Sol vəl nəv ngetik a Yesu
9
Mandal səna, ɓən ngə Sol wər kə zlənen takwan a hidiy mə səbiy Yesu ɓəw kə wəzlta kaɗ. Sin va angər masay mordoy təm jik Bayzlav. 2 Za sin neh ɗerewel ngə jan mozlokotuf ngə va angər mogroy təm jik jəgwan ma parpar tə liɓde Damas. A neh mozlokotuf am ɗerewel səna, mana sin tu jan mawəliy avə wertiy mə səbiy mozlokotuf ngə Yesu təbəgo, sin kə kawta. Za sin kə dahta a liɓde Ursalima.3 Mandal sin aa va a mozlokotuf, mbeh kə hos a liɓde Damas, zləzlaɗ yah aa dibizlav za atalan tik məndumndum mgbaw sin kaɗ. 4 Sin ndəv a kayək, za zlim wəla ngə hid a luwenni: ‹‹Sol Sol, hoh gbezlerekma kemi?›› 5 Sol ɗiya neh tik, luwenni: ‹‹Məmar hidi, hoh hid ngayi?›› Wəla ngə hid sin mə zlim səna zlawenni, ɗiya luw: ‹‹Kata acin Yesu, hid hoh taa gbezlerenma. 6 Amma a sliɗ za, a va am liɓde Damas. Abəgo, hidiy av kə ceɗiy təkən hoh tu kə ɗiytik.›› 7 Hidiy mə ɗiy mbuluk avə Sol gariy kaɗ, njiytan tehte. A zlimiy wəla ngə hid taa zləgam səna, amma a ləmiy hid səna ɗahkwən. 8 Sol sliɗ za, zlər həriya kə saf lay, zəni aa lim ɗahɗaba. Hidiy mə viy avə sin kawta am ngəra, kə ngazlta a liɓde Damas. 9 Wan makaɗ ton, aa lim ɗahkwən, a zəm bəgwən, za a sə yəm bəgwən təm.
10 A liɓde Damas səna, kərgawla məpərmay ngə Yesu awan abəgo, zlim tik Ananiyas. Yesu Məmar hidi ɗef talan tik a Ananiyas wa a sisin, ɗiya ɗefenma: ‹‹Ananiyas.›› Ananiyas ɗiya zləwəla, luwenni: ‹‹Bay ɗa, kata anhi!›› 11 Za Yesu Məmar hidi ɗiya luwenni: ‹‹A sliɗ, a va tanjinhi! A səb mozlokotuf ta njə kə luwta Mozlokotuf ma Səksək, za a va ade Yahuda. Ma neh hid njə Tarsus zlim tik Sol, sin aa tar Bayzlav. 12 Am tar ngetik, a ɗiyen wa a sisin, sin lim hid zlim tik Ananiyas. Ananiyas səna aa pət angər tik, za ɗiy ngəra atalan tik kə jan sin kə lim baha.›› 13 Ananiyas zlawen a Yesu, ɗiya luw: ‹‹Yesu Məmar kata, kat zlim hidiy dolom a nəfiy zlim ngə gawal səna. Tu ceɗekta ngay sin mə ɗiyen a hidiy koh a Ursalima. 14 Mogroy ngə masayiy təm jik Bayzlav acin mə vəlenta mozlokotuf, sin kə yah a liɓde awənhi, kə kaw hidiy cike mə səbiy mozlokotuf koh.›› 15 Amma Yesu Məmar hidi ɗiya luwenni: ‹‹A va jan gawal səna, kadaban kat mə wel za kə ɗiy kəzəɗ ngaɗa. Təv kə zləntik kə cakway zlim ngaɗa a hidiy səban tan par a yahudigi, a bayiy ngatan, ɓəw a hidiy Isirayila təm. 16 Kata atalan ɗa, təv kə ɗefen takwan sin tu kə sətik makavay kata.››
17 Ananiyas maa zlim atəgo za, sin sliɗ, va pət ade səna, jan Sol. Sin ɗiy ngəra atalan tik, za luwenni: ‹‹Galmayɗa Sol, Yesu Məmar hidi mə ɗef talan tik a hoh a mozlokotuf, hoh mə yah taa bəgo acin mə zlənak kat kə yah angər koh, kə jan hoh kə lim lay baha. Zəni Mbiɗ ngə Bayzlav kə wek nəv koh.›› 18 Njoɗ təkəniy wa keslengeɗ ndəviy aa mə həriya ngə Sol za. Za həriya ngetik ɗiya lim kweɗek kweɗek baha. Sin sliɗ, za yək baptisma. 19 Zəni sin ɗiya zəm, za sin jan gədan tik baha.
Sol ceɗ zləgam ngə Bayzlav a liɓde Damas
Sol ɗew ngə wan gwedek avə hidiy mə səbiy Yesu a Damas. 20 Njoɗ Sol va am jik jəgwaniy maa parpar ngə Yahudigi, aa ceɗen a hidigi, Yesu acin Kər ngə Bayzlav. 21 Hidiy cike mə zlimiy ləbar ngetik tu wələk bərngəzl talan tan. Taniy ɗiya zləgamiy am walan tan ɗiya luwta: ‹‹Nhi, gawal mə ɗiy treh a hidiy mə səbiy Yesu tə liɓde Ursalima. Za sin a yah a liɓde Damas nhi kə kaw hidiy səna, za kə tepenta a mogroy ngə masayigi.››
22 Amma Sol ɗiya zləgamenta bah mgban mgban mətak hovok. Sin ceɗenta Yesu acin Kristu. Za Yahudiy tə liɓde səna maa zlimiy zləgam ngə Sol za, a səniy kə zlawenta aceki bəgwən.
23 Wan ndas a dəwən səna, Yahudiy jawima kə wəzl Sol kaɗ. 24 Vuɗu avə pic hidiy a puwiy bərmidigiɗiy ngə liɓde səna, kə jan kə kawiy Sol, za kə wəzlta kaɗ. Amma Sol zlim jawma ngatan. 25 Asəna acin, vuɗu sənan wəriy gawliy ngə Sol fəkiy Sol am ndel mordoy, za jawiy mbiseh am gozlum tik. Za Taniy fəkta, tendelennge, aa talan gəlməɗ kə va a kayək a caɗak.
Sol buw a liɓde Ursalima
26 Sol sliɗ, va a liɓde Ursalima. Maa hos abəgo za, sin təl kə pət adab hidiy mə səbiy mozlokotuf ngə Yesu, amma hidiy səna a hovokiy a sin, kadaban taniy a ɓənta sin a vəl nəv ngetik lawlaw a Yesu bəgwən. 27 Barnabas acin ngazl Sol səna tep angər məzlənzləniy ngə Yesu. Sin ɗiya luwenta: ‹‹Sol mə lim Yesu Məmar hidi za a mozlokotuf Damas, za Yesu səna tu zləgamenni. Za Sol tu ceɗ Ləbar Malaw atalan Yesu a hidiy tə liɓde Damas mgban mgban mətak hovok.›› 28 Dəga ngə pic səna, Sol lap aa məzlənzləniy ngə Yesu acin. Za aa tal witik witik a tanigi a liɓde Ursalima. Sin ɗiya ceɗ Ləbar Malaw am zlim ngə Yesu Məmar hidi mətak hovok. 29 Sin gbam a Yahudiy mə njə kə zləgamiy ma yunanin. Ɗiya ngiway avə tanigi. Amma hidiy səna jariy mozlokotuf ngə wəzlta kaɗ. 30 Celeniy ngə Sol mə səbiy mozlokotuf ngə Yesu ma zlimta atəgo za, tepta a liɓde Kaysariya kə jan hidiy təbəgo kə ngazlta kə va am hayək Tarsus.
31 Mandal səna, hidiy təm mbuw mə səbiy Yesu təm hayək Yahudiya, təm hayək Galili ɓəw təm hayək Samariya aa ɗewiy avə zoy. Hoyhoy aa janiy səsak am vəl nəv a Bayzlav. Am ɗew ngatan, aa zlimentəma a Bayzlav Məmar hidi. Mbiɗ ngə Bayzlav mən hidiy mə səbiy Yesu kə fufuligi.
Piyer mbəl Ayneyas a mə mgbəru ngetik
32 Piyer a njə tal hayəkiy parpar. Pic takan, sin va angər hidiy mə yəkiy Yesu tə liɓde Lida. 33 Sin jan hid məpərmay abəgo zlim tik Ayneyas. Hid səna ngaziy tik mə mgbəruwiy za. Sin mə wana kaɗ am lay wan ngetik, mə ɗiya di cəfaɗcəfaɗ aa gar ɗahkwən. 34 Piyer luwenni: ‹‹Hoh Ayneyas, Yesu Kristu tu mbəloh aa mə mgbəru koh za. A sliɗ za, a paɗ lay wan koh, hoh atalan koh.›› Njoɗ sin sliɗ za. 35 Hidiy cike tə liɓde Lida ɓəw tə Saron maa limta za, vəliy nəv ngatan a Yesu.
Piyer mbəl Tabita aa mə məc za
36 Wer məpərmay mə njə kə səb mozlokotuf ngə Yesu awan a liɓde Zope, zlim tik Tabita. Tabita səna avə ma yunanin ‹‹Dorkas››, mana kə luw kaɗ ‹‹məweni››. A njə kə ɗiyen malaw a hidiy hoyhoy, ɓəw a njə kə mən hidiy təm sanha. 37 Mandal səna, sin dal za məc. Hidiy pan panta kaɗ ɓəw ndəɗta a jik tə talan celen. 38 Hidiy mə səbiy mozlokotuf ngə Yesu tə Zope səna zlimta Piyer awan a liɓde Lida, Lida səna mbeh a liɓde ngatan. Zləniy hidiy saray kəv kə luwenta: ‹‹Ambu, a yah angaw angər yikwan!›› 39 Njoɗ Piyer sliɗ lapiy avə tanigi. Ma hosiy za, hidiy ngazlta a jik tə talan celen səna. Wertiy mə cupcupiy maa limiy Piyer za, viy a jagwar tik, a hanigi. Ɗiya ɗefenta ləkwətiy parpar Dorkas mə ba taməcek mandal sin awana avə micin. 40 Piyer ɗiya luwen a hidiy mə ɓasɓas tə jik səna kə pətiy tan a caɗak. Za sin gbiliy titimbiz kaɗ, ɗiya tar Bayzlav. Zəni sin buw a pal mimci. Sin ɗiya luwenni: ‹‹Tabita, a sliɗ za.›› Tabita zlər həriya. Maa lim Piyer za, sliɗ ɗew a ndun madaba. 41 Piyer kaw ngəra tik, za mənenni kə sliɗ. Za acin, sin ɗefenma a wertiy mə cupcupiy səna ɓəw hidiy mə yəkiy zləgam ngə Yesu. Ɗefenta Tabita awana a micin. 42 Hidiy tə liɓde Zope cike zlimiy ləbar səna, za hidiy dolom vəliy nəv ngatan a Yesu Məmar hidi. 43 Piyer wan wan ndas a liɓde Zope ade hid məpərmay mə njə kə kəkəɗ bagwəla, zlim tik Simon.