Yesu acin dihir pay Inabohi
15
Yesu ɗiya luw baha: ‹‹Kata acin dihir pay Inabohi, Vay acin njə tuz. 2 Ko jəngəriy ceki tə kəsəm ɗa maa aa mbuwiy wəriy ɗahkwən, Vay av kə celta kaɗ. Amma jəngəriy mə njə kə mbuwiy wərigi, sin av kə zaɓta kə jan kə mbuwiy wəriy bah lawlaw. 3 Ngəkin, zləgam kat mə cəɗehin səna mə mbaɗahin za kweɗek kweɗek. 4 Mə ɗew lap avə kata, wa kat mə ɗew lap avə hin. Jəngər pay agendik palpal kwəl kə mbuw kwən, say sin mə mgbəwa kaɗ am ndun ngə Inabohi. Wa səna təm baha, hin kwəl kə ɗiy təkən malaw kwən say hin tu lap a kata.5 Kata acin ndun pay Inabohi, za hin acin jəngəriy tik. Hid mə ɗew lap avə kata, za kat mə ɗew lap avə sin, hid səna av kə ɗiy təkəniy malaw ndas, kadaban mana kat ɗah avə hin kwən, hin mə ɓəs kə ɗiy ko təkən ngemi kwən. 6 Mana hid a ɗew lap avə kat bəgwən, Bayzlav av kə fək tik a caɗak, mana jəngər pay. Za acin a njə kə kwal, za a njə kə gasta kə zek aliɓ kuhu kə kəɗaw. 7 Amma mana hin tu ɗew lap avə kata, za hin tu kaw zləgam ngaɗa am nəv kin, mə tar təkən cike hin mə mayu, hin məv kə jan tik. 8 Mana hin tu ɗiy təkəniy malaw ndas, hidiy av kə sənta akimin, hin wəriy gawliy ngaɗa. Asəna acin taniy av kə vəlenta mordoy a Vay.
9 Kat tə mayehin mana Vay mə mayakku. Mə ɗew lap avə kata, am may kat mə mayehin hoyhoy. 10 Mana hin tu səb mə jawjawiy ngaɗa, za hin tu ɗew lap avə kata am may, təv kə mayehin hoyhoy, wa kat taa səb mə jawjawiy ngə Vay ɓəw kat taa ɗew lap avə sin am may, sin aa mayak hoyhoy. 11 Kat tə ceɗehin təkəniy səna, kə jan hin kə zəzay mana kata, za zəzay səna kə wek nəv kin.
12 Mə jawjaw ngaɗa anhi: Mə may kəsəm am walan kin mana kat mə mayehin. 13 May kəsəm kə day hid kə geɗ micin ngetik kə lek makavay ngwalayiy tik ɗahkwən. 14 Mana hin tu ɗiy təkəniy cike kat mə luwehin, asəna wər hin ngwalayiy ɗa. 15 Kat tə ɗefehinma kə mə ɗiyiy kəzəɗ ngaɗ ɗaba, kadaban hid mə ɗiy kəzəɗ ngə hidi, aa sən təkən mordoy ngetik ta njə kə ɗiy tik ɗahkwən. Kat tə ɗefehin ma ngwalayiy ɗa, kadaban kat mə ceɗehin təkəniy cike kat mə zlimeh aangər Vay za. 16 Hin acin mə welek kwən, amma kata acin mə welehin. Za kat tu vərəkehin təm kə ɗiy kəzəɗiy ɗa. Kəzəɗiy hin tu kə ɗiyta səna, hin kə ɗiy təkəniy malaw maa a wayiy ɗahkwən ko apu. Asəna acin, Vay av kə vəlehin təkəniy cike hin tu kə tar tik am zlim ngaɗa. 17 Təkən kat mə luw hin kə ɗiy tik acin, hin kə may kəsəm am walan kin.››
Hidiy təm talan mahayək av kə zeliy Yesu avə hidiy ngetik
18 Yesu ɗiya luw baha: ‹‹Mana hidiy təm talan mahayək tu zelehin, mə sən kaɗ, a zeliy kat məpəlpəla kə hin. 19 Mana hin hidiy ngə talan mahayək wər, hidiy təm talan mahayək av kə mayehin kadaban hin caliy tan. Amma kat welehin aadab tan za, tanjinhi hin hidiy ngə talan mahayək ɗaba. Hidiy təm talan mahayək a zelehin acin kadaban. 20 Mə slek talan am zləgam kat mə ceɗehin, kat tə luw: ‹Bahlam a dayen gədan a hid məmar tik kwən.› Mana hidiy tu gbezlerektəma, taniy av kə gbezlerehinma təm baha. Mana taniy tu zlimektəma, taniy av kə zlimehin ma təm baha. 21 Taniy av kə ɗiyehin təkəniy səna cike makavay kata, kadaban aa səniy hid mə zlənakku ɗahkwən. 22 Mana kat tə yah kə ceɗenta zləgam ngə Bayzlav bəgwən, dalgway ngə Bayzlav a kawta makaway mə ngavngav kwən. Amma tanjinhi kat mə ceɗenta za, wirwir ngatan ngə leriy talan tan ɗahɗaba. 23 Hid mə zelekku, sin a zel Vay təm. 24 Mana kat tə ɗiy kəzəɗiy akibik tan maa hidiy a ɗiyta ɓahbəgwən bəgwən wər, dalgway ngə Bayzlav a kawta makavay mə ngavngav kwən. Amma tanjinhi, taniy mə limiy təkəniy cike kat mə ɗiyta za, za aa zeliy yikwan avə Bahbay ɗa dap. 25 Amma təkən səna a ɗiy atəgo kə jan kə ɗiy tiɗtiɗe mana mə ɗəɗefta am deftere ngə Bayzlav. A ɗəɗefta anhi: ‹Hidiy a zelekta maymay dap.›