Məc ngə Lazarus
11
1-2 Hid məpərmay ɗaha zlim tik Lazarus, sin awan a slalade ta njə luwta Baytaniya. Mariyama avə galmən Marta awaniy abəgo təm. Mariyama səna acin wer mə zeken dorson a Yesu am ngaz, za mə saɗ kaɗ avə suson talan ngetik. Pic takan, Lazarus tafnan ɗiya dal.3 Galməniy maa saray səna zləniy hid kəv kə ceɗen a Yesu: ‹‹Məmar hidi, ngwalay koh təm nəv aa dal.›› 4 Yesu maa zlim za ɗiya luw: ‹‹Məc səna a wəzl Lazarus kwən, amma av kə ɗef gədan ngə Bayzlav, kə jan hidiy kə vəlenta mordoy a kər ngə Bayzlav makavay səna.››
5 Yesu aa may Marta ɓəw galmən Mariyama avə Lazarus. 6 Sin maa zlim Lazarus aa dal za, sin ɗeweytik wan saray bah am lay səna.
7 Zəni sin luwen a wəriy gawliy ngetik: ‹‹Nəmkwan kə jəɓ am hayək Yahudiya.›› 8 Wəriy gawliy ngetik luwenta: ‹‹Mordoy na, Yahudiy mə gər kə ndiy a gugwən kə wəzliy kaɗ nhi a vah bəgwən, za hoh gər kə jəɓ abəgo bah vu?›› 9 Yesu zlawenta, ɗiya luw: ‹‹Dəga gbəmza nha pic ndəv a njə kə ɗiy masa gəɓ atalan saray kwa? Mana hid aa tal a pic, ngaz ngetik aa kpic ɗahkwən, kadaban awan am zləzlaɗ. 10 Amma mana hid aa tal a vuɗu, ngaz ngetik av kə kpic, kadaban zləzlaɗ ɗah akibik tik kwən.››
11 Zəni Yesu ɗiya luw baha: ‹‹Ngwalay ngiykwan Lazarus tu wan, kat təv kə fəɗah kaɗ.›› 12 Wəriy gawliy ngetik ɗiya luwenta: ‹‹Məmar hidi, mana sin tu wan, za mandal sin tu fəɗah kəsəm tik av kə ɗiy zoy kwən vu.›› 13 Yesu a gər kə luwenta: ‹‹Lazarus tu məc.›› Amma wəriy gawliy ngetik acagandan sin a zləgam atalan wan mindiwin tik. 14 Yesu luwenta mgban mgban acin: ‹‹Lazarus tu məc. 15 Kata zəzay atalan kin, lay məc mə kaw Lazarus kat ɗah abəgo kwən nhi. Bayzlav a ɗiy atəgo kə jan hin kə vəlak nəv kin. Nəmkwan kəv angər tik.›› 16 Tomas ta njə kə luwta muwili luwen a wəriy gawliy məpərmay acin: ‹‹Nəmkwan təm, yikwan kəv kə məc jənjəna avə sin!››
Yesu acin mə mbəlah hidiy aa mə məc za
17 Yesu maa hos a Baytaniya za, sin zlim mə kahiy Lazarus kaɗ mə ɗiya wan foɗ. 18 Slalade Baytaniya səna mbeh a liɓde Ursalima, av kə ɗiy kilemetir makaɗ. 19 Kadaban səna acin, yahudiy dolom yiy ade Marta avə Mariyama kə jan taniy kə bacenta nəv, lay galmay tan mə məc.
20 Marta maa zlim Yesu aa hosohoh za, sliɗ va kə gbamenni. Mariyama wər ɗewey tik ade. 21 Marta ɗiya luwen a Yesu: ‹‹Məmar hidi, mana hoh awan awənhi, galmay a məc kwən! 22 Amma kat mə sən za, ko tanjinhi təkən cike hoh mə tar a ngər Bayzlav av kə vəloh.›› 23 Yesu luwenni: ‹‹Golmocoh av mbəlah aa mə məc za.›› 24 Marta zlawenni, ɗiya luw: ‹‹Kat mə sən za, sin av kə mbəlah aa mə məc za, am pic Bayzlav tu kə mbəlah hidiy cike a mə məc za, am mandal talan mahayək tu kə way.››
25 Yesu ɗiya luwen baha: ‹‹Kata acin ngə mbəlah hid aa mə məc za ɓəw ngə vəlen micin a hidi. Mana hid tu vəlak nəv ngetik, ko sin tu məc av kə ɗew a micin. 26 Za mana hid taa micin, tu vəlak nəv ngetik, sin a məc kwən ko apu. Hoh mə yək za vu?›› 27 Marta zlawenni ɗiya luw: ‹‹Yaw Məmar hidi, kat mə yək ma koh za, hoh acin Kristu, kər ngə Bayzlav mə yah am talan mahayək.››
Yesu han makavay məc ngə Lazarus
28 Adəwən Marta maa luw atəgo za, sin va ɗefenma a galmən Mariyama. Sin siseken ma ɗiya luwenni: ‹‹Mordoy mə yah za aa ɗefehma.›› 29 Mariyama maa zlim atəgo za, sliɗ angaw va angər Yesu. 30 Yesu wər a pət a slalade gesin bəgwən, sin a wəlen am lay Marta mə gbamenni. 31 Yahudiy mə ɗewiy tə de Mariyama kə bacenta nəv, limta sin aa si angaw kə va caɗak. Taniy nap səbta, a ɓənta sin a va am talan civi kə han abəgo.
32 Mariyama hos am lay Yesu mə ɗew. Sin maa lim Yesu za, gbilih titimbiz akibik tik, za ɗiya luwenni: ‹‹Məmar hidi, mana hoh awan awənhi, galmay a məc kwən.›› 33 Yesu lim Mariyama aa han, za yahudiy mə lapiy tavə sin təm aa hanigi. Nəv ngə Yesu ɗiya nus day day. 34 Sin nehta, ɗiya luw: ‹‹Hin mə kah aki?›› Taniy ɗiya zlawenta, luwta: ‹‹Məmar hidi, a yah safu.›› 35 Teweɗ ɗiya kwar am həriya ngə Yesu. 36 Yahudiy ɗiya luwta: ‹‹Mə saf mana sin mə may Lazarus!›› 37 Amma hidiy məpərmay luwta: ‹‹Sin zlər həriya ngə huluf, za a ɓəs kə tak Lazarus kaɗ mətak məc bəgwən wər kemi?››
Yesu mbəlah Lazarus aa mə məc za
38 Nəv ngə Yesu ɗiya nus bah dayday, sliɗ va atalan civi. Civ səna a lutiy talagwən, za pekiy mə tik kaɗ avə kəlam mordoy. 39 Yesu ɗiya luw: ‹‹Mə goɗ kəlam təm civ nhi kaɗ.›› Marta galmən ngə mimci ɗiya luw: ‹‹Məmar hidi, av kə njif, kadaban mə ɗiya wan foɗ am civi.›› 40 Yesu luwenni: ‹‹Kat tə luwoh mana hoh tu vəlak nəv koh, hov kə lim mordoy ngə Bayzlav bəgwən vu?›› 41 Zləriy civ kaɗ acin. Yesu cəhəriya a dibizlav za ɗiya luw: ‹‹Vay, kata ɗiyo soko dayday lay hoh mə zlimek ma. 42 Kat mə sən za hoh njə kə zlim tar ngaɗa hoyhoy. Amma kat tə luw makavay hidiy maa mgbaw kata təwənhi, kə jan taniy kə yəkta, hoh acin mə zlənakku.›› 43 Adəwən sin maa luw atəgo za, ɗiya cəwəla dayday ɗiya luw: ‹‹Lazarus, a pətah aabəgo za!›› 44 Mimci səna pətahah, ngaziy tik ɓəw ngəriy tik mə jawiy kaɗ avə mbusur ləkwət, za həriy tik mə paɗa kaɗ avə maslaga. Yesu ɗiya luw: ‹‹Mə pəsl kaɗ, za mə geɗ mə vətik.››
Hidiy mogroy a zleriy ma kə wəzl Yesu kaɗ
45 Hidiy dolom a dab Yahudiy mə yiy kə bacenta nəv a Mariyama, mə limiy təkən maa tuwah Yesu mə ɗiy səna, vəliy nəv ngatan a Yesu. 46 Amma hidiy sənan viy angər Farisigi, ceɗenta təkən Yesu mə ɗiyu. 47 Za acin, mogroy ngə masayigi ɓəw Farisiy ɗiyiy ɓas ngə mgbəw ngə mə zliy dalgway, za ɗiya luwta: ‹‹Gawəl nhi aa səb avə ɗiy təkəniy maa tuwah. Terre, yikwan kə ɗiy aceki? 48 Mana yikwan tu geɗ sin kə ɗiyay gendik dap, hidiy cike av kə vəlenta nəv ngatan. Zəni hidiy Roma av kə yigi, av kə gomiy jik Bayzlav ngiykwan kaɗ, za av kə wəzliy hidiy ngiykwan kaɗ.›› 49 Amma hid takan a dab tan zlim tik Kayafas, a vərəkta kə mordoy ngə masay am di səna, sin ɗiya luw: ‹‹Hin maa sən təkən ɓahɗahkwən! 50 Mə ɓən lawlaw, geleɓ hid takan kə məc makavay ngə zəgudu, law day kə zəgudu cike kə məciy kwən vu?›› 51 Zləgam sin mə luw səna ɓən ngetik gendik kwən. Lay mə vərəkta kə mordoy ngə masay am di səna, sin jan gədan ngə zləgam mana mokotuf ngə Bayzlav, kə ceɗ Yesu av kə məc makavay ngə yahudiy cike wayza. 52 Sin a məc makavay yahudiy dap kwən, amma av kə məc təm, kə jan kə lap wəriy ngə Bayzlav mə cakway cakway təm talan mahayək cike am lay takan.
53 Dəga am pic səna, mogroy ngə yahudiy jawiy ma kə wəzliy Yesu kaɗ. 54 Asəna acin, Yesu geɗ kə tal birre a dab yahudiy kaɗ. Sin vətik a liɓde ta njə kə luwta Efrayim, təm hayək maa mbeh avə dab donu. Sin ɗewey tik abəgo avə wəriy gawliy ngetik.
55 Məmbəlwa Paska ngə yahudiy mbeh kə hos. Hidiy dolom sliɗiy aa mə hayək tan za viy a Ursalima. A viy wak za kə ɗiy mə zugzugwa ngə mbaɗ hid kə ɗiy kweɗek kweɗek akibik Bayzlav. 56 Hidiy səna nap jariy Yesu, ɗiyiy neh am walan tan, ɗiya luwta: ‹‹Mə ɓən aceki? Yesu wər a yah am məmbəlwa kwən vu?›› 57 Taniy a zləgamiy atəgo nhi, kadaban mogroy ngə masayiy ɓəw Farisiy mə luwta za, mana hid tu sən lay Yesu mə ɗew təbəgo, hid səna kə yah kə ceɗenta, kə jan taniy kə viy kə kawta.