Yesu vəlen zəm a hidiy ngərbək joɓən
6
Adəwən səna, Yesu sliɗ vətik a dəwən maza mordoy tə Galili. Maza mordoy səna, ɗaw kə ɗefentəma baha maza mordoy tə Tiberiyas. 2 Zəgudiy dolom ɗiya səbta, makavay təkəniy ma tuwa taniy mə limta sin mə ɗiy a kə vəlen geleɓe a mə daldaligi. 3 Yesu tapiy avə wəriy gawliy ngetik atalan wurum, za ɗewiy tan abəgo. 4 Mandal səna, məmbəlwa ngə Yahudiy taa njə kə luwta Paska mbeh kə hos.5 Gwedek Yesu cəhəriya, lim zəgudiy dolom aa yiy angər tik. Sin maa limta za, ɗiya neh Filip, luwenni: ‹‹Yikwan kə jan təkən ngə zəm ngə səkəm wər aki kə vəlen a hidiy səna cike kə zəmta?›› 6 Yesu a luw atəgo səna, a may kə sən ɓən ngə Filip, asənkwən sin atalan tik, sin aa sən təkən sin tu kə ɗiy tik. 7 Filip zlawenni, ɗiya luw: ‹‹Aw Mordoy, ko kə səkəmenta təkən ngə zəm ngə suloy blək saray, kə jan ko hid ngayi kə dezl gwedek gwedek, a kpaslenta kwən.›› 8 Kər gawla ngetik takan, zlim tik Andire, galmən ngə Simon Piyer, ɗiya luwenni acin: 9 ‹‹Kərtawəl məpərmay awan awənhi, awana bretiy joɓən ɓəw kilifiy saray. Amma nhi səna gəɗak kə vəlen a hidiy dolom kwən vu?››
10 Yesu ɗiya luw: ‹‹Mə luwen a hidiy mə ɗewiy cike kaɗ.›› Am lay səna, hiziɗ ɗahiy dolom. Taniy cike ɗewiy kaɗ atalan hiziɗ səna. Adab tan, mawəliy agendik av kə hos ngərbək joɓən. 11 Yesu ɓiy bretiy tafnan səna, za luwen soko a Bayzlav makavay səna. Za wəzak wəzakenta a hidiy təbəgo səna. Za sin ɗiy avə kilifiy təm atəgo. Taniy cike mə janta za mana nəv ngatan mə mayta. 12 Maa pasiy za, Yesu luwen a wəriy gawliy ngetik: ‹‹Mə kambal mə fəs fəs tik kaɗ kə jan taa kə ngav za.›› 13 Taniy kambal kambaliy mə fəs fəs ngə bretiy hidiy mə hamta tafnan, pe pe paskariy gəɓ atalan saray.
14 Hidiy səna maa limiy təkən maa tuwah Yesu mə ɗiy tavə bretiy səna za, ɗiya luwta: ‹‹Mindiwin, gawal nhi acin mokotuf ngə Bayzlav məv kə yah am talan mahayək!›› 15 Yesu mə sən za, hidiy səna av kə yiy kə kawta aa gədan kə vərəkta kə bay ngatan, kadaban səna sin kərəɓ tik bah atalan wurum sin agendik palpal.
Yesu va avə ngaz atalan yəm
16 Pic maa ndəv za, wəriy gawliy ngə Yesu surohiy a wurum za, viy atalan maz mordoy. 17 Taniy pətiy a liɓ pay ngə zlan maza kə zlaniy adəwən maza tə liɓde Kafarnahum. Vuɗu janta aliɓ yəm. Amma Yesu wər a hosoh angər tan gesin bəgwən. 18 Mbiɗ diw kə ca a gədan, viw viw viw, za yəm ɗiya kəz, gingiw gingiw. 19 Taniy kəzeriy pay ngə zlan maza, kəzer kəzer av kə ɗiy kilemetir joɓən, limiy Yesu aa yaha. A va a ngaz atalan yəm. Taniy maa limta za, nəv ngatan ɗiya mbir. 20 Amma Yesu luwenta: ‹‹Mə hovok kwən, kata.›› 21 Taniy gər kə wətiy Yesu a liɓ pay ngə zlan maza, zəni wayba taniy mə hosiy za a gozlum maza am hayək taniy taviy abəgo.
Hidiy a jariy Yesu
22 Apat tik, hidiy cike mə ɗewiy taa dəwən maza mordoy, slekiy talan, sənta pay ngə zlan maza takan dap a talan maza. Za wəriy gawliy ngə Yesu acin mə pətiy a kimin taniy agandan za viy tan. Yesu wər a pət akimin bəgwən.
23 Amma payiy məpərmay ngə zlan maza yiy aa liɓde Tiberiyas za, hosiy abər lay Yesu mə luwen soko a Bayzlav atalan bretiy hidiy mə hamta. 24 Zəgudu maa limta Yesu avə wəriy gawliy ngetik ɗahiy abəgo ɗaba, taniy pətiy a liɓ payiy ngə zlan maza səna acin, sliɗiy viy aliɓde Kafarnahum kə jariy Yesu abəgo.
Yesu acin bret ngə vəl micin
25 Zəgudiy maa hosiy adəwən maza mordoy za, janiy Yesu abəgo. Ɗiya nehta, luwenta: ‹‹Mordoy na, hoh hosoh awənhi apu?›› 26 Yesu zlawenta, ɗiya luw: ‹‹Mindiwin, kata ceɗehin, hin mə jarak nhi, kadaban hin mə ham bretiy pas angər ɗa dap. Amma hin mə jarak lay hin mə lim təkəniy ma tuwah kat mə ɗiyta kwən. 27 Mə gər kə ɗiy kəzəɗ ngə jan təkən ngə zəm mə njə kə ngav maymay kwən. Geleɓ mə ɗiy kəzəɗ ngə jan təkən ngə zəm maa a ngav ɗahkwən, ngə vəlehin micin mətak way. Təkən ngə zəm səna, Kər hidmemblen acin ngə vəlehin. Bahbay tik Bayzlav acin mə vəlen gədan ngə vəlehin.›› 28 Hidiy səna nehta, luwenta: ‹‹Mordoy yikwan kə ɗiy aceki kə jan yikwan kə ɗiy kəzəɗ Bayzlav mə mayu?›› 29 Yesu zlawenta, ɗiya luw: ‹‹Kəzəɗ Bayzlav mə may hin kə ɗiy tik acin, hin kə vəlen nəv kin a hid sin mə zlənaha.›› 30 Hidiy səna nehta, luwenta: ‹‹A ɗiy təkən maa tuwah am həriy ngiykwan, yikwan kə limtik, za yikwan kə vəloh nəv ngiykwan. Hov kə ɗiy yikwan təkən ngemi? 31 Aməcek, mandal didiy ngiykwan mə ɗewiy tə dab donu, tu zəmiy təkən ta njə kə luwta mahnu, mana mə ɗeɗefta am deftere ngə Bayzlav, a luwta: ‹Bayzlav tu vəlenta təkən ngə zəm mə yah taa dibizlav za.››› 32 Yesu zlawenta, ɗiya luw: ‹‹Mindiwin kata luwehin, Musa wər, a vəlehin zəm mə yah taa dibizlav za ɓahbəgwən. Amma Vay Bayzlav acin mə njə kə vəlehin zəm maa cekcek mə yah taa dibizlav za. 33 Kat tə luw asəna, kadaban zəm Bayzlav ta njə kə vəlen a hidiy səna, sin acin mə surohoh aa dibizlav za. Za a njə kə vəl micin a hidiy təm talan mahayək.›› 34 Taniy maa zlimta atəgo za, ɗiya luwenta a Yesu acin: ‹‹Məmar hidi, a vəl yikwan zəm səna hoyhoy!›› 35 Yesu zlawenta, ɗiya luw: ‹‹Kata acin bret mə njə kə vəl micin. Ko hid ngayi mə yah angər ɗa, mitis a wəzlen kwən. Za ko hid ngayi mə vəlak nəv ngetik, yəm a wəzlen kwən ko apu. 36 ‹‹Kat mə luwehin wayza, hin mə lim kəzəɗ ɗa za, amma hin mə vəlak nəv kin kwən. 37 Ko hid ngayi, Vay Bayzlav mə vəlakku, av kə yah angər ɗa. Za ko hid ngayi mə yah angər ɗa, tə gam kaɗ a caɗak kwən. 38 Kat tə luw asəna, kadaban kat tə surohoh aa dibizlav za nhi kə ɗiy may ngaɗ kwən. Kat tə yah kə ɗiy təkən hid mə zlənakku mə may ɗər. 39 Təkən hid mə zlənakku mə mayu anhi: ‹‹Hidiy cike sin mə vəlakta, kat kə lek ko takan kaɗ kwən, amma kat kə mbəlta kaɗ aa mə məc za am pic talan mahayək tu kə way. 40 Təkən Vay Bayzlav mə mayu anhi: ‹Ko hid ngayi mə lim kərti tik, za mə vəlen nəv ngetik, av kə jan micin mətak way, za am pic talan mahayək tu kə way, sin av kə mbəlah kaɗ aa mə məc za.››
41 Yahudiy ɗiya jəgwaniy ma atalan Yesu, makavay sin mə luw: ‹‹Kat wər, kata acin zəm mə surohoh taa dibizlav za.›› 42 Ɗiya luwta: ‹‹Sin Yesu kwən vu, kər ngə Yusufu kwa! Yikwan maa sən bahbay tik avə mahmay tik wayza. Za tanjinhi sin kə luw: ‹Kat tə sərohoh aa dibizlav za wər a diw aceki?››› 43 Yesu zlawenta, ɗiya luw: ‹‹Mə geɗ kə jəgwan ma am walan kin kaɗ. 44 Mə zlimu, hid kwəl kə yah angər ɗa kwən. Say Vay Bayzlav mə zlənakku tu ngazlah hid səna angər ɗa. Ko hid ngayi mə yah tə ngər ɗa, təv kə mbəlah kaɗ aa mə məc za am mandal talan mahayək tu kə way. 45 Aməcek mokotufiy ngə Bayzlav tu ɗəɗefta am deftere. Taniy a luwta: ‹Bayzlav av kə jəgwanen təkən a hidiy cike wayza.› Hidiy cike mə zlimiy ma ngə Vay Bayzlav, za mə səbiy jəgwan ngetik, av kə yiy angər ɗa. 46 Kat mə luw atəgo səna, tə luw hid mə lim Vay Bayzlav za ɗahkwən, say hid mə yah ta angər tik za, sin agendik palpal acin mə lim tik.
47 ‹‹Mindiwin, kata ceɗehin, mana hid tu vəlak nəv ngetik, hid səna tu jan micin mətak way. 48 Kat wər, kata acin bret ngə vəl micin a hidigi. 49 Didiy kin tu zəmiy təkən ngə zəm ta njə kə luwta mahnu, Bayzlav mə vəlenta a dab donu, za ko asəna taniy tu məcigi. 50 Amma təkən ngə zəm mə surohoh taa dibizlav za wər, hid mə zəm tik, a məc kwən. 51 Kat wər, kata acin bret mə surohoh taa dibizlav za mə njə kə vəl micin. Mana hid tu zəm tik, sin av kə ɗew a micin ko apu. Bret kat tu kə vəl tik səna acin, kəsəm ngaɗa. Kat təv kə vəl tik kə jan hidiy təm talan mahayək kə janiy micin.››
52 Yahudiy maa zlimta atəgo za, diw kə ngiway am walan tan. Ɗiya luwta: ‹‹Sin kə vəl yikwan kəsəm ngetik yikwan kə zəm tik səna aceki?›› 53 Yesu luwenta: ‹‹Mindiwin kata ceɗehin, mana hin mə ham kəsəm ngə Kər hidmemblen ɓahbəgwən, za hin mə sa ɓiɓiz ngetik ɓahbəgwən, hin mə jan dihir micin kwən. 54 Hid mə zəm kəsəm ngaɗa, za mə sa ɓiɓiz ngaɗa, tu jan micin mətak way. Za təv kə mbəlah kaɗ aa mə məc za, am mandal talan mahayək tu kə way. 55 Kadaban kəsəm ngaɗa acin təkən ngə zəm maa mindiwin, za ɓiɓiz ngaɗa acin təkən ngə sa maa mindiwin. 56 Hid mə zəm kəsəm ngaɗa, za mə sa ɓiɓiz ngaɗa, av kə lap avə kata, za kata wana avə sin witikwitik. 57 Vay Bayzlav mə zlənakku, awana micin, za kat bah tə ɗew a micin mbelmbel sin. Za asəna təm, hid mə zəm kəsəm ngaɗa, av kə ɗew a micin mbelmbel kata. 58 Anhi bret mə surohoh taa dibizlav za. Sin par gendik avə təkən ngə zəm didiy kin mə zəmta aməcek adab donu səna. Taniy wər mə zəmta za, za tu məcigi. Amma hid məv kə ham bret nhi, av kə ɗew a micin ko apu.››
59 Yesu a ceɗ zləgam səna a hidiy mandal sin a ɗiyenta jəgwan am jik jəgwan ngə Yahudiy tə liɓde Kafarnahum.
Wəriy gawliy sənan geɗiy kə səbiy Yesu kaɗ
60 Wəriy gawliy ngə Yesu dolom maa zlimta atəgo za, ɗiya luwta: ‹‹Kay zləgam səna toytoy. Hid ngayi ngə ɓəs kə yəktik yi?›› 61 Yesu mə sən za, wəriy gawliy ngetik a jəgwaniy ma atalan zləgam səna. Sin ɗiya luwenta acin: ‹‹Zləgam səna tu nusehin nəv vu? 62 Ya mana hin tu lim Kər hidmemblen aa taptik am lay sin mə yah taa bəgo za wər, hin məv kə luw aceki? 63 Mbiɗ ngə Bayzlav acin taa vəl micin. Hid memblen wər ɓəs kə ɗiy ko təkən ngemi kwən. Zləgamiy kat mə ceɗehin səna, a yiy aangər mbiɗ ngə Bayzlav, za av kə vəlehin micin. 64 Amma hidiy məpərmay a dab kin a yəkiy zləgam səna ɓahbəgwən.›› Yesu a luw atəgo səna, kadaban dəga amicek za, sin aa sən hidiy maa a vəliy nəv ngatan a sin kwən wayza, za aa sən hid məv kə vəl tik kə jan hidiy kə kawta wayza təm. 65 Sin ɗiya luwenta baha: ‹‹Kat tə luwehin: ‹Hid məv kə hosoh angər ɗa ɗahkwən, say Vay tu ngazlah tik, kat tə luwehin makavay səna.›››
66 Dəga am mandal səna, wəriy gawliy ngə Yesu dolom jəɓiytan aadəwən, za aa may kə səbiy Yesu ɗaba. 67 Yesu maa lim atəgo za, ɗiya neh wəriy gawliy ngetik ma gəɓ atalan saray, luwenta: Hin təm, maa may kəv kin vu?›› 68 Simon Piyer zlawenni, ɗiya luw: ‹‹Məmar hidi, yikwan kəv acin angər hidngayi? Hoh wər hoh njə kə ceɗ yikwan ləbar ngə vəl micin mətak way. 69 Yikwan wər, yikwan mə vəloh nəv ngiykwan za, za yikwan mə sən za, hoh acin hid njə ɗew maa kweɗek kweɗek Bayzlav mə zlənaha.›› 70 Yesu zlawenta, ɗiya luw: ‹‹Kata acin mə welehin gəɓ atalan saray tik kwən vu? Amma hid takan adab kin, sin bay musuruf.›› 71 Yesu a luw atəgo səna atalan Yahuda, kər ngə Simon Iskariyot. Yahuda səna sin hid takan tə dab wəriy gawliy ngə Yesu ma gəɓ atalan saray, za sin acin məv kə vəl Yesu kə jan hidiy kə kawta.