Kawiy Yesu
18
Adəwən Yesu maa way zləgam za, sin vətik avə wəriy gawliy ngetik adəwən maza Kedron. Tuz ngə pay awan abəgo, sin pət aliɓ tuz səna avə wəriy gawliy ngetik. 2 Yahuda məv kə vəl Yesu aa sən lay səna wayza, kadaban jəɓ ndas Yesu a njə kə viy abəgo avə wəriy gawliy tik. 3 Yahuda ngazl sojiy dolom ɓəw hidiy mə puwiy jik Bayzlav am tuz ngə pay səna. Mogroy ngə masayiy ɓəw Farisiy acin mə zlənta. Taniy hosiy abəgo, mə kawiy təkəniy ngə vurum, cəbelbeligi ɓəw uluriy am ngəra.4 Yesu mə sən təkən tu kə ton atalan tik wayza. Sin va angər tan, za nehta, luwenta: ‹‹Hin mə gər hid ngayi?›› 5 Taniy zlawenta, ɗiya luwta: ‹‹Yikwan mə gər Yesu njə Nasaratu.›› Yesu luwenta: ‹‹Kata acin sin.›› Yahuda məv kə vəl Yesu mə gara kaɗ adab sojiy səna. 6 Am mandal Yesu mə luw: ‹‹Kata acin sin,›› taniy dideriy aadəwən za sənaf, ndəviy a kayək. 7 Yesu nehta baha, luwenta: ‹‹Hin mə gər hid ngayi?›› Taniy zlawenta, ɗiya luwta: ‹‹Yikwan mə gər Yesu njə Nasaratu.›› 8 Yesu luwenta: ‹‹Kat tə luwehin, kata acin sin. Mana hin mə gər kat wər, mə geɗ hidiy nhi mə vitan.›› 9 A ɗiy asəna kə jan kə ɗiy tiɗtiɗe mana Yesu mə luw, sin a luw: ‹‹Vay, hidiy hoh mə vəlakta, ko takan tə lekta kaɗ bəgwən.››
10 Simon Piyer awana a masalam, sin pəɗah, fat, bəl kərgawla ngə mordoy ngə Masay, sin celen zlim taa mə ngərzəm kaɗ. Kər gawla səna zlim tik Malkus. 11 Amma Yesu luwen a Piyer: ‹‹A təm masalam koh kaɗ am jik tik. Hoh ɓən wər kat tə sa takwan vay mə luw kat kə sətik səna kwən vu?››
Tepiy Yesu akibik Anas
12 Za acin, mgbəw ngə sojiy ngərbək (1000) ɓəw mordoy ngatan avə Yahudiy mə njə kə puwiy jik Bayzlav kawiy Yesu, za jawiy ngəriy tik kaɗ avə mbiseh. 13 Tizin tik, a tepta ade ngə Anas, sin bahbay ngə wer Kayafas. Am di səna Kayafas səna acin mordoy ngə masayigi. 14 Sin acin mə vəlen ngəz a Yahudigi, mə luw: ‹‹Geleɓ hid takan kə məc makavay hidiy cike wayza.››
Simon Piyer luw sin aa sən Yesu ɗahkwən
15 Simon Piyer avə kərgawla məpərmay aa səbiy Yesu. Mordoy ngə masay aa sən kərgawla məpərmay səna ɗaha, makavay səna acin taniy pətiy avə Yesu a terde ngə mordoy ngə masay. 16 Amma Piyer wər mə gara kaɗ a caɗak a bərmidigiɗ. Kərgawla sənan maa mordoy ngə masay aa sən ɗaha pətah a caɗak, sin luwen aa wer mə puw bərmidigiɗ kə geɗ Piyer kə pət a terde. 17 Wer səna luwen a Piyer: ‹‹Hoh təm, hoh kərgawla ngə gawal təgo kwa?›› Piyer zlawenni, ɗiya luw: ‹‹Awwo, kat kərgawla ngetik kwən.››
18 Cəcən diw kə ɗiy, hidiy mə ɗiyiy kəzəɗ ngə mordoy ngə masay ɓəw hidiy mə puwiy jik Bayzlav mbəliy kuhu aa sifta. Piyer təm mə gara kaɗ abər tan aa sif kuhu.
Yesu awan akibik mordoy ngə Masayigi
19 Mordoy ngə masayiy ɗiya neh Yesu atalan wəriy gawliy tik, ɓəw atalan təkəniy sin ta njə kə jəgwanen a hidiy acin. 20 Yesu zlawenni, ɗiya luw: ‹‹Kat mə zləgama za mgban mgban akibik hidiy cike wayza. Hoyhoy tə njə kə ɗiy jəgwan a jik jəgwan ngə Yahudigi ɓəw a jik Bayzlav, am lay Yahudiy cike wayza ta njə kə ɓasigi, tə zləgam avə ɓah ɓahbəgwən. 21 Hoh nehek kemi? A neh hidiy mə zlimiy zləgam ngaɗa mək, taniy aa səniy zləgam kat mə luw wayza.›› 22 Yesu maa luw atəgo za, hid takan adab mə puwiy jik ngə Bayzlav mə gar gar tə bər Yesu nden ngərgəda, za ɗiya luw: ‹‹Hoh kə zlawenma a mordoy ngə masayiy atəgo vu?›› 23 Yesu zlawenni, ɗiya luw: ‹‹Mana kat mə zləgam ma mə ngavngav za, a ceɗek kaɗ. Amma mana kat tə zləgam ma malaw, hoh wəzlak kemi?››
24 Za acin Anas luwen a hidiy tepiy Yesu angər Kayafas mordoy ngə Masayigi. A tepta səna ngəriy tik mə jawiy kaɗ.
Piyer luw baha, sin aa sən Yesu ɗahkwən
25 Am mandal səna, Simon Piyer mə gara kaɗ am lay tafnan aa sif kuhu. Hidiy luwenta: ‹‹Hoh təm, hoh hid takan tə dab wəriy gawliy ngə gawal səna kwa?›› Amma Simon Piyer ɓon, za ɗiya luw: ‹‹Awwo, kat ɗah adab tan kwən!›› 26 Hid takan adab mə ɗiyiy kəzəɗ ngə mordoy ngə masay, sin vənen ngə gawal Piyer mə bəl zlim ngetik səna, sin ɗiya luwen a Piyer: ‹‹Kat tə limeh avə sin am tuz ngə pay bəgwən vu ta?›› 27 Amma Piyer ɗiya ɓon baha. Wayba gomzok ɗiya cəwəla.
Yesu awan akibik bay Pilatu
28 Apat tik, gbəm za, sojiy ngazliy Yesu aade Kayafas za, tepta ade Pilatu bay Roma. Mogroy ngə Yahudiy wər a pətiy ade səna bəgwən, kadaban taniy a may kə puwiy talan tan ɗew ngatan kə ɗiy kweɗek kweɗek, kə jan taniy kə zəmiy gəda ngə məmbəlwa Paska. 29 Asəna acin, bay Pilatu pətah acaɗak angər tan, za ɗiya nehta, luwenta: ‹‹Hin mə cenwəla a gawal nhi am dalgway makavay mi?›› 30 Taniy zlawenta ɗiya luwta: ‹‹Mana sin a ngavma ɓahbəgwən wər, yikwan mə dah za angər koh vu?›› 31 Pilatu luwenta: ‹‹Hin talan kin mə tepu, mə zlen dalgway mana mə jawjaw ngəkin mə luwu.›› Mogroy ngə Yahudiy zlawenta ɗiya luwta: ‹‹Mozlokotuf a yikwan ngə zla dalgway ngə hid ngə wəzl kaɗ ɗahkwən.›› 32 A ɗiy atəgo kə jan kə ɗiy tiɗtiɗe mana Yesu mə ceɗtik mana aceki sin tu kə məc. 33 Pilatu pət tik ade, za ɗefenma a Yesu, ɗiya neh tik luwenni: ‹‹Hoh acin bay ngə Yahudiy vu?›› 34 Yesu zlawenni, ɗiya luw: ‹‹Hoh luw ɓən ngəkoh dap vu, hidiy acin mə ceɗiy zləgam atalan ɗa?›› 35 Pilatu zlawenni, ɗiya luw: ‹‹Kat wər kat njə Yahudiya vu?›› Vəniy koh avə mogroy ngə masayigi acin mə ciywəla am dalgway angər ɗa. Hoh ɗiy təkən ngemi?›› 36 Yesu zlawenni, ɗiya luw: ‹‹Kat tə zəm bay am talan mahayək kwən. Mana kat təv kə zəm bay am talan mahayək wər, mbək hidiy mə ɗiyiy kəzəɗ ngaɗa av kə yiy kə jəgəmiy avə Yahudiy kə jan taa taniy kə kawakta. Amma bay ngaɗa, bay ngə talan mahayək nhi kwən. 37 Pilatu ɗiya nehtik, luwenni: ‹‹Hoh bay acin vu?›› Yesu zlawenni ɗiya luw: ‹‹Hoh talan koh, hoh mə luw gunngoh za. Kat tə yah am talan mahayək kə ceɗen mindiwin a hidigi. A mbuwakta makavay səna. Ko hid ngayi mə səb mozlokotuf maa mindiwin av kə tehek zlimi.›› 38 Pilatu ɗiya luwenni: ‹‹Mindiwin səna acin təkən ngemi?››
A zlenta dalgway aa Yesu ngə wəzl kaɗ
‹‹Adəwən Pilatu maa luw atəgo za, sin pətah acaɗak baha. Sin va angər Mogroy ngə Yahudigi, za ɗiya luwenta: ‹‹Kat tə jan ma ngə zlen dalgway a gawal nhi makavay tik bəgwən. 39 Amma hin mə sərəta wayza, kə di kə di, am məmbəlwa Paska kat ɗaw kə fəkehin hid takan kaɗ aa mə jik jaw za. Hin maa may kat kə fəkehin bay ngə Yahudiy kaɗ vu?›› 40 Za acin taniy nap ciywəla, ɗiya luwta: ‹‹Awwo! Hoh fək kaɗ kwən! Amma a fək yikwan Barabas!›› Zəɗər, Barabas səna məhəl mə njə kə ngok təkən ngə hidigi.