Yesu acin mozlokotuf ngə va angər Bayzlav
14
Yesu luwen a wəriy gawliy ngetik: ‹‹Mə gər kə den kwən, mə vəlen nəv kin a Bayzlav, za mə vəlen a kat təm. 2 Jikiy ɗahiy dolom ade vay, kadaban səna kat tə luwehin: ‹‹Kat təv kə va kə sləsləɓehin lay ɗew. 3 Mandal kat tu za, kat tu sləsləɓehin lay ɗew wayza, təv kə jəɓah kə ɓiyehin kə tepehin abər ɗa, kə jan hin kə ɗew təm am lay kat mə ɗew. 4 Ya hin maa sən mozlokotuf ngə va am lay kat taa va wayza.››5 Tomas luwenni: ‹‹Məmar hidi, yikwan maa sən lay hoh tu kəv abəgo ɗahkwən. Ya za yikwan kə sən mozlokotuf ngəv abəgo səna aceki?›› 6 Yesu zlawenni, ɗiya luw: ‹‹Kat talan ɗa acin mozlokotuf səna. Kata acin mindiwin ɓəw kata acin mə njə kə vəl micin mətak way təm. Hid ngə hos angər vay ɗahkwən, say hid səna kə ton aangər ɗəza. 7 Mana hin tu sənakku, hin məv kə sən vay təm baha. Dəga tanjinhi, hin maa sən tik, za hin mə lim za ɗər.››
8 Filip luwenni: ‹‹Məmar hidi, a ɗef yikwan Bahbay koh səna, av kə ɗiy yikwan gəga.›› 9 Yesu zlawenni, ɗiya luw: ‹‹Filip, dəga amicek za, kata awana avə hin, za hoh sənak ɗahkwən vu? Hid mə liməkku, mə lim vay za. Ya za hoh luw a ɗef yikwan Bahbay koh kemi? 10 Hoh yək am nəv koh, kata avə vay yikwan takan, za vay təm avə kata yikwan takan bəgwən vu? Zləgam kat taa ceɗehin nhi ɓən ngaɗ gana kwən. Vay tavə kata acin taa ɗiy kəzəɗ ngetik avə kata. 11 Mə yək zləgam kat mə luwehin: ‹‹Kata avə vay yikwan takan, vay təm avə kata yikwan takan. Asənkwən təm, mə yək zləgam səna makavay kəzəɗiy kat mə ɗiyta.
12 ‹‹Mindiwin kata luwehin: Mana hid tu vəlak nəv ngetik, sin təm av kə ɗiy kəzəɗiy mana kat mə ɗiyta səna. Hid səna av kə ɗiy kəzəɗiy mogroy day godokwən, kadaban kat təv kə jəɓɗa angər Vay. 13 Təkəniy cike hin tu kə tar tik am zlim ngaɗa, təv kə ɗiy hin kə jan Kər kə pətah gədan mordoy ngə Bahbay tik kaɗ mgban mgban. 14 Mana hin tu tar təkən am zlim ngaɗa, təv kə ɗiye hin.
Yesu a luw av kə zlənah Mbiɗ ngə Bayzlav
15 Mana hin maa mayakku, hin məv kə səb mə jawjaw ngaɗa. 16 Kat təv kə tar Vay, kə jan sin kə zlənehin hid məpərmay kə mənehin, hid səna av kə ɗew avə hin ko apu. 17 Sin acin Mbiɗ ngə Bayzlav, mə njə kə tep hidiy am mindiwin. Hidiy təm talan mahayək kwəl kə yəkta am nəv ngatan kwən, kadaban taniy kwəl kə limiy kəzəɗ ngetik kwən, za taniy kwəl kə sənta kwən təm. Amma ngəkin, hin maa sən tik, kadaban sin awana avə hin hoyhoy, za awan am nəv kin təm.
18 ‹‹Kat tə geɗehin a gingin mana tuwehiy kwən, kat təv kə buwah angər kin. 19 Gwedek akibik wənhi, hidiy təm talan mahayək a limekta ɗaba, amma ngəkin, hin məv kə limekku kadaban kata awana micin, za hin təm məv kə ɗew a micin. 20 Am pic səna acin, hin məv kə sən tik, kata avə Vay yikwan takan, hin avə kata, yikwan takan, za kata avə hin, yikwan takan təm.
21 ‹‹Mana hid tu yək mə jawjaw ngaɗa, za tu səb tik kpekpe, sin acin hid mə may kata. Mana hid tu mayakku, Vay av kə may hid səna, kat təm bah təv kə may tik, za təv kə ɗefen talan ɗa a sin.››
22 Za acin, Yahuda məpərmay maa Yahuda Iskariyot kwən, ɗiya luwen a Yesu: ‹‹Məmar hidiy, hov kə ɗef talan koh a yikwan, za a hidiy təm talan mahayək wər hoh ɗefenta kwən kemi?›› 23 Yesu zlawenni, ɗiya luw: ‹‹Hid mə mayakku, sin av kə zlimek ma, za Vay av kə may tik. Yikwan avə Vay, yikwan məv kə yah angər tik, za yikwan məv kə ɗew witik witik avə sin. 24 Hid maa aa mayak kwən, a zlimekma kwən. Zləgam hin taa zlim tik angər ɗa nhi, ɓən ngaɗ gana kwən, Vay mə zlənakku acin mə ceɗek zləgamiy səna.
25 Kat tə ceɗehin təkəniy nhi dəga kat awana avə hin gesin. 26 Vay av kə zlənehin Mbiɗ ngə Bayzlav am zlim ngaɗa. Mbiɗ səna acin hid məv kə mənehin. Sin av kə jəgwanehin təkəniy cike, za av kə slekehin talan am təkəniy kat mə ceɗehin.
27 ‹‹Tanjinhi kat təv kə vəɗa, kata geɗehin zoy, kat tə vəlehin zoy ngaɗa. Kat tə vəlehin zoy mana hidiy təm talan mahayək ta njə kə vəlenta a hidiy kwən. Kadaban səna, mə den kwən, za mə hovok kwən! 28 Hin mə zlim za, kat tə luwehin: ‹Kat təv ɗa, amma təv kə jəɓah angər kin.› Mana hin maa mayak mindiwin, hin məv kə zəzay lay kat taa vəɗa angər Vay, kadaban Vay day kata avə zay. 29 Kat mə ceɗehin təkəniy səna za tanjinhi, dəga təkəniy səna a hosoh gesin bəgwən, kə jan mandal təkən səna tu kə hosohoh, hin kə yək tik zləgam səna mindiwin.