Yesu mbəl hid mə mgbərəw mgbərəw
5
Adəwən səna, Yahudiy ɗiyiy məmbəlwa ngatan. Yesu sliɗ va a liɓde Ursalima təm. 2 A liɓde Ursalima səna, torok ngə pan awan abəgo, mbeh mbeh avə bərmidigiɗ ta njə kə luwta bərmidigiɗ ngə təmakigi, zlim ngə torok səna avə ma Ibraninko Baytijata. Za liyliy gazamiy joɓən mgbaw torok səna. 3 Hidiy dolom mə dal daliy ɗaw kə waniy a madaba gazamiy səna. Hulufigi, vəderigi ɓəw hidiy mə mgbərəw mgbərəwigi. [ 4 Taniy ɗaw kə waniy abəgo, kadaban pic məpərmay mbaslay ngə Bayzlav a njə kə sərohoh aa dibizlav za aliɓ yəm səna, kə kəz tik. Mana yəm səna tu kəz wər, mə daldal mə pət məpəlpəla a liɓ yəm səna a njə kə mbəl am dal ngetik. Ko sin a dal aa məc madaba ceki.]5 Adab hidiy mə daldaliy səna acin, hid məpərmay dal ngetik tu hos di ngər makaɗ a talan cəfacəfaɗ. 6 Yesu lim gawal səna mə wana kaɗ, mə sən za tu ɗiy di ndas sin aa dal. Sin neh gawal səna ɗiya luwenni: ‹‹Hoh may hid kə mbəloh kaɗ vu?›› 7 Gawal səna zlawenni, ɗiya luw: ‹‹Aw Mordoy, kata mayu, amma hid ngə mənak kə fəkak am yəm mandal aa kəz ɗahkwən! Tə njə kə jəway kə pət, amma hid məpərmay a njə kə pət məpəlpəla kə kata.›› 8 Yesu luwenni acin: ‹‹A sliɗ za, a paɗ waypah koh, av koh!›› 9 Sin maa luwen atəgo za, wayba gawal səna tu mbəl. Sin a waypah tik wət, za nap va avə gar.
Amma Yesu a mbəl gawal səna am pic nəp ngə Yahudigi. 10 Zəni mogroy ngə Yahudiy luwenta a gawal Yesu mə mbəl səna: ‹‹Apinhi pic ngə nəp, mə taka kaɗ hoh kə ɓiy waypah koh.›› 11 Gawal səna zlawenta, ɗiya luw: ‹‹Hid mə mbəlakku acin mə luwakku: ‹A wət waypah koh, ma va avə gar!››› 12 Taniy nehta, luwenta: ‹‹Mə luwoh: ‹A wət waypah koh, za ma va avə gar səna hid ngayi?››› 13 Amma gawal səna a sən hid mə mbəl tik bəgwən, kadaban njoɗ Yesu vətik aa bəgo za lay hidiy mə ɓasiy dolom təbəgo .
14 Gwedek Yesu gbamiy avə gawal səna bah am jik Bayzlav. Maa lim za, luwenni: ‹‹Tanjinhi hoh tu mbəl am dal koh. Amma kata luwoh, hoh gər kə ɗiy mə ngavngav ɗaba, asənkwən təkən məpərmay kwəl kə ɗiyoh day kə nhi.›› 15 Adəwən səna, gawal səna va ceɗen a mogroy ngə Yahudigi, luwenta: ‹‹Yesu acin mə mbəlakku.›› 16 Lay Yesu mə mbəl hid am pic nəp səna, Yahudiy ɗiya gbezlerentəma acin. 17 Amma Yesu zlawenta, ɗiya luw: ‹‹Vay Bayzlav a njə kə ɗiy kəzəɗ hoyhoy, za kat təm kat ɗaw kə ɗiy kəzəɗ.›› 18 Lay Yesu mə luw atəgo, mogroy ngə Yahudiy jariy mozlokotuf maa day ngə wəzlta kaɗ. Taniy a jar kə wəzlta səna makavay sin mə mbəl hid am pic nəp dap kwən, a jar kə wəzlta kadaban sin mə luw Bayzlav acin Bahbay tik. Mana kə luw kaɗ, sin a sla talan tik a Bayzlav.
Bayzlav vəl gədan ngetik a kərti tik
19 Yesu ɗiya luwen a hidiy mə gər kə wəzlta kaɗ səna baha: ‹‹Mindiwin, kata ceɗehin, kər ngə Bayzlav a hos gəga kə ɗiy təkən avə talan tik kwən, səna təkən sin mə lim Bahbay tik ta njə kə ɗiytik. Təkəniy Bahbay tik ta njə kə ɗiy tik, kərti tik a njə kə ɗiy tik kpekpe. 20 Vay Bayzlav aa may kərti tik, kadaban səna sin ɗaw kə ɗefen təkəniy cike sin ta njə kə ɗiy tik. Za av kə ɗefen kəzəɗiy məpərmayiy bah maa day kə nhi. Za mana hin tu lim kəzəɗiy səna, talan kin av kə wələk. 21 Mana Vay Bayzlav ta njə kə mbəlah hidiy aa mə məc za, kə vəlenta micin, kərti tik təm, ɗaw kə vəlen micin a hidiy sin mə may kə vəlenta. 22 Za baha, Vay Bayzlav sin aa talan tik a zlen dalgway ko a hid ngayi kwən, sin a vəl gədan ngə zla dalgway cike wayza angər kərti tik. 23 Asəna acin, hidiy cike wayza av kə vəlenta mordoy a kərti tik səna, wa taniy ta njə kə vəlenta a Bahbay tik talan tik. Bahbay acin mə zlən kərti tik, mana hid a vəlen mordoy a kərti ɓahbəgwən, hid səna a vəlen mordoy a Bahbay tik kwən təm.
24 ‹‹Mindiwin kata luwehin, mana hid tu zlim ma ngaɗa, za tu vəlen nəv a Bayzlav mə zlənakku, hid səna tu jan micin mətak way. Bayzlav təm a zlen dalgway kwən. Sin tu ton aa talan məc za, za tu jan micin. 25 Mindiwin kata luwehin, pic məpərmay av kə hosohoh, hidiy mə məc məc av kə zlimiy wəla ngə kər ngə Bayzlav. Za hidiy tu kə zlimta, av kə ɗewiy a micin. Tanjinhi pic sən mə hosoh za. 26 Vay Bayzlav acin mə njə kə vəl micin. Wa səna, sin vəlen gədan a kərti tik kə jan sin kə vəlen micin a hidiy təm. 27 Vay Bayzlav vəlen gədan a kərti tik kə zla dalgway ngə hidigi, kadaban sin Kər hidmemblen. 28 Ləbar kat mə ceɗehin səna, mə gər kə pəraslehin talan kwən, kadaban pic səna av kə hosoho, hidiy mə məc məciy cike tə liɓ civi, av kə zlimiy wəla ngə Kər hidmemblen, 29 za kə pətiy aa mə civiy ngatan za. Hidiy mə ɗiyiy malaw, av kə mbəliy aa mə məc za kə janiy micin mətak way. Hidiy mə ɗiyiy mə ngavngav av kə mbəliy aa mə məc za, kə zlenta dalgway.››
30 ‹‹Kata avə talan ɗa, tə hos gəga kə ɗiy təkən ɓahbəgwən. Kat tə njə kə zla dalgway ngə hidiy mana Vay mə luwakku. Tə njə kə zlətik tiɗtiɗe, kadaban tə njə kə jar kə ɗiy təkən kat mə may kwən, amma tə njə kə ɗiy təkən hid mə zlənakku mə mayu.
Zləgam hidiy par par mə zləgamta atalan Yesu
31 Yesu ɗiya luw baha: ‹‹Mana kata acin mə zləgam atalan ɗa gana, zləgam səna a mbaɗ kə mindiwin kwən. 32 Amma hid məpərmay ɗaha, məsəber ngaɗa, za kat mə sən za zləgam sin taa zləgam atalan ɗa, mindiwin. 33 Mə safu, hin zlən mə zlənzləniy angər Yuhana mə njə kə juroɓ Baptisma, za sin tu ceɗenta mindiwin atalan ɗa. 34 Kata, kata may hidiy kə zləgamenta a hidiy məpərmay atalan ɗa kwən. Amma kat tə slekehin talan am zləgam ngə Yuhana kə jan hin kə yək zləgam səna, za Bayzlav kə mbəlehin. 35 Yuhana səna tu ɗew a dab kin wa cəbelbel mə mbəl mbəl, mə njə kə zləzlaɗ lay. Za hin tu zəzay ngə wan gwedek avə zləzlaɗ ngetik səna.
36 ‹‹Amma kata, kəzəɗ kat ta njə kə ɗiy tik aa ɗef tik mindiwin Vay Bayzlav acin mə zlənakku, day kə zləgam Yuhana mə zləgam atalan ɗa. Təkən kat taa ɗiy tik, kat tə ɗiy təkən Vay Bayzlav mə luwak kə ɗiy tik. 37 Za Vay Bayzlav aa talan tik mə zlənakku, mə zləgamah za atalan ɗa. Amma hin, mə zlim wəla ngetik ɓahbəgwən, za hin mə lim həriya ngetik ɓahbəgwən təm. 38 Za hin mə yək zləgam ngetik ɓahbəgwən, kadaban hin mə vəlen nəv a hid sin mə zlənah bəgwən.
39 ‹‹Hin mə njə kə kwəsal deftere ngə Bayzlav, za hin mə ɓən zləgamiy təm deftere səna av kə vəlehin micin mətak way. Za deftere ngə Bayzlav səna a zləgam atalan ɗa. 40 Amma, hin maa may kə yah angər ɗa, za kat kə vəlehin micin mətak way kwən.
41 ‹‹Kat tə gər hidiy kə vəlakta mordoy kwən. 42 Amma kata sən nəv ngəkin wayza. Kat mə sən za, hin maa may Bayzlav kwən. 43 Kat tə yah nhi, Vay Bayzlav acin mə zlənakku, za hin mə yəkak bəgwən. Amma mana hid məpərmay tu yah ngə talan tik gendik, mə njə kə yək tik ngər səsaray. 44 Ngəkin, mə njə kə may kə vəl mordoy am walan kin, amma hin maa may kə ɗiy təkəniy malaw Bayzlav mə mayu, za sin a gendik palpal kə vəlehin mordoy kwən. Za acin məv kə vəl nəv kin a Bayzlav aceki? 45 Mə gər kə ɓən kat təv kə cehin wəla am dalgway akibik Vay Bayzlav kwən. Mə jaw jaw ngə Musa hin taa bəbəc atalan tik səna acin məv kə cehin wəla am dalgway. 46 Kat tə luw anhi, kadaban mana hin tu yək zləgam təm mə jaw jaw ngə Musa, asəna wər hin mə yək zləgam ngaɗ təm, kadaban zləgam Musa mə ɗəɗef təm deftere a zləgam atalan ɗa. 47 Amma mana hin mə yək zləgam ngə Musa mə ɗəɗef təm deftere bəgwən, ya hin kwəl kə yək zləgam ngaɗa acin vu?››