas ɓəw hidiy məpərmay səna, maa hosiy a liɓde Ursalima za, hidiy təm mgbəw ngə mə səbiy Yesu avə məzlənzləniy ngə Yesu ɓəw talan mbalgamiy ngə mgbəw ngə səbiy Yesu, ɗiya yəkta ngəra səsaray, za Pol avə Barnabas ceɗen a hidiy səna təkəniy Bayzlav mə ɗiy avə tanigi. 5 Amma Farisiy məpərmay mə yəkiy Yesu sliɗigi, ɗiya luwta: ‹‹Say hidiy maa səban tan par avə yahudigi kə ngəmiy kə zla mandawal ɓəw kə səbiy mə jaw jaw ngə Musa.››
6 Məzlənzləniy ngə Yesu ɓəw talan mbalgamiy ngə mgbəw ngə mə səbiy Yesu ɓasiy kə ɗəwaliy ma tik. 7 Adəwən taniy maa ngiway dayday za, Piyer sliɗ, za ɗiya luw: Galmayɗigi, hin maa sən wayza Bayzlav a welek dəga aməcek za adab kin, kat kə ceɗ ləbar malaw a hidiy maa səban tan par a yahudigi, kə jan taniy kə zlimta, za kə yəkiy zləgam ngə Yesu. 8 Bayzlav taa sən nəv ngə hidiy cike wayza, sin avə talan tik acin mə vəlenta Mbiɗ ngetik mana sin mə vəl yikwan təm. A ɗiy atəgo nhi, kə jan kə ɗef yikwan sin aa mayta təm. 9 Bayzlav aa wel hidiy ɗahkwən. A kibik tik, yikwan yahudigi ɓəw hidiy maa səban tan par a yahudigi, yikwan takan. Yikwan takan kadaban sin mə goh nəv ngatan kaɗ kweɗek kweɗek lay taniy mə yəkiy Yesu səna. 10 Mana atəgo, hin mə gər kə taken wəla a hidiy mə yəkiy Yesu kə ɓiyiy səndək a talan tan kemi? Ko didiy ngiykwan, ko yikwan, yikwan mə ɓəs kə ɓiy səndək səna ɓahbəgwən. Hin mə gər kə sla nəv ngə Bayzlav wər kemi? 11 Zəmaa yikwan mə sən za, yikwan mə jan mbəl micin ngiykwan avə Yesu Məmar yikwan mə safah yikwan marɓən, taniy təm atəgo.
12 Za acin hidiy njiy tan tehte, aa zlimiy zləgam ngə Pol avə Barnabas taa ceɗiy mana Bayzlav mə vəlenta gədan ngə ɗiy təkəniy par par mə kpah talan ngə hidigi, adab hidiy maa səban tan par a yahudigi. 13 Maa wayiy zləgam tan za, Yakubaª ɓiy zləgam təm ɗiya luw: ‹‹Galmayɗigi mə tehek zlimi! 14 Tanjinhi Simon Piyer mə ceɗ yikwan za, dəga aməcek Bayzlav tu wel hidiy adab hidiy maa səban tan par a yahudigi, za kə mbaɗiy kə hidiy ngetik. 15 Zləgam səna mə va za tiɗtiɗe mana mokotufiy ngə Bayzlav mə ɗəɗefta am deftere.
16 Bayzlav a luw: ‹Jik ngə bay Dawda tu gom!
Təv kə jəɓaha kə zaɓ kaɗ am lay tik.
Za ko təkəniy tik mə ngaviy wayza, təv kə zaɓ kaɗ am lay tik baha.
17 Za acin, hidiy məpərmay av kə jariy kə sənakta kata Bayzlav mindiwin tik.
Hidiy təm talan mahayək cike wayza, kat welta kə ɗewiy kə hidiy ngaɗa.
Nhi acin ləbar Kat Bayzlav mə luwu təv kə ɗiytik.
18 Mana kat mə luwu dəga aməcek.›››
19 Yakuba ɗiya luw baha: ‹‹Ɓən ngaɗa wər, yikwan mə gər kə zlənen takwan a hidiy maa səban tan par a yahudigi mə yəkiy zləgam ngə Bayzlav nhi kwən. 20 Amma yikwan kə ɗəɗefenta am ɗerewel anhi: ‹‹Hin mə gər kə zəm vəreniy təm zugwa kwən, kadaban a njə kə dəbəz hidi akibik Bayzlav. Mə gər kə ɗiyiy vərndew kwən. Mə gər kə zəmiy vəren ngə təkəniy huvu mə məc məciy kwən, mə gər kə zəmiy ɓiɓiz kwən baha. 21 Yikwan mə luw atəgo nhi, kadaban dəga aməcek hidiy aa ceɗiy ləbar ngə mə jawjaw ngə Musa a liɓdiy par par nha hos tanjinhi, za baha, a njə kə jangita hoyhoy am pic nəp ngə yahudigi am jik jəgwan ngatan.
Ɗəɗefenta ɗerewel a hidiy ngə Yesu maa səban tan par a yahudigi
22 Adəwən Yakuba maa way zləgam ngetik za, talan mbalgamiy ngə mgbəw ngə mə səbiy Yesu avə zəgudu mə yəkiy Yesu cike wayza yəkiy zləgam ngetik. Taniy weliy hidiy sanan tə dab tan kə viy avə Pol ɓəw Barnabas kə jan kə zlənta a Antakiya. A weliy Yahuda ta ɗefentəma Barsabas ɓəw Silas. Taniy saray tik hidiy mogroy tədab tan. 23 A zlənta avə ɗerewel am ngəra, a ɗəɗefta anhi :
‹‹Yikwan məzlənzləniy ngə Yesu avə talan mbalgamiy ngə mgbəw ngə mə səbiy Yesu, yikwan galmayiy kin acin mə ɗəɗefehin ɗerewel nhi. Yikwan maa ɗehin mbeli hin hidiy mə yəkiy Yesu maa səban kin par a yahudigi tə liɓde Antakiya ɓəw təm hayək Siriya avə Silikiya.
24 Yikwan mə zlim hidiy sənan tə dab yikwan viy angər kin, kpahehin talan, vəlehin wəzən am nəv kin avə jəgwan ngatan, amma yikwan acin mə zlənayta kwən. 25 Kadaban səna acin yikwan zlerma witikwitik kə wel hidiy kə zlənta angər kin. Taniy av kə viy avə hidiy yikwan taa mayta dayday Barnabas avə Pol. 26 Pol avə Barnabas nhi, tu vəliy talan tan, ko hid av kə wəzlta kaɗ, av kə ɗiyiy kəzəɗ ngə Məmar yikwan Yesu Kristu. 27 Yikwan mə zlənehin Yahuda avə Silas, taniy av kə ceɗehin təkəniy yikwan mə ɗəɗef təm ɗerewel nhi waykaɗ. 28 Ɗaha law a Mbiɗ ngə Bayzlav ɓəw a yikwan kə capehin təkən maa ɓilik atalan kwən, say hin kə səb təkəniy mə jawjaw malaw day. 29 Anhi təkəniy səna: ‹‹Hin mə gər kə zəm vəreniy hidiy mə fatta am zugwa kwən. Mə gər kə zəm ɓiɓiz kwən. Za mə gər kə zəm vəren ngə təkən huvu mə məcməc kwən. Mə gər kə ɗiy vərndew kwən. Mana hin tu ɗiy atəgo wər, hin mə ɗiy təkəniy malaw za.
Bayzlav mə ɗiyehin ngərbay.››
30 Adəwən səna, geɗiy Barnabas avə Pol ɓəw Yahuda avə Silas, taniy viy acin a liɓde Antakiya təm hayək Siriya. Maa hosiy abəgo za, ɓasiy hidiy mə səbiy Yesu təbəgo səna, vəlenta ɗerewel mə zlənata avə sin tafnan. 31 Hidiy mə səbiy Yesu jangiy ɗerewel səna, maa zləmiy ma təm ɗerewel səna za, ɗiya zəzayiy dayday, kadaban ma səna mə vəlenta gədan za. 32 Yahuda avə Silas taniy mokotufiy ngə Bayzlav tu zləgamenta dayday a hidiy mə səbiy Yesu səna, vəlenta gədan ngə səb zləgam ngə Yesu.
33 Adəwən taniy maa ɗewiy wan ndas abəgo za, sliɗiy kə buwiy a Ursalima, hidiy mə səbiy Yesu luwenta: ‹‹Mə va avə zoy!›› Za taniy buwiy tan angər hidiy mə zlənta. 34 [Amma Silas wər ɗewey tik a Antakiya. Za Yahuda buw sin a gendik palpal a Ursalima.]
35 Pol avə Barnabas ɗewiy wan ndas a Antakiya. Taniy avə hidiy məpərmay dolom a jəgwanenta təkəniy a hidigi, a ceɗiy ləbar ngə Məmar Hidi.
Pol avə Barnabas pətarigi
36 Adəwən wan gwedek, Pol luwen a Barnabas: ‹‹Nəmkwan kə jəɓ a liɓdiy cike wayza yikwan mə ceɗeh ləbar ngə Məmar Hidi kə safah hidiy mə yəkiy Yesu təbəgo taniy waceki.›› 37 May ngə Barnabas wər, kə ngazliy Yuhana ta njə kə luwta Markus gəzza. 38 Amma Pol a ngəm bəgwən, kadaban Yuhana Markus a geɗta am hayək Pamfiliya. Yuhana geɗta mandal a wayiy kəzəɗ gesin bugwən. 39 Pol avə Barnabas maa ngiyway dayday za, taniy pətariy tan. Barnabas ngazl Yuhana Markus kə ɗiyiy mbuluk tan witik-witik, tapiy pay ngə zlan maza viy a Kiprus maa mgbaw tav yəm. 40 Pol təm wel Silas. Hidiy mə səbiy Yesu təbəgo tarenta Bayzlav kə ɗiyenta ngərbay. Za acin Pol avə Silas viy tan. 41 Taltaliy lay parpar təm hayəkiy Siriya avə Silikiya kə vəlenta gədan a hidiy təm mgbəw ngə mə səbiy Yesu təbəgo.