Zləniy Pol avə Barnabas kə ceɗiy ləbar ngə Bayzlav
13
Am mgbəw ngə mə səbiy Yesu tə liɓde Antakiya təm hayək Siriya, mokotufiy ngə Bayzlav ɓəw hidiy mə jəgwanenta təkəniy a hidiy ɗahiy abəgo. Barnabas, Simeyon ta njə kə luwta Mamblen, Lusiyus tə Sirene, Manahen cal mandal ngə Hirudus bay Galili ɓəw Sol.2 Pic takan a tariy Bayzlav, aa ɗiyiy dalyam, Mbiɗ ngə Bayzlav luwenta: ‹‹Mə welek Barnabas avə Sol kə ɗiyiy kəzəɗ kat tu kə ceɗenta.›› 3 Adəwən taniy maa tariy Bayzlav avə ɗiy dalyam za, ɗiyiy ngəra atalan Barnabas avə Sol, za geɗta kə viy kə ɗiyiy kəzəɗ ngə Bayzlav.
Barnabas avə Sol viy am hayək Kiprus
4 Asəna acin, Mbiɗ ngə Bayzlav zlən Barnabas avə Sol. Taniy viy a liɓde Selewkiya, aa bəgo za, pətiy am pay ngə zlan maza kəv am hayək Kiprus maa mgbaw avə yəm. 5 Taniy maa hosiy a liɓde Salamis təm hayək Kiprus za, ɗiya ceɗiy ləbar ngə Bayzlav a yahudigi am jik jəgwan ngatan. Yuhana ta njə kə luwta Markus awana avə tanigi kə mənta. 6 Toniy Kiprus hayək maa mgbaw avə yəm, za hosiy a liɓde Pafos. Abəgo, janiy njə yahuda zlim tik Bar -Yesu. Gawal səna a njə kə ɗiy təkən ngə kpah talan, a njə kə luw sin mə zlənzlən ngə Bayzlav. Aska a ɗiy polkoy. 7 Sin awan a de bay, bay səna zlim tik Sergiyus Pol. A sən təkən godokwən. Sin ɗefenma a Barnabas avə Sol kadaban aa may kə zlim zləgam ngə Bayzlav angər tan. 8 Amma Bar-Yesu səna a njə ɗefentəma avə ma yunanin Elimas. A njə kə ɗiy təkən mə kpah talan, zəni Elimas ɓon kə yək Barnabas avə Sol. Sin ɗiya jar wirwir ngə tak bay kaɗ kə ɗew mətak yək zləgam ngə Bayzlav. 9 Sol mə njə kə ɗefentəma Pol avə ma roma, Mbiɗ ngə Bayzlav pət wek nəv ngetik, cəhəriya atalan Elimas tafnan. 10 Za luwenni: ‹‹Hid mə ɗiy polkoy cah! Hid mə njə kə jək hidiy cah! Kər ngə Bay musuruf cah! Hoh mosum ngə təkəniy malaw cike wayza! Bayzlav a njə kə ɗiy təkən avə mozlokotuf tik. Zəni hoh, hoh njə kə jar kə ngav təkəniy malaw Bayzlav mə ɗiy səna kaɗ. 11 A zlimu, tanjinhi Bayzlav av kə wəzloh, hov kə huluf. Av kə ɗiy wan ndas, hoh lim lay kwən. Njoɗ, kpizlik ɗiy am həriya ngə Elimas, aa lim lay ɗahɗaba. Ləlam ləlam lay kə jar hid ngə kaw tik am ngəra kə ngazl tik . 12 Bay maa lim təkən mə ton səna za, jəgwan ngə Məmar hidi tu praslen talan, sin vəl nəv ngetik a Yesu.
Pol avə Barnabas awaniy a Antakiya təm hayək Pisidiya
13 Adəwən səna, Pol avə Barnabas ɓəw hidiy mə ngazlta pətiy am pay ngə zlan maza, sliɗiy tan aa liɓde Pafos za, viy a Perge təm hayək Pamfiliya. Amma Yuhana Markus wər geɗta abəgo, sin jəɓ tik a Ursalima. 14 Za acin Pol avə Barnabas sliɗiy aa Perge za, viy tan a Antakiya təm hayək Pisidiya. Am pic nəp ngə yahudigi, taniy pətiy am jik jəgwan ngə yahudiy səna, ɗewiy kaɗ abəgo. 15 A jik səna, hidiy jangiy am deftere ngə mə jawjaw ngə Musa ɓəw am deftere ngə mokotufiy ngə Bayzlav. Za talan mbalgamiy zləniy hid kə luwen a Pol ɓəw Barnabas kə zləgamenta. Gawal səna luwenta: ‹‹Galmayigi, mana hin mawana avə zləgam ngə vəlen gədan a zəgudu nhi, hin kwəl kə zləgamenta acin.›› 16 Zəni, Pol sliɗ za, luwenta avə ngəra kə njiy tan tehte, za sin ɗiya luw: ‹‹Hin israyiligi ɓəw hidiy məpərmay mə zlimentəma aa Bayzlav, mə zlimu! 17 Bayzlav ngiykwan hidiy Israyila acin mə wel didiy ngiykwan. Sin ɗiya fufulta am mandal taniy mbulukigi am hayək Misra. Za pətahta kaɗ aa mə hayək səna za avə gədan ngetik mordoy. 18 Za av kə ɗiy di ngərfoɗ sin mə musuf avə tanigi adab donu. 19 Adəwən sin ma wəzl wəzl hidiy təm lay ma parpar cisaray təm hayək Kanana za, vəlen layiy səna a israyiligi taniy kə marta. 20 Di taniy mə ɗewiy a Misra ɓəw adab donu, av kə ɗiy di blək foɗ avə ngərjoɓun. Adəwən səna, Bayzlav vrək mə zliy dalgway adab didiy ngiykwan, hos am mandal mokotuf ngə Bayzlav zlim tik Samuyila mə hosohoh.
21 Am mandal səna, didiy ngiykwan tariy Samuyila kə vrəkenta bay. Za Bayzlav vəlenta Sawulu kər ngə Kis, təm səban ngə Beyamin. Sin ɗew kə bay ngatan di ngərfoɗ. 22 Adəwən səna, Bayzlav goɗ kaɗ aa mə bay za, vrək Dawda am lay ngetik. Bayzlav ɗiya zləgam atalan Dawda, ɗiya luw: ‹‹Kat mə jan hid mə fetek nəv za, zlim tik Dawda kər ngə Yesa. Av kə ɗiy təkəniy nəv ngaɗa mə mayu cike wayza.›› 23 Am səban ngə Dawda səna acin, Bayzlav ɗiy hid kə mbuw Mə mbəl hidi a israyiligi mana sin mə luw aməcek av kə vəlenta. Hid səna acin Yesu. 24 Dəga Yesu a diw kəzəɗ gesin bəgwən, Yuhana mə juroɓ baptisma a ceɗen a hidiy kə buwiy ngar kaɗ, za kə yəkiy baptisma. 25 Mandal Yuhana mbeh kə way kəzəɗ ngetik, ɗiya luwen a hidigi: ‹Am ɓən ngəkin wər, kata hid ngayi? Kata acin hid hin taa pu kwən. Kata ceɗehin, hid av kə ya adəwən ɗa, kata tə hos gəga kə pəsl mbiseh krap tik kwən.›››
26 Pol ɗiya luw baha: ‹‹Galmayɗigi, hin səban ngə Ibrahima ɓəw hidiy məpərmay mə zlimentəma aa Bayzlav. Bayzlav a zlənah ləbar nhi a yikwan, kə jan kə mbəl yikwan cike wayza. 27 Hidiy tə Ursalima avə bay ngatan a səniy Yesu mə mbəl hidi ɓahbəgwən. A zləmiy zləgamiy ngə mokotufiy ngə Bayzlav taniy ta jangita hoyhoy am pic nəp ngə yahudiy bəgwən. Ko asəna, mandal mə zlenta dalgway a Yesu, a ɗiyiy təkəniy mana mokotufiy ngə Bayzlav mə luwta. 28 A janiy mə ngavngav ngə wəzliy Yesu kaɗ bəgwən. Ko asəna, tariy bay Pilatu kə wəzl kaɗ. 29 Maa ɗiyiy təkəniy cike wayza mana deftere mə luw atalan Yesu za, surohota kaɗ aa mə pay maa zləngrak za, zəni kahta kaɗ. 30 Amma, Bayzlav mbəlah kaɗ aa mə məc za. 31 Adəwən səna, mə ɗiya wan ndas sin ɗef talan tik a hidiy mə ngazlta aa Galili za kə va Ursalima. Tanjinhi taniy acin məsəberiyª ngə Yesu aa hidiy ngiykwan.
32 Yikwan təm, yikwan maa ceɗehin ləbar malaw səna, təkən Bayzlav mə luw av kə ɗiy tik a didiy ngiykwan taməcek. 33 Tanjinhi, Bayzlav mə ɗiy təkən səna za a yikwan wəriy ngatan, avə sin mə mbəlah Yesu aa mə məc za. Mana mə ɗəɗefta am Jabura mogroy tik saray. Bayzlav a luw:
‹Hoh acin kərti ɗa!
Apica kata acin Bahbay koh mə mbuwoh!›
34 Bayzlav mbəlah Yesu aa mə məc za, kə jan kəsəm tik kə ɗew mətak wər mana sin mə luwu:
‹Təv kə ɗiyehin ngərbay maa kweɗek, maa mindiwin,
mana kat mə luwen a bay Dawda.›
35 Am Jabura məpərmay təm, Dawda ɗiya luw:
‹Hid malaw hoh mə welu kə ɗiy kəzəɗ ngəkoh,
Hoh geɗ kəsəm tik kə wər a liɓ civ kwən.›
36 Mandal bay Dawda awana avə micin, sin a ɗiy kəzəɗ ngə Bayzlav mana sin mə mayu. Za Dawda məc, kahta kaɗ am civi abər didiy ngetik, za wəray tik. 37 Amma hid Bayzlav mə mbəlah taa mə məc za, kəsəm tik a wər a liɓ civ bəgwən.
38 Galmayɗigi, mə sən kaɗ lawlaw, yikwan maa ceɗehin, mbelmbel Yesu Bayzlav geɗ mə ngavngav ngə hidiy kaɗ. Sin a geɗ mə ngavngav ngəkin makavay hin taa səb mə jawjaw ngə Musa kwən. 39 Amma hidiy mə vəliy nəv ngatan a Yesu, mə ngavngav ngatan mə geɗe cike waykaɗ. Taniy acin mə mariy talan tan. 40 Kadaban səna acin, mə kaw talan kin lawlaw! Kə jan təkəniy mokotufiy ngə Bayzlav mə luwta taməcek kə hosiy atalan kin kwən. Taniy a luwta:
41 ‹Hin hidiy mətak cəcefiy zləgam ngaɗa, mə safu!
Təkəniy nhi, mə praslehin talan. Mə məc!
Kadaban kat Bayzlav,
mandal hin mawana avə micin, təv kə ɗiy kəzəɗ mordoy.
Za kəzəɗ mordoy kat tu kə ɗiy səna, mana hid mə ceɗehin za,
hin mə yək kwən!›
42 Za Pol avə Barnabas pətiy tan aa jik jəgwan ngə yahudiy za, hidiy tarta kə jəɓiy am pic nəp tu kə yah, kə zləgamenta zləgam səna baha. 43 Adəwən hidiy maa cakwayiy tan aa mə ɓas za, yahudiy dolom ɓəw hidiy məpərmay mə zlimentəma aa Bayzlav taa səbiy mə zugzugwa ngə yahudigi, səbiy Pol avə Barnabas. Pol avə Barnabas ngəzta, vəlenta gədan kə jan kə səbiy mozlokotuf ngə Bayzlav lawlaw, kadaban Bayzlav mə vəlenta malaw ngetik za.
Pol avə Barnabas viy angər hidiy səban tan par a yahudigi
44 Pic nəp ngə yahudiy səna maa hos za, hidiy dagay tik tə liɓde səna ɓasiy kə zləmiy zləgam ngə Bayzlav Məmar hidi. 45 Yahudiy maa limiy zəgudu za, nap ɗiyenta ngərak a Pol. Taniy a yəkiy zləgam ngə Pol bəgwən, za ɗiya rəta. 46 Za Pol avə Barnabas ɗiya zləgamiy a hidiy mgban mgban mətak hovok. Ɗiya luwta: ‹‹Lawlaw wər, yikwan kə ceɗ zləgam ngə Bayzlav a hin yahudigi məpəlpəla zagway. Amma hin ɓon kə yək zləgam ngə Bayzlav səna. Asəna acin, hin maa ɗef talan kin, hin gəga ngə jan micin mətak way kwən. Kadaban səna acin yikwan məv kə geɗehin, yikwan kə va kin angər hidiy ma səban tan par a yahudigi. 47 Anhi təkən Bayzlav Məmar hidi mə luwu:
‹Kat tə ɗiyoh kə zləzlaɗ adab hidiy maa səban tan par a yahudigi.
Kə jan hoh kə ceɗen a hidiy təm talan mahayək cike wayza, Bayzlav aa mbəl hidi!›››
48 Hidiy ma səban tan par a yahudigi maa zlimta atəgo za, nəv ngatan tu zəzay dayday. Ɗiya səbaniy Bayzlav Məmar hidi, makavay zləgam ngetik. Hidiy Bayzlav mə welta kə janiy micin mətak way, yəkiy ləbar tə talan Yesu.
49 Za acin hidiy ɗiya tepiy ləbar ngə Bayzlav Məmar hidi mgbaw hayək səna. 50 Amma yahudiy lebeɗiy wertiy mənjənjigi mə zlimentəma aa Bayzlav avə səb məzuzgzugwa ngə yahudigi ɓəw hidiy mogroy tə liɓde Antakiya səna, kə zlənenta takwan a Pol avə Barnabas. Za gamta kaɗ aa mə hayək ngatan za. 51 Pol avə Barnabas mbiciy kərbitilª təm ngaz ngatan kəv angər hidiy səna, za gariy tan abəgo za, viy a liɓde Ikoniya. 52 Amma hidiy mə səbiy Yesu tə Antakiya awaniy avə zəzay, za nəv ngatan wek avə Mbiɗ ngə Bayzlav.