Dahiy barlaw werti angər Yesu
8
Yesu va atalan wurum Jaytun. 2 Apat tik gbəm za, sin jəɓtik a jik Bayzlav, za hidiy cike yiy angər tik. Sin mə ɗewekaɗ, za sin diw kə ɗiyen jəgwan a hidigi.3 Mogroy ngə jəgwan ɓəw Farisiy dahiy wer məpərmay angər Yesu, a kawiy wer səna am vərndew. Taniy luwenta a wer səna kə gar akibik hidiy cike wayza. 4 Taniy luwenta a Yesu: ‹‹Mordoy, yikwan mə kaw wer nhi am vərndew. 5 Musa a luw yikwan am mə jawjaw, madaba wer mana nhi, yikwan kə ndətik a gugwən nha kə məc. Hoh wər, hoh luw aceki?›› 6 Taniy a luwta atəgo səna, a ɗəfiy Yesu kə jan kə kawta am ma. Amma Yesu tək talan a kayək, za nap ɗəɗef a kər ngəra a kayək. 7 Mogroy ngə jəgwan ɓəw Farisiy aa səbiy a nehta dap. Yesu kaf talan za ɗiya luw: ‹‹Hid adab kin maa a ɗiy mə ngavngav ɓahbəgwən, sin mə diw kə nda gugwən məpəlpəla atalan wer nhi.›› 8 Za sin tək talan a kayək baha, nap ɗəɗef a kayək. 9 Hidiy maa zlimta atəgo za, vitan takan takan, mbusuriy acin mə diw kə vitan. Geɗiy Yesu avə wer səna agandan palpal, za wer səna garra akibik tik. 10 Za acin Yesu kaf talan, ɗiya luwenni: Werti, akway hidiy tafnan? Ko hid takan mə zloh dalgway ɗahkwən vu?›› 11 Wer səna zlawenni, ɗiya luw: ‹‹Ko hid takan ɗahkwən Məmar kata.›› Yesu luwenni: ‹‹Kat təm tə zloh dalgway kwən, a sliɗ ma vəkoh, amma hoh gər kə ɗiy mə ngavngav ɗaba.››]
Yesu acin zləzlaɗ ngə talan mahayək
12 Yesu zləgamen a hidiy baha, sin luw: ‹‹Kata acin zləzlaɗ ngə talan mahayək. Mana hid tu səbakku, sin a ɗew am kpizlik kwən, amma kat təv kə vəlen zləzlaɗ ngə tep hid am micin mətak way.›› 13 Farisiy ɗiya luwenta: ‹‹Hoh zləgam atalan koh gungoh, zləgam hoh mə zləgam səna mindiwin kwən.›› 14 Yesu zlawenta ɗiya luw: ‹‹Mindiwin, kat tə zləgam atalan ɗa gana, amma zləgam kat mə luw səna ma maa mindiwin. Kat tə luw anhi kadaban kata sən lay yah ngaɗa, za ta sən lay kat tu kəv wayza. Amma hin wər, lay yah ngaɗa, asənkwən lay kat tu kə va abəgo hin maa sən ɗahkwən. 15 Ngəkin, hin mə njə zla dalgway ngə hidiy avə ɓən ngə hidmemblen. Ngaɗa, ko hidngayi, kat aa zlen dalgway ɗahkwən. 16 Za mana ko kat tu zlen dalgway a hidi, təv kə zlenni avə mindiwin, kadaban kat aa gana palpal acin taa zla dalgway səna kwən. Yikwan mawana vay Bayzlav mə zlənakku.
17 Mə ɗəɗefe kaɗ am deftere ngə mə jawjaw ngəkin, a luwta anhi: ‹Mana məsəberiy saray tu zləgamiy atalan təkən, za ma ngatan tu lap takan, hidiy mə yəkiy ma ngatan səna kə mindiwin.› 18 Kata, kat tə zləgam atalan ɗa gana, za vay mə zlənakku tu zləgam atalan ɗa təm baha.›› 19 Farisiy ɗiya nehta, luwenta: ‹‹Akway ceh səna?›› Yesu zlawenta ɗiya luw: ‹‹Hin maa sənak ɗahkwən, za hin maa sən vay ɗahkwən təm. Kadaban mana hin maa sənak ɗaha, mbək hin məv kə sən vay təm baha.››
20 Yesu a zləgam səna mandal sin taa ɗiy jəgwan a jik Bayzlav. Sin aa wan mbeh a jagwar lay ngə vəl təkən a Bayzlav. Hid mə kawtik ɗahkwən, kadaban pic ngə kawtik a hos gesin bəgwən.
Yesu a luw sin av kə buwtik angər cin
21 Yesu ɗiya luwenta baha: ‹‹Kat təv kəv ɗa, za hin məv kə jarakku, amma hin məv kə məc am mə ngavngaviy ngəkin. Hin kwəl kə va am lay kat tu kə va kwən.›› 22 Yahudiy ɗiya zləgamiy am walan tan, ɗiya luwta: ‹‹Sin av kəv kə wəzl talan tik kaɗ vu? Kadaban sin a luw: ‹Hin kwəl kə va am lay kat tu kə va kwən ta.››› 23 Yesu luwenta: ‹‹Hin, hin hidiy tə kayək, za kata, tə yah aa wəzlav za. Talan mahayək acin mə marehin, amma kata, talan mahayək a marak ɓahbəgwən. 24 Kadaban səna acin kat mə luwehin: ‹Hin məv kə məc am ngavngaviy kin.› Say hin kə yək tik, ‹Kata acin kata› asənkwən hin məv kə məc am mə ngavngaviy kin.››› 25 Taniy luwenta: ‹‹Hoh, hoh yi?›› Yesu zlawenta, ɗiya luw: ‹‹Kat mə ceɗehin za dəga am diw tik. 26 Kat awana təkəniy dolom ngə zləgam atalan kin, za təv kə zlehin dalgway makavay təkəniy səna. Amma hid mə zlənakku a njə zləgam ma maa mindiwin. Təkən kat mə zlimeh tə ngərtik dap acin kat taa ceɗen a hidiy təm talan mahayək.››
27 Taniy a sənta Yesu a zləgam atalan cin ɓahbəgwən. 28 Za acin Yesu ɗiya luwenta: ‹‹Mandal hin tu zen Kər hidmemblen am pay maa zləngrak, hin məv kə səntik ‹Kata acin kata.› Hin məv kə səntik, kat tə ɗiy təkən ngə talan ɗa dap kwən. Kat tə njə kə ceɗ təkən vay mə jəgwanakku. 29 Hid mə zlənakku awana kata. Sin a geɗek kata gana palpal bəgwən, kadaban kat tə njə kə ɗiy təkən nəv ngetik mə mayu.›› 30 Mandal Yesu taa zləgam səna hidiy dolom vəliy nəv ngatan a sin.
Dihir wəriy ngə Ibrahima
31 Yesu luwen a Yahudiy mə vəliy nəv ngatan a sin, sin a luw: ‹‹Mana hin maa səb avə kə kaw zləgam ngaɗa, hin məv kə ɗew kə wəriy gawliy ngaɗa mindiwin tik. 32 Hin məv kə sən ma maa mindiwin, za ma maa mindiwin səna av kə vəlehin gədan ngə mar talan kin.››
33 Taniy zlawenta a Yesu, ɗiya luwta: ‹‹Yikwan wəriy ngə Ibrahima, za yikwan mə ɗew kə bahlam ngə hid ɓahbəgwən. Ya za hoh luw: ‹Hin məv kə mar talan kin› hoh luw atəgo wər kemi?››› 34 Yesu zlawenta ɗiya luw: ‹‹Mindiwin, kata aa ceɗehin: Hidiy cike wayza mə njə kə ɗiyiy mə ngavngav, taniy bahlam ngə mə ngavngav səna. 35 Bahlam a ɗew tuk kaɗ ade ngə hid mə martik kwən, amma kər tə de wər av kə ɗeweytik ade ko apu. 36 Mana kər ngə Bayzlav tu lerehin kaɗ wər, hin məv kə mar talan kin mindiwin tik. 37 Kat mə sən za, hin wəriy ngə Ibrahima. Amma hin maa gər kə wəzlak kaɗ, kadaban hin mə yək zləgam ngaɗa ɓahbəgwən. 38 Kata, tə njə kə zləgam atalan təkən kat mə limeh təngər vay. Amma hin, mə njə kə ɗiy təkəniy bahbay kin mə jəgwanehin.››
39 Taniy zlawenta, ɗiya luwta: ‹‹Ibrahima acin vay ngiykwan.›› Yesu luwenta: ‹‹Mana hin wəriy ngə Ibrahima mindiwin wər, mbək hin məv kə ɗiy kəzəɗ sin mə ɗiyu. 40 Kata, kat mə ceɗehin ma maa mindiwin kat mə zlimeh təngər Bayzlav za. Zəɗər tanjinhi, hin maa gər kə wəzlak kaɗ, Ibrahima a ɗiy atəgo bəgwən. 41 Ngəkin, hin mə ɗiy kəzəɗ ngə bahbay kin.›› Taniy zlawenta ɗiya luwta: ‹‹Yikwan mbuw mətak səban kwən, vay ngiykwan takan dap, sin acin Bayzlav.›› 42 Yesu luwenta: ‹‹Mana Bayzlav acin Bahbay kin wər, mbək hin məv kə mayakku, kadaban kat tə yah aangər tik za, za kat awan awənhi makavay sin. Kat aa talan ɗa acin mə yahɗa dap kwən, amma Bayzlav acin mə zlənakku. 43 Hin maa sən təkən kat taa ceɗehin ɗahkwən wər kemi? Hin maa sən ɗahkwən, kadaban hin maa ɓəs kə teh zlimi kə zlim zləgam ngaɗa ɗahkwən. 44 Bahbay kin acin bay musuruf, za hin mə may kə ɗiy təkən bahbay kin mə mayu. Dəga amicek za, sin hid mə wəzl dəwa. Sin a zləgam mindiwin ɓahbəgwən, kadaban mindiwin a kəma tik ɗahkwən. Kəzəɗ ngetik acin kə ɗiy polkoy, kadaban sin hid mə ɗiy polkoy za polkoy cike wayza a yah aangər tik za. 45 Amma kata, tə njə kə cəɗehin mindiwin, kadaban səna acin, hin maa yək zləgam ngaɗ ɗahkwən. 46 Adab kin, hid ngayi ngə ɓəs kə zləgam atalan ɗa, kat mə ɗiy mə ngavngav za yi? Kat tə njə zləgam mindiwin, amma hin maa yək zləgam ngaɗ kwən wər kemi? 47 Mana Bayzlav mə mar hid za, hid səna av kə zlimenma. Amma ngəkin, hin maa zlimenma ɗahkwən kadaban Bayzlav acin mə marehin kwən.››
Yesu avə Ibrahima
48 Adəwən səna, Yahudiy zlawenta a Yesu, ɗiya luwenta: ‹‹Mandal yikwan mə luw: ‹Hoh njə Samariya, za hoh hid njə mbiɗ mə ngavngav tə kəsəm nhi, yikwan mə luw tiɗtiɗe.››› 49 Yesu zlawenta ɗiya luw: ‹‹Kat hid njə mbiɗ mə ngavngav tə kəsəm kwən. Amma kat tə vəlen mordoy a vay, zəni hin, hin maa vəlak mordoy ɗahkwən. 50 Kata, tə gər hidiy kə vəlakta mordoy kwən. Hid mə may hidiy kə vəlakta mordoy ɗaha, sin acin təm məv kə zla dalgway tik. 51 Mindiwin, kata luwehin: Mana hid tu zlimekma, hid səna a məc kwən ko apu.››
52 Yahudiy luwenta a Yesu baha: ‹‹Tanjinhi yikwan mə sən za mindiwin hoh hid njə mbiɗ mə ngavngav tə kəsəm. Ibrahima mə məca za, za mokotufiy ngə Bayzlay təm mə məciy za, za ngəkoh hoh luw: ‹Mana hid tu zlimekma, hid səna a məc kwən ko apu!› 53 Hoh day didi ngiykwan Ibrahima avə zay acin vu? Sin mə məca za, za mokotufiy ngə Bayzlay təm mə məciy za. Hoh vərək talan koh kə yi?›› 54 Yesu zlawenta, ɗiya luw: ‹‹Mana kat tu vəlen mordoy a talan ɗa gana, zay tik ɗahkwən. Bahbay ɗa Bayzlav hin mə luw atalan tik: ‹Sin acin Bayzlav ngəkin səna›, sin acin ngə vəlak mordoy. 55 Amma hin maa sən ɗahkwən, kata, kat aa sən tik. Mana kat tə luw zaba: ‹Kat aa sən ɗahkwən.› Kat təv kə ɗew kə hid mə ɗiy polkoy mana hin. Amma kat aa sən tik, za tə njə kə zlimenma. 56 Ibrahima didi kin tu ɗew am zəzay, aa bəbəc kə lim pic mbuw ngaɗa, sin maa lim za, tu zəzay day day makavay səna.›› 57 Yahudiy luwenta a Yesu: ‹‹Di ngəkoh a hos ngərjoɓun gesin bəgwən, za hoh luw, hoh mə lim Ibrahima za!›› 58 Yesu luwenta: ‹‹Mindiwin, kata ceɗehin, dəga a mbuwiy Ibrahima bəgwən, ‹kat ɗaha.››› 59 Za acin taniy gasiy gugwən a gər kə ndiy Yesu avə sin. Amma Yesu ɓahay tik kaɗ, za sin pət tik aa jik Bayzlav za.