Etiyen a zləgam a kibik mgbəw ngə hidiy mə zliy dalgway
7
Masay mordoy təm jik Bayzlav ɗiya neh Etiyen, ɗiya luw: ‹‹Mana ta luwta atalan koh nhi, mindiwin vu?›› 2 Etiyen zlawenni, ɗiya luw: ‹‹Galmayɗigi ɓəw bahbayɗigi, mə zlimu. Bayzlav mə mar gədan mordoy tu ɗef talan tik a didi ngiykwan Ibrahima, mandal sin wəlen am hayək Mesopotamiya, a yan kə va am hayək Haran gesin bəgwən. 3 Bayzlav luwenni: ‹A sliɗ aa mə hayək koh za ɓəw a geɗ səban koh. Ma va am lay kat tu kə ɗefeh.› 4 Zəni Ibrahima geɗ hayək Kaldiya səna, sliɗ va ɗewey tik am hayək Haran. Za bahbay tik məc. Adəwən səna, Bayzlav luwenni sin kə gara aa mə hayək səna za, kə va am hayək hin taa ɗew maa tanjinhi. 5 Abəgo, Bayzlav a vəlen lay a Ibrahima bəgwən, sin a jan lay ko gwedek bəgwən. Say a luwenni: ‹Təv kə vəloh hayək nhi hoh kə mar tik. Adəwən koh, səbaniy koh kə marta təm.› Mandal səna, Ibrahima a jan kərti bəgwən. 6 Bayzlav luwen baha: ‹Wəriy ngə wəriy koh av kə ɗewiy am hayək ngə hidigi. Abəgo, hidiy av kə ɗiyta kə bahlam, za av kə ɗiyenta takwan hos am di blək foɗ. 7 Amma təv kə zla dalgway ngə hidiy mə ɗiyiy taniy kə bahlamiy səna. Adəwən səna, wəriy ngə wəriy koh av kə geɗiy hayək təgo, kə yiy kə mbəzlakta am hayək nhi.› 8 Bayzlav maa luw atəgo za, jawma ndawyan avə Ibrahima. Zla mandawal acin tu kə ɗef jawma ngatan. Anhi acin Ibrahima mbuw Isiyaku. Adəwən zəm luma takan, sin zla mandawal tik kaɗ. Isiyaku təm zla mandawal ngə kərti tik Yakubu. Yakubu zla mandawal ngə wəriy tik ma gəɓ atalan saray. Wəriy tik maa gəɓ atalan saray səna acin didiy ngiykwan.9 ‹‹Didiy ngiykwan səna ɗiyenta ngərak avə galmən tan Yusufu. Taniy kawiy Yusufu, berenta a hidiy kə tepta kə bahlam a Misra. Amma Bayzlav ɗew avə sin hoyhoy. 10 Sin mbəl kaɗ am takwaniy tik cike wayza. Bayzlav vəlen sən. Sin ɗiy Firawna bay ngə hayək Misra kə may Yusufu. Za bay səna vrək kə talan mbalgam mordoy am hayək ngetik cike wayza. Za sin vəlen de ngetik cike, sin kə puw tik.
11 ‹‹Adəwən səna, mitis ɗiya ɗiy am hayək Misra ɓəw am hayək Kanana cike wayza. Hidiy tu zləniy takwan dayday. Zəni didiy ngiykwan aa janiy təkəniy ngə zəm ɗahkwən. 12 Yakubu maa zlim təkən ngə zəm ɗaha am hayək Misra za, zlən wəriy tik abəgo. A zlənta nhi ngə tizin tik. 13 Maa zlənta jəɓ mə saray tik baha, Yusufu ceɗenta sin galmən tan. Am pic səna acin, bay Firawna sən səban ngə Yusufu. 14 Zəni Yusufu zlən galməniy kə dahiy bahbay tik Yakubu avə hidiy tə de ngetik cike. Taniy cike wayza ngər cisaray avə joɓən. 15 Yakubu va a Misra acin. Sin ɗew ɗew hos am məc ngetik abəgo. Za didiy ngiykwan a məciy abəgo təm. 16 Maa məciy za, hidiy dahta am hayək Sikem. A kahta am civi Ibrahima mə səkəmu amicek avə suloy angər wəriy Hamor.
17 ‹‹Mandal didiy ngiykwan awaniy a Misra, pic ngə ɗiy təkən mana Bayzlav mə luwen a Ibrahima mbeh kə hos. Hidiy ngiykwan tu fufuliy dayday am hayək Misra. 18 Zəni bay məpərmay ma aa sən Yusufu ɗahkwən, ɗiya zəm bay am hayək Misra səna. 19 Bay səna jək hidiy ngiykwan, za sin zlənen takwan a didiy ngiykwan. Tu takenta wəla taniy kə fəkiy wəriy ngatan mawariy kə məcigi. 20 Am mandal səna acin mə mbuwiy Musa. Sin kər malaw, za Bayzlav a may tik. Kər səna a sa wa ngə mahmay tik tər makaɗ a de bahbay tik. 21 Maa fəkta kaɗ za, kərtaza ngə bay ɓiy. Sin gəl gendik mana kərti tik. 22 Asəna acin, Musa jəgwan təkəniy cike Misriy mə sənta. Sin mbaɗ kə hid mə njə kə zləgam ɓəw mə njə kə ɗiy kəzəɗ a gədan.
23 ‹‹Musa maa hos di ngər foɗ za, pic takan jan ɓən ngəv kə safah hidiy ngetik Isirayiligi. 24 Mandal sin a va a mozlokotuf, jan hid məpərmay njə Misra a ɗiyen takwan a hid təm səban ngetik Israyila. Va mən hid ngetik taa sa takwan, wəzl gawal səna kaɗ. 25 ‹‹Sin acagendik səban ngetik av kə sənta, Bayzlav av kə mbəlta aa ngər tik za. Za ko a sənta ɓahbəgwən. 26 Apat tik, sin jan hidiy Isirayila saray aa wəzliy kəsəm. Sin a gər kə tərta kaɗ taniy kə ɗewiy avə zoy. Sin ɗiya luwenta: ‹Aw ngwalayɗigi, mə wəzl kəsəm kemi? Hin galmayiy kwən vu?› 27 Amma hid njə gədan maa day, goɗ Musa. Za luwenni: ‹Hid ngayi mə vrəkoh kə bay kə zla dalgway ngiykwan yi? 28 Hoh gər kə wəzlak kaɗ təm mana hoh mə wəzl njə Misra tavənan vu?› 29 Musa maa zlim atəgo za, sin hovok, geɗ hayək Misra kaɗ, paf, siy tik am hayək Mediyan. Abəgo dəm werti, za mbu wəriy kərtawəl saray.
30 ‹‹Adəwən di ngər foɗ, pic takan Musa awan a dab donu mbeh abər wurum Sina, sin lim Mbaslay ngə Bayzlav. Sin a lim Mbaslay səna a liɓ gana kuhu taa zlaw am vidiɗ pay. 31 Maa lim za, tu wələk talan tik, za sin sliɗ kəv mbeh mbeh kə saf tik. Mandal sin mbeh kə hos, sin zlim wəla ngə Bayzlav Məmar hidi a luwenni: 32 ‹Kata acin Bayzlav ngə didiy koh Ibrahima, Isiyaku ɓəw Yakubu.› Musa maa zlim atəgo za, a hovok diw kə nənəh, za aa may kə cə həriya tik akimin ɗaba. 33 Za acin Bayzlav Məmar hidi luwenni: ‹A cok kərap təm ngaz koh kaɗ, kadaban lay hoh mə gar akimin nhi lay maa kweɗek. 34 Kat lim hidiy ɗa təm hayək Misra aa siy takwan. Za kat zlim aa əzənigi. Kadaban səna acin, kat tə surohoh aa dibizlav za kə mbəlta kaɗ. Ya tanjinhi, ayah, kat kə zlənoh a Misra.›
35 ‹‹Ya Musa nhi, hidiy Isirayila təm hayək Misra tu ɓoniy ma ngetik amicek. Taniy a luwenta: ‹Hid ngayi mə vrəkoh kə bay kə zla dalgway ngiykwan yi?› Za ɗər Musa səna, Bayzlav zlən sin kə ɗew kə talan mbalgam ɓəw kə hid mə lereh hidiy ngetik aa mə bahlam za, avə mən ngə mbaslay ngetik, Musa mə lim təm gana kuhu ta zlaw am vidiɗ pay. 36 Musa səna acin mə ngazlah Israyiliy aa Misra za. Di ngər foɗ sin awana avə tanigi. Sin tu ɗiy təkəniy maa təwa parpar ɓəw təkən mə wələk bərngəzl. A ɗiy təkəniy səna a Misra bəgo, a maza mordoy maa pren ɓəw a dab donu. 37 Za Musa səna acin mə luwen a Israyiliy, sin a luwenta: ‹Bayzlav av kə zlənehin mokotuf mana kata, av kə zlənah hid təm səban kin.› 38 ‹‹Mandal Isirayiliy mə ɓasiy a dab donu, Musa səna awana avə tanigi. Sin tu ɗew am walan ngə didiy ngiykwan avə mbaslay ngə Bayzlav ta zləgamenni a wurum Sina. Asəna acin, sin zlime ləbar ngə jan micin angər Bayzlav, za yah ceɗiyikwan.
39 Amma didiy ngiykwan a mayiy kə zlimentəma bəgwən, ɓoniy ma ngetik. Taniy a mayiy kə jəɓiy tan am hayək Misra.› 40 Tu luwenta a Haruna: ‹A ɓəsliy yikwan təkəniy məv kə ɗewiy kə Bayzlav ngiykwan, za sin kə cah yikwan kibik. Kadaban Musa gawal mə ngazlah yikwan taa mə hayək Misra za nhi, yikwan mə sən təkən mə janen a wurum bəgo bəgwən.› 41 Am mandal səna acin, taniy ɓəslɓəsliy zugwa mana kərvəlen. Ɓiyiy təkən huvu, fatenta a zugwa səna. Diw kə ɗiyiy məmbəlwa avə zəzay atalan təkən taniy mə ndənta avə ngər ngatan. 42 Amma Bayzlav buwenta dəwən, geɗta kaɗ taniy kə mbəzliy cuwzlerekiy tə dibizlav. A ɗiyta mana mə ɗəɗefta am deftere ngə mokotufigi. Am deftere səna, Bayzlav a luw:
‹Hin Isirayiligi,
di ngər foɗ a dab donu, hin mə bənak təkən za ɗaha vu?
Hin mə vəlak təkən zaba vu?
43 Awwo, amma hin ɓiy mazlaɓ ngə zugwa Molok,
za hin ɓiy zugwa mə ɓəslɓəsl mana cuwzlerek hin mə njə kə ɗefta Refan.
Zugwiy səna, hin acin mə ɓəslta avə ngər ngəkin kə mbəzl.
Kadaban səna acin,
təv kə ngazlehin am hayək məpərmay,
təv kə tepehin gədək zlan hayək Babila.›
44 ‹‹Mandal didiy ngiykwan mə ɗewiy adab donu, tu ɗiyiy mazlaɓ. A madabah mazlaɓ səna, təkəniy ngə jawma ngə Bayzlav avə hidiy ngetik awaniy abəgo. A ɗiyta mana Bayzlav mə ceɗen a Musa sin kə ɗiytik. Za Musa ɗiy mana Bayzlav mə ɗefenni. 45 Adəwən səna, didiy ngiykwan geɗenta a wəriy ngatan. Hid ɗaha zlim tik Yosuwa. Sin acin talan mbalgam ngə ngazl hidiy kə pətiy am hayək Kanana avə mazlaɓ səna. Bayzlav gam hidiy təm hayək səna kaɗ, za taniy ɗewiy abəgo avə mazlaɓ səna hos am mandal mə vrəkiy Dawda kə bay. 46 Bay Dawda səna, fet nəv ngə Bayzlav. Sin tar Bayzlav kə geɗen mozlokotuf sin kə ndənen jik. Bayzlav səna acin Yakubu taa njə kə səban tik. 47 Amma kərti tik bay Suleymanu acin mə ndən jik səna.
48 ‹‹Za ɗər, Bayzlav maa fal, aa ɗew a jik hidiy mə ndənta avə ngəra ngatan ɗahkwən. Mana mokotuf ngə Bayzlav mə luwu:
49 Bayzlav a luw:
‹Dibizlav acin lay ɗew ngaɗa, za talan mahayək acin lay jak ngaziy ngaɗa.
Za acin wər, jik hin tu kə ndən
a kata səna acin jik mana aceki ?
Za lay nəp ngaɗ wər akway?
50 Ya təkəniy cike kata acin mə ɗiy tik aa ngər ngaɗ kwən vu?›››
51 Etiyen ɗiya luwen a hidiy mə zliy dalgway səna baha: ‹‹Bərngəzl talan kin ɓəw nəv ngəkin toytoy. Za hin tu nek zlim ngəkin kaɗ kə ɗew mətak zlim zləgam ngə Bayzlav. Hin maa yək ləbar Mbiɗ ngə Bayzlav ta luw a hin ɗahkwən. Hin wa didiy kin. 52 Aməcek didiy kin tu zlənenta banay a mokotufiy ngə Bayzlav cike wayza. Taniy wəzliy hidiy mə njə kə ceɗenta yah ngə hid ma kweɗek kaɗ. Za tanjinhi, hin mə ber hid səna kaɗ. Hin mə wəzl kaɗ. 53 Bayzlav zlənah mbaslayiy tik kə ceɗehin mə jawjaw ngetik. Amma hin mə səb mə jawjaw səna bəgwən.››
Məc ngə Etiyen
54 Hidiy mə zliy dalgway maa zlimiy zləgam ngə Etiyen səna za, basiy nəv day godokwən, za a hamiy ndin. 55 Amma Etiyen njə Mbiɗ ngə Bayzlav maa wek təm nəv, ca həriya a dibizlav, lim zləzlaɗ maa cəcay ngə Bayzlav, za Yesu mə gara kaɗ am ngərzəm ngə Bayzlav. 56 Sin ɗiya luw: ‹‹Kata aa lim dibizlav mə zləra kaɗ, za Kər hidmemblen mə gara kaɗ aa mə ngərzəm ngə Bayzlav.››
57 Zəni hidiy mə zliy dalgway maa zlimta za, aa zlim ngatan nek nekta kaɗ, ɗiya ciy wəla. Zəni taniy cike ɓeriy Etiyen kawta. 58 Ngazlta kaɗ aa liɓde za, ɗiya ndəta avə gugwən. Mandal ta ndəta, hidiy səna cokiy ləkwətiy tan, vəlta angər kərgawal məpərmay, zlim tik Sol kə kawenta. 59 Mandal ta ndəta avə gugwən səna, sin wər a tar Yesu, ɗiya luw: ‹‹Aw Məmar kata Yesu, a yək micin ngaɗa.›› 60 Zəni, sin gbilih titimbiz kaɗ, ɗiya cəwəla dayday. Sin ɗiya luw baha: ‹‹Yesu Məmar hidi, a geɗ mə ngavngav ngatan səna kaɗ.›› Maa luw atəgo za, məcay tik.