Galmayiy ngə Yesu a vəlenta nəv ngatan ɓahbəgwən
7
Adəwən səna, Yesu ɗiya səb avə tal hayək Galili cike wayza. Sin a ngəm kəv am hayək Yahudiya bəgwən, kadaban mogroy ngə Yahudiy ɗaw kə gər kə wəzlta kaɗ.2 Mandal səna, məmbəlwa ngə Yahudiy ta njə luwta məmbəlwa ngə madaba bla mbeh kə hos. 3 Galməniy ngə Yesu ɗiya luwenta: ‹‹A sliɗ awənhi za, a va am hayək Yahudiya, kə jan wəriy gawliy koh təbəgo təm kə limiy kəzəɗiy hoh ta njə kə ɗiy tik səka. 4 Mana hid aa may hidiy kə limiy kəzəɗiy ngetik, a ɓah talan tik kaɗ ɗahkwən. Hoh njə kə ɗiy kəzəɗiy parpar, asəna acin a ɗiy am həriy hidiy cike kə jan hoh kə ɗef talan koh a tanigi.›› 5 Galmayiy tik a luwenta atəgo, kadaban ko taniy avə talan tan maa, a vəlenta nəv ngatan a Yesu bəgwən. 6 Yesu ɗiya luwenta: ‹‹Pic ngaɗa ngəv abəgo a hos gesin bəgwən. Amma hin wər, ko apu pic səna law dap. 7 Kat tə luw asəna, kadaban hidiy təm talan mahayək kwəl kə zelihin kwən, amma taniy a njə kə zeliy kat ɗər, kadaban kat wər tə njə kə ceɗenta kaɗ mgban mgban, kəzəɗiy taniy ta njə kə ɗiyta, kəzəɗiy mə ngavngav. 8 Hin wər mə va am məmbəlwa səna. Kat wər, tə vak kwən, kadaban pic ngaɗ a hos gesin bəgwən.›› 9 Adəwən sin maa luwenta atəgo za, sin ɗewey tik a Galili.
Yesu awan am məmbəlwa ngə madaba bla
10 Galmayiy ngə Yesu maa viy am məmbəlwa za, Yesu va abəgo təm. Sin a va am məmbəlwa səna avə ɓah, aa may hidiy kə sənta kwən. 11 Mogroy ngə Yahudiy nap jarta am məmbəlwa səna, ɗiya luwta: ‹‹Yesu səna awan ki?›› 12 Adab hidiy mə ɓasiy am məmbəlwa səna, taniy tu zləgamiy dolom atalan Yesu. Hidiy məpərmay a luwta: ‹‹Sin hid malaw.›› Hidiy məpərmay a luwta: ‹‹Sin hid malaw kwən, a njə kə jək hidigi.›› 13 Amma hid mə zləgam mgban mgban atalan tik wər ɗahkwən, kadaban a hovokiy avə mogroy ngə Yahudigi.
14 Məmbəlwa səna, a njə kə darta wan cisaray. Məmbəlwa maa ɗiy wan makaɗ mə foɗ tik, Yesu pət am jik Bayzlav, za nap ɗiyen jəgwan a hidigi. 15 Mogroy ngə Yahudiy maa zlimiy zləgam ngetik za, taniy wələk wələk, za ɗiya luwta: ‹‹Gawəl nhi a sən təkən aceki? Zəmaa sin a jəgwan mə jawjaw ngə Musa angər bay jəgwan ɓahbəgwən ta!›› 16 Yesu zlawenta ɗiya luw: ‹‹Zləgam kat mə jəgwanehin nhi, tə ɗiy avə sən ngaɗ kwən. Bayzlav mə zlənakku acin mə vəlak sən ngə ɗiy tik. 17 Hid mə may kə ɗiy may ngə Bayzlav, hid səna av kə sən tik, Bayzlav acin mə vəlak sən ngə ɗiy jəgwan səna asənkwən kat tə ɗiy tik avə sən ngaɗ gana. 18 Hid mə njə kə zləgam atalan tik gendik, a njə kə may hidiy kə həmənta. Amma hid mə njə kə zləgam kə vəlen mordoy a hid mə zlənah tik, sin hid maa tiɗtiɗe, aa jək hidiy ɗahkwən. 19 Musa mə vəlehin mə jawjaw ngə Bayzlav za kwən vu? Amma ko hid takan adab kin mə səb mə jawjaw səna ɗahkwən. Ya za tanjinhi hin mə gər kə wəzlak kaɗ, kat tə ɗiy təkən ngemi?›› 20 Hidiy zlawenta, ɗiya luwta: ‹‹Hoh awana mbiɗ mə ngavngav! Hid ngayi mə gər kə wəzloh yi?›› 21 Yesu zlawenta, ɗiya luw: Kat tə ɗiy təkən maa tuwah takan dap am pic nəp ngə Yahidigi, za hin cike wayza hin wələk wələk. 22 Musa a luw hin kə zla mandawal ngə wəriy kin kaɗ, amma zləgam səna a yah aangər Musa za kwən. Didiy kin acin mə luwta, kadaban səna acin hin ɗaw kə zla mandawal ngə wəriy kin ko am pic nəp ngə yahudigi. 23 Ya hin ɗaw kə zla mandawal am pic nəp, kə səb mə jawjaw ngə Musa. Za kat, kat vəlen zoy kəsəm a hid am pic nəp, zəni hin ɗiy nəv atalan ɗa, makavay mi acin? 24 Mə gər kə zlen dalgway a hidiy makavay təkəniy həriya kin ta njə kə limta dap kwən, mə zla dalgway a mozlokotuf tik.
Yesu acin Kristu vu?
25 Hidiy sənan tə Liɓde Ursalima maa limta za, ɗiya luwta: ‹‹Sin acin hid hidiy taa jarta kə wəzlta kaɗ səna kwən vu? 26 Mə safu: Sin aa zləgam akibik hidigi, za hid mə zləgamen ɓahɗahkwən! Talan mbalgamiy ngiykwan mə sənta za, mindiwin sin acin Kristu vu? 27 Gawəl nhi, yikwan maa sən lay sin mə yah aabəgo za lawlaw, amma mandal Kristu tu kə yah, hid ngə səntik, sin a yah aazəki ɗahkwən.››
28 Mandal Yesu mə ɗiyen jəgwan a hidiy am jik Bayzlav, sin mə luwenta za a gədan, sin a luw: ‹‹Hin mə luw hin maa sənak lawlaw, za hin maa sən lay kat mə yah taabəgo za kwa? Amma kata atalan ɗa acin mə yəɗa dap kwən, hid acin mə zlənakku, za hid səna hid maa tiɗtiɗe, sin wər hin maa sən ɗahkwən. 29 Kat wər, kata səntik, kadaban kat tə yah aangər tik za, za sin acin mə zlənakku.›› 30 Za acin hidiy nap gər kə kawiy Yesu, amma hid mə ɓəs kə mbəlem ngəra a kəsəm tik ɓahɗahkwən, kadaban pic ngə kawtik wəlen. 31 Hidiy dolom adab zəgudu vəliy nəv ngatan a sin, za ɗiya luwta: ‹‹Mandal Kristu tu kə yah, av kə ɗiy təkən maa tuwah day ngə gawal nhi səna acin vu?››
Farisiy aa mayiy kə kawiy Yesu
32 Farisiy tu zlimiy zləgam hidiy mə sisekta atalan Yesu cike wayza. Za acin taniy zlerima avə mogroy ngə masayigi, zləniy hidiy mə puwiy jik Bayzlav kəv kə kawiy Yesu. 33 Za acin Yesu ɗiya luw: ‹‹Kat təv kə ɗew avə hin ngə wan gwedek baha, za təv kə jəɓ ɗa angər hid mə zlənakku. 34 Hin məv kə jarakku, zəni hin mə janak kwən, kadaban hin kwəl kə va am lay kat tu kəv kwən.›› 35 Yahudiy nehiy talan tan, ɗiya luwta: ‹‹Lay sin tu kə va, maa yikwan kwəl kə jan tik kwən səna awan aki? Sin a gər kə va angər hidiy ngiykwan mə ɗewiy təm hayək yunaninkiy acin vu? A gər kəv kə jəgwanen təkən a hidiy yunaninkiy vu? 36 Sin mə luw: ‹‹Hin məv kə jarakku zəni hin mə janak kwən, kadaban hin kwəl kə va am lay kat tu kəv kwən.›› Zlagam səna a gər kə ləwa kaɗ aceki?
Jəgwan atalan yəm mə njə kə vəl micin
37 Pic way ngə məmbəlwa, pic səna zay tik day wan mə ton tonigi. Am pic səna acin, Yesu sliɗ gar aa gar, za ɗiya luw a gədan: ‹‹Mana yəm aa wəzlen a hidi, hid səna mə yah angər ɗa, təv kə vəlen yəm sin kə sətik. 38 Mana hid tu vəlak nəv ngetik, yəm av kə kwar aliɓ ngetik njeɓ njeɓ njeɓ, mana deftere mə luwu.›› 39 Yesu a zləgam səna atalan Mbiɗ ngə Bayzlav. Hidiy məv kə vəliy nəv ngatan a Yesu, Bayzlav av kə vəlenta Mbiɗ səna. Amma mandal səna nhi, Bayzlav a zlənah Mbiɗ ngetik gesin bəgwən, kadaban Bayzlav a ɗef gədan mordoy ngə Yesu gesin bəgwən.
Hidiy a ngiwayiy atalan Yesu
40 Zəgudu maa zlim zləgam ngə Yesu za, hidiy sənan tədab tan ɗiya luwta: ‹‹Mindiwin, gawəl nhi mokotuf ngə Bayzlav!›› 41 Hidiy məpərmay luwta: ‹‹Sin acin Kristu.›› Hidiy sənan təm bah luwta: ‹‹Kristu kwəl kə yah aa mə hayək Galili za vu? 42 Deftere wər a luw, Kristu av kə pətah aa mə səban ngə Dawda za. Sin av kə yah aa Liɓde Baytilama Dawda mə ɗew təbəgo kwən vu?›› 43 Asəna acin, hidiy a jan kə zlerima atalan Yesu ɓahbəgwən. 44 Hidiy məpərmay tədab tan a gər kə kawta, amma ko hid takan mə mbəlem ngəra a kəsəm tik ɗahkwən.
45 Hidiy mə puwiy jik Bayzlav jəɓiy angər mogroy ngə masayiy ɓəw Farisigi. Mogroy ɓəw Farisiy luwenta a hidiy səna: ‹‹Hin mə ngazlah bəgwən, mə ngav mi?›› 46 Hidiy mə puwiy jik Bayzlav zlawenta, ɗiya luwta: ‹‹Hid ngə zləgam mana gawəl səna ɓahɗahkwən.›› 47 Farisiy luwenta: ‹‹Hin təm baha, sin mə jəkehin za kwa? 48 Ko hid takan adab talan mbalgamiy ngiykwan, asənkwən adab Farisiy mə vəl nəv a sin ɗah vu? 49 Səna hidiy mətak səniy mə jawjaw ngə Musa, taniy səna Bayzlav mə ngavta waykaɗ, taniy acin mə vəlenta nəv!››
50 Hid takan adab Farisiy səna, zlim tik Nikodemus, sin a njah zaba angər Yesu. Sin ɗiya luwenta: 51 ‹‹Am mə jawjaw ngiykwan Bayzlav mə vəlen a Musa, ɗah law yikwan kə zlen dalgway a hid atəgo kwən! Say yikwan kə zlim zləgam ɓəw kə sən təkəniy sin ta ɗiy tik zagway.›› 52 Amma hidiy sənan zlawenta, ɗiya luwta: ‹‹Hoh təm hoh njə Galili vu? A saf am deftere may, za hov kə səntik ko mokotuf takan ngə Bayzlav ngə yah aa mə hayək Galili za ɗahkwən.››