Piyer zləgam a kibik hidiy mə səbiy Yesu tə Ursalima
11
Mə zlənzləniy ngə Yesu ɓəw hidiy mə yəkiy Yesu təm hayək Yahudiya zlimta hidiy səban tan par a yahudigi təm, mə yəkiy zləgam ngə Bayzlav za. 2 Piyer maa jəɓ tik a liɓde Ursalima za, Yahudiy mə səbiy Yesu ɗiya luwenta, sin mə ɗiy mə ngavngav za. 3 Ɗiya luwenta: ‹‹Hoh njah ade hidiy mətak zliy mandawaliy tan. Za hoh zəmah gəda avə tanigi!›› 4 Zəni Piyer ɗiya ceɗenta mana təkən səna mə ton takan takan dəga am diw tik. Sin ɗiya luwenta: 5 ‹‹Kata awan a liɓde Zope, kata tar Bayzlav. Zəni Bayzlav ɗefek təkən wa kat tə sisin. Təkən səna mana maslaga mordoy wa hidiy mə kawiy gozlumiy tik foɗ tik kaɗ a surohoh a wəzlav za kə yah a kibik ɗa. 6 Kat ɗiya ca həriya law law kə saf təkən səna. Za kat lim huviy ngaz ma foɗ, huviy tə de ɓəw tə donu, təkən mə njə kə viy a wan, ɓəw viginigi. 7 Zəni kat zlim wəla ngə hid a luwakku: ‹A sliɗ za Piyer, a fat təkəniy nhi, a zəmu.› 8 Kat zlawenni, kat luw acin: ‹Awwo Məmar kata, njay ɗa kata zəm təkəniy hezi təgo ɗahkwən.› 9 Kat zlim wəla səna a luwak mə saray tik: ‹Təkən Bayzlav mə mbaɗ kə təkən maa kweɗek, hoh gər kə saf kə təkən hezi kwən.› 10 Wəl ngə hid səna tu zləgamak jəɓ makaɗ, za adəwən səna, maslaga tafnan jəɓ tik a dibizlav. 11 Mandal səna gəzza, hidiy makaɗ hosiy ade yikwan mə ɗew səna. Hid tə Kaysariya acin mə zlənahta kə ɗefektəma. 12 Mbiɗ ngə Bayzlav luwakku kat kə va a tanigi mətak wəzən. Hidiy maa kwəh mə səbiy Yesu tə jagwar ɗa awənhi, ngazlakta a Kaysariya. Yikwan maa hos za, yikwan cike pət ade Korneliyus. 13 Sin ɗiya ceɗiyikwan mana sin mə lim Mbaslay ngə Bayzlav mə ɗef talan tik ade ngetik. Za luwenni: ‹A zlən hid a liɓde Zope, mə va luwen a hid zlim tik Simon taa njə kə luwta Piyer, mə njə yah. 14 Sin av kə ceɗeh zləgam ngə Bayzlav tu kə mbəloh ɓəw kə mbəl de ngə koh cike.› 15 Kat maa diw kə zləgam za, Mbiɗ ngə Bayzlav surohoh atalan tan wa mə yah atalan ngiykwan am diwtik. 16 Kat slek talan am zləgam Yesu Məmar hidi mə luwu: ‹Yuhana a ɗiyen baptisma a hidiy avə yəm. Amma ngəkin, Bayzlav avə kə ɗiyehin baptisma avə Mbiɗ ngetik.› 17 Asəna acin, Bayzlav vəlen Mbiɗ ngetik a hidiy mana sin mə vəliyikwan, mandal yikwan mə yək Məmar hidi Yesu Kristu. Mana a səna wər, kat hid ngayi kə tak Bayzlav kə ɗiy may ngetik kwən?›› 18 Yahudiy mə səbiy Yesu maa zlimiy ma səna za, njiy tan tehte. Zəni nap səbaniy Bayzlav. Ɗiya luwta: ‹‹Bayzlav tu zlər mozlokotuf ko a hidiy səban tan par a yahudigi, kə buwiy ngar ngatan kaɗ, za kə janiy micin mətak way.››Diw ngə mgbəw ngə mə səbiy Yesu a liɓde Antakiya
19 Adəwən maa wəzliy gawal məpərmay zlim tik Etiyen za, diw kə zlənenta takwan a hidiy mə səbiy Yesu Kristu. Zəni hidiy səna cakwayiy tan am hayəkiy parpar. Hidiy sənan tə dab tan viy kula am hayək Fenisi, məpərmay viy am hayək Kiprus, za sənan təm viy a liɓde Antakiya. Hidiy mə cakwayiy səna, aa ceɗiy ləbar ngə Yesu a Yahudigi a gendik. 20 Amma hidiy məpərmay mə sliɗiy taa mə hayək Kiprus ɓəw taa mə hayək Sirene za, viy a liɓde Antakiya. A liɓde səna, tu ceɗiy Ləbar Malaw atalan Yesu Məmar yikwan a hidiy səban tan par a Yahudigi təm. 21 Bayzlav tu mənenta day day avə gədan ngetik. Hidiy dolom vəliy nəv ngatan a Yesu, za səbiy mozlokotuf ngetik.
22 Hidiy təm mgbəw ngə Yesu tə liɓde Ursalima zlimiy təkən mə ɗiy am hayək Antakiya səna. Za acin, taniy zləniy Barnabas abəgo. 23 Sin maa hos za, sin sən gendik, Bayzlav tu ɗiyen malaw a hidiy mə yəkiy Yesu. Sin ɗiya zəzay dayday, sin vəlenta gədan a taniy cike wayza kə səbiy mozlokotuf ngə Yesu Məmar hidi hoyhoy avə nəv takan. 24 Barnabas səna hid malaw, nəv ngetik wek avə Mbiɗ ngə Bayzlav, mə vəl nəv ngetik za a Yesu. Makavay ɗew ngetik malaw səna, hidiy dolom yəkiy zləgam ngə Yesu Məmar hidi. 25 Asəna acin, Barnabas va a liɓde Tarsus kə jarah Sol. 26 Sin maa jan za, sin tep a Antakiya. Taniy saray tik, ɗewiy abəgo di takan avə hidiy mə yəkiy zləgam ngə Bayzlav. Ɗiya jəgwanenta təkəniy a hidiy dolom. A liɓde Antakiya səna acin, mə diw kə ɗefenma a hidiy mə yəkiy zləgam ngə Yesu hidiy ngə Kristu.
27 Mandal səna, mokotufiy ngə Bayzlav sənan sləɗiy a Ursalima za, viy a Antakiya. 28 Maa hosiy za, hid takan tə dab tan, zlim tik Agabus gar a dab hidigi, sin ɗiya ceɗenta avə gədan ngə Mbiɗ ngə Bayzlav, mitis mbeh kə yah am talan mahayək cike wayza. Mitis səna a ton am mandal Kalawdiyus acin bay məmar mahayək Roma cike wayza. 29 Wəriy gawliy ngə Yesu maa zlimiy ləbar səna za, ɗiyiy ɓən, za ɗiya luwta: ‹‹Ko hid ngayi mə vəl təkən mana gədan ngetik mə maru, kə mən hidiy mə yəkiy zləgam ngə Bayzlav təm hayək Yahudiya.›› 30 Taniy kambaliy təkəniy səna. Za zləniy Barnabas avə Sol kə tepta angər talan mbalgamiy ngə mə yəkiy zləgam ngə Bayzlav təm hayək Yahudiya.