Piyer avə Yuhana awaniy a kibik mgbuw ngə mə zliy dalgway
4
Mandal Piyer avə Yuhana aa zləgamenta a hidigi, masayiy tə jik Bayzlav, mordoy ngə hidiy mə puwiy jik Bayzlav ɓəw Sadukigi hosiy angər tan. 2 Maa zlimiy zləgam ngatan za, nəv ngatan hamenta kadaban Piyer avə Yuhana a jugwanenta a hidigi, a luwta, Yesu tu mbəlah a mə məc za, za asəna hidiy av kə mbəliy a mə məc za təm. 3 Taniy kawta, fəkta a jik jaw gesin kə puw a pat kadaban pic tu ndəv. 4 Za ɗər, hidiy dolom tə dab hidiy mə zlimiy zləgam ngə Piyer avə Yuhana yəkiy Yesu. Hidiy səna av kə ɗiy ngərbək joɓən.5 Apat tik, mogroy ngə Yahudigi, avə talan mbalgamigi ɓəw hidiy mə njə kə jugwanenta mə jawjaw ngə Bayzlav a hidigi tu ɓasiy a liɓde Ursalima. 6 Adab hidiy mə ɓas ɓas səna, masay mordoy ngə jik Bayzlav zlim tik Anas, ɓəw masayiy məpərmayigi Kayafas, Yuhana, Aleksandre, ɓəw vineniy ngə Anas mordoy ngə masayiy cike wayza a waniy abəgo təm. 7 Maa ɓasiy za, dahiy məzlənzləniy ngə Yesu təm jik jaw. Ɗiya nehta, luwenta: ‹‹Hin mə ɗiy avə gədan ngemi kə jan gawal mə mgbəru mgbəru nhi kə va?›› ‹‹Hin mə ɗiy tik avə zlim ngayi? ›› 8 Zəni Piyer njə Mbiɗ ngə Bayzlav maa wek təm nəv, zlawenta, ɗiya luwenta: ‹‹Hin bayigi ɓəw talan mbalgamigi, 9 apicah yikwan maa wan a kibik kin am dalgway makavay yikwan mə ɗiy təkəniy malaw atalan hid mə mgbəru mgbəru nhi, za hin maa neh yikwan mə ɗiy aceki kə jan sin kə va aa gar. 10 Tanjinhi hin cike wayza avə hidiy Isirayila məpərmayigi, say hin kə səntik. Gawal mə gar gar tə kibik kin, hin taa lim nhi, Yesu Kristu njə Nasaratu, hin mə kpaw am pay maa zləngərak, sin məc, za Bayzlav mbəlah kaɗ a mə məc za. Gədan ngə zlim ngetik acin mə mbəl gawal səna. 11 Yesu səna acin mə ɗəɗefta am deftere atalan tik, a luwta:
‹Gugwən, hin hidiy mə ndəniy gədivil, hin mə fək kaɗ nhi,
Bayzlav wel kə gugwən malaw maa day gugwəniy məpərmay a gədan!›
12 Sin a gendik palpal acin maa kwəl kə mbəl yikwan. Kadaban am talan mahayək cike, Bayzlav a zlənah hid məpərmay kə mbəl hidigi adəwən tik bəgwən.›› 13 Mgbuw ngə hidiy mə zliy dalgway limta Piyer avə Yuhana a zləgamiy mətak hovok, təkən səna tu wələk talan tan dayday. Kadaban taniy a sənta wayza, Piyer avə Yuhana a jangiy bəgwən, taniy wa hidiy məpərmayiy dap. Za taniy mə sənta za, Piyer avə Yuhana tu ɗewiy avə Yesu aməcek. 14 Zəni taniy limta təm, hid mə mgbəru mgbəru lawlaw tik mə garra kaɗ a jagwar Piyer avə Yuhana, za a səniy təkən taniy tu kə zləgamiy ɗahɗaba. 15 Mgbuw ngə mə zliy dalgway luwenta a Piyer avə Yuhana kə jelitan a mə lay zla dalgway za zagway. Piyer avə Yuhana maa pətiy tan aa caɗak za, hidiy səna diw kə ngiway am walan tan, 16 a luwta: ‹‹Tanjinhi yikwan kə ɗəyenta mi a hidiy nhi, kadaban hidiy tə liɓde Ursalima tu sənta lawlaw, taniy acin mə ɗiyiy təkən maa tuwah nhi, za ko yikwan, yikwan mə luw a ɗiyta bəgwən kwən. 17 Amma kə jan ma səna kə cakway a dab hidiy kwən, nəmkwan kə ndəlta avə gədan, mə gər kə nəfiy zlim ngə Yesu ko a hid ngayi ɗaba.››
18 Taniy ɗefentəma a Piyer avə Yuhana acin, za luwenta baha: ‹‹Mə zlimu, mə gər kə zləgam atalan Yesu asənkwən kə ɗiy jəgwan a hidigi am zlim ngetik ɗaba! ›› 19 Piyer avə Yuhana zlawenta, ɗiya luwta: ‹‹Tanjinhi hin talan kin mə ɓənu, av kə ɗiy law angər Bayzlav yikwan kə zlim ma ngəkin, za kə ɓon ma ngetik ɗər vu? 20 Amma ngiykwan wər, yikwan mə geɗ kə zləgam atalan təkən yikwan mə limu avə həriya ngiykwan ɓəw yikwan mə zlim avə zlim ngiykwan kwən.›› 21 Za acin, hidiy mə zliy dalgway ndəlta, za geɗta taniy viy tan, kadaban a janiy mə ngavngav Piyer avə Yuhana mə ɗiyta maa gəga ngə zlenta dalgway bəgwən, za ɓəw lay hidiy ta səbaniy Bayzlav makavay təkən mə ɗiyta səna. 22 Gawal Piyer avə Yuhana mə ɗiyiy təkən ma tuwah atalan tik kə jan sin kə va aa gar nhi, di ngetik day ngər foɗ.
Hidiy mə yəkiy Yesu a tariy Bayzlav
23 Hidiy mogroy maa fəkiy Piyer avə Yuhana kaɗ za, sliɗiy viy njoɗ angər celeniy tan. Ɗiya ceɗenta ləbar cike, mogroyiy ngə masayiy təm jik Bayzlav ɓəw talan mbalgamiy ngə yahudiy mə luwenta. 24 Celeniy tan maa zlimta za, ɗiya tariy Bayzlav a nəv takan, luwta: ‹‹Bayzlav mordoy, hoh acin mə ndən dibizlav avə mahayək ɓəw maza, za ɓəw təkəniy tə kimin cike wayza. 25 Amicek hoh vəlen Mbiɗ ngəkoh a didi ngiykwan Dawda mə ɗiy kəzəɗ koh. Hoh tu luw avə ma ngetik:
‹Hidiy maa səban tan par a yahudigi a njə kə gbezleriy ma kemi?
A njə kə lapiy kaɗ kə ɗiy ɓən mə ngavngav kemi?
26 Bayiy təm talan mahayək tu lapiy kaɗ kə diw vurum,
za mogroy tu ɓasiy kaɗ
kə ɗiy jəgəm avə mordoy ngiykwan Bayzlav,
za ɓəw avə Kristu, hid Bayzlav mə welu.›
27 Yaw, mana Dawda mə ceɗ səna mindiwin. Bay Hirudus ɓəw Pontiyus Pilatu, avə hidiy təm səban məpərmayigi ɓəw hidiy Isirayila, tu lapiy kaɗ am hayək nhi kə wəzliy Yesu, hid maa kweɗek mə ɗiy kəzəɗ koh hoh mə welu. 28 A ɗiyiy təkən səna mana hoh Bayzlav mə mayu avə gədan ngəkoh, za hoh mə ceɗ kaɗ dəga amicek. 29 Bayzlav ngiykwan, tanjinhi, a saf mana taniy taa gbezleriy yikwan ma. A vəliyikwan gədan a yikwan mə ɗiyiy kəzəɗ koh kə ceɗ ləbar koh aa hidigi mətak hovok. 30 A vəliyikwan gədan kə mbəl mə daldaligi, kə ɗiy təkəniy maa tuwah ɓəw mə wələk bərngəzl, avə zlim ngə Yesu hid maa kweɗek mə ɗiy kəzəɗ koh.›› 31 Maa wayiy tar Bayzlav za, lay taniy mə ɓasiy təbəgo nhi, diw kə kəz, gir gir gir. Mbiɗ ngə Bayzlav wek nəv ngatan cike. Za acin, taniy a hovokiy bəgwən, diw kə ceɗiy ləbar ngə Bayzlav a hidigi.
Mə səbiy Yesu mgbəwiy təkən tan kaɗ
32 Hidiy mə yəkiy Yesu cike wayza lapiy kaɗ nəv ngatan takan ɓəw ɓən ngatan takan. Hid mə luw: ‹‹Təkən nhi ngaɗgahna›› ɗahkwən. Təkəniy taniy mə marta cike wayza, a njə kə wəzakta am walan tan. 33 Mə zlənzləniy ngə Yesu janiy gədan dolom kə zləgam atalan Yesu a hidigi. A luwenta: ‹‹Məmar yikwan Yesu tu mbəlah aa mə məc za, yikwan mə lim za avə həriya ngiykwan.›› Za Bayzlav tu ɗiyen ngərbay ngetik day godokwən a mə səbiy Yesu. 34 Ko hid takan a dab tan mətak təkən ɗahkwən. Kadaban hidiy cike mə mariy tuz ɓəw jik ngə wan, ber berta way kaɗ, za ɓiyiy suloy tik 35 vəlenta a məzlənzləniy ngə Yesu za taniy kə wəzakenta a hidigi, ko a hid ngayi mana sin mə gəru.