Mariyama zeken dorson a Yesu am ngaz
12
Am mandal səna, fəs wan kwəh məmbəlwa ngə Paska kə ɗiy, Yesu sliɗ va a Baytaniya slalade ngə Lazarus sin mə mbəlah taa mə məc za. 2 Yesu maa hos abəgo za, hidiy tenta gəda. Za Marta wət gəd səna vəlen a Yesu. Taniy nap zəmiy gəd səna avə Lazarus ɓəw hidiy məpərmay.3 Mariyama wət dorson mətak gaɓ mbasl am vəram, dorson səna səkəm tik tuwah, a təta avə pay ta njə kə luwta Nardi. Sin zeken a Yesu am ngaz, za saɗ saɗ kaɗ avə suson talan tik, njif ngə dorson wek jik səna acin.
4 Hid takan a dab wəriy gawliy ngə Yesu zlim tik Yahuda Iskariyot, sin acin məv kə vəl Yesu, kə jan hidiy kə kawta. Sin ɗiya luw: 5 ‹‹Aw a beriy dorson səna kaɗ kway? Mbək yikwan məv kə jan suloy blək makaɗ kə mən hidiy təm sanhah avə sin!›› 6 Yahuda a luw atəgo səna, mindiwin tik wər, a ɓən atalan hidiy təm sanhah kwən. Amma kadaban sin məhəl, sin acin mə njə kə kaw gabal ngə zek suloy ngatan, za sin ɗaw kə həl suloy səna. 7 Yesu ɗiya luw acin: ‹‹Mə geɗ wer təgo kaɗ! Sin a zekek dorson nhi, kə jan kə sləsləɓ kəsəm ngaɗa kə pət a wili. 8 Ko apu, hin mawana avə hidiy təm sanhah, amma kata, tə ɗew hoyhoy avə hin kwən.››
Mogroy ngə Masayiy gər kə wəzliy Lazarus kaɗ
9 Adəwən səna, zəgudiy ngə Yahudiy dolom zlimta, Yesu awan a Baytaniya. Za acin taniy viy abəgo. Taniy a viy makavay Yesu dap kwən, amma a viy kə safiy Lazarus Yesu mə mbəlah aa mə məc za təm. 10 Mogroy ngə masayiy jawiy ma ngə wəzl Lazarus kaɗ təm. 11 A jawiy ma kə wəzlta kaɗ səna, kadaban yahudiy dolom pətiy tan aa dab tan za, vəliy nəv ngatan a Yesu lay sin mə mbəlah Lazarus aa mə məc za.
Yesu pət a liɓde Ursalima mana Bay
12 Apat tik, zəgudu dolom mə yiy təm məmbəlwa Paska səna, zlimta Yesu aa yah a Ursalima. 13 Hidiy səna aa vidiɗiy ngə pay dibinohiª kaw kawta am ngəra, pətiy aa liɓde za, viy kə gbamenta a Yesu. Nap ciwəla, ɗiya luwta: ‹‹Hozanna! Bayzlav mə ɗiyen ngər bay a hid mə yah avə zlim ngə Məmar Hidi! Bayzlav mə ɗiyen ngərbay a bay ngə Israyila!››
14 Za acin, dahenta kər ndennden a Yesu, sin tap adəwən tik. A ɗiy atəgo wa mə ɗəɗefta am deftere, Bayzlav a luw:
15 ‹‹Liɓde Siyona,
hoh gər kə hovok kwən!
Bay koh aa taa vay təgo,
sin mə tapah adəwən kər ndenndenª.››
16 Mandal səna, wəriy gawliy ngə Yesu a səniy madaba ma səna gesin bəgwən. Amma adəwən Bayzlav maa vəlen mordoy a Yesu za, taniy slekiy talan sənta zləgam səna mə ɗəɗefe kaɗ atalan Yesu am deftere, hidiy a ɗiyenta makavay səna.
17 Mandal Yesu mə mbəlah Lazarus aa mə məc za, ɓəw sin mə luwen kə pətahtik aa mə civ za səna, hidiy awaniy abəgo dolom mə limta za. Taniy viy ceɗiy təkəniy taniy mə limta a hidiy məpərmay. 18 Asəna acin, hidiy yiy kə gbamenta a Yesu, makavay taniy mə zlimiy təkən maa tuwah sin mə ɗiy səna.
19 Farisiy ɗiya zləgamiy am walan tan acin, ɗiya luwta: ‹‹Mə safu, hin jəway jəway gbak. Hidiy cike wayza aa səbta!››
Yunaninkiy sənan yiy angər Yesu
20 Am mandal məmbəlwa, adab hidiy mə yiy kə mbəzliy Bayzlav a Ursalima səna, yunaninkiy awaniy adab tan. 21 Taniy viy angər Filip tə liɓde Baytisayda təm hayək Galili, taniy nehta, ɗiya luwenta: ‹‹Mordoy, yikwan maa may kə gbam həriya avə Yesu.›› 22 Filip va ceɗen a Andire, za taniy saray tik viy ceɗenta a Yesu. 23 Yesu zlawenta, ɗiya luw: ‹‹Pic Bayzlav tu kə vəlen mordoy a Kər hidmemblen tu sla. 24 Mindiwin, kata luwehin: ‹‹Mana a mbəɗiy sisin am hayək kə məc zagway bəgwən, av kə ɗewey tik sin agendik palpal dap. Amma mana sin tu məc, av kə ɗiy gwarayiy dolom. 25 Hid mə may micin ngetik, av kə lek kaɗ. Amma mana hid tu may Bayzlav day kə micin ngetik am talan mahayək nhi, micin ngə gawal səna a lek kwən, za sin av kə ɗeweytik avə Bayzlav ko apu. 26 Hid mə may kə ɗiy kəzəɗ ngaɗa, say sin kə səbakku, sin av kə ɗew am lay kat mə ɗew. Ko hid ngayi mə mbaɗ kə hid mə ɗiy kəzəɗ ngaɗa, Vay av kə vəlen gədmazlən.››
Yesu zləgam atalan məc ngetik
27 Yesu ɗiya luw baha: ‹‹Tanjinhi nəv ngaɗa aa nusakku. Kat kə luwen a vay aceki? Kat kə luwenni: ‹Aw Vay ɗa, mana a jan za wər, takwan nhi, a tak kaɗ vu?› Amma mindiwin tik, kat tə yah kə sa takwan am mandal maa tanjinhi. 28 Vay, a vəlen mordoy a talan koh.›› Za acin, hidiy zlimiy cəwəla aa dibizlav za, ɗiya luw: ‹‹Kat mə vəlen mordoy za a talan ɗa, za kat təv kə vəlen mordoy a talan ɗa səna baha.››
29 Hidiy mə ɓasɓas təbəgo mə zlimiy wəla tafnan ɗiya luwta: ‹‹Nhi wər van acin mə ndəl.›› Hidiy məpərmay ɗiya luwta: ‹‹Mbaslay ngə Bayzlav acin mə zləgamen a Yesu.›› 30 Amma Yesu ɗiya luwenta: ‹‹Wəla hin mə zlim təgo, a zləgam a kat kwən, sin a zləgam makavay hin. 31 Tanjinhi, Bayzlav av kə zlen dalgway a hidiy təm talan mahayək acin, za tanjinhi av kə gam bay mə mar talan mahayək nhi kaɗ. 32 Kat wər, mandal hidiy tu zenekta am pay maa zləngrak am talan mahayək, təv kə ɗefenma a hidiy cike kə yiy angər ɗa.›› 33 Avə zləgamiy səna, sin a ceɗ mana aceki, sin tu kə məc. 34 Hidiy luwenta: ‹‹Yikwan mə zlim za am deftere ngə mə jawjaw, Kristu av kə ɗewey tik a micin ko apu. Ya zəɗər hoh luw, av kə zeniy Kər hidmemblen am pay maa zləngrak nhi aceki? Kər hidmemblen səna acin hid ngayi?›› 35 Yesu zlawenta, ɗiya luw: ‹‹Zləzlaɗ awana avə hin gesin ngə wan gwedek. Mə talaykin mandal sin aa zləzlaɗ gesin, kə jan taa kpizlik kə hosohoh hək, kadaban hid taa tal am kpizlik aa sən ko sin a va aki ɗahkwən. 36 Mandal zləzlaɗ awana avə hin gesin, mə vəlen nəv kin a sin kə jan hin kə mbaɗ kə wəriy ngə zləzlaɗ.››
Adəwən Yesu maa luw atəgo za, sin va ɓahay tik gaf avə tanigi.
Esaya zləgam atalan Yesu
37 Yesu mə ɗiy təkəniy ma tuwah za ndas akibik hidigi, amma ko asəna taniy a vəlenta nəv ngatan a sin bəgwən. 38 A ɗiy asəna kə jan kə ɗiy tiɗtiɗe mana mokotuf ngə Bayzlav zlim tik Esaya mə luwu, sin a luw:
‹‹Məmar hidi, hid ngayi mə yək zləgam yikwan mə luw tik yi?
Məmar hidi a ɗefen gədan ngetik a yi?ª››
39 Hidiy səna kwəl kə yəkiy zləgam ngə mokotufiy kwən, kadaban Esaya səna mə luw za baha: ‹‹
40 Bayzlav mə huluf hiriy ngə hidiy səna kaɗ.
Sin tu kpizliɓ bərngəzl talan tan kaɗ.
Kə jan taa taniy kə limiy lay avə həriya ngatan.
Taa bərngəzl talan tan kə zlər za taniy kə səniy təkən.
Za acin taniy a jəɓiy angər Bayzlav ɗaba.
Bayzlav a vəlenta zoy kəsəm ɗabaª.››
41 Esaya a luw atəgo səna, lay sin mə lim gədan mordoy ngə Yesu, za acin sin nap zləgam atalan tik.
42 Zəɗər, ko adab mogroy ngə yahudigi, hidiy dolom tu vəliy nəv ngatan a Yesu. Amma lay taniy taa hovokiy avə Farisiy tu kə gamta kaɗ aa mə jik jəgwan za, a mbal kə ɗefiy talan tan birre, yikwan mə vəlen nəv za a Yesu kwən. 43 A mayiy hidiy kə vəlen mordoy law day avə Bayzlav kə vəlenta.
Yesu acin zləzlaɗ
44 Yesu ɗiya luw a gədan: ‹‹Mana hid tu vəlak nəv ngetik, sin a vəlen nəv ngetik səna a kat dap kwən, sin a vəlen təm a hid mə zlənakku. 45 Za mana hid tu limekku, sin tu lim hid mə zlənakku təm. 46 Kata, kat zləzlaɗ, kat tə yah am talan mahayək kə jan hid mə vəlak nəv ngetik kə ɗew am kpizlik kwən. 47 Mana hid tu zlim zləgam ngaɗa, za a səb zləgam səna ɓahbəgwən, kata acin ngə zlen dalgway kwən, kadaban kat tə yah kə zlen dalgway a hidiy təm talan mahayək kwən, kat tə yah kə mbəlta. 48 Mana hid tu zelekku, za tu ɓon kə yək zləgam ngaɗa, av kə zlenta dalgway. Zləgam kat mə luwtik acin məv kə zlen dalgway am pic talan mahayək tu kə way. 49 Kat tə luw asəna, kadaban kat tə zləgam ɓən ngaɗa gana kwən. Amma vay mə zlənakku acin mə ceɗek təkən kat tu kə zləgam tik ɓəw kə jəgwanen a hidigi. 50 Za kat mə sən za, mə jawjaw ngə vay a njə kə vəl micin mətak way. Zləgamiy cike kat ta njə luw tik, tə ceɗ mana vay mə luwak kat kə ceɗ tik.››