Yesu mbəlah tik aa mə məc za
20
Am pic Daywan zlalay vət, lay cewcew, Mariyama tə Magdala va atalan civi. Sin lim mə goɗiy kəlam tə kəm civ kaɗ. 2 Za acin sin nap si, va angər Simon Piyer avə kərgawla ngə Yesu sənan maa Yesu taa may tik maa day. Sin luwenta: ‹‹Mə wətiy kəsəm ngə Məmar hidi aa mə civ za, za ko a ɗiyta aki, yikwan maa sən lay tik ɗahkwən.›› 3 Piyer avə kərgawla sənan tafnan sliɗiy viy atalan civi. 4 Taniy saray tik nap sigi, amma kərgawla sənan səna si day Piyer, za sin hos məpəlpəla atalan civi. 5 Sin daɓ, kəɗan civi, lim maslaga mə paɗiy mimci mə ɗiya kaɗ a kayək, amma sin a pət aliɓ civ bəgwən. 6 Simon Piyer hosoh adəwən tik, sin pət aliɓ civi, lim maslaga mə paɗiy mimci mə ɗiya kaɗ a kayək. 7 Sin lim mbusur ləkwət mə paɗiy talan ngə Yesu, mbusur ləkwət səna ɗah avə maslaga kwən, amma mə paɗa kaɗ, za mə ɗiya kaɗ am lay par. 8 Za acin, kərgawla mə hos məpəlpəla atalan civi, pət aliɓ civ təm. Sin lim təkəniy səna, za yək am nəv ngetik. 9 Nha am pic səna, wəriy gawliy ngə Yesu a səniy zləgam təm Deftere ngə Bayzlav mə luw, Yesu av kə mbəlah aa mə məc za bəgwən. 10 Za acin wəriy gawliy səna saray tik jəɓiytan ade.Yesu ɗef talan tik a Mariyama tə Magdala
11 Mariyama mə gara kaɗ acaɗak, atalan civi aa han. Am sin taa han səna, sin daɓ kaɗ kəɗan civi, 12 sin lim mbaslayiy ngə Bayzlav saray, mə kwəliy ləkwətiy maa baran tewtew a kəsəm. Mə ɗewiy kaɗ am lay mə ndəɗiy mimci ngə Yesu. Takan am lay ndəɗ talan tik, za takan am lay mə zərehiy ngaziy tik. 13 Mbaslayiy ngə Bayzlav nehiy Mariyama, ɗiya luwenta: ‹‹Hoh han kemi?›› Sin zlawenta, ɗiya luw: ‹‹Mə wətiy kəsəm ngə Məmar kat za, za kata sən lay mə ɗiyta akimin ɗahkwən.›› 14 Sin maa luw atəgo za, sin cəhəriya aa dəwən lim Yesu mə gara kaɗ, amma sin a sən nhi Yesu bəgwən. 15 Yesu ɗiya nehtik, luwenni: ‹‹Hoh han kemi werti? Hoh jar yi?›› Mariyama acagendik hid mə ɗiy kəzəɗ təm tuz ngə Payigi, ɗiya luwenni: ‹‹Aw mordoy, mana hoh acin mə wət tik, a ceɗek lay hoh mə ɗiy tik may, za kat təv kəv kə ɓiya tik.›› 16 Yesu luwenni: ‹‹Mariyama.›› Sin buw aangər Yesu, za ɗiya luwen avə ma ngə Ibraninko: ‹‹Rabuni!›› Mana kə luw kaɗ Bay jəgwan. 17 Yesu luwenni: ‹‹Hoh mbəlemek ngəra a kəsəm kwən! Kadaban kat tə tap ɗa angər Vay gesin bəgwən. Amma a jəɓ koh angər galmayɗigi, za hoh kə luwenta: ‹Kat aa tap ɗa kəv angər Vay. Sin bahbay kin təm. Kat tə tap ɗa angər Bayzlav ɗa. Sin acin Bayzlav kin təm.››› 18 Za acin Mariyama tə Magdala va ceɗen zləgam səna a wəriy gawliy ngə Yesu. Sin luwenta: ‹‹Kat mə lim Məmar hid za.›› Za sin ceɗenta təkən Yesu mə luwenni.
Yesu ɗef talan tik a wəriy gawliy ngetik
19 Am pic Daywan səna gəzza, ngə sukoh gəda, wəriy gawliy ngə Yesu mə ɓasiy kaɗ a jik. Taniy ndeɗiy mijijikiy way kaɗ avə lekile, kadaban taniy a hovokiy a mogroy ngə Yahudigi. Yesu pətah məndumndum, gar adab tan, za ɗiya luwenta: ‹‹Zoy mə ɗew avə hin!›› 20 Am sin taa zləgam səna, sin ɗefenta ngəriy tik avə bəra ngetik. Nəv ngə wəriy gawliy ngə Yesu tu zəzay lay taniy mə limiy Məmar hidi. 21 Za acin Yesu ɗiya luwenta baha: ‹‹Zoy mə ɗew avə hin. Kata zlənehin mana vay zlənak təm.›› 22 Sin maa luwenta zləgamiy təgo za, sin uf mbiɗ atalan tan, za ɗiya luw: ‹‹Mə yək Mbiɗ ngə Bayzlav! 23 Mana hin tu geɗ mə ngavngav ngə hid kaɗ, Bayzlav av kə geɗ mə ngavngav ngə hid səna kaɗ. Mana hin tu ɓon kə geɗ mə ngavngav ngə hidi, Bayzlav av kə ɓon kə geɗ mə ngavngav ngə hid səna kaɗ təm.››
Yesu ɗef talan tik a Tomas
24 Mandal Yesu mə pətah adab wəriy gawliy tik səna, Tomas ta njə kə luwta muwili, sin hid takan adab wəriy gawliy ngə Yesu maa gəɓ atalan saray, sin ɗah abəgo kwən. 25 Wiriy gawliy sənan luwenta: ‹‹Yikwan mə lim Məmar hid za.›› Amma sin zlawenta ɗiya luw: ‹‹Mana kat tə lim lay təm ngəriy tik mə kpawta avə masa, za mana kat tə mbəlem ngəra am lay mas səna ɓəw am herdimbəlah təm bəra ngetik bəgwən, kat tə yək kwən.››
26 Zəm luma takan adəwən səna, wəriy gawliy ngə Yesu ɓasiy kaɗ a jik baha, za Tomas awan adab tan. Mijijik mə ndeɗe kaɗ avə lekile, Yesu pətah məndumndum, gar adab tan, za ɗiya luw: ‹‹Zoy mə ɗew avə hin!›› 27 Zəni sin ɗiya luwen a Tomas: ‹‹A dah ngər koh awənhi, za a saf ngəriy ɗa, a zok ngər koh, za a mbəlem bər ɗa, a geɗ wəzən kaɗ, a vəlak nəv koh. 28 Tomas zlawenni, ɗiya luw: ‹‹Məmar kata, Bayzlav ɗa!›› 29 Yesu luwenni: ‹‹Hoh vəlak nəv lay hoh mə limekku. Hidiy maa a limekta bəgwən, za vəlakta nəv ngatan, taniy av kə zəzayigi.
Zay ngə Deftere nhi
30 Yesu tu ɗiy təkəniy maa tuwah məpərmayiy dolom bah akibik wəriy gawliy tik, maa a ɗəɗefta am Deftere nhi bəgwən. 31 Təkəniy mə ɗəɗefta təm Deftere nhi, a ɗəɗefta kə jan kə mənehin, hin kə yəktik Yesu acin Kristu, sin acin kər ngə Bayzlav. Za acin mana hin tu vəlen nəv kin, sin av kə vəlehin micin mətak way.