Mbiɗ ngə Bayzlav surohoh atalan mə səbiy Yesu
2
Pic məmbəlwa ta njə kə luwta Pentekosta maa hos za, hidiy mə səbiy Kristu cike wayza mə ɓasiy kaɗ am lay takan. 2 Njoɗ zlimiy ləv təkən aa dibizlav za, wa mbiɗ mə njə kə cah aa gədan. Wek jik taniy mə ɓasiy təbəgo səna. 3 Za acin taniy limiy təkən mana gana kuhu. Gana kuhu səna ɗiya wəzak par par kpasl tanigi. 4 Mbiɗ ngə Bayzlav tu surohoh atalan tan, wek nəv ngatan cike wayza. Ɗiya zləgamiy avə ma maa a sənta ɗahkwən, mana Mbiɗ ngə Bayzlav mə luwenta kə zləgam.5 A liɓde Ursalima, Yahudiy dolom mə səbiy ma ngə Bayzlav a nəv malaw awaniy abəgo, a yiy a mə hayək par par təm talan mahayək cike wayza. 6 Hidiy maa zlimiy ləv ngə təkən tafnan za, taniy ɗiya ɓasiy dolom am lay səna. Abəgo, hidiy mə səbiy Yesu a zləgamigi, ko hid ngayi a zlim zləgam səna a madaba gana ngetik, za tu wələk bərngəzl talan ngə hidiy mə zlimta. 7 Təkən səna tu ngenta talan dayday, za taniy wələk-wələk, ɗiya luwta: ‹‹Aska hidiy mə zləgamiy nhi cike hidiy təm hayək Galili ɗər kwa? 8 Ya za acin, aa zləgamigi, za ko hidi ngayi tə dab yikwan a zlim tik a madaba gana ngetik, a ɗiy aceki ? 9 Za maa, yikwan taa zlim zləgam nhi, yikwan mə yah aa mə hayəkiy par par. Hidiy sənan a yiy a mə hayək Partiya, Mediya, Elam. Sənan a yiy a Mesopotamiya, a Yahudiya za, a Kapadosiya za, a Pontiyus ɓəw a Asiya. 10 Sənan təm a yiy a Firigiya, a Pamfiliya za, a Misra za, ɓəw aa mə hayək Libiya ma mbeh mbeh avə hayək Sirene. Za hidiy məpərmay a yiy a Roma za. 11 Hidiy məpərmay təm a yiy a mə hayək Kireta za ɓəw a mə hayək Arabiya za. Adab tan, hidiy məpərmay Yahudigi, za hidiy məpərmay təm mə səbiy mə zugzugwa ngə Yahudigi dap. Za acin, yikwan cike yikwan maa zlim taniy a ceɗiy yikwan təkəniy mogroy Bayzlav mə ɗiyu a madaba gana ngiykwan.›› 12 Təkəniy səna tu wələk bərgngəzl talan tan, za taniy wələk-wələk. Taniy cike wayza a zləgamiy am walan tan, ɗiya luwta: ‹‹Təkən nhi wər a gər kə luw mi ?›› 13 Hidiy məpərmay ɗiya mbisenta a mə səbiy Yesu, luwta: ‹‹Hidiy nhi a hayigi.››
Piyer a zləgamen a hidiy mə ɓas ɓas
14 Za acin, Piyer sliɗ avə məzlənzləniy ngə Yesu ma gəɓ atalan takan, za ɗiya zləgamen a hidiy mə ɓas ɓasiy səna day day, ɗiya luwenta: ‹‹Hin Yahudigi avə hidiy tə liɓde Ursalima cike, mə zlim zləgam ngaɗ law law, kə jan hin kə sən təkən taa ton nhi. 15 Hidiy hin mə luw a hayigi nhi, mindiwin wər a hayiy mana hin mə ɓən kwən. Tanjinhi masa ngərafkatakan ngə gbəm dap, a siy təkən gesin bəgwən. 16 Amma təkən hin taa lim taa ɗiy nhi, sin acin təkən mokotuf ngə Bayzlav zlim tik Yo'el mə ceɗ taməcek. Sin a luw:
17 ‹Bayzlav a luw: Anhi təkən tu kə hosohoh am pic way ngə talan mahayək.
Təv kə vəl Mbiɗ ngaɗa a hidiy cike wayza.
Wəriy kin mawəligi avə wərzigi
av kə mbaɗiy kə mokotufiy ɗa.
Təv kə ɗefen təkəniy par par a wəriy gawliy kin waa a sinigi.
Mbusuriy kin av kə sinigi.
18 Yaw mindiwin, a pic səna,
təv kə vəl Mbiɗ ngaɗa
a mawəliy ɓəw wertiy mə ɗiyiy kəzəɗ ngaɗa,
za av kə mbaɗiy kə mokotufiy ɗa.
19 Təv kə ɗiy təkəniy ma təwah a dibizlav,
ɓəw təkən mə njə kə wələk bərngəzl ngə hidiy təm, am talan mahayək nhi.
Hin məv kə lim ɓiɓiz,
hin məv kə lim kuhu
ɓəw hin məv kə lim seleh, titititit, wa gazlavay.
20 Pic av kə kpizlik,
za tra av kə mbaɗ pren pren wa ɓiɓiz.
Za acin, pic ngaɗa av kə hos,
pic kata Bayzlav Məmar Hidi tu kə zla dalgway ngə hidigi, pic səna pic mordoy maa day kə luw.
21 Am pic səna acin, ko hid ngayi mə ɗefekma Kat Bayzlav Məmar Hidi,
təv kə mbəl tik.›››
22 Piyer ɗiya luw baha: ‹‹ Hin Israyiligi, mə zlim zləgam kat tu kə ceɗehin nhi. Bayzlav mə ɗefehin Yesu njə Nasaratu nhi hid ngayi za. Hin mə sən za law law Bayzlav acin mə vəlen gədan mordoy kə ɗiy təkəniy ma təwah, təkəniy mə wələk bərngəzl ɓəw kə ɗiy təkəniy mə kpah talan par par a kibik kin. 23 Hin kaw Yesu səna, za hin vəlen a hidiy maa a yəkiy Bayzlav bəgwən, taniy kpawta am pay maa zləngrak, za sin məc. Təkən hin mə ɗiy nhi, Bayzlav acin mə sləsləɓ tik dəga aməcek za. 24 Amma Bayzlav wir takwan ngə məc ngə Yesu, sin mbəlah kaɗ aa mə məc za, kadaban məc kwəl kə mar gədan atalan tik ɗaba. 25 Bay Dawda mə luw za aməcek atalan Yesu. Sin a luw:
‹ Hoy hoy tə njə kə lim
Bayzlav Məmar hidi a kibik ɗa,
makavay sin awan aa mə ngərzəm ɗa,
kə jan kat kə hovok kwən.
26 Kadaban səna acin nəv ngaɗa awana zəzay,
za ma ngaɗa aa jək drif ngə zəzay.
Za ko kat mə məca za,
təv kə bəbəc atalan Bayzlav dap.
27 Kadaban kat mə sən za,
hoh geɗek am lay ɗew ngə mimciy kwən.
Zəni kat hid hoh mə welu,
hoh geɗ kəsəm ngə hid malaw mə ɗiy kəzəɗ ngəkoh am civi kə wər kwən.
28 Hoh ɗefek mozlokotuf ngə jan micin mətak way.
hav kə wek nəv ngaɗa avə zəzay
kadaban hoh awana avə kata.›››
29 Piyer jəɓ luwenta baha: ‹‹Galmayɗigi, taa may kə zləgamehin mgban-mgban a talan didi ngiykwan bay Dawda, sin mə məca za, mə kahta kaɗ. Za talan civi ngetik a wan mbeh a jagwar yikwan awənhi kula apica. 30 Sin tu ɗew kə mokotuf ngə Bayzlav. Sin tu sən təkən Bayzlav mə luwenni avə luw mbeɗi, sin a luwenni: ‹Təv kə vərək hid tə madaba koh, kə ɗew kə bay am lay koh.› 31 Dawda mə sən za, Kristu av kə mbəzlah a mə məc za. kadaban səna sin luw acin:
‹Bayzlav a geɗ am lay ɗew ngə miciy bəgwən,
za kəsəm ngetik a wər am civi bəgwən.›
32 Hid kat taa zləgam tə talan tik nhi, sin acin Yesu. Bayzlav tu mbəlah kaɗ aa mə məc za, yikwan cike yikwan mə lim mana təkən səna mə ton za. 33 Adəwən səna, Bahbay tik Bayzlav wət kəv dibizlav, vərək am ngər zəm ngetik, za vəlen Mbiɗ ngetik sin mə vərək kə vəlenni. Təkən hin taa lim tanjinhi ɓəw hin taa zlimu, Mbiɗ ngə Bayzlav Yesu mə vəlikwan səna acin, ta ɗiy tik.
34 Mə safu, Dawda wər a hos a dibizlav mana Yesu bəgwən. Amma sin zləgam atalan Kristu, sin ɗiya luw :
‹Bayzlav Məmar Hidi luwen a Məmar kata:
A yah, ma ɗewey koh am ngər zəm ngaɗa,
35 hos am pic kat tu kə vəl mosumiy koh,
hoh kə bacenta ngaz!›
36 ‹‹Hin hidiy Israyila cike, say hin kə sən tik lawlaw. Yesu hin mə kpaw təm pay maa zləngərak nhi, sin acin hid Bayzlav mə vərək kə ɗew kə Kristu ɓəw Məmar hidi.››
37 Hidiy cike tə kibik Piyer maa zlimiy ləbar təgo za, nəv ngatan ndoh. Ɗiya nehiy Piyer ɓəw məzlənzləniy ngə Yesu məpərmayigi, luwta: ‹‹Galmayɗigi, tanjinhi yikwan kə ɗiya aceki acin? ›› 38 Piyer zlawenta, ɗiya luw: ‹‹Mə buw ngar kaɗ, za hin cike hin kə yək baptisma am zlim ngə Yesu Kristu, kə jan Bayzlav kə geɗ mə ngavngav ngəkin kaɗ, za kə vəlehin Mbiɗ ngetik. 39 Bayzlav a luw aməcek av kə vəlen Mbiɗ ngetik a hin avə wəriy kin ɓəw a hidiy məpərmay təm hayəkiy maa gaf. Za av kə vəlen a hidiy cike sin tu kə ɗefentəma kə səbiy mozlokotuf ngetik.›› 40 Piyer ɗiya zləgamenta ma məpərmay dolom kə jan taniy kə yəkiy zləgam ngetik ɓəw kə vəlenta gədan. A luwenta: ‹‹Mə pət kin a dab hidiy mə ngavngav nhi za, mə geɗ Bayzlav kə lerehin aa mə dalgway tu kə hosoh atalan tan.›› 41 Hidiy dolom zlimiy zləgam ngə Piyer, sənan tə dab tan yəkiy zləgam ngetik, za yəkiy baptisma. Am pic səna, av kə ɗiy hidiy ngərbək makaɗ mə lapiy a dab hidiy mə səbiy Yesu.
Ɗew ngə hidiy mə səbiy Yesu
42 Hoyhoy hidiy mə səbiy Yesu a njə kə lapiy kaɗ kə zlimiy jəgwan məzlənzləniy ngə Yesu ta ceɗenta. A njə kə mgbəwiy talan tan, ɗaw kə zəmiy gəda witik-witik, za ɗaw kə tariy Bayzlav witik-witik. 43 Mə zlənzləniy ngə Yesu a ɗiyiy təkəniy maa təwah ɓəw təkəniy mə wələk bərngəzl talan godokwən. Za hidiy mə limta, ɗiya hovokigi. 44 Hidiy mə yəkiy Yesu cike ɗewiy witik witik, za lapiy təkəniy ngatan am lay takan. 45 Təkən taniy mə marta ɓəw arayiy ngatan a njə kə berta kaɗ, za kə wəzakiy suloy tik am walan tan. Ko hid ngayi mana sin mə gəru. 46 Hoyhoy a njə kə lapiy avə nəv takan am jik Bayzlav, za a njə kə viy kə de kə de kə hamiy Bred. Ɓəw a njə kə zəmiy gəda avə zəzay ɓəw a nəv malaw. 47 A njə kə səbaniy Bayzlav, za nəv ngə hidiy cike tu fet a tanigi. Hoyhoy Məmar yikwan Yesu a njə kə dah hidiy sin mə mbəlta am mgbuw ngə hidiy ngetik.