Yesu ɗef talan tik a wəriy gawliy ngetik a talan maza
21
Adəwən səna, Yesu ɗef talan tik a wəriy gawliy ngetik bah atalan maza tə Tiberiyas. Anhi mana sin mə ɗefenta talan tik: 2 Simon Piyer avə Tomas ta njə luwta muwili, Nataniyel tə liɓde Kana təm hayək Galili, ɓəw wəriy Zebede avə wəriy gawliy məpərmayiy saray, taniy cike awaniy am lay takan. 3 Simon Piyer luwenta: ‹‹Kat təv ɗa kə kawah kilif.›› Taniy luwenta: ‹‹Yikwan məv kə va avə hoh.›› Taniy sliɗiy pətiy am pay ngə zlan maza. Amma ngə vuɗ səna, taniy a janiy kilif ɓahbəgwən. 4 Lay maa dan za, Yesu mə gara kaɗ a gozlum maza, amma wəriy gawliy a sənta Yesu bəgwən. 5 Yesu luwenta: ‹‹Hay hidiy cah, hin mə jan kilif za vu?›› Taniy zlawenta, ɗiya luwta: ‹‹Awwo.›› 6 Yesu luwenta: ‹‹Mə fək jəva aa pal ngərzəm ngə pay ngə zlan maza, za hin məv kə jan tik.›› Taniy fəkiy jəv səna, za təl təlta kə ngazlahta kaɗ aa mə yəm za, a ɓəsta bəgwən kadaban kilifiy wek day aliɓ jəv səna.7 Za acin kərgawla Yesu taa may maa day luwen a Piyer: ‹‹Tattah nhi, Məmar hidi.›› Simon Piyer maa zlim sin mə luwenni: ‹‹Tattah nhi, Məmar hidi.›› Sin kwəl ləkwət tik a kəsəm, kadaban sin kəsəm a səna, za sin giv, mbir am yəm. 8 Wiriy gawliy ngə Yesu məpərmayiy buwiy avə pay ngə zlan maza. Za ɗiya ngazliy jəv maa wek kilifiy səna avə pay ngə zlan maza səna. Lay taniy mə kawiy kilifiy təkimin səna ɗah gaf aa gozlum maza kwən, av kə ɗiy metir blək. 9 Taniy maa surohiy a kayək za, limiy kuhu mə mbəla kaɗ, za kilif awan aliɓ tik, za bəret awan abəgo. 10 Yesu luwenta: ‹‹Mə batah kilifiy hin mə kawah səna gwedek mə daha.›› 11 Simon Piyer pət am pay ngə zlan maza, za ngazlah jəv maa wek tav kilifiy maa groy blək a ngərjoɓun avə makaɗ səna a kayək. Jəv a kwah ɓahbəgwən, zəɗər kilifiy dolom aliɓ tik. 12 Yesu luwen a wəriy gawliy ngetik: ‹‹Mə yah zəmu!›› Ko hid takan adab wəriy gawliy mə nehtik, mə luw: ‹‹Hoh hidngayi?›› ɗahkwən. Mə sənta wayza, sin acin Məmar hidi. 13 Za acin Yesu kərəɓ angər tan, ɓiy bəret, vəlenta, za vəlenta kilif təm.
14 Nhi Yesu a ɗef talan tik jəɓ mə makaɗ tik a wəriy gawliy ngetik, adəwən sin mə mbəlah aa mə məc za.
Yesu avə Piyer
15 Adəwən taniy maa zəmiy gəd za, Yesu ɗiya luwen a Simon Piyer: ‹‹Simon, kər ngə Yuhana, hoh mayak day hidiy nhi mə mayakta vu?›› Simon zlawenni, ɗiya luw: ‹‹Yaw, Məmar hidi, hoh mə sən za kata mayoh.›› Za Yesu luwenni: ‹‹A puw hidiy ɗa lawlaw.›› 16 Yesu luwen bah jəɓ mə saray tik: ‹‹Simon, kər ngə Yuhana, hoh mayak vu?›› Simon zlawenni, ɗiya luw: ‹‹Yaw, Məmar hidi, hoh mə sən za kata mayoh.›› Yesu luwenni: ‹‹A ɗew kə kər məgəlgəla ngə hidiy ɗa.›› 17 Yesu luwen bah jəɓ mə makaɗ: ‹‹Simon, kər ngə Yuhana, hoh mayak vu?›› Nəv ngə Piyer tu nus lay Yesu mə luwen jəɓ mə makaɗ tik: ‹‹Hoh mayak vu?›› Sin zlawenni, ɗiya luw: ‹‹Məmar hidi, hoh sən təkəniy cike wayza, za hoh sən tik, kata mayoh!›› Yesu luwenni baha: ‹‹A puw hidiy ɗa lawlaw. 18 Mindiwin, kata ceɗeh: Mandal hoh wəlen gawla, hoh ɗaw kə jaw maslapa koh avə ngər koh, za hoh ɗaw kə va am lay hoh mə mayu. Amma mandal hoh tu ɗa mbusur, hov kə kaf ngəriy kaɗ za hid məpərmay kə jawoh maslapa, za kə tepoh am lay maa hoh may kəv bəgwən.›› 19 Avə zləgam səna, Yesu a ceɗ mana aceki Piyer tu kə məc, za məc ngetik av kə vəlen mordoy a Bayzlav. Zəni Yesu luwenni: ‹‹A səbakku!››
Yesu avə kərgawla ngetik sin mə may maa day
20 Adəwən səna, Piyer cəhəriya aadəwən, sin lim kərgawla Yesu mə mayu maa day aa səbahta. kərgawla səna acin mə hərjik kəv ngər Yesu, mandal taniy mə zəmiy gəda, za mə nehtik mə luw: ‹‹Məmar hidi, hid məv kə vəloh səna, hidngayi?ª›› 21 Piyer maa lim kərgawla səna za, ɗiya luwen a Yesu: ‹‹Məmar hid na, gawal təgo wər, ngə janen mi?›› 22 Yesu zlawenni, ɗiya luw: ‹‹Mana kat mə may za, sin kə ɗeweytik a micin hos am pic kat tu kə jəɓahah, ma ngəkoh akimin ɗah vu? Hoh wər, a səbakku.›› 23 Dəga am pic səna, ma səna tu cakway adab hidiy mə səbiy Yesu, a luwta kərgawla səna a məc kwən. Zəɗər, Yesu a luwen a Piyer: ‹‹Kərgawla təgo a məc kwən›› bəgwən. Amma sin a luw: ‹‹Mana kat mə may za, sin av kə ɗeweytik avə micin hos am pic kat tu kə jəɓahah, ma ngəkoh akimin ɗah vu?››
24 Kərgawla səna acin mə ceɗ təkəniy səna, za sin acin mə ɗəɗef ma səna kaɗ. Ya yikwan maa sənu, zləgamiy sin mə ɗəɗef səna, zləgamiy maa mindiwin.
25 Yesu mə ɗiy kəzəɗiy məpərmayiy za dolom, mana kə ɗəɗefta kaɗ takan kakan, ɓən ngaɗ wər, lay ngə vərək Defteriy səna am talan mahayək ɗahkwən.