Pol avə Barnabas aliɓde Ikoniya
14
Pol avə Barnabas maa hosiy a Ikoniya za, pətiy a jik jəgwan ngə yahudiy təbəgo. Ceɗiy ləbar ngə Bayzlav a hidigi. Za acin yahudiy ɓəw hidiy səban tan par avə yahudiy dolom ɗiya yəkiy zləgam ngə Yesu. 2 Amma yahudiy mətak yəkiy ləbar səna, lebeɗiy hidiy səban tan par a yahudiy kə jan kə zeliy hidiy mə yəkiy Yesu. 3 Ko asəna, Pol avə Barnabas tu vahiy a liɓde Ikoniya. Ɗiya zləgamiy ma ngə Yesu Məmar hidi mgban mgban a hidiy mətak hovok. Za Məmar hidi vəlenta gədan ngə ɗiy təkəniy parpar mə kpah talan ngə hidiy, kə jan kə ɗefen a hidiy, zləgam tan atalan marɓen ngə Bayzlav nhi mindiwin.4 Zəni, hidiy tə liɓde səna a zlerima am walan tan bəgwən. Hidiy məpərmay yəkiy ɓən ngə yahudigi, za sənan təm yəkiy ɓən ngə məzlənzləniy ngə Yesu.
5 Am wan səna, yahudiy avə hidiy səban tan par a yahudigi ɓəw avə talan mbalgamiy tan sləsləɓiy kə jupiy Pol avə Barnabas, za kə ndəta avə gugwən kə wəzlta kaɗ mimci. 6 Zəni Pol avə Barnabas zlimiy ləbar səna. Taniy siy tan aa Ikoniya za. Viy tan apal ta liɓdiy Listira avə Derbe, təm hayək Likoniya ɓəw a liɓdiy ma parpar tə jagwar tik. 7 Abəgo təm, aa ceɗiy Ləbar Malaw atalan Yesu.
Pol avə Barnabas a Listra
8 A Listra, hid ngaz mə mgbəru mgbəru məpərmay awan abəgo. Ɗəga mbuwata a jan kə gar kə va ɓahbəgwən. 9 Am pic sənan, sin aa zlim zləgam ngə Pol. Pol cəhəriya atalan tik, lim gawal səna mə vəlen nəv tik za a Bayzlav. Gawal səna kwəl kə jan zoy a kəsəm tik. 10 Za acin Pol cəwəla dayday ɗiya luwenni: ‹‹A sliɗ za, a gar səksək avə ngaz koh!›› Gawal səna gar, vak, diw kə va. 11 Zəgudu maa limiy təkəniy Pol mə ɗiy səna za, ɗiya ciwəla a ma ngatan Likoniya. Ɗiya luwta: ‹‹Gawligi, bayzlaviy tu surohiy adab yikwan, mə mbaɗiy kə hidiy mamblen.›› 12 Centa zlimi a Barnabas Zes, a Pol təm Hermes ª kadaban Pol acin taa zləgam.
13 Jah zugwa ngatan Zes mbeh a bərmidigiɗ ngə liɓde Listra. Za masay ngə zugwa ngatan dah mbalaviy avə fufon pay gəzza, və gar a bərmidigiɗ. Masay tafnan avə zəgudu agər kə fattenta mbalaviy səna a Pol avə Barnabas, mana taniy taa njə kə tiy zugwa ngatan. 14 Amma Pol avə Barnabas maa zlimta atəgo za, kwahiy ləkwət tə kəsəm ngatan kaɗ, dəmiy ngaz, viy angər zəgudu ciwəla dayday, ɗiya luwenta: 15 ‹‹Hay gawligi, hin mə ɗiy atəgo mi? Yikwan hidiy mamblen mana hin kwən vu? Yikwan mə yah kə ceɗehin ləbar malaw. Yikwan mə gər kə ceɗehin zugwiy nhi, zay tan ɗahkwən, hin kə geɗ kaɗ. Hin kə buwah kə səb Bayzlav taa micin, mə ndən dibizlav avə talan mahayək, maza avə təkəniy tə kimin. 16 Aməcek, Bayzlav geɗ hidiy kə səbiy mozlokotuf taniy mə mayta. 17 Ko asəna, sin tu ɗefenta talan ngetik. Sin awan adab tan avə ɗiy təkəniy malawigi. Sin a njə kə zehin von aa dibizlav za. Kidi kidi, tuziy kin a njə kə ɗiyiy təkəniy ngə zəm lawlaw. A njə kə vəlehin gəda pas, za avə zəzay am nəv.›› 18 Ko asəna, Pol avə Barnabas aa takiy hidiy kə ɗewiy mətak fatiy mbalaviy səna pəcə pəcə.
19 Gwedek, yahudiy məpərmay yiy aa Antakiya təm hayək Pisidiya ɓəw a liɓde Ikoniya za. Ɗiya lebeɗiy hidiy kə ndiy Pol avə gugwən kə wəzlta kaɗ. Za hidiy ndiy Pol avə gugwən, ngazlta aa liɓde za, fəkta kaɗ a cahgandan sin mə məca za. 20 Amma hidiy mə səbiy Yesu maa ɓasiy abər Pol za, sin gar, jəɓtik aliɓde. Apat tik, taniy gariy avə Barnabas, viy tan aliɓde Derbe.
Pol avə Barnabas jəɓiy tan aliɓde Antakiya təm hayək Siriya
21 Pol avə Barnabas ceɗiy ləbar malaw aliɓde Derbe, hidiy dolom yəkiy zləgam ngə Yesu. Za taniy jəɓiy tan aliɓde Listra avə Ikoniya ɓəw Antakiya təm hayək Pisidiya. 22 Aliɓde taniy mə viy cike wayza, ɗaw kə bəriy nəv ngə hidigi, ɗaw kə vəlenta gədan a hidiy kə ɗewiy lawlaw am yək zləgam ngə Bayzlav, ɗaw kə luwenta: ‹‹Say yikwan kə zlən takwan dayday zagway, za kə diw kə pət am bay ngə Bayzlav.›› 23 Am mgbəw ngə hidiy mə səbiy Yesu cike wayza, Pol avə Barnabas a njə kə weliy talan mbalgamiy ngə mgbəw ngə hidiy mə səbiy Yesu, ɗaw kə tariy Bayzlav avə ɗiy dalyam, za kə vəlta am nəv ngər ngə Məmar hidi taniy mə yəkta.
24 Maa toniy hayək Pisidiya za, hosiy am hayək Pamfiliya. 25 Adəwən taniy maa ceɗiy zləgam ngə Bayzlav aliɓde Perge za, viy aliɓde Ataliya. 26 Abəgo za, pətiy am pay ngə zlan maza, jəɓiy tan aliɓde Antakiya təm hayək Siriya. Abəgo acin, hidiy mə səbiy Yesu mə tariy Bayzlav, kə vəlenta gədan kə jan kə ɗiyiy kəzəɗ ngetik, kəzəɗ səna acin taniy mə ɗiyahta nhi.