16
‹‹Kat tə ceɗehin təkəniy səna, kə jan mandal hidiy tu kə zlənehin takwan, hin kə geɗ səb mozlokotuf ngaɗ kaɗ kwən. 2 Hidiy av kə gamiy hin aa mə jik jəgwan ngə Yahudiy za. Pic məpərmay av kə hosohoh, am mandal səna, hidiy av kə wəzliy hin kaɗ, za taniy av kə ɓənta avə taniy mə wəzlihin səna, a ɗiyiy kəzəɗ ngə fet nəv ngə Bayzlav. 3 Taniy av kə ɗiyta asəna, kadaban taniy aa səniy Vay ɗahkwən, za aa sənakta ɗahkwən təm. 4 Kat tə luwehin asəna, kə jan am mandal pic səna tu kə hosohoh, hin kə slek talan kat tə luwehin zaba. Kat tə ceɗehin təkəniy səna kaɗ dəga am diw kəzəɗ ngaɗ bəgwən, kadaban kat awana avə hin.››Kəzəɗ Mbiɗ ngə Bayzlav tu kə ɗiy tik
5 Tanjinhi, kat təv ɗa angər hid mə zlənakku, za ko hid mə nehekku, kə luw: ‹‹Hoh va aki?›› Ɗahkwən. 6 Amma hin tu den godokwən makavay zləgam kat mə ceɗehin səna. 7 Zəɗər maa, kat tə ceɗehin maa mindiwin. Kat tu vəɗa wər, zay tik av kə ɗiy law day a hin, kadaban mana kat tə vəɗa bəgwən, hid məv kə yah kə mənehin a yah kwən. Mandal kat tu vəɗa, kat təv kə zlənehin hid səna. 8 Mandal sin tu yah, av kə ɗefen a hidiy təm talan mahayək taniy aa ɗiyiy mə ngavngav. Za av kə ɗefenta mozlokotuf malaw ɓəw dalgway Bayzlav tu kə zlenta. 9 Mə ngavngav sin tu kə ɗefenta səna acin: Taniy a vəlakta nəv ngatan ɓahbəgwən. 10 Sin av kə ɗefen a hidigi, taniy tu lekiy am ɗiy təkən maa tiɗtiɗe, kadaban kat təv ɗa angər Vay, za hin mə limek ɗaba. 11 Sin av kə ɗefenta taniy tu lekiy am dalgway ngə Bayzlav, kadaban sin mə zlen dalgway wayza a bay məmar talan mahayək nhi.
12 Ma awaniy dolom aliɓ ɗa ngə ceɗehin baha. Amma hin mə ɓəs kə zlim tik gesin kwən. 13 Mandal Mbiɗ ngə Bayzlav mə njə kə tep hidiy am mindiwin tu hosohoh, av kə tepehin am mindiwin cike wayza. Kat tə luw anhi, kadaban sin a zləgam ɓən ngetik kwən, amma sin av kə ceɗ təkəniy cike Vay mə ceɗenni, za av kə ceɗ təkən məv kə yah akibik. 14 Mbiɗ səna av kə ɗef gədan mordoy ngaɗa, kadaban sin av kə ceɗehin təkən sin mə zlim təngər ɗa. 15 Təkəniy Vay mə maru, kata acin mə marta təm. Kat mə luw: ‹‹Mbiɗ av kə ceɗehin təkən sin mə zlim təngər ɗa,›› kat tə luw makavay səna.
Nəv ngə hidiy ngə Yesu av kə wek avə zəzay
16 Yesu ɗiya luw baha: ‹‹Gwedek akibik wənhi, hin mə limek ɗaba. Za adəwən səna gwedek, hin məv kə limek baha.›› 17 Wəriy gawliy ngə Yesu sənan ɗiya zləgamiy am walan tan, ɗiya luwta: ‹‹Sin a luw: ‹Gwedek akibik wənhi, hin mə limek ɗaba. Za adəwən səna, gwedek hin məv kə limek baha. Sin luw baha, kat təv ɗa angər Vay.› Zləgamiy səna cike a gər kə luw aceki?›› 18 Sin mə luw: ‹‹Gwedek akibik wənhi səna, a gər kə luw aceki, yikwan maa sən madaba mətik ɗahkwən.››
19 Yesu sən gendik, wəriy gawliy ngetik aa mayiy kə nehta. Sin ɗiya luwenta: ‹‹Hin mə may kə sən madaba ma kat mə luwehin: ‹Gwedek akibik wənhi, hin mə limek ɗaba, za adəwən səna gwedek hin məv kə limek bah nhi vu?››› 20 Mindiwin, kata ceɗehin: Hin məv kə han, za hin məv kə jək dirif ngə mimci, amma hidiy təm talan mahayək av kə zəzayigi. Hin məv kə den, amma ɗew ngəkin təm den av kə mbaɗ kə zəzay. 21 Mə ɓən atalan wer taa jəway kə mbuw, mandal sin aa jəway, sin ɗaw kə zlən takwan dayday kadaban pic ngə sə takwan ngetik tu hos. Amma, mana sin tu mbuw, sin ɗaw kə zlay takwaniy tik səna kaɗ. Sin ɗaw kə zəzay dayday kadaban sin mə mbuw kər za am talan mahayək. 22 Hin təm bah atəgo. Tanjinhi hin maa den, amma yikwan məv kə mgbam həriya baha. Za nəv kin av kə zəzay dayday, za hid ngə ɓəs kə takehin kə zəzay səna ɗahkwən.
23 Am mandal səna, hin mə nehek atalan təkən ngemi ɗaba. Mindiwin, kata luwehin, təkəniy cike hin mə tarta angər Vay am zlim ngaɗa, sin av kə vəlehin təkəniy səna. 24 Nha tanjinhi, hin mə tar ko təkən ngemi am zlim ngaɗa angər Vay bəgwən. Mə tar təkən angər tik, za sin av kə vəlehin, asəna acin, zəzay av kə wek nəv kin.
Gədan ngə Yesu day təkəniy təm talan mahayək cike wayza
25 Yesu ɗiya luw baha: ‹‹Kat tə ceɗehin təkəniy səna cike avə ma mə ngaɓngaɓ. Amma mandal sənan av kə hosohoh, am mandal səna, kat tə zləgam avə ma mə ngaɓngaɓ ɗaba, kat təv kə zləgamehin atalan Vay mbgan mgban dap. 26 Am mandal səna, hin atalan kin hin məv kə tar təkən angər Vay am zlim ngaɗa. Kat tə luw, kat tə tar tik makavay hin ɗaba. 27 Kat tə luw anhi, kadaban Vay atalan tik aa mayehin. Sin a mayehin lay hin mə mayakku ɓəw lay hin mə yək am nəv kin, kat tə yah aangər Bayzlav za. 28 Kat tə yah aangər Vay za, kə yah am talan mahayək. Tanjinhi, kat təv kə geɗ talan mahayək kaɗ, təv kə jəɓɗa angər Vay.››
29 Wəriy gawliy ngetik luwenta: ‹‹Ya tanjinhi səna, hoh zləgam yikwan mgban mgban mətak ngaɓ ma. 30 Tanjinhi yikwan mə sən za, hoh sən təkəniy cike wayza, za hoh may hid kə neheh a neh kwən. Asəna acin, yikwan yək am nəv ngiykwan, hoh yah aangər Bayzlav za.›› 31 Yesu zlawenta, ɗiya luw: ‹‹Tanjinhi wər hin mə vəlak nəv kin zəvu? 32 Pic məpərmay av kə yah, ko tanjinhi səna maa pic tik mə hosoh za, hin məv kə cakway kin, wərzləzləzl, ko hid ngayi av kə sitik ade kə geɗ kata a gana palpal. Amma kat tə ɗew kata a gana palpal kwən, kadaban Vay awana avə kata.
33 Kat tə ceɗehin təkəniy səna, kə jan hin hidiy mə lapiy tavə kata, hin kə ɗew avə zoy. Hin məv kə zlən takwan am talan mahayək, amma hin kə sok nəv kaɗ, kadaban kat mə day talan mahayək za avə gədan.››