Weliy hidiy cisaray kə mən məzlənzləniy ngə Yesu
6
Mandal səna, hidiy mə njə kə səbiy mozlokotuf ngə Yesu tu fufuligi. Za Yahudiy tə dab tan mə njə kə zləgamiy ma yunanin ɗiya jəgwaniy ma atalan Yahudiy mə njə kə zləgamiy ma ibranin. A luwta: ‹‹Hoyhoy mandal aa wəzakiy gəda, wertiy mə cupcup mə yiy taa de ngiykwan a janta ɗahkwən.›› 2 Mə zlənzləniy ngə Yesu maa gəɓ atalan saray maa zlimta atəgo za acin, ɓasiy hidiy mə səbiy mozlokotuf ngə Yesu cike kaɗ, za luwenta: ‹‹Ngiykwan wər, yikwan mə geɗ ceɗ ləbar ngə Bayzlav kaɗ, za kə wəzakehin təkəniy ngə zəm kwən. 3 Kadaban səna galmayɗigi, geleɓ mə wel hidiy cisaray a dab kin mə mariy ngar malaw. Hidiy njə Mbiɗ ngə Bayzlav maa wek təm nəv, za njə bərngəzl talan malaw. Yikwan kə vrəkta kə ɗiyiy kəzəɗ ngə wəzak təkeniy ngə zəm səna. 4 Ngiykwan wər, yikwan kə ɗiy kəzəɗ ngə tar Bayzlav ɓəw kə ceɗ ləbar ngetik a hidiy dap.››5 Hidiy cike mə ɓas ɓas maa zlimta za acin, yəkiy ma səna. Weliy Etiyen mə yək Bayzlav lawlaw, ɓəw njə Mbiɗ ngə Bayzlav maa wek təm nəv, ɓəw Filip, Porokorus, Nikanor, Timon, Parmenas, ɓəw Nikolawus. Nikolawus səna tə liɓde Antakiya, a njə kə səb məzugzugwa ngə Yahudigi. 6 Hidiy maa weliy hidiy maa cisaray nhi za, tepta angər məzlənzləniy ngə Yesu. Mə zlənzləniy ngə Yesu ɗiyiy ngəra atalan tan, za tarenta Bayzlav.
7 A dəwən səna, ləbar ngə Bayzlav ɗiya cakway kibik-kibik. Hoyhoy hidiy mə njə kə səbiy mozlokotuf ngə Yesu aa fufuligi a Ursalima, za masayiy təm dolom vəliy nəv ngatan a Yesu.
Hidiy kawiy Etiyen
8 Bayzlav ɗiyen ngərbay ɓəw vəlen gədan ngetik a Etiyen. Zəni Etiyen ɗaw kə ɗiy təkəniy mə wələk bərngəzl ɓəw təkəniy mə kpah talan par par a dab hidigi. 9 Amma Yahudiy məpərmay təbəgo ɓoniy kə yəkiy zləgam ngetik. Hidiy səna a njə kə viy am jik jəgwan ngə Yahudigi, mə njə kə luwta ‹‹Jik jəgwan ngə hidiy mə zlambaɗata aa mə bahlam za.›› Hidiy səna a yiy aa mə hayək Sirene za, ɓəw aa mə hayək Aleksandriya. Ya Yahudiy məpərmay ɗahigi a dab tan mə yiy aa mə hayək Silikiya ɓəw aa mə hayək Asiya za. Taniy cike mə ɓasiy kaɗ, aa ngiway avə Etiyen. 10 Amma hidiy mə ɓəsiy kə zləgam day kə Etiyen ɗahkwən, kadaban Mbiɗ ngə Bayzlav a vəlen sən ngə zləgam. 11 Hidiy mə ɓoniy kə yəkiy zləgam ngə Etiyen səna vəlenta suloy a hidigi kə ngawentəma. Za kə luwta: ‹‹Yikwan mə zlim a zləgam mə ngavngav atalan Musa ɓəw atalan Bayzlav.›› 12 Asəna acin, a kafiy nəv ngə hidigi, ngə talan mbalgamiy ngə yahudigi ɓəw ngə mogroy ngə jugwan. Zəni hidiy cike ɓeriy Etiyen, kawta, za tepta a kibik mgbəw ngə hidiy mə zliy dalgway. 13 Za tepiy məsəberiy mə ngawiy ma, luwta: ‹‹Gawal nhi hoy hoy a njə kə zləgam ma mə ngavngav atalan jik Bayzlav ɓəw atalan mə jawjaw ngə Musa. 14 Yikwan mə zlim sin a luw: ‹‹Yesu njə Nasaratu av kə gom jik Bayzlav, za av kə zlambaɗ mə jawjaw Musa mə vəliyikwan kaɗ.›› 15 Hidiy mə zliy dalgway cike maa zlimta atəgo za, ɗiya ciy həriya atalan Etiyen. A limiy muzuroh ngetik wa ngə mbaslay məpərmay ngə Bayzlav.