19
Za acin Pilatu luwen a hidiy ngetik kə dahiy Yesu, za kə zarta a lakwatay. 2 Adəwən taniy maa zarta za, Sojiy ɓələm ɓələmiy kidigiɗ wa maytolol təpenta a Yesu a talan. Za kwəlenta ləkwət mordoy maa wizek a kəsəm wa ləkwət ngə bay. 3 Taniy kərəɓiy abər tik, za ɗiya luwenta: ‹‹Soko bay Yahudigi!›› Za ɗiya ndenta ngərgəda. 4 Pilatu pətah acaɗak baha, za ɗiya luwenta: ‹‹Mə zlimu, kat təv kə dahehin Yesu səna acaɗak. Asəna acin hin məv səntik kat tə janak ma ngə zlen dalgway makavay tik ɓahbəgwən.›› 5 Yesu pətah acaɗak acin, maytolol ngə kidigiɗ ɓəw ləkwət mordoy tafnan wəleniy a kəsəm tik. Pilatu ɗiya luwenta: ‹‹Sin atawan təgo!›› 6 Amma mogroy ngə Masayigi avə hidiy mə puwiy jik Bayzlav maa limta za, nap ciywəla, ɗiya luwta: ‹‹Aw a kpaw kaɗ am pay maa zləngrak! Haya a kpaw kaɗ!›› Pilatu luwenta: ‹‹Hin avə talan kin, mə tepu, mə kpawu, ngaɗ tə janak təkən sin mə ɗiy maa gəga ngə zlen dalgway bəgwən.›› 7 Yahudiy luwenta: ‹‹Mə jawjaw ngiykwan ɗaha, mə jawjaw səna a luw say sin kə məc, kadaban sin a luw sin Kər ngə Bayzlav.8 Pilatu maa zlim atəgo za, sin ɗiya hovok bah day day. 9 Sin pət tik bah ade, za ɗiya neh Yesu, luwenni: ‹‹Hoh, hoh yah aazəki?›› Amma Yesu a zlawen ɓahbəgwən. 10 Pilatu ɗiya luwenni acin: ‹‹Hoh ɓon kə zləgamakku? Hoh sən kata wana gədan ngə fəkoh kaɗ, za kata wana gədan ngə zeneh am pay maa zləngrak bəgwən vu?›› 11 Yesu zlawenni, ɗiya luw: ‹‹Gədan koh atalan ɗa ɓahɗahkwən, say Bayzlav tu geɗeh mozlokotuf. Asəna acin, mə ngavngav ngə hid mə cak wəla angər koh, day ngəkoh.›› 12 Dəga am mandal səna, Pilatu nap jar wirwir ngə fək Yesu kaɗ. Amma yahudiy nap ciwəla, ɗiya luwenta: ‹‹Mana hoh tu fək gawal təgo kaɗ, hoh ngwalay ngə bay Roma məmar lay cike ɗaba! Ko hid ngayi mə vərək talan tik kə bay, sin calmosum ngə bay Roma məmar lay cike wayza.››
13 Pilatu maa zlim atəgo za, sin luwen a sojiy dahiy Yesu acaɗak. Pilatu ɗew kaɗ am karawal ngə zla dalgway təm lay ta njə kə luwta: ‹‹Lay mə sləbsləb avə gugwən.›› Lay səna a njə kə luwta avə ma ngə Ibraninko: ‹‹Gabata.››
14 Pic səna, pic ngə sləsləɓª məmbəlwa Paska. Ngə dabdab pic, Pilatu luwen a Yahudigi: ‹‹Bay kin atəgo!›› 15 Amma taniy nap ciwəla, ɗiya luwta: ‹‹Aw a wəzl kaɗ, aw a wəzl kaɗ! Haya a kpaw kaɗ am pay maa zləngrak!›› Pilatu luwenta: ‹‹Kat kə kpaw bay kin kaɗ vu?›› Mogroy ngə masayiy zlawenta, ɗiya luwta: ‹‹Bay ngiykwan məpərmay ɗahkwən, say bay Roma məmar lay cike agendik dap.›› 16 Za acin Pilatu vəlenta Yesu kəv kə kpawta am pay maa zləngrak.
Kpawiy Yesu am pay maa zləngrak
17 Yesu səna avə talan tik wət pay maa zləngrak ngetik, pətiy aa liɓde za, hosiy am lay ta njə kə luwta: ‹‹Kukuɗum talan,›› ɗaw kə luwta avə ma ngə Ibraninko: ‹‹Golgota.››
18 Abəgo, sojiy kpawiy Yesu am pay maa zləngrak. Kpawiy hidiy saray təm ajagwar tik, takan aa mə ngərzəm tik, za takan aa mə ngərzlaɓay tik. Yesu awan a dabdaba. 19 Pilatu luwen a hidiy kə ɗəɗefiy zləgam am pay maa kaslaprap, za kə zenta am pay maa zləngrak. Zləgam səna a ɗəɗefta anhi: ‹‹Yesu njə Nasaratu, bay ngə Yahudigi.›› 20 Yahudiy dolom tu jangiy zləgam mə ɗəɗef ɗəɗef səna, kadaban lay hidiy mə kpawiy Yesu am pay maa zləngrak səna mbeh avə liɓde. A ɗəɗefiy zləgam səna avə ma ngə Ibraninko, avə ma ngə Roma ɓəw avə ma ngə Yunaninkigi. 21 Mogroy ngə masayiy luwenta a Pilatu: ‹‹Ɗah law kə ɗəɗef: ‹‹Bay ngə Yahudiy kwən.›› Amma a ɗəɗef ɗər: ‹‹Gawal nhi a luw: ‹Kata acin bay ngə Yahudigi.››› 22 Pilatu zlawenta, ɗiya luw: ‹‹Zləgam kat mə ɗəɗef səna, av kə njay tik atəgo.››
23 Sojiy maa kpawiy Yesu am pay maa zləngrak za, wətiy ləkwətiy tik mban mbanta madaba foɗ, ko soje ceki jan madaba takan. Taniy wətiy ləkwət tik mordoy, ləkwət səna a hizliɓta aa hizliɓ kwən, a bəta aa ba dəga a wəzlaw nha a kayək. 24 Sojiy zləgamiy am walan tan, ɗiya luwta: ‹‹Yikwan kə kwah ləkwət mordoy nhi kaɗ kwən. Amma nəmkwan kə ɗiy metentenge kə sən hid məv kə mar tik.›› A ɗiyta atəgo kə jan kə ɗiy tiɗtiɗe mana mə ɗəɗefta am deftere, a ɗəɗefta:
Taniy wəzakiy ləkwətiy ɗa
za ɗiyiy metentenge makavay ləkwət ɗa mordoy.››
Sojiy a ɗiyta asəna.
25 Mahmay ngə Yesu avə galmən ngə mahmay tik werti, Mariyama wer ngə Kolopas avə Mariyama tə liɓde Magdala mə gariy kaɗ abər pay maa zləngrak mə kpawiy Yesu. 26 Yesu maa lim mahmay tik, za lim kərgawla ngetik sin mə mayu awan abər mahmay tik, sin luwen a mahmay tik: ‹‹Mahmay, kərti koh atəgo.›› 27 Za luwen a kərgawla ngetik: ‹‹Mahmay koh atəgo.›› Dəga ngə pic səna, kərgawla səna ngazl mahmay ngə Yesu ade ngetik.
Məc ngə Yesu
28 Adəwən səna, Yesu mə sən za təkəniy məv kə toniy a talan tik cike tu way. Za kə jan kə ɗiy tiɗtiɗe mana mə ɗəɗefta am deftere, sin ɗiya luw: ‹‹Yəm aa wəzlakku.›› 29 Siwli awan abəgo, mə zekiy movu maa kwerek akimin. Sojiy juroɓiy mbusur ləkwət am movu maa kwerek səna, za cəɓ am pay ta njə kə luwta izop, za zokenta a Yesu a kəma. 30 Yesu maa dezl movu maa kwerek səna za, sin ɗiya luw: ‹‹Təkəniy cike mə ɗiyiy wayza.›› Za sin tək talan a kayək, za məcay tik.
Soje ngaɓ Yesu am bəra avə njervek
31 Yahudiy ɗaw kə sləsləɓiy təkəniy ngatan am pic səna, kadaban apat tik pic nəp ngatan. Mogroy ngə Yahudiy aa mayiy kə geɗiy kəsəm ngə hid am pay maa zləngrak am pic nəp ngatan ɗahkwən. Pic nəp ngə təgo, law day kə məpərmayigi kadaban məmbəlwa ngə paska a ndəv am pic səna. Asəna acin taniy viy tariy Pilatu kə jan sin kə luwen a hidiy kə ngiy ngaziy ngə hidiy təm payiy maa zləngrakiy səna kaɗ, za kə surohiy mimciy tan kaɗ. 32 Sojiy viy abər hidiy mə kpawta təm payiy maa zləngrakiy tə jagwar Yesu. Taniy ngiy ngaziy ngə hid mə tizin, za ngiy ngə hid mə saray tik. 33 Amma taniy maa hosiy am Yesu, taniy limta sin mə məca za. Za acin taniy a ngiy ngaziy ngetik kaɗ bəgwən. 34 Amma soje takan ɗiya ngaɓ tik am bəra avə njervek, za njoɗ ɓiɓiz avə yəm kwariy aa mə bəra tik za.
35 Hid mə ceɗehin təkəniy səna mə lim təkəniy mə toniy səna za am həriya ngetik. Za ma ngetik tiɗtiɗe. Sin mə sən talan tik za, sin ɗaw kə luw ma maa mindiwin. Asəna acin, hin təm, hin kwəl kə yək zləgam səna.
36 Təkəniy səna cike a ɗiyiy atəgo kə jan kə ɗiy tiɗtiɗe mana mə ɗəɗefta am deftere, a ɗəɗefta: ‹‹Hidiy a ngenta kirngizl ngetik ko takan kaɗ kwən.›› 37 Mə ɗəɗefeh kaɗ təm bah am lay məpərmay am deftere, a luwta: ‹‹Hidiy av kə ciy həriya atalan hid hidiy mə ngaɓta.››
Kahiy Yesu
38 Adəwən səna, Yusufu tə liɓde Arimatiya sin kərgawla ngə Yesu, amma a səbtik avə ɓah, kadaban a hovok avə mogroy ngə Yahudigi. Sin va angər Pilatu ɗiya tar tik kə jan sin kə geɗen mozlokotuf ngə surohoh mimci ngə Yesu kaɗ aa mə pay za. Za Pilatu geɗen mozlokotuf. Yusufu va surohoh mimci ngə Yesu aa mə pay za acin. 39 Nikodemus təm yah. Sin acin gawal mə njah tə ngər Yesu avə vuɗu amicek. Sin a yah avə ɗawa. Ɗaw kə tiy ɗawa səna avə pusloɗ ɓəw tubu pay ta njə kə luwta mir ɓəw alowe. Ɗawa səna ɓilik tik av kə ɗiy kiliw ngər makaɗ. 40 Taniy saray tik, wətiy mimci ngə Yesu paɗta kaɗ avə maslaga, za zekiy ɗawa mə njə kə njif mana dorson akimin. Am mə zugzugwa ngə Yahudiy wər a njə kə kahiy mimci atəgo. 41 Am lay mə kpawiy Yesu am pay maa zləngrak səna, tuz ngə pay awan mbeh abəgo. Civ ndawyan awan aliɓ tuz ngə pay səna, a kahiy hid akimin gesin bəgwənª. 42 Taniy viy ndəɗiy mimci ngə Yesu am civ səna, kadaban pic mbeh kə ndəv, za pic nəp mbeh kə diw, civ təm bah mbeh a tanigi.