Məgəlgəla avə təmakiy tik
10
Yesu ɗiya luw: ‹‹Mindiwin, kata luwehin, mana hid a pət am dazlay ngə təmakiy aa mə mijijik bəgwən, amma sin zlan aatalan cak dazlay, sin məhəl mə ngok təkən. 2 Amma hid mə pət taa mə mijijik, sin acin kər məgəlgəla ngə təmakigi. 3 Hid mə puw təmakiy av kə zləren mijijik, za təmakiy av kə zlimiy wəl ngetik. Sin av kə ɗefenma a təmakiy ngetik avə zlim ngatan, za sin av kə tepta a caɗak. 4 Mana sin tu gamah təmakiy tik cike a caɗak, sin av kə cə kibik, za təmakiy av kə səbta, kadaban taniy aa səniy wəla ngetik. 5 Amma ko aceki, taniy a səbiy hid maa taniy aa sənta ɗahkwən kwən. Av kə siytan gaf avə sin ɗər, kadaban taniy a səniy wəl ngə hid maa asənta ɗahkwən kwən.››6 Yesu mə zləgamenta avə ma mə ngaɓngaɓ səna, taniy a səniy madabah mətik ɓahbəgwən.
Yesu acin kər məgəlgəla malaw
7 Yesu ɗiya luw baha: ‹‹Mindiwin, kata ceɗehin, kata acin mijijik ngə dazlay təmakigi.›› 8 Hidiy cike mə yiy məpəlpəla kə kata, taniy cike məhəligi, za taniy hidiy mə ngokiy təkən ngə hidigi, amma təmakiy a zlimentəma ɓahbəgwən. 9 Kata acin mijijik. Hid mə pət taa mə ngər ɗa, kat təv kə mbəl kaɗ. Mana sin mə mayza, av kə pət a jik, av kə pət tik a caɗak, sin av kə jan təkən ngə zəm.
10 Məhəl wər a njə kə yah kə həl, kə lek micin ɓəw kə bərazl təkəniy way kaɗ. Kata, tə yah kə vəlen micin a hidigi, kə jan taniy kə ɗewiy ɗew malaw hoyhoy.
11 Kata, kat acin kər məgəlgəla malaw. Kər məgəlgəla malaw ɗaw kə geɗ micin tik kə lek makavay təmakiy tik. 12 Hid mə wətta kə gəl təmakiy ngə suloy, sin kər mə məgəlgəla malaw kwən. Sin acin məmar təmakiy kwən. Mana sin tu lim haz donu aa yah, sin av kə geɗ təmakiy kaɗ. Za av kə sitik. Za acin, haz donu av kə kaw təmakigi, za sənan av kə cakwayiy tan, wərzləzləzl. 13 Sin av kə sitik, kadaban a gəl ngə jan suloy dap. Ngam ngetik a tamakiy ɗahkwən. 14 Kata, kat kər məgəlgəla malaw. Kata sən təmakiy ɗa wayza, taniy təm aa sənakta wayza. 15 Wa səna, Vay aa sənak wayza, kat təm, kata sən tik. Kat təv kə məc makavay təmakiy ɗa. 16 Təmakiy ngaɗ məpərmay ɗahigi, a yiy a dazlay gesin bəgwən. Taniy təm say kat kə dahta taniy kə zlimiy wəl ngaɗa, za kə ɗewiy a dazlay takan, za kər məgəlgəla takan kə gəlta.
17 Vay aa mayakku kadaban kat mə vəl micin ngaɗa makavay təmakigi, za təv kə jan micin ɗa kaɗ am lay tik. 18 Micin ngaɗ səna, kata acin ngə vəl gana nguray. Hid ngə takak wəla kə vəl tik ɗahkwən. Kat awana gədan ngə vəl micin ngaɗa, za kat awana gədan ngə jan micin ngaɗ kaɗ am lay tik. Nhi acin mə jawjaw vay mə vəlakku.››
19 Lay Yesu mə luw asəna, yahudiy ɗiya wəzakiy kaɗ baha. 20 Hidiy dolom a dab tan a luwta: ‹‹Musuruf awan a kəsəm tik, sin aa wək! Hin mə zlimenma kemi?›› 21 Hidiy məpərmay luwta: ‹‹ Hid njə Musuruf tə kəsəm kwəl kə zləgam atəgo kwən. Musuruf ɓəs kə zlər həriya ngə hulufiy vu?
Yahudiy aa mayiy kə yəkiy Yesu kwən
22 Kə di kə di, hidiy ɗaw kə viy a Ursalima, kə ɗiyiy məmbəlwa ngə slek talan am ɗiy mə zugzugwa ngə ɗiy jik Bayzlav kweɗek kweɗek. Tanjinhi pic ngə ɗiy məmbəlwa səna tu hos, a njə kə ɗiyta am tər cəcən.
23 Mandal səna, Yesu aa tal a madaba bla ngə jik Bayzlav, ta njə kə luwta bla ngə Suleymanu. 24 Yahudiy ɓasɓasiy mgbaw sin, za taniy ɗiya luwenta: ‹‹Mana hoh acin Kristu, a ceɗ yikwan mgban mgban dap. Yikwan wələk wələk, hov kə ceɗ yikwan apu?›› 25 Yesu zlawenta, ɗiya luw: ‹‹Kat mə ceɗehin wayza, amma hin maa may kə yək ma ngaɗ kwən. Kəzəɗiy cike kat mə ɗiyta, vay acin mə vəlak gədan ngə ɗiy tik, za kəzəɗiy səna aa ceɗehin, mana ko kat hid ngayi. 26 Hin mə yək ma ngaɗ kwən, kadaban hin mgbəw ngə təmakiy ɗa kwən. 27 Təmakiy ɗa a njə zlimiy wəl ngaɗa, kata sənta wayza, za taniy ɗaw kə səbakta. 28 Kat təv kə vəlenta micin mətak way, za ko apu, taniy a məciy kwən. Hid ngə ngokta aa mə nəv ngəra ngaɗ za ɗahkwən. 29 Vay mə vəlak təmakiy səna, gədan ngetik day ngə hidiy cike wayza. Hid ngə ngokta aa mə ngəra ngə vay za ɗahkwən. 30 Kata avə vay, yikwan takan.››
31 Asəna acin, yahudiy nap gasiy gugwən bah kə ndiy Yesu. 32 Zəni Yesu luwenta: ‹‹Kat tu ɗiy kəzəɗiy malaw ndas avə gədan ngə vay. Adab kəzəɗiy səna, hin mə gər kə ndak makavay kəzəɗ ceki?›› 33 Yahudiy zlawenta, ɗiya luwta: ‹‹Yikwan mə gər kə wəzloh kaɗ makavay kəzəɗiy malaw hoh mə ɗiyta kwən, amma lay hoh mə ra Bayzlav. Hoh hidmemblen dap, za hoh vərək talan koh kə Bayzlav!›› 34 Yesu zlawenta ɗiya luw: ‹‹Mə ɗəɗefeh kaɗ am deftere mə jawjaw ngəkin, Bayzlav a luw: ‹Hin cike hin wa Bayzlav› kwən vu? 35 Am zləgam təm deftere ngə Bayzlav səna, Bayzlav a zləgamen a hidigi, za sin ɗefentəma kə Bayzlav! Zəmaa hid ngə zlambaɗ zləgam təm deftere kaɗ ɗahkwən. 36 Kata, Vay acin mə welekku za ɗiya zlənak am talan mahayək. Za hin mə luw, kat tə ra Bayzlav lay, kat mə luw: ‹‹Kat kər ngə Bayzlav›› səna, kat tə ra nhi aceki? 37 Mana kəziɗiy kat mə ɗiyta səna, vay acin mə zlənak kə ɗiyta kwən wər, hin mə gər yək ma ngaɗ kwən! 38 Amma, mana kat tə ɗiy kəzəɗiy ngə vay wər, ko hin mə vəlak nəv ngəkin ɓahbəgwən, kəzəɗiy kat mə ɗiyta wər mə yəku. Asəna acin, hin məv kə səntik lawlaw, vay avə kata, yikwan takan. Za kata avə sin, yikwan takan.››
39 Za acin, Yahudiy nap gər kə kawiy Yesu baha, amma sin lerey tik.
40 Yesu buwtik adəwən maz Urdun, am lay Yuhana mə diw kə juroɓ Baptisma, za sin ɗewey tik abəgo. 41 Hidiy dolom yiy angər tik, za taniy ɗiya luwta: ‹‹Yuhana a ɗiy təkən maa tuwah ko takan bəgwən, amma təkəniy cike sin mə luwtik atalan gawal nhi, sin a luw mindiwin.›› 42 Hidiy təbəgo dolom vəliy nəv ngatan a Yesu.