8
Nəv ngə Sol tu fet a hidiy mə wəzliy Etiyen kaɗ səna.Sol a zlənen takwan a hidiy təm mbgəw ngə mə səbiy Yesu
Am pic səna, hidiy diw kə zlənenta takwan dayday a hidiy təm mbgəw ngə mə səbiy Yesu tə liɓde Ursalima. Hidiy cike mə yəkiy Yesu a cakwayiy tan acin am hayək Yahudiya ɓəw am hayək Samariya, say a fəs məzlənzləniy ngə Yesu agandan. 2 Etiyen maa məc za, hidiy mə njə kə zlimentəma a Bayzlav ɓiyta, kahta kaɗ, za ɗiya haniy dayday atalan tik.
3 Sol wər, a təl kə lek hidiy təm mbgəw ngə mə səbiy Yesu kaɗ. A njə kə va kə de kə de, kə jar mawəligi avə wertigi kə kawta, kə pekta kaɗ am jik jaw.
Filip a ceɗ Ləbar Malaw am hayək Samariya
4 Hidiy mə səbiy mozlokotuf ngə Yesu mə cakwayiy səna aa viy am lay maa parpar, za aa viy, aa ceɗiy Ləbar Malaw atalan Yesu a hidigi. 5 Filip wər sliɗ va a liɓde təm hayək Samariya, sin maa hos abəgo za, ɗiya ceɗ ləbar atalan Kristu a hidigi. 6 Hidiy tə liɓde səna cike yigi. Taniy ɗiya zlimiy zləgam ngə Filip lawlaw. A tehenta zlimi lawlaw nhi, kadaban taniy mə zlimiy ɓəw mə limiy təkən maa tuwah sin ta njə kə ɗiytik. 7 Təkən maa tuwah səna, musurufiy tə kəsəm ngə hidiy parpar pətiy tan a ciywəla dayday. Hidiy mə mgbəruw mgbəruwigi ɓəw viderigi parpar viy aa gar. 8 Za hidiy cike tə liɓde səna aa zəzayiy dayday.
9 A liɓde səna, dəga aməcek za hid məpərmay awan abəgo zlim tik Simon. Sin a njə kə ɗiy mə wəzlwəzlək. Sin a njə kə kpah talan ngə hidiy avə mə wəzlwəzlək ngetik səna. Simon tu vrək talan tik kə hid mordoy. 10 Hidiy cike a njə kə yəkiy ma ngetik, ko mogroy, ko wərigi. A njə kə zləgamiy atalan tik, a njə kə luwta: ‹‹Gawal nhi, Gədan Mordoy ngə Bayzlav awan atalan tik, sin acin ta njə kə luwta ‹mə mar gədan mordoy.››› 11 Hidiy səna tu tehiy zlim ngatan kə zlimiy ləbar Simon ta ceɗenta. A tehiy zlimiy atəgo , kadaban tu ɗiy wan ndas Simon aa wələk bərngəzl talan tan avə mə wəzlwəzlək sin ta ɗiyu.
12 Amma adəwən Filip maa ceɗenta Ləbar Malaw atalan bay ngə Bayzlav ɓəw atalan Yesu Kristu za, mawəligi avə wertigi yəkiy zləgam ngetik. Za taniy janiy baptisma. 13 Simon təm yək zləgam ngə Bayzlav. Za sin jan baptisma. Aa may kə jel tik aa jagwar Filip za kwən. Sin tu lim təkəniy ma təwah ɓəw təkəniy mə wələk bərngəzl parpar Filip mə ɗiyta a kibik tik, za tu wələken talan dayday.
14 Mə zlənzləniy ngə Yesu tə liɓde Ursalima zlimta hidiy təm hayək Samariya tu yəkiy zləgam ngə Bayzlav. Maa zlimta za, zləniy Piyer avə Yuhana kə viy abəgo. 15 Maa hosiy za, ɗiya tariy Bayzlav atalan hidiy mə yəkiy Bayzlav təbəgo kə jan hidiy səna kə janiy Mbiɗ ngetik. 16 Taniy a tariy Bayzlav səna, kadaban Mbiɗ ngə Bayzlav a surohoh ko atalan hid ngayi tə dab tan gesin bəgwən, say taniy a janiy baptisma am zlim ngə Yesu Məmar hidi a gendik. 17 Za acin Piyer avə Yuhana ɗiyiy ngər ngatan atalan hidiy səna, za janiy Mbiɗ ngə Bayzlav.
18 Simon lim hidiy mə yəkiy zləgam ngə Yesu mə janiy Mbiɗ ngə Bayzlav za. A janta mandal məzlənzləniy ngə Yesu mə ɗiyiy ngər ngatan atalan tan. Asəna acin, vəlen suloy a Piyer avə Yuhana. 19 Za ɗiya luwenta: ‹‹Mə vəlak gədan səna səka, kə jan mana kat tu ɗiy ngəra atalan hidi, sin kə jan Mbiɗ ngə Bayzlav təm.›› 20 Amma Piyer zlawenni, ɗiya luw: ‹‹Ta ceɗeh, hoh avə suloy koh, mə lek! Hoh ɓən wər təkən Bayzlav taa vəlen a hid maymay a njə kə səkəmta a suloy vu? 21 Nhi kəzəɗ koh kwən, ma ngəkoh akimin ɗahkwən. Kadaban a kibik Bayzlav wər, ɓən koh nhi mə ngavngav. 22 A buw ngar koh kaɗ, kadaban nəv koh tu ngav, za a tar Bayzlav Məmar hidi, ezen sin av kə geɗeh ɓən mə ngavngav təm nəv koh nhi kaɗ. 23 Kat mə sən za, nəv koh heɗek-heɗek, za mə ngavngav acin mə maroh.›› 24 Simon ɗiya luwenta acin: ‹‹Mbu dap, hin avə talan kin, mə tar Bayzlav atalan ɗa, kə jan təkən hin mə luw nhi kə hosoh atalan ɗa kwən.››
25 Piyer avə Yuhana ɗiya səbiy a zləgam atalan Yesu ɓəw avə ceɗ ləbar ngetik. Za jəɓiy tan kəv a liɓde Ursalima. Mandal taa viy a mozlokotuf, aa ceɗiy Ləbar Malaw atalan Yesu a hidiy tə slalade ma parpar təm hayək Samariya.
Filip avə hid mordoy təm hayək Etiyopiya
26 Pic takan, mbaslay ngə Bayzlav Məmar hidi luwen a Filip: ‹‹A sliɗ ma va aa mə ngərzəm ngə liɓde Ursalima. Hoh kə səb mozlokotuf mə yah taa Ursalima za kə va a liɓde Gaza, mozlokotuf səna hidiy aa səbiy aa bəgo ɗahɗaba.›› 27 Njoɗ Filip sliɗ va. Mandal sin aa va a mozlokotuf, gbomiy avə hid mordoy məpərmay njə Etiyopiya. Kəzəɗ sin ta njə kə ɗiy tik, a njə kə puw aray ngə bay werti mə mar hayək Etiyopiya səna. Zlim ngə bay wer səna Kandas. Hid mordoy səna mə lah kaɗ. Sin a njah a Ursalima kə mbəzl Bayzlav, 28 a jəɓtik kə va de. Mə ɗewe kaɗ a liɓ saret. Za a jangi am liɓ deftere, mokotuf ngə Bayzlav Esaya mə ɗəɗef tik. 29 Filip maa lim gawal səna za, Mbiɗ ngə Bayzlav luwenni acin: ‹‹A va mbeh mbeh a saret təgo.›› 30 Filip si kəv mbeh mbeh a jagwar saret səna. Sin zlim gawal səna aa jangi am deftere ngə mokotuf Esaya, za Filip ɗiya neh tik acin luwenni: ‹‹Hoh zlim təkən hoh ta jangi təgo ɗaha vu? ›› 31 Gawal səna zlawenni ɗiya luw: ‹‹Awwo ta sən ɗahkwən. Mana hid a ceɗek bəgwən wər, kat kə sən tik aceki ?›› Za sin luwen a Filip baha: ‹‹A tapah a liɓ saret nhi, ma ɗew a jagwar ɗa, ma ceɗekku.›› Filip tap acin. 32 Zləgam gawal tə liɓ saret mə jangi səna a luw anhi:
Sin wa təmak,
hidiy ta njə kə tepta am lay ngə bən təkən huvu.
Sin wa kərtəmak,
Hidiy ta njə kə zliy suson tik,
A njə kə ɗewey tik tehte.
A zlər ma tik kə han ɗahkwən.
33 Hidiy tu gəciy hidi səna kaɗ,
za ko hid takan mə mən tik səka, ɗahkwən.
Hid ngə zləgam atalan wəriy tik ɗahkwən,
kadaban mə wəzlta kaɗ am talan mahayək.››
34 Hid mordoy səna ma jangi ləbar səna za, ɗiya neh Filip acin, luwenni: ‹‹Aw, a ceɗekku, mokotuf ngə Bayzlav nhi, a luw atalan hid ngayi? A luw atalan tik vu? A luw atalan hid məpərmay? ›› 35 Filip diw kə zləgam acin. A diw avə zləgam gawal nhi mə jangi. Sin ceɗen Ləbar Malaw atalan Yesu. 36 Mandal taa viy a mozlokotuf, va janiy lay njə yəm. Mordoy səna maa lim yəm za, ɗiya luwen a Filip acin: ‹‹Yəm anhi, təkən ngə takak kə ɗiy baptisma ɗah vu?›› [ 37 Filip zlawenni ɗiya luw: ‹‹Mana hoh tu vəl nəv koh cike a Yesu wər hav kə jan baptisma.›› Gawal səna zlawenni ɗiya luw: ‹‹Kat mə yək za, Yesu Kristu acin Kər ngə Bayzlav.››] 38 Gawal səna luwen a hidiy mə ngazliy plis tavə saret kə gariy kaɗ. Maa gariy kaɗ za, Filip avə mordoy səna surohiy aa mə saret za, za pətiy saray tik am yəm. Filip ɗiyen baptisma. 39 Maa pətiy tan aa mə yəm za, njoɗ Mbiɗ ngə Bayzlav Məmar hidi wət Filip kaɗ, mordoy səna aa lim ɗahɗaba. Amma sin sliɗ ɗiya səb mozlokotuf avə zəzay am nəv acin.
40 Filip wər a lim məndumndum sin awan a liɓde Asdod. Sin sliɗ aa bəgo za kə va am hayək Kaysariya. A liɓdiy tə mozlokotufiy ma parpar cike, sin mə ton taa bəgo, sin tu ceɗ Ləbar Malaw a hidiy atalan Yesu Kristu.