Ləbar atalan Ananiyas avə werti tik Safira
5
Hid məpərmay təm ɗaha, zlim tik Ananiyas avə werti tik Safira. Taniy saray tik zlerima, za sin ber tuz ngatan takan kaɗ. 2 Maa berta za, taniy zlerima bah avə werti tik, batiy suloy sənan ɓahta kaɗ. Za ɓiy mə fəs tik tep angər məzlənzləniy ngə Yesu. 3 Maa vəlenta za, Piyer luwenni: ‹‹Hoh Ananiyas, Bay Musuruf a jan mozlokotuf kə pət am nəv koh aceki ? Hoh kə ɗiyen polkoy a Mbiɗ ngə Bayzlav aa kə ɓah suloy məpərmay ngə tuz koh kaɗ, a ɗiy aceki? 4 Tuz koh səna, mandal hoh ber gesin bəgwən, ngəkoh kwən vu? Za hoh maa ber kaɗ, suloy səna ngəkoh kwən vu? Za acin hoh ɓən kə ɗiy təkən nhi kemi? Hoh mə ɗiy polkoy mana nhi, hoh ɗiyen a hid kwən, hoh ɗiyen a Bayzlav.›› 5 Ananiyas maa zlim atəgo za, kuyup, ndəv a kayək, za məcay tik. Hidiy cike mə zlimiy ləbar məc ngetik, ɗiya hovokiy dayday. 6 Wəriy gawliy təbəgo sliɗigi, nap paɗiy kəsəm tik, viy kahta kaɗ.7 Za adəwən masa makaɗ, wer ngə Ananiyas hosoh am lay səna, za a sən təkən mə ton bəgwən. 8 Piyer ɗiya neh tik acin, luwenni: ‹‹A ceɗek may, tuz ngəkin hin mə beru, suloy tik cike wayza acin nhi vu?›› Wer səna zlawenni, ɗiya luw: ‹‹Yaw suloy tik cike wayza atəgo .›› 9 Piyer luwenni acin: ‹‹Mə lap ma kin a zoloh kaɗ kə saf nəv ngə Mbiɗ ngə Bayzlav kemi? A zlim ngaz ngə hidiy mə viy kə kahiy zoloh taa ləv a məjijik tugo, za av kə ɓiyiy kə viy kə kahiy mana zoloh.›› 10 Njoɗ wer səna, kuyup, ndəv təm a kibik Piyer, za məcay tik. Wəriy gawliy tafnan səna pətiy a jik, janta sin mə məca za, za ɓiyta, viy kahta a bər zelen. 11 Hidiy cike təm mgbəw ngə mə səbiy Yesu avə hidiy mə zlimiy ləbar səna, ɗiya hovokiy dayday.
Mə zlənzləniy ngə Yesu a ɗiyiy təkəniy maa tuwah par par
12 Mə zlənzləniy ngə Yesu tu ɗiyiy təkəniy ma tuwah avə təkən mə wələk bərngəzl par par dolom a dab hidigi. Hidiy mə yəkiy Yesu cike wayza a njə kə ɓasiy kaɗ am jik Bayzlav nəv ngatan takan am lay ta njə kə luwta madaba bla ngə Suleymanu. 13 Amma hidiy maa a yəkiy Yesu bəgwən aa may kə lapiy a taniy kwən, kadaban taniy aa hovokigi. Ko asəna, hidiy cike a njə kə həmənta. 14 Hidiy dolom mawəliy avə wertiy yəkiy Yesu Məmar hidi, za lapiy a hidiy mə səbiy Yesu səna. 15 Makavay təkən məzlənzləniy ngə Yesu mə ɗiyta səna, hidiy məpərmay dahiy mə daldaliy a mozlokotuf. Maa dahta za, ndəɗta atalan kombom asənkwən waypah ngatan, kə jan mandal Piyer tu kə ton aa bəgo za, mazaɓəl ngetik kə ton atalan mə daldaliy məpərmay tə dab tan kə mbəligi. 16 Hidiy dolom təm a yiy aa slaladiy maa par par ma mbeh ta liɓde Ursalima. Dahiy mə daldaliy ɓəw hidiy maa musuruf awan a kəsəm tan za aa zlənenta takwan, za hidiy səna cike tu mbəligi.
A kawiy məzlənzləniy ngə Yesu
17 Za acin, mordoy ngə masay ɓəw celeniy tan, mana kə luw kaɗ hidiy tə dab Sadukigi ɗiyiy ngərak dayday a məzlənzləniy ngə Yesu, za jawiy ma atalan məzlənzləniy ngə Yesu səna. 18 Zləniy hidiy acin, viy kawiy məzlənzləniy ngə Yesu pekta am jik jaw mordoy. 19 Amma ngə vuɗu səna, mbaslay ngə Bayzlav Məmar hidi yah zlər mijijik ngə jik jaw kaɗ. Sin ngazlah məzlənzləniy səna a caɗak, za ɗiya luwenta: 20 ‹‹Mə sliɗ mə va am jik Bayzlav, za mə ceɗenta ləbar cike atalan micin ndawyan a hidigi.›› 21 Mə zlənzləniy ngə Yesu maa zlimta atəgo za, zlimentəma aa mbaslay səna. Zlalay vut, sliɗiy viy am jik Bayzlav za diwiy kə ɗiyenta jəgwan a hidigi.
Za acin, masay mordoy təm jik Bayzlav ɓəw celeniy tan ɗefentəma atalan mbalgamiy ngə yahudigi, kə yiy am mgbəw ngə hidiy mə zliy dalgway. Za acin zləniy sojiy kə viy kə ngazliy məzlənzləniy ngə Yesu təm jik jaw. 22 Taniy hosiy am jik jaw, za a janta ɓahbəgwən. Jəɓiy tan, za luwenta a hidiy mə zliy dalgway səna: 23 ‹‹Yikwan maa hos za, yikwan jan jik jaw mə peke kaɗ, za sojiy mə puwiy məjijik mə gariy kaɗ abəgo. Yikwan maa zlər məjijik za, yikwan mə jan hidiy səna abəgo bəgwən.›› 24 Mordoy tə dab hidiy mə puwiy jik Bayzlav ɓəw mogroy ngə masayiy maa zlimta za, talan tan tu prasl, kadaban a səniy təkən mə ton atalan məzlənzləniy səna bəgwən. 25 Njoɗ hid məpərmay yah, luwenta: ‹‹Hidiy hin mə pekta am jik jaw səna, aa waniy am jik Bayzlav, aa ɗiyenta jəgwan a hidigi.›› 26 Mordoy mə puw jik Bayzlav maa zlim za, sliɗ viy am jik Bayzlav avə sojiy ngetik kəv kə ngazlahta. Amma a ngazlahta a gədan bəgwən, kadaban taniy a hovokiy a hidiy mə ɓas ɓas taa kə ndəta a gugwən. 27 Maa dahta za, tepta a kibik mgbəw ngə hidiy mə zliy dalgway. Za acin mordoy ngə masay ɗiya nehta, 28 luwenta: ‹‹Yikwan tu takehin kaɗ kə ɗiy jəgwan atalan gawal səna. Amma ngəkin, hin ma ɗiyiy gingin dap, za hin maa cakway ləbar səna a liɓde Ursalima cike. Hin ta njə kə ɗiy atəgo acin, mə may hidiy kə luwta yikwan acin mə wəzl gawal səna vu?›› 29 Piyer avə məzlənzləniy ngə Yesu məpərmay ɗiya zlawenta, ɗiya luwta: ‹‹Ngiykwan wər, yikwan məv kə zlimenma a Bayzlav day kə zlimma ngə hidigi. 30 Hin, hin kpaw Yesu am pay ma zləngrak, za sin məc. Bayzlav ngə didiy ngiykwan tu mbəlah kaɗ aa mə məc za. 31 Bayzlav wət vrək aa mə ngər zəm tik, za sin mbaɗ kə bay ɓəw kə mə mbəl hidigi. A ɗiy atəgo, kə jan kə zlər mozlokotuf a hidiy Israyila kə buwiy ngar ngatan, za sin kə geɗ mə ngavngav ngatan kaɗ. 32 Yikwan tu mbaɗ mana məsəberiy ngə təkəniy mə toniy səna. Za Mbiɗ Bayzlav mə vəlen a hidiy mə zlimentəma sin məsəber ngə təkən səna təm.››
33 Hidiy mə zliy dalgway maa zlimiy ləbar ngə Piyer za acin, nəv ngatan hamenta day day, za ɗiya gəriy kə wəzliy məzlənzləniy ngə Yesu səna kaɗ. 34 Amma hid takan ɗaha a dab tan, zlim tik Gamaliyel, sin bay jəgwan ngə mə jawjaw, sin njə Farisa. Za hidiy cike a njə kə zlimima ngetik. Sin sliɗ adab hidiy mə zliy dalgway za, gar a gar, za luwen a sojigi: ‹‹Mə ngazl hidiy nhi kəv caɗak zagway may.›› 35 Maa ngazlta a caɗak za, sin luw: ‹‹Hin hidiy Isirayila, mə ɓən lawlaw zagway atalan təkəniy hin tu kə ɗiyen a hidiy nhi. 36 Mə ɓən atalan hid məpərmay ta njə kə luwta Tewdas, a vah ɓahbəgwən, sin mə yah a dab yikwan. Sin vrək talan tik kə hid mordoy, za hidiy av kə ɗiy blək foɗ mə səbta. Amma adəwən səna, hidiy wəzlta kaɗ. Za hidiy mə səbta tu cakwayigi, pete pete, kəzəɗ ngetik tu vəvay. 37 Ya adəwən məc ngetik, hid məpərmay ta njə kə luwta Yahuda yah təm, sin njə Galili. A yah mandal bay roma mə luw kə ɗəɗef zlim ngə hidiy təm hayək ngetik cike kaɗ. Za hidiy dolom tu səbta. Sin təm wəzlta kaɗ, za hidiy mə səbta tu cakwayigi, pete pete. 38 Ya tanjinhi acin, kata luwehin, mə zlay talan a hidiy təgo kwən, mə geɗta kaɗ mə viy tan dap. Kadaban mana ɓən ngatan ɓəw kəzəɗ ngatan a yah aa ngər hid membəlen za wər, a gariy kwən, av kə way njoɗ. 39 Amma mana ɓən ngatan ɓəw kəzəɗ ngatan taniy ta njə kə ɗiyta a yah aa ngər Bayzlav za wər, ko a ɗiy aceki, hin mə ɓəs kə vəvay kəzəɗ ngatan kaɗ kwən. Ya mə kaw talan kin, kə jan taa hin kə diw vurum avə Bayzlav.›› Hidiy mə zliy dalgway maa zlimiy zləgam ngə Gamaliyel za, yəkiy ma ngetik. 40 Taniy ɗefentəma a məzlənzləniy ngə Yesu səna acin kə yiy a kibik tan. Maa yiy za, luwenta a sojiy kə zarta za. Maa zarta za luwenta acin: ‹‹Mə gər kə ceɗ ləbar tə talan Yesu a hidiy ɗaba !›› Za geɗta viy tan.
41 Mə zlənzləniy ngə Yesu səna pətigi, viy tan aa dab mgbəw ngə mə zliy dalgway za. Nəv ngatan nek godokwən kadaban Bayzlav tu sla nəv ngatan, taniy tu hosiy gəga kə sa takwan atalan Yesu. 42 Hoyhoy a njə kə ceɗiy Ləbar Malaw, za a njə kə ɗiyenta jəgwan a hidiy am jik Bayzlav ɓəw kə de kə de. A njə kə luwenta a nhi: ‹‹Yesu Kristu acin, Hid Bayzlav mə wel kə mbəl hidigi.››