Takwan atalan hidiy mə səbiy Yesu
12
Am mandal səna Hirudus acin bay, sin diw kə zlənen takwan a hidiy sənan təm mgbəw ngə mə səbiy Yesu. 2 Sin luwen a sojiy ngetik kə wəzliy Yakuba kaɗ, za taniy wəzlta avə masalam. Yakuba səna galmən ngə Yuhana. 3 Sin maa lim Yahudiy aa fetigi, lay sin mə wəzl Yakuba səna za, sin zlən sojiy kawiy Piyer. Za pekta am jik jaw. Sin a zlən kə kawiy Piyer am mandal məmbəlwa ngə bret mətak njem.ª 4 Adəwən taniy maa kawiy piyer za, pekta am jik jaw, bay luwen a sojiy kə puwta. Sojiy səna mə ɗiya taniy foɗ njuk njuk madaba foɗ. Bay Hirudus a may kə zla dalgway ngə Piyer akibik hidiy cike wayza adəwən məmbəlwa ngə paska.5 Mandal sojiy ta puwiy Piyer am jik jaw səna, hidiy təm mgbəw ngə mə səbiy Yesu aa səbiy avə kə tar Bayzlav atalan tik avə nəv takan.
Pətah ngə Piyer aa mə jik jaw za
6 Bay Hirudus aa ɓən kə zla dalgway ngə Piyer apat tik akibik hidiy cike wayza, ngə vuɗ səna, Piyer mə wana kaɗ am walan ngə sojiy saray. Mə jawta kaɗ avə selelenª saray. Sojiy məpərmay a waniy a məjijik a puwiy jik jaw səna. 7 Mbaslay ngə Bayzlav Məmar hidi pətah mə ndumndum, za zləzlaɗ ɗiya ɗiy am jik jaw səna. Mbaslay ngə Bayzlav kəz Piyer, za fəɗah kaɗ ɗiya luwenni: ‹‹A sliɗ za aa ngaw!›› Za seleleniy yoɓiy tan aa mə ngriy tik za. 8 Mbaslay səna luwenni: ‹‹A jaw gan koh, za a təm krap koh am ngaz!›› Piyer ɗiy mana sin mə luwenni. Za mbaslay səna luwen baha: ‹‹A kwəl ləkwət koh za ma səbakku.›› 9 Piyer ɗiya səb tik, pətiy tan aa mə jik jaw za. Amma, Piyer a ɓən wər mindiwin kwən, acagendik a sisin. 10 Piyer avə mbaslay tafnan toniy sojiy mə puwiy lay ngə tizin, za toniy sojiy mə puwiy lay mə saray tik. Taniy hosiy a məjijik njə masa ngə ton kə va liɓde. Məjijik zləray tik nguray akibik tan. Za pətiy tan aa mə jik jaw za, viy viy kula a mozlokotuf ngə pət kə va liɓde. Zəni mbaslay səna ləleh tik mə ndumndum, geɗ Piyer agendik.
11 Am lay səna acin, bərngəzl talan ngə Piyer zlər, sin sən gendik, təkən mə ɗiy nhi mindiwin. Za sin ɗiya luw: ‹‹Tanjinhi, kat mə sən za, mindiwin: Bayzlav Məmar hidi mə zlənah mbaslay ngetik, za kə mbəlakku aa mə ngəra ngə Hirudus za. Sin mə lerek za baha am təkəniy cike mə ngavngaviy yahudiy mə ɓən kə ɗiyakta.››
12 Piyer maa sən təkən mə ton səna za, sin sliɗ, va a de Mariyama mahmay ngə Yuhana mə njə kə luwta Markus. Hidiy dolom mə mgbəwiy abəgo, a tariy Bayzlav. 13 Piyer maa hosoh za, gar a bərmidigiɗ, ɗiya ɗefma kə va de. Kərtaza mə njə kə ɗiy kəzəɗ ade səna, zlim tik Rode, maa zlim za, yah kə zlawenni. 14 Sin maa sən wəla ngə Piyer za, sin ɗiya zəzay dayday, zəɗər a jan kə zlər məjijik bəgwən. Sin si kəv ade kə ceɗen a hidiy sənan. Sin ɗiya luw: ‹‹Gawla! Piyer a wan a midigiɗ.›› 15 Hidiy məpərmay luwenta: ‹‹Hoh wək vu ta?›› Za sin ɗiya luw baha: ‹‹Mindiwin, Piyer a wan a midigiɗ!›› Zəni, hidiy səna zlawenta: ‹‹Asəna wər, mazaɓəl ngetik acin mə yah!›› 16 Piyer wər aa ɗefma kəv ade dap. Za acin taniy zləriy məjijik, limiy Piyer. Tu kpah talan tan. 17 Zəni Piyer luwenta avə ngəra kə njiy tehte. Adəwən səna, sin ceɗenta mana Bayzlav mə lereh tik aa mə jik jaw za. Za ɗiya luwen a hidiy səna: ‹‹Mə va ceɗen a Yakuba ɓəw avə galmayiy ngiykwan məpərmayigi. Za pət tik, vətik am lay məpərmay.
18 Lay maa dan za, sojiy mə puwiy jik jaw nəv ngatan ɗiya mbir. Taniy ɗiyiy neh am walan tan, ɗiya luwta: Piyer wər awan aki? 19 Bay Hirudus zlən sojiy kəv kə jariy Piyer am lay parpar. Zəni taniy jar jarta, a janta ɓahbəgwən. Adəwən səna acin, bay səna ɗiya ɗiy neh a sojiy mə puwiy Piyer səna. Za luwen a sojiy məpərmay kə wəzliy mə puwiy Piyer kaɗ. Za acin, bay Hirudus sliɗ tik am hayək Yahudiya za, vətik a liɓde Kaysariya kə ɗiya wan gwedek abəgo.
Məc ngə bay Hirudus
20 Mandal səna, bay Hirudus nəv tik tu nus dayday atalan hidiy tə liɓde Tirus avə Sidon. Hidiy səna zlerima kəv kə safahta. Kadaban səna acin, taniy vəlenta suloy a Balastus soje mə njə kə puw jik ngə bay, kə jan kə geɗenta mozlokotuf ngə hos angər bay, kə centa ngəra. Kadaban hidiy tə liɓde Tirus avə Sidon a njə kə janiy zəm ngatan am hayək ngə bay Hirudus. 21 Pic ngə zlerma mana bay Hirudus mə zlenta maa hos za, Hirudus kwəl ləkwət ngetik ngə bay, za ɗew am karamwal ngə bay, ɗiya zləgamen a zəgudu. 22 Mandal bay Hirudus taa zləgam, hidiy ɗiya ciwəla, ɗiya luwta: ‹‹Nhi wəl ngə hidmemblen kwən, wəl ngə Bayzlav!›› 23 Njoɗ mbaslay ngə Bayzlav zlənah məc a kəsəm ngə bay səna, kadaban sin a vəlen mordoy a Bayzlav bəgwən, sin ngəm hidiy kə səbanta mana Bayzlav. Gukwəɗiy ɗiya hamta nha sin məc. 24 Ko asəna, hidiy mə səbiy Yesu aa ceɗiy ləbar ngə Bayzlav kibik kibik, za hidiy mə yəkiy zləgam ngə Bayzlav a fufuligi.
25 Barnabas avə Sol maa wayiy kəzəɗ ngatan a Ursalima za, taniy jəɓiy tan a Antakiya. Ngazliy Yuhana taa luwta Markus gəzza.