Yesu goh ngaz ngə wəriy gawliy tik
13
A fəs wan takan məmbəlwa ngə Paska kə ɗiy. Yesu mə sən za, pic sin tu kə geɗ talan mahayək kaɗ, za kə vətik angər Bahbay tik tu hos. Sin aa may hidiy ngetik təm talan mahayək nha tanjinhi, za aa may kə ɗefenta sin a mayta hos am way ɗew ngetik təm talan mahayək.2 Ngə sukoh, Yesu avə wəriy gawliy ngetik aa zəmiy gəda, mandal səna bay musuruf mə pətah wayza am nəv ngə Yahuda kər ngə Simon Iskariyot, kə jan sin kə vəl Yesu hidiy kə kawta.
3 Yesu mə sən za Bahbay tik a geɗ təkəniy cike am nəv ngər ngetik, sin talan tik Bayzlav acin mə zlənah tik, za av kə jəɓtik angər Bayzlav. 4 Sin gar aa mə lay zəm gəd za, cok ləkwət maa mordoy tə kəsəm tik kaɗ, ɓiy mbusur ləkwət sin mə jaw təm gan. 5 Za sin ɗə yəm am kaslak, za sin diw kə goh ngaz ngə wəriy gawliy ngetik, saɗ saɗ kaɗ a mbusur ləkwət sin mə jaw təm gan səna. 6 Sin maa hos angər Simon Piyer, Simon Piyer səna luwenni: ‹‹Hoh acin Məmar hidi, za hoh kə gohok ngaz ɗər vu?›› 7 Yesu zlawenni, ɗiya luw: ‹‹Tanjinhi hoh sən təkən kat mə ɗiy nhi kwən, amma akibik wənhi, hov kə sən tik.›› 8 Piyer luwenni: ‹‹Ko aceki, hoh gohok ngaz kwən!›› Yesu luwenni: ‹‹Mana kat tə gohoh ngaz bəgwən, təkən ngə lapak avə hoh ɗahɗaba.›› 9 Simon Piyer luwenni: ‹‹Məmar hidi, asəna wər hoh gohok ngaz agendik dap kwən, amma a panak ngəra avə talan tik.›› 10 Yesu zlawenni, ɗiya luw: ‹‹Mana hid tu pan, a may kə pan bah ɗaba, say kə goh ngaz dap, kadaban kəsəm tik cike wayza kweɗek kweɗek. Hin kweɗek kweɗek, amma hin cike wayza kwən.›› 11 Yesu aa sən hid məv kə vəl tik wayza, kadaban səna sin mə luw: ‹‹Hin kweɗek kweɗek cike kin kwən.››
12 Yesu maa way goh ngaz ngə wəriy gawliy ngetik za, sin kwəl ləkwət tik mordoy, za ɗew kaɗ baha. Ɗiya luwen a wəriy gawliy ngetik: ‹‹Hin mə sən təkən kat mə ɗiyehin səna zəvu? 13 Hin ɗaw kə luwakku: ‹Bay jəgwan› ɓəw ‹Məmar hidi›, za ma ngəkin tiɗtiɗe, kat Bay jəgwan ɓəw Məmar hidi. 14 Asəna wər, mana kata, kat Bay jəgwan ɓəw Məmar hidi, za kat gohohin ngaz, say hin təm hin kə goh ngaz am walan kin. 15 Kat tə zlərehin mozlokotuf hin kə səb batam ngaɗa. Hin kə ɗiy təkən mana kat mə ɗiyehin. 16 Mindiwin, kata luwehin: Bahlam aa day hid məmar tik ɗahkwən, mə zlənzlən aa day hid mə zlən tik ɗahkwən. 17 Tanjinhi hin mə sən təkəniy səna cike wayza, mana hin tu ɗiy təkəniy cike kat mə ceɗehin, nəv ngəkin av kə zəzay dayday.
18 ‹‹Kat tə zləgam atalan kin hin cike wayza kwən. Kata aa sən hidiy kat mə welta wayza. Amma say təkən mə zləgamta am deftere kə ɗiy tiɗtiɗe. A luw: ‹Hid yikwan taa njə zəm gəda avə sin mbaɗ kə calmosum ɗa.› 19 Kat tə ceɗehin kaɗ tanjinhi, dəga təkən səna a ɗiy gesin bəgwən. Asəna acin mandal təkən səna tu ɗiy, hin məv kə yək tik, ‹Kata acin kata.›
20 Mindiwin, kata ceɗehin: Hid mə yək hid kat mə zlənu, a yək kat təm, za hid mə yək kata, sin a yək hid mə zlənakku təm.››
Yesu ceɗ Yahuda av kə vəltik
21 Adəwən Yesu maa way kə zləgam səna za, nəv ngetik nusenni ɗiya luwen a wəriy gawliy tik: ‹‹Mindiwin kata ceɗehin, hid takan adab kin av kə vəlakku.›› 22 Wəriy gawliy ngetik ɗiya safiy kəsəm am walan tan, ko Yesu a zləgam atalan hid ngayi taniy a sənta ɓahbəgwən. 23 Kər gawla takan tə dab wəriy gawliy ngə Yesu, Yesu taa may tik day mə ɗewe kaɗ abər tik am lay zəm gəda. 24 Simon Piyer miceɗen həriya a kər gawal səna, kə jan sin kə neh Yesu a zləgam atalan hid ngayi. 25 Kər gawla səna hərjik kəv angər Yesu acin, ɗiya neh tik, luwenni: ‹‹Məmar hidi, hoh zləgam atalan hid ngayi?›› 26 Yesu zlawenni, ɗiya luw: Kat təv kə wət bəret kə juroɓ am kaslak, za hid kat tu kə vəlenni, sin acin hid səna.›› Za acin Yesu wət bəret juroɓ am kaslak, vəlen a Yahuda kər ngə Simon Iskariyot. 27 Adəwən Yahuda maa yək bəret səna za, Bay musuruf pət am nəv tik. Yesu luwenni: ‹‹Təkən hoh taa gər kə ɗiy nhi, a ɗiy angaw.›› 28 Ko hid takan adab taniy mə lapiy kə zəm gəda am tabəl mə sən tik, Yesu a luw atəgo kemi ɗahkwən. 29 Yahuda acin mə kaw gabal ngə zek suloy, asəna acin hidiy dolom a ɓənta Yesu a luwen kəv kə səkəm təkən ngə məmbəlwa, asənkwən a luwen sin kəv kə vəlen təkən a hidiy təm sanhah. 30 Yahuda maa yək bəret səna za, pət tik angaw. Am mandal səna vuɗu.
Yesu vəl mə jawjaw ndawyan
31 Yahuda maa pət tik za, Yesu ɗiya luw: ‹‹Tanjinhi Bayzlav mə pətah gədan mordoy ngə Kər hidmemblen kaɗ mgban, za sin a pətah gədan mordoy ngetik gendik kaɗ mgban avə Kər hidmemblen səna. 32 Asəna acin, Bayzlav av kə pətah gədan mordoy ngə Kər hidmemblen kaɗ mgban, zəni sin av kə pətah gədan mordoy ngə Kər hidmemblen səna mbeh mbeh nhi dap. 33 Wəriy ɗa, kat təv kə ɗew avə hin ngə wan gwedek baha. Adəwən səna, hin məv kə jarakku, za mana kat mə luwen a yahudigi, tanjinhi kata luwehin təm: ‹‹Hin mə ɓəs kə hos am lay kat tu kə va abəgo kwən.››
34 Kata vəlehin mə jawjaw ndawyan anhi: ‹‹Mə may kəsəm am walan kin. Hin kə may kəsəm am walan kin mana kat mə mayehin. 35 Mana hin tu may kəsəm am walan kin, hidiy cike av kə sənta hin wəriy gawliy ngaɗa.››
Yesu luw Piyer av kə luw aa sən ɗahkwən
36 Simon Piyer luwen a Yesu: ‹‹Məmar hidi hoh gər kəv aki?›› Yesu zlawenni, ɗiya luw: ‹‹Lay kat tu kəv abəgo, hoh ɓəs kə səbak kəv abəgo tanjinhi kwən, amma akibik wənhi wər, hov kə ɓəs kə səbakku.›› 37 Piyer luwenni: ‹‹Məmar hidi, tə ɓəs kə səboh tanjinhi kwən wər makavay mi? Kat mə sləsləɓa za kə vəl micin ngaɗa makavay hoh!›› 38 Yesu zlawenni, ɗiya luw: ‹‹Hoh luw hoh mə sləsləɓa wayza kə vəl micin koh makavay kat kwa? Mindiwin, kata ceɗeh: Dəga gomzok a cəwəla gesin bəgwən, hov kə luw jəɓ makaɗ akibik hidigi, hoh sənak ɗahkwən.››