Yesu taren Bayzlav a wəriy gawliy ngetik
17
Adəwən Yesu maa way zləgam za, sin cəhəriya a dibizlav, za ɗiya luw: ‹‹Aw Vay ɗa, tanjinhi pic tik mə hosoh za, a ɗiy hidiy kə limiy gədan mordoy ngə kərti koh, za kərti koh kə ɗef gədan mordoy koh a hidigi. 2 Hoh vəlen gədan a kərti koh, kə mar hidiy təm talan mahayək cike wayza. Asəna acin, sin av kə vəlen micin mətak way a hidiy hoh mə vəlta am nəv ngər ngetik. 3 Micin mətak way mana kə luwa kaɗ: say taniy kə sənta hoh a gungoh palpal acin dihir Bayzlav, za kə səniy Yesu Kristu hid hoh mə zlənah tik.4 Kat tu ɗef gədan mordoy ngəkoh am talan mahayək, za kəzəɗiy cike hoh mə zlənakku kə ɗiy tik, kat mə ɗiyta wayza. 5 Aw Vay ɗa, tanjinhi a vəlak gədan mordoy akibik koh, gədan mordoy kat mə maru mandal kata awan abər koh. Dəga hoh ndən talan mahayək nhi gesin bəgwən.
6 ‹‹Hidiy hoh mə welta təm talan mahayək, za hoh mə vəlakta am ngəra, kat mə ceɗenta hoh za a tanigi. Hoh acin məmar hidiy səna, hoh vəlakta, za taniy zlimentəma a hoh. 7 Tanjinhi, taniy aa sənta wayza, təkəniy cike hoh mə vəlakta, a yiy aangər koh za, 8 kadaban kat tə ceɗenta zləgamiy kat mə zlimeh təngər koh. Taniy mə yəkiy zləgamiy səna za, mə sənta za mindiwin, kat tə yah aangər koh za, za taniy yəkta am nəv ngatan, hoh acin mə zlənakku.
9 Kata taroh makavay tanigi. Kat tə taroh makavay hidiy təm talan mahayək kwən, amma kat tə taroh makavay hidiy nhi hoh mə vəlakta am ngəra, kadaban taniy hidiy koh. 10 Hidiy cike kat mə marta, ngəkoh, za hidiy cike hoh mə marta, ngaɗa, za taniy mə ɗefiy gədan mordoy ngaɗa za a hidiy məpərmay.
11 Tanjinhi kat tə ɗew am talan mahayək ɗaba, amma tanigi, taniy awaniy am talan mahayək. Za kata, taa jəɓɗa kə vay abər koh. Aw Vay maa kweɗek ɗa, a puwta avə gədan ngə zlim ngəkoh hoh mə vəlakku. Asəna acin, taniy av kə lapiy kaɗ takan, wa hoh avə kata, yikwan mə lapa kaɗ takan. 12 Mandal kata awana avə tanigi, kat tu puwta, kat tə jan gədan ngə puwta am zlim ngəkoh, zlim səna acin zlim hoh mə vəlakku. Kat puw puwta, ko hid takan adab tan a lek ɓahbəgwən, say hid məv kə lek, kə jan kə ɗiy tiɗtiɗe mana mə ɗəɗefta am deftere.
13 Tanjinhi kata jəɓayɗa kə vay abər koh, kat tə luw tik dəga kat wəlen am talan mahayək zagway, kə jan taniy kə zəzayigi, za zəzay ngaɗa kə wek nəv ngatan. 14 Kat mə ceɗenta zləgam ngəkoh za, za talan mahayək mə zelta za. Talan mahayək a zelta səna, kadaban taniy hidiy ngə talan mahayək kwən, wa kat təm hid ngə talan mahayək kwən. 15 Kat tə taroh hoh kə gasta kaɗ aa mə talan mahayək za kwən, amma kat tə taroh hoh kə puwta, kə jan mə ngavngav kə janenta kwən. 16 Taniy hidiy ngə talan mahayək kwən, wa kata, kat hid ngə talan mahayək kwən. 17 A ɗefenta mindiwin, kə jan taniy kə vəliy talan ngatan cike a hoh. Mindiwin səna acin zləgam ngəkoh. 18 Hoh mə zlənak za am talan mahayək, kat təm bah taa zlənta am talan mahayək mana hoh mə zlənakku. 19 Kat tə vəl micin ɗa a hoh makavay tanigi, kə jan taniy kə vəliy talan tan cike a hoh təm avə mindiwin.
20 ‹‹Kat tə taroh makavay taniy dap kwən, tə taroh makavay hidiy tu kə zlimiy zləgam ngəkoh angər tan, za məv kə vəliy nəv ngatan a kata. 21 Kat tə taroh kə jan hoh kə ɗiy taniy cike wayza kə lapiy kaɗ takan, wa hoh Vay avə kata yikwan takan, za kat təm avə hoh yikwan takan. Taniy təm kə lapiy avə yikwan, yikwan kə mbaɗ takan a tanigi, kə jan talan mahayək kə yəkta am nəv ngatan hoh acin mə zlənakku. 22 Gədan mordoy hoh mə vəlakku, kat mə vəlenta za, kə jan taniy kə lapiy kaɗ takan, mana hoh avə kata yikwan takan. 23 Kata avə tanigi, yikwan takan, za hoh avə kata, yikwan takan. Asəna acin taniy mə lapiy kaɗ takan mindiwin tik, kə jan talan mahayək kə səntik hoh acin mə zlənakku, za hoh mayta mana hoh taa mayakku.
24 ‹‹Vay ɗa, may ngaɗ wər, hidiy hoh mə vəlakta kə ɗewiy avə kata am lay kat tu kə va abəgo. Asəna acin taniy av kə limiy gədan mordoy hoh mə vəlakku, kadaban hoh mayak dəga hoh ndən talan mahayək gesin bəgwən.
25 Aw vay maa tiɗtiɗe, hidiy dolom am talan mahayək a səniy ɗahkwən, amma kata, kata sənoh, za hidiy nhi mə sənta za, hoh acin mə zlənakku. 26 Kat mə ceɗenta hoh za a tanigi, za təv kə ceɗenta hoh bah a tanigi. Asəna, taniy av kə mayiy kəsəm am walan tan mana hoh mə mayakku, za təv kə lap a taniy yikwan kə mbaɗ takan.››