Mbaslay ngə Bayzlav zləgamen a Korneliyus
10
Hid məpərmay awan a liɓde Kaysariya zlim tik Korneliyus. Sin mordoy ngə sojiy ngə blək ngə roma, adab ta njə kə luwta: ‹‹mgbəw ngə sojiy ngə Italiya.›› 2 Gawal səna avə hidiy tə de ngetik a njə kə zləmentəma lawlaw a Bayzlav. A njə kə mən hidiy ndas njə sanha tə dab Yahudigi. Hoyhoy a njə kə taray Bayzlav tik.3 Pic takan, avə masa makaɗ ngə sukoh, mbaslay ngə Bayzlav ɗef talan tik a Korneliyus. Sin lim avə həriya ngetik mindiwin, mbaslay ngə Bayzlav a pət ade ngetik. Maa hos a kibik tik za, ɗefenma acin: ‹‹Korneliyus!›› 4 Korneliyus maa zlim za, nəv ngetik ndoh, za luwenni: ‹‹Məmar kata, təkən ngemi mə ɗiy mi?›› Mbaslay ngə Bayzlav zlawenni, ɗiya luw: ‹‹Bayzlav tu yək tar koh ɓəw tu lim hoh ta njə kə mən hidiy təm sanha. Sin a ɓən atalan koh makavay səna acin. 5 Tanjinhi, a zlən hidiy a liɓde Zope, mə ɗefentəma a hidi, zlim tik Simon, ta njə kə luwta Piyer. 6 A njə kə wan ade ngə hid mə njə kə kəkəɗ bagwəla, zlim tik Simon təm. De ngetik awan a jagwar maz mordoy.›› 7 Adəwən Mbaslay ngə Bayzlav maa vətik za, Korneliyus ɗefenma a hidiy saray mə njə kə ɗiyiy kəzəɗ ngetik, ɓəw ɗefenma a soje takan. Soje səna ɗaw kə ɗiy kəzəɗ dəga aməcek avə sin. Sin aa səb mozlokotuf ngə Bayzlav lawlaw. 8 Korneliyus ceɗ ceɗenta mana təkəniy səna mə toniy cike. Za sin zlənta a liɓde Zope.
Mbiɗ ngə Bayzlav zləgamen a Piyer
9 Apat tik, dabdab pic, hidiy Korneliyus mə zlənta səna a viy a mozlokotuf, taniy mbeh kə hosiy a Zope. Mandal səna, Piyer tap atalan jik maa varak varak kə tar Bayzlav. 10 Am sin taa tar Bayzlav səna, mitis a hemenni, a may təkən ngə zəm. Mandal səna a tenta gəda, Bayzlav ɗefen təkəniy a Piyer wa a sisin. 11 Piyer lim dibizlav tu zlər, za təkən mana maslaga mordoy wa hidiy mə kawiy gozlumiy tik foɗ tik kaɗ a surohoh a wəzlav za kə yah a kayək. 12 A liɓ maslaga səna, təkəniy huviy parpar wek. Təkən huviy njə ngaz foɗ, mə viy avə wan ɓəw viginigi. 13 Piyer zlim wəla ngə hidi a luwenni: ‹‹A sliɗ za Piyer, a fat təkəniy tugo, za a zəmu!›› 14 Amma Piyer zlawenni, ɗiya luw: ‹‹Awwo Məmar kata, njay ɗa kat tə zəm təkəniy mana təgo bəgwən, hezi.›› 15 Piyer zlim wəla səna a luwen baha: ‹‹Təkən Bayzlav mə mbaɗ kə təkən ma kweɗek, hoh gər kə saf kə təkən hezi kwən.›› 16 Wəl ngə hid səna tu zləgam jəɓ makaɗ, za a dəwən səna, maslaga tafnan jəɓ tik a dibizlav.
17 Piyer ɗiya ɓən atalan təkən Bayzlav mə ɗefen wa a sisin səna, sin aa sən madabah ma tik ɗahkwən. Mandal sin a ɓən atəgo , hidiy Korneliyus mə zlənta a liɓde Zope hosigi. Taniy aa jariy de ngə Simon. Maa sənta za, taniy viy gariy a bərmidigiɗ tik. 18 Taniy ciy wəla kəv de, ɗiya luwta: ‹‹Simon ta njə kə luwta Piyer awan awənhi vu?›› 19 Piyer wər, a wəlen aa ɓən atalan təkən sin mə lim səna. Zəni Mbiɗ ngə Bayzlav luwenni: ‹‹Anhi hidiy makaɗ a jarigi. 20 A sliɗ, a suroh aa talan jik za, a va a tanigi mətak wəzən, kadaban kata acin mə zlənahta.›› 21 Zəni Piyer surohoh aa talan jik za, va angər hidiy səna, luwenta: ‹‹Hid hin taa gər səna acin kata. Mə yah kemi?›› 22 Hidiy səna zlawenta, ɗiya luwta: ‹‹Korneliyus mordoy ngə sojiy ngə blək ngə roma acin mə zləniyikwan. Sin hid malaw a kibik Bayzlav, mə njə kə mbəzl Bayzlav. Za Yahudiy cike ɗaw kə luwta sin hid malaw. Mbaslay ngə Bayzlav acin mə yah angər tik kə luwenni: ‹A zlən hidiy angər Piyer, mə va luwenta, sin kə yah. Mana sin mə yah za, hoh kə zlim ləbar ngetik sin tu kə ceɗeh.››› 23 Zəni Piyer ngazl hidiy səna ade. Sin vəlenta lay kə waniy kaɗ.
Piyer va angər Korneliyus
Apat tik, Piyer sliɗ lapiy avə hidiy ma makaɗ səna. Hidiy sənan mə yəkiy Yesu tə liɓde Zope viy avə tanigi. 24 Apat tik, hosiy a liɓde Kaysariya. Korneliyus wər, ɗefenma a vinenigi ɓəw a ngwalayiy tik malaw. Taniy ɗewiy kə puwiy Piyer. 25 Sin maa hos za, Korneliyus yah gbamenni a bərmidigiɗ. Gbili titimbiz kaɗ kə mbəzl tik. 26 Zəni Piyer kaf kaɗ, luwenni: ‹‹A sliɗ za! Kat hid memblen mana hoh.›› 27 Zəni Piyer pətiy witik witik avə Korneliyus, aa vigi, aa zləgamigi, nha pətiy ade. Piyer ma hos za, jan hidiy mə ɓasiy kaɗ dolom. 28 Sin ɗiya luwenta: ‹‹Hin mə sən za, mə zugzugwa ngiykwan Yahudiy a geɗiy yikwan mozlokotuf kə pət ade ngə hidiy səban tan par a yahudigi, asənkwən kə lap a taniy bəgwən. Amma Bayzlav luwak kat kə geɗ saf hid kə hezi kaɗ, za kə pətar avə sin kwən. 29 Kadaban səna acin, hin ɗefekma, kat yah mətak ɓon. Ya tanjinhi acin mə ceɗekku, mə ɗefekma kemi?››
30 Korneliyus zlawenni, ɗiya luw: ‹‹Mə ɗiya wan makaɗ, mana tanjinhi masa makaɗ ngə sukoh, kata tar Bayzlav ade ɗa. Njoɗ kat lim hid məpərmay a ləkwət maa tuwek tuwek, taa lir a kibik ɗa. 31 Za sin ɗiya luwakku: ‹Korneliyus, Bayzlav tu yək tar koh, za talan ngetik a zlay am mən hoh mə ɗiyen a hidiy təm sanha bəgwən. 32 A zlən hidiy a liɓde Zope, mə va luwenta a hid zlim tik Simon ta njə kə luwta Piyer mə yah. A njə kə wan ade Simon mə kəkəɗ bagwəla. De ngetik mbeh a jagwar maz mordoy.› 33 Kat maa zlim atəgo za, kata zlənay hidiy njoɗ kə vay kə jarigi. Hoh təm hoh ngəm, hoh yah. Soko a yah ngəkoh. Tanjinhi acin yikwan cike yikwan mawan a kibik Bayzlav awənhi, kə zlim ləbar Bayzlav mə luwoh hoh kə ceɗeyikwan.››
Piyer ceɗ ləbar ngə Bayzlav ade Korneliyus
34 Za acin Piyer diw kə zləgam, sin ɗiya luw: ‹‹Tanjinhi, kat mə sən za acin mindiwin, angər Bayzlav wər, hidiy cike wayza takan. 35 Ko hid njə səban ceki, mana sin a ɗiy təkən Bayzlav mə mayu, za a hovok avə sin, Bayzlav a njə kə may hid səna. 36 Hin mə sən za, Bayzlav tu zlən Ləbar ngetik a hidiy Israyila, zləgam ngetik səna Ləbar Malaw ta vəliyikwan zoy angər Yesu Kristu Məmar hidiy cike wayza. 37 Zləgam səna a diw am hayək Galili mandal Yuhana ta ceɗ ləbar ngə Bayzlav a hidigi. Sin a luwen a hidiy kə yəkiy baptisma. Hin mə sən mana təkəniy səna mə toniy am hayək Yahudiya cike wayza. 38 Hin mə sən za, Bayzlav tu vəl Miɗ ngetik avə gədan ngetik a Yesu njə Nasaratu. Yesu tu tal hayəkiy parpar. Sin tu ɗiy malaw a hidigi. Sin mbəl hidiy mə mbaɗiy kə bahlamiy ngə musuruf. A ɗiy təkəniy səna kadaban Bayzlav awana avə sin. 39 Za ngiykwan wər, yikwan hidiy mə limiy təkəniy sin mə ɗiy am hayək ngə yahudigi, za ɓəw a Ursalima, yikwan acin məsəberiy tik. Hidiy kpawta kaɗ am pay maa zləngrak, sin məc. 40 Amma wan mə makaɗ tik, Bayzlav mbəlah kaɗ aa mə məc za. Sin geɗ Yesu kə ɗef talan tik. 41 A ɗef talan tik a hidiy cike wayza bəgwən, amma a yikwan hidiy Bayzlav mə wel taməcek kə ɗewiy kə məsəberiy ngetik. Bayzlav maa mbəlah kaɗ aa mə məc za, yikwan zəm gəda ɓəw yikwan sa təkən ngə sa avə sin. 42 Sin luwiyikwan kə ceɗ Ləbar ngetik Malaw a hidigi, za kə ceɗenta sin acin hid Bayzlav mə wel kə zla dalgway ngə hidiy tavə micin ɓəw ngə hidiy mə məc məcigi. 43 Mokotufiy ngə Bayzlav cike wayza tu zləgamiy atalan tik. A luwta: ‹Ko hid ngayi mə yək Yesu, Bayzlav av kə geɗ mə ngavngav ngetik kaɗ am zlim ngə Yesu.›››
Bayzlav vəl Mbiɗ ngetik a hidiy səban tan par a yahudigi
44 Mandal Piyer awəlen aa zləgam, Mbiɗ ngə Bayzlav surohoh atalan hidiy cike mə zlimiy ləbar ngetik. 45 Yahudiy mə yəkiy Yesu mə yiy avə Piyer maa limta za, tu wələk bərngəzl talan tan lay taniy mə limiy Bayzlav mə vəl Mbiɗ ngetik a hidiy səban tan par a yahudigi. 46 Yahudiy səna zlimiy hidiy səna a zləgamiy ma ndawyan mətak sən, a səbaniy Bayzlav. Zəni Piyer ɗiya luw: 47 ‹‹Tanjinhi, hidiy nhi tu janiy Mbiɗ ngə Bayzlav mana yikwan. Hid ngayi ngə takta kə jan baptisma tavə yəm kwən yi?›› 48 Zəni Piyer luwen a hidiy mə lapiy tavə sin kə ɗiyenta baptisma a hidiy səna avə zlim ngə Yesu Kristu. Korneliyus avə hidiy ngetik maa janiy baptisma za, luwenta a Piyer kə ɗewiy avə tanigi ngə wan gwedek baha.