Piyer avə Yuhana mbəliy hid mə mgbəru-mgbəru
3
Pic məpərmay, Piyer avə Yuhana aa tapiy kəv am jik Bayzlav kə tariy Bayzlav, tar ngə masa makaɗ ngə sukoh. 2 Maa hosiy a mijijik mə njə kə ɗefta ‹‹Mijijik malaw›› za, janiy hid məpərmay mə mgbəru mgbəru abəgo, hid səna a mgbəru dəga mbuwa tik. Hoyhoy hidiy a njə kə dahta abəgo, kə jan sin kə tar suloy angər hidiy taa pətiy a jik Bayzlav. 3 Sin ma lim Piyer avə Yuhana aa pətiy a jik Bayzlav za, sin diw kə tar suloy angər tan. 4 Taniy saf safta zagway, za Piyer ɗiya luwenni: ‹‹A safikwan.›› 5 Sin ɗiya safta law law, ɓən ngetik wər, av kə jan təkən angər tan. 6 Piyer luwenni acin: ‹‹Tə mar suloy bəgwən, za tə mar melenge ngə vəloh bəgwən. Amma təkən kat məmar wər, təv kə vəloh. Am zlim ngə Yesu Kristu njə Nasaratu, a sliɗ za, a va avə gar!›› 7 Maa luwen atəgo za, kaw am ngər zəm, kaf kaɗ. Njoɗ ngaz tik jan gədan, gbin-gbin. 8 Sin ɗiya mbir, gar aa gar, za diw kə va. Sin səb Piyer avə Yuhana kəv am jik Bayzlav təm. Sin aa va, sin aa mbir, za aa səban Bayzlav. 9 Hidiy cike limta aa va, za aa səban Bayzlav. 10 Taniy ma sənta sin acin mə njə kə ɗew a mijijik ta njə kə ɗefta ‹‹Mijijik malaw›› kə dəbək za, hovokiy day day, taniy wələk-wələk makavay taniy mə limiy təkən mə ton atalan gawal səna.Piyer a zləgamen a hidiy am jik Bayzlav
11 Hid mə mgbəru-mgbəru a geɗ kə səb Piyer avə Yuhana bəgwən. Tu wələk bərngəzl talan ngə hidigi. Taniy siy angər tan a madaba bəla ta njə kə luwta madaba bəla ngə Suleymanu. 12 Piyer maa lim zəgudu za, ɗiya luwenta: ‹‹Hin Israyiligi, bərngəzl talan kin a wələk makavay təkən mə ton nhi kemi? Mə safiy yikwan anhi kemi? Hin mə ɓən wər, gədan ngə mbəl gawal nhi a yah angər yikwan za vu, asənkwən kadaban nəv ngiykwan kweɗek kweɗek a kibik Bayzlav vu? 13 Bayzlav ngə didiy ngiykwan Ibrahima, Isiyaku ɓəw Yakubu acin mə mbəl gawal nhi, sin a vəlen mordoy a Yesu mə ɗiy kəzəɗ ngetik. Amma hin a talan kin, hin vəlen Yesu səna a Pilatu. Pilatu səna gər kə fəkah kaɗ a mə jik jaw za, za hin ɗiya ɓon. 14 Hin tu ɓon hid maa kweɗek ɓəw ma tiɗtiɗe a kibik Bayzlav, za hin luwen a Pilatu kə fəkehin hid mə wəzl duwa ɗər. 15 Asəna acin, hin wəzl hid mə njə kə vəl micin a hidigi. Amma Bayzlav mbəlah a mə məc za. Yikwan mə zləgam kadaban yikwan mə lim za avə həriya ngiykwan. 16 Yesu acin mə mbəl gawal hin mə limu ɓəw hin mə sən nhi avə gədan ngetik, kadaban yikwan mə vəlen nəv ngiykwan za. Aa vəl nəv ngiykwan a Yesu səna acin, sin mə jan mbəl ngetik law law mana hin mə limu acin.
17 ‹‹Tanjinhi galmayɗigi, kat mə sən za, hin avə talan mbalgamiy kin, hin mə sən təkən hin mə ɗiy atalan Yesu səna bəgwən. 18 Amma Bayzlav a ɗiy təkən sin mə luw taməcek avə ma ngə mokotufiy ngetik cike, a luwta Kristu hid sin mə welu av kə zlən takwan. 19 Tanjinhi geleɓ mə buw ngar, mə buwah kin angər Bayzlav, sin kə geɗ mə ngavngav ngəkin kaɗ. 20 Za mana hin tu ɗiy atəgo wər, Bayzlav av kə vəlehin zoy, za av kə zlənehin Yesu Kristu, sin mə welu taməcek kə mbəlehin. 21 Tanjinhi Bayzlav a may Yesu kə ɗew gesin a dibizlav hos am pic sin tu kə zlambaɗ təkəniy ndawyan, mana sin mə ceɗ taməcek avə ma ngə mokotufiy ngetik.
22 ‹‹Aməcek Musa tu luw atalan Yesu səna, a luw: ‹Bayzlav məmar hin a luw av kə zlənehin mokotuf mana kata, təm səban ngəkin. Hin kə ɗiy təkəniy sin tu kə luwehin cike. 23 Hid mətak zlim ma ngə mokotuf səna, av kə gamta kaɗ a dab hidiy ngə Bayzlav za, za av kə wəzlta kaɗ.› 24 Za mokotufiy ngə Bayzlav cike wayza, diw a Samuyila avə hidiy məpərmay, cike a zləgamigi, hidi a dəwən hidi atalan təkən ta ton ta pica. 25 Təkən Bayzlav mə luw a ma ngə mokotufiy ngetik av kə vəlen a hidigi, a luw atalan kin. Am pic səna, Bayzlav a jawma a didiy kin. Sin luwen a Ibrahima: ‹Mbelmbel səban koh, təv kə ɗiyen ngər bay a hidiy təm talan mahayək cike wayza.› Bayzlav a jawma nhi, makavay hin təm. 26 Asəna acin, Bayzlav mbəlah hid mə ɗiy kəzəɗ ngetik a mə məc za makavay hin zagway, sin zlənah kə jan kə ɗiyehin ngərbay, a kə mənehin kə buw dəwən a mə ngavngaviy kin.››