Kəzəɗ Yesu mə vəlen
a wəriy gawliy ngetik
Yesu avə məzlənzləniy ngetik
1
Ngwalayɗa Teyofilus, am tizin deftere kat mə ɗəɗefu, kat tə ceɗ kəzəɗiy Yesu mə ɗiyu cike wayza, ɓəw mə jugwanen təkəniy a hidiy dəga am diw tik, 2 hos am pic Bayzlav mə wət kəv a dibizlav. Mandal sin av tik a dibizlav gesin bəgwən, avə gədan ngə Mbiɗ ngə Bayzlav, sin vəlen ngəz a məzlənzləniy ngetik sin mə welu. 3 Adəwən sin maa sa takwan hos am məc za, mbəlah tik aa mə məc za. Wan ngərfoɗ sin mə ɗef talan tik aa məzlənzləniy ngetik avə ɗiy təkəniy madaba par par. A ɗef talan tik səna, kə jan taniy kə sənta mindiwin sin awana avə micin. Zəni sin tu zləgamenta atalan bay ngə Bayzlav.4 Pic takan, Yesu a zəmiy gəda avə məzlənzləniy tik. Sin ɗiya ngəzta, luwenta acin: ‹‹Mə ɗew a liɓde Ursalima awənhi, kə puw təkən taməcek Vay Bayzlav mə luw av kə zlənehin. Kat avə talan ɗa, kat mə ceɗehin za. 5 Yuhana wər, a ɗiyen baptisma a hidiy avə yəm. Amma ngəkin, a fəs wan gwedek, Bayzlav av kə ɗiyehin baptisma avə Mbiɗ ngetik.››
Bayzlav wət Yesu kəv dibizlav
6 Mə zləzləniy ngə Yesu mə ɓasiy kaɗ avə sin, ɗiya nehta acin, a luwta: ‹‹Aw Mə mar yikwan, tanjinhi hov kə mohoh yikwan bay ngiykwan Israyiliy kaɗ am lay tik vu?›› 7 Yesu zlawenta, ɗiya luw: ‹‹Kə sən təkən nhi av kə ton am pic ngemi asənkwən am mandal ceki, ma ngəkin kwən. Vay acin mə sla wan tik, sin a gendik palpal acin məmar gədan ngə ɗiy təkən səna. 8 Amma hin wər, Bayzlav av kə zlənah Mbiɗ ngetik atalan kin, hin kə jan gədan. Za acin, hin məv kə ɗew kə məsəberiy ɗa a liɓde Ursalima awənhi, am hayək Yahudiya cike wayza, ɓəw am hayək Samariya, za kpasl a madaba lay cike wayza.
9 Yesu maa way kə luw atəgo za, Bayzlav wət kaɗ kəv dibizlav. Mandal Bayzlav taa ɓiy tik səna, məzlənzləniy tik aa ciy həriya kəv wəzlav, a safta nha sin lekey tik a liɓ gazlavay, aa limta ɗahɗaba. 10 Mandal ta zlayiy talan kə ciy həriya a dibizlav am lay Yesu mə va səna, hidiy saray pətiy mə ndumndum a jagwar tan avə ləkwət maa baran. 11 Taniy ɗiya luwenta: ‹‹Hidiy tə Galili ca, hin garra awənhi, a həriya cahha a dibizlav kemi? Yesu Bayzlav mə wət tə dab kin kəv dibizlav nhi, av kə jəɓaha mana hin taa lim tik aa vətik kəv dibizlav nhi.››
Weliy hid am lay ngə Yahuda
12 Za gwedek məzlənzləniy ngə Yesu surohiy tan aa talan wurum ta njə kə luwta Wurum Jaytun za, jəɓiy tan a liɓde Ursalima. Wurum səna ɗah gaf a liɓde Ursalima kwən, av kə ɗiy kilometir takan. 13 Ma hosiy a liɓde Ursalima za, tapigi, za pətiy am jik tə talan celen am lay taa njə kə mgbəwiy hoyhoy abəgo. Hidiy mə pətiy am jik səna acin: Piyer, Yuhana, Yakuba, Andire, Filip, Tomas, Bartolome, Mata, Yakuba kər ngə Halfa, Simon hid mə njə kə jəgəm makavay hayək tik, ɓəw Yahuda kər ngə Yakuba. 14 Taniy cike a njə kə lapiy hoyhoy kə tariy Bayzlav avə nəv takan. Mariyama mahmay ngə Yesu, galməniy ngə Yesu, ɓəw wertiy məpərmay.
15 Pic takan, hidiy mə njə kə yəkiy zləgam ngə Yesu ɓasiy kaɗ, av kə hosiy blək avə ngər səray. Piyer sliɗ, gar aa gar kə zləgamenta, ɗiya luw: 16 ‹‹Galmayɗigi, aməcek Mbiɗ ngə Bayzlav tu luw avə ma ngə Dawda am Deftere atalan Yahuda mə ngazl hidiy məpərmay kə kawiy Yesu. Ləbar Bayzlav təm Deftere səna tu ɗiy tiɗtiɗe. 17 Yahuda səna tu ɗew a dab yikwan məzlənzləniy ngə Yesu, za tu jan kəzəɗ ngə ɗiy wa yikwan təm.›› 18 Sin a suloy sin mə jan am ɗef ngəra atalan Yesu səna, səkəm tuz avə sin. Am tuz səna, sin ndəv a kayək, liɓ təz, wenji, virɗiɗiɗ, za məcay tik. 19 Hidiy tə liɓde Ursalima cike wayza tu zlimiy ləbar ngetik. Centa zlimi a tuz səna avə ma ngatan Hakeldama, mana kə luw kaɗ ‹Tuz ngə ɓiɓiz.›
20 Piyer ɗiya luw baha: ‹‹Dawda mə luw za am deftere Drif ngetik. Sin a luw:
‹Hid mə gər kə zəm de ngə gawal səna kwən,
kifde ngetik mə ɗew maymayª.›
Sin mə ɗəɗef za baha:
‹Mə vərəkiy hid məpərmay kə ɗiy kəzəɗ am lay ngetikª.›
21-22 ‹‹Mana asəna acin, say hid takan kə lap avə yikwan, kə ceɗ ləbar a hidigi atalan Yesu Məmar Hidi, mə mbəlah ta mə məc za. Hid səna kə ɗew kə hid taməcek tə dab yikwan mandal yikwan taa tal avə Məmar yikwan Yesu, diw am pic Yuhana mə ɗiyen baptisma a Yesu kula am pic Bayzlav mə wət Yesu a dab yikwan za kəv dibizlav.››
23 Hidiy mə ɓas ɓas maa zlimiy ləbar ngə Piyer za, ɓiyiy hidiy səray. Adab hidiy maa səray səna, hid sənan zlim tik: Zozef mə njə kə luwta Barsabas, za ɗaw kə luwenta Zustus baha. Za zlim ngə hid sənan acin Matiyas. 24 Ma ɓiyta za acin, tariy Bayzlav witik witik, ɗiya luwta: ‹‹Məmar yikwan, hoh sən nəv ngə hidiy cike wayza. Ambu! A ɗef yikwan hid takan hoh mə welu a dab hidiy maa səray nhi, 25 sin kə ɗew kə mə zlənzlən ngə Yesu am lay ngə Yahuda mə geɗ kəzəɗ ngə Yesu, za kə vətik am lay sin mə mayu.›› 26 Adəwən səna, ɗiyiy metentengeª kə səniy hid tu kə ɗew am lay ngə Yahuda səna. Zəni metentenge səna ndəv atalan Matiyas. Sin lap avə məzlənzləniy ngə Yesu ma gəɓ atalan takan acin.