Yesu a zlər həriya ngə huluf
9
Pic takan, Yesu aa ton aa mə lay məpərmay, mandal sin taa ton səna, sin lim huluf hidi, gawəl səna dəga mə mbuwata sin huluf. 2 Wəriy gawliy ngə Yesu nehta, ɗiya luwenta: ‹‹Mordoy na, a mbuwiy gawəl nhi huluf, mə ɗiy mə ngavngav yi? Sin vu, asənkwən bahbay tik ɓəw mahmay tik vu?›› 3 Yesu zlawenta, ɗiya luw: ‹‹A mbuwata sin huluf lay sin mə ɗiy mə ngavngav, asənkwən lay bahbay tik avə mahmay mə ɗiyta kwən. A ɗiy atəgo kə jan Bayzlav kə ɗef gədan ngetik atalan gawəl səna. 4 Tanjinhi, pic ɗaha zagway, nəmkwan kə ɗiy kəzəɗ ngə hid mə zlənakku. Vuɗu mbeh kə hosohoh, am mandal səna, hid kwəl kə ɗiy kəzəɗ kwən. 5 Mandal kata aawan am talan mahayək zagway, kata acin zləzlaɗ ngə talan mahayək.››6 Adəwən Yesu maa luw atəgo za, sin tif giden a kayək, za sin har hayək mə joɓjoɓ tavə giden səna, sləraɓ hayək səna am həriya ngə huluf tafnan. 7 Za acin ɗiya luwenni: ‹‹A va pan həriya koh am torok ta njə kə luwta Silwam.›› Silwam səna mana kə luwa kaɗ: ‹‹Mə zlənzlən.›› Huluf səna va pan həriya ngetik, za sin maa buwa za, aa lim lay kwenkwen.
8 Midigiy tik ɓəw hidiy mə njə kə limta maa hoyhoy sin aa pəl təkən, maa limta za, ɗiya luwta: ‹‹Nhi huluf mə njə ɗew a mozlokotuf kə pəl təkən angər hidiy səna kwa?›› 9 Hidiy məpərmay luwta:‹‹Yaw, sin.›› Hidiy sənan təm bah luwta: ‹‹Awwo, sin kwən; hid mə dah sin.›› Zəni sin atalan tik, ɗiya luw: ‹‹Mindiwin, kata.›› 10 Taniy luwenta: ‹‹Ya həriya koh a zlər aceki?›› 11 Sin zlawenta, ɗiya luw: ‹‹Hid ta luwta Yesu, sin ngaɗngaɗ hayək, za sin sləraɓak am həriya, za sin ɗiya luwakku: ‹A va pan həriya koh am torok Silwam.› Kat va pan həriya, za kat nap lim lay acin.››› 12 Taniy luwenta: ‹‹Akway gawəl səna?›› Sin zlawenta, ɗiya luw: ‹‹Kata sən ɗahkwən.››
Farisiy nehiy huluf
13 Adəwən səna, hidiy tepiy gawəl mə ɗew taməcek huluf səna angər Farisigi. 14 Yesu mə ngaɗ hayək, za mə sləraɓen am həriya ngə huluf kə zləren həriya kaɗ səna, sin a ɗiy am pic nəp ngə yahudigi. 15 Kadaban səna acin, Farisiy nehiy huluf mə zlərenta həriya səna, ɗiya luwenta: ‹‹Tanjinhi, hoh lim lay nhi a ɗiy aceki?›› Sin luwenta: ‹‹Sin sləraɓak ɓuzu am həriya, kat pan həriya ɗa kaɗ, za kat ɗiya lim lay.›› 16 Hidiy sənan tə dab Farisiy səna ɗiya luwta: ‹‹Gawəl səna a yah aangər Bayzlav za kwən, kadaban sin a cicef pic ngə nəp ɓahbəgwən.›› Amma hidiy sənan təm baha, ɗiya luwta: ‹‹Mana hid aa ɗiy mə ngavngav wər, sin kwəl kə ɗiy təkən ma tuwah mana nhi vu?›› Farisiy səna a zlerima am walan tan ɓahbəgwən.
17 Za acin taniy nehiy huluf səna baha, ɗiya luwenta: ‹‹Hoh atalan koh, hoh luw atalan hid mə zləroh həriya səna aceki? Sin zlawenta, ɗiya luw: ‹‹Sin mokotuf ngə Bayzlav.›› 18 Amma mogroy ngə Yahudiy aa may kə yəkta, gawəl nhi amicek sin huluf, za tanjinhi həriya ngetik mə zləra za kwən. Kadaban səna acin, taniy ɗefentəma a bahbay tik avə mahmay tik. 19 Maa yiy za, taniy nehta, ɗiya luwenta: ‹‹Gawəl nhi kərti kin vu? Dəga mbuwa tik sin huluf vu? Ya tanjinhi sin aa lim lay nhi, a ɗiy aceki?›› 20 Bahbay tik avə mahmay tik zlawenta, ɗiya luwta: ‹‹Yikwan maa sənu, sin kər ngiykwan. Dəga yikwan mə mbuwtik, sin huluf. 21 Amma tanjinhi, sin a lim lay nhi a ɗiy aceki, yikwan mə sən bəgwən. Za mə zləren həriya səna yi, yikwan mə sən bəgwən. Mə nehu, sin kər ɗaba. Sin gəga ngə zlawma atalan tik!›› 22 Bahbay tik avə mahmay tik a luwta atəgo kadaban taniy aa hovokiy avə mogroy ngə Yadudigi. Kadaban mogroy ngə Yahudiy səna mə jawiy ma za, a luwta mana hid tu luw Yesu acin Kristu, av kə gamiy hid səna kaɗ aa mə jik jəgwan ngatan za. 23 Kadaban səna acin, bahbay avə mahmay ngə Gawal səna luwta: ‹‹Sin kər ɗaba, mə nehu!››
24 Farisiy ɗefentəma a gawal mə ɗew amicek huluf səna baha, ɗiya luwenta: ‹‹A ceɗ mindiwin akibik Bayzlav! Yikwan mə sən za gawəl mə zləroh həriya səna, sin hid mə ɗiy mə ngavngav.›› 25 Sin zlawenta, ɗiya luw: ‹‹Sin hid mə ɗiy mə ngavngav, sin hid mə ɗiy mə ngavngav kwən, sən ngaɗ akimin ɗahkwən. Amma təkən takan kat mə sənu acin: Amicek kat huluf, za tanjinhi kata lim lay.›› 26 Taniy luwenta: ‹‹Sin a ɗiyoh mi? Sin a zlər həriya koh səna aceki?›› 27 Sin zlawenta, ɗiya luw: ‹‹Kat mə ceɗehin wayza, za hin mə zlim ɓahbəgwən. Tanjinhi hin mə may kə zlim tik bah kemi? Asənkwən, hin təm bah hin mə may kə mbaɗ kə wəriy gawliy ngetik vu?›› 28 Taniy diw kə rəta acin, ɗiya luwenta: ‹‹Hoh acin kərgawla ngetik, yikwan wər yikwan wəriy gawliy ngə Musa. 29 Ngiykwan, yikwan mə sən za, Bayzlav mə luwen za a Musa. Amma gawəl mə zləroh həriya səna, sin a yah aazəki yikwan maa sən ɗahkwən!›› 30 Sin zlawenta ɗiya luw: ‹‹Mə mbaɗa kə təkən mə kpah talan! Sin a yah aazəki hin maa sən ɗahkwən, za mə zlərak həriy za! 31 Yikwan mə sən za, Bayzlav aa yək ma ngə hid mə ɗiy mə ngavngav ɗahkwən, amma sin a njə kə yək ma ngə hidiy mə njə kə vəlenta mordoy ɓəw mə ɗiyiy may ngetik. 32 Dəga Bayzlav mə ndən talan mahayək, ko hid takan mə zlim, hid mə zlər həriy ngə hid mə mbuwata huluf za ɗahkwən. 33 Mindiwin, gawəl səna a yah aangər Bayzlav za, asənkwən sin a ɓəs kə ɗiy atəgo kwən.›› 34 Taniy zlawenta, ɗiya luwta: ‹‹Dəga mə mbuwigi, hoh awan am mə ngavngav, za hoh gər kə jəgwan yikwan təkən vu?›› Za acin taniy gamta kaɗ a caɗak.
Huluf am səb mozlokotuf ngə Bayzlav
35 Yesu zlim Farisiy mə gamiy gawəl sin mə zləren həriya səna kaɗ a caɗak. Yesu va gbamenni, za ɗiya luwenni: ‹‹Hoh mə vəlen nəv koh za a Kər hidmemblen vu?›› 36 Sin zlawenni, ɗiya luw: ‹‹Məmar hidi, sin acin hid ngayi? Aw a ceɗekku, kə jan kat kə vəlen nəv ngaɗa.›› 37 Yesu luwenni: ‹‹Hoh mə lim za, hid taa zləgamoh maa tanjinhi səna, sin acin gawəl səna.›› 38 Sin ɗiya luw: ‹‹Məmar hidi, kat mə vəloh nəv ɗa za.›› Za sin gbiliy titimbiz akibik Yesu.
39 Zəni Yesu ɗiya luw: ‹‹Kat tə yah am talan mahayək nhi, kə wəzak hidiy madaba par par saray. Kat tə yah nhi kə jan hulufiy kə limiy lay kwenkwen, za hidiy ta njə kə luwta aa limiy lay, kə hulufigi.››